Api, 10
2014
Ataza kudeaketa, elkarlana, Internet, kontzeptuak, Sakelako Telefonoak, Sare sozialak eta Microblogging, Sareak

IFTTT eta amarauna erabiltzailearen morroi

IFTTT-for-iPhone-Intro-Screen-01Internet zerbitzuz josita dago, baina gutxi dira haien artean komunikatzen direnak. IFTTT bi web aplikazio elkarrekin konektatzeko balio duen tresna da. Interneteko gune soil bat da, baina denbora erruz aurrezten lagun dezake askotan egin beharreko gauzak automatiko eginez. Esaldi bakar bat nahikoa da sareko zerbitzuak zelatatu ditzan, eta ezer bada, haiek elkar eragiten jartzeko. IFTTT oharkabean harrapatzerik ez dago, eta beti betetzen du esana. Nahi beste zerbitzu kudeatzen ditu.

Aurrez zehazten diren baldintzak edo abiarazleak gertatzen direnean, hartu beharreko ekintzak zehaztuta uztean datza. If This Then That, edo hau jasotzen bada (abiarazlea), egin beste hau (ekintza).

Esaldi edo arau horiek errezeta izena jasotzen dute. Abiarazle bat norbait Twitterren etiketatzea izan daiteke, eta ekintza Facebookeko horma eguneratzea. Batzuetan abiarazleen barruan balio batzuk erabili beharko dira, eta horiei osagai deitzen zaie. Adibidez, ordu zehatz batean euria egingo duen mezu bidez abisatzeko eska dakioke. Edo gustuko blogean argitaratzen den azken sarrera automatikoki txio bidez lagunekin partekatu. Bakoitzak bere errezetak sor ditzake, edo besteenak erabili. Kanal bidez antolatzen dira guztiak, eragiten dituzten zerbitzuen arabera, alegia. Facebook, Blogger, Twitter, sakelako kontaktuak, posta elektronikoa… kanal bakoitzak bere abiarazle eta ondorengo ekintzak jasotzen ditu. Errezetaren osagaiak pertsonalizatu, eta kito. Baldintza betetzen denean hodeiak norbere ordez egingo du.

Aurrez zehazten diren baldintzak betetzen ditu IFTTT-k.

Aurrez zehazten diren baldintzak betetzen ditu IFTTT-k.

85 kate dira denera, eta aldian binaka lotzen diren arren, kateak osa daitezke batak bestea eragitea lortuz. Errezetak desgaitu egin daitezke une oro, eta beharra ikusten denean, berriz ere abiarazi. Zehatza eta metodikoa da IFTTT, eta errezetek 15 minututik behin egiaztatzen dituzte haien egitekoetan aldaketarik jaso den.

Webgunea erabil daiteke https://ifttt.com/ lekuan, edo sakelakoetarako aplikazio gisa deskargatu. Eskaintzen dituen aukerak izugarriak dira, eta muga bakarra bakoitzaren irudimenak ezartzen du.

Geokokapena baliatzen du

Azken eguneraketan sartu duten funtzio berriak ere molde guztiak apurtu ditu. Orain, iPhone edo Android sakelakoetako geokokapena balia daiteke errezetak sortzeko. Honela, etxera iritsi aurretik etxeko argiak pizteko edo jatetxe on baten aurretik pasatzean mezu bat jasotzeko programatu daiteke honezkero. Are gehiago, lanerako bidean egunero egiten diren denborak neurtu eta Google Drive zerbitzuko kalkulu horri batean gordetzeko, edo aireportu zehatz batera iristean norbaiti abisua bidaltzeko balia daiteke aurrerantzean.

iOS plataforman, GPS, telefono sarea, wifia edo bluetooth seinaletik eratzen da une oro posizioa. Nahiko berme da hori norbere kokapena beti zuzen neurtuko dela jakiteko, eta, haatik, IFTTT zehaztasunez ibiliko dela.

Api, 03
2014
kontzeptuak, Telebista

Bereizmen handiaren amarruak

retinapixelIrudi digital bat handitzean edo zoom egitean ikusten diren karratu txikiei deitzen zaie pixel. Pantaila bat pixelez osaturiko matrize edo taula bat bezalakoa da. Gelaxka edo pixel bakoitzak kolore bat eta dagokion sakontasuna edo iluntasuna erakusten ditu.

Irudia puntu horiek argitzean osatzen da. Mugimendua, berriz, ondoz ondoko pixel horien balioak aldatzean. Pixel gehiago dituen pantailak bereizmen hobeko irudia emango du, bertan unitate txiki horiek bereiztea zailagoa delako, besteak beste. Orduan, halabeharrez, bereizmena luzerako unitate bakoitzean sartzen den pixel kopuruaz adierazten da. Hazbeteko pixeletan adierazi ohi da (dots per inch edo dpi), baina zentimetroko puntutan ere adierazten hasi dira, zorionez.

Hala ere, egun, irizpide nagusia pixel horizontalen eta, batez ere, bertikalen kopuruak markatzen dutena da. Komertzialki, bereizmena soilik pixel kopuruaz zehazten da egun, neurria aintzat hartu gabe. Eta, adierazteko, lerro bertikalak lehenesten dira, eta, atzetik, bideo teknikaren hizkia eransten: adibidez, 1080p.

 

Honela, pantaila zabaletara edo 16:9 erlazioan dagoela 1920×1080 pixel dituela adierazten bada, 1920 lerroko bereizmen horizontala eta 1080 lerroko bereizmen bertikala dituela esan nahi da. Guztira, 2.073.600 pixel (2 Megapixel). Adierazteko garaian lerro bertikalak lehenesten direnez, 1080p izena jasotzen du. 1080i bezala ere ager daiteke, baina honetan irudia osatzeko erabiltzen den oinarria desberdina da, eta haatik, bereizmena makalagoa.

Irudi maiztasuna

Edonola ere, honezkero garbi dago pixelen tamaina pantailaren neurriak ezartzen duela. Eta, horregatik, neurri handiko pantailetan bakarrik nabaritzen dela esaten da bereizmen handia edo Full HD erabilera.

Mugimendua edo bideoari buruz hitz egitean, ordea, nabarmena da pixel kopuruaz gain bestelako aldagaiek duten eragina. Marrazki bizidunetan garbi asko ikusten den bezala, bideoa ez da elkarren segidako irudi sekuentzia bat baino. Begiak epe motzean jasotzen dituen irudi segidak mugimendu gisa nabaritzen ditu giza garunak. Teknologiak gabezia hori baliatzen du irudi animatuak edo bideoak egikaritzeko. Beraz, amarru hori gertatzeko bota beharreko irudi kopurua da gakoa.

Sekuentziako ale bakoitzari frame edo fotograma deitzen zaio. Segundoko epean neurtzen dira, eta bideo sistemaren arabera handiagoa edo txikiagoa da kopuru hori. Azken batean, maiztasuna da, eta hertzetan ere (Hz) adierazten da maiz. Hiru dira zinema eta telebistarako estandarrak: 24p, 25p eta 30p. Maiztasun horietatik aurrerakorik bada, baina osatu gabeko sasi irudiz beteta eratzen da sekuentzia.

The Hobbit filma mugarria izan da horretan, amarrurik gabe 48 fotograma segundoko abiaduran filmatu eta eman baita doitutako aretoetan.

1080p edo 1080i? 1080i edo 720p? Zein da hobea?

InterlacedVsProgressiveIrudia osatzen den erak alde ederra egiten du kalitatean. Mailakatua edo interlaced scan (i) eta progresiboa edo progressive scan (p) dira aukerak. Eta, hain zuzen ere, horretan datza bereizmen handiko pantailen eta gainontzekoen arteko aldea.

Progresiboan, fotograma bakoitza leun proiektatzen da lerro guztiak baliatuz. Gaur-gaurkoz, 60 hertzera eguneratu dezake bideoa. Teknologikoki, lortzeko zailagoa da, eta benetako bereizmen handitzat hartzen da. Egun, puntakoak 1080p Full HD eta 2160p 4K edo Ultra HD dira.

Mailakatua denean, ostera, irudia osatzen duten pixel lerroen erdiak proiektatzen dira aldi bakoitzeko. Hau da, lerro bakoitiak hutsuneekin gurutzatzen dira, eta ondorengo fotograman lerro bikoitiak agertzen dira, eta besteak itzaltzen. Ondoz ondo txandakatzen diren irudiek elkar osatzen amaitzen dute. Ipar Euskal Herrian SECAM eta Hego Euskal Herrian PAL, batak zein besteak 50 hertz mailakaturik erakusten dute egun bideoa. Horrela, osorik 25 fotograma segundoko erakusten dira. Bestela esanda, progresiboan 25 fps izatea beste.

1080p bereizmenean, eskura dauden pixel guztiak aldi berean baliatzen diren artean, 1080i denean, erdiak dira. Arrazoi horregatik dira parekide 720p eta 1080i, pixel kopuruari dagokionez; beste hainbeste 2160i eta 1080p.

Esanak esan, 1080p da Full HD eta 1080i/720p HD Ready. Baina, benetan, Full HD eta HD Ready ez dira inolako bereizmenaren berme; hitzarmen komertzial bat dira. Eta, hortik, iragarki batzuek sortzen duten nahasmena.

Oro har, progresiboa hobea da abiadura handiko sekuentziadun bideoetarako. Bestela, 42 hazbeteko pantailetatik aurrera baino ez dago igartzerik bideo mailakatuetan dardara txiki bat edo olatua bezalako efektua.

Eka, 13
2013
Hardware, kontzeptuak, Segurtasuna

Giza gorputza, giltza

handing-the-keyErabiltzaile-pasahitz bidez benetakotzat egiaztatzeko modua ahula da, eta, horregatik, aspalditik dator hori ordezkatuko duen zerbaiten bila aritzea. Esaterako, Google hasi da bi pausoko modu bat sustatzen: ezarpen horretaz baliatzen denak, behin saioa hasita, sakelakoan jasotako mezuaren kodea behar du postan sartzeko. Pasahitza lapurtuta ere, hortaz, zelatariak gure sakelakoa beharko luke sartzeko.

Identifikatzeko sistema sendoagoak erabiltzen hasiak dira hainbat erakunde eta enpresatan. Esaterako, hor daude txartel kriptografikoak edo token-ak, segundo batzuren ondoren iraungitzen den ausazko pasahitza sortzen dutenak. Hala ere, badira beste batzuk norbanakoen ezaugarri propioetan oinarritzen direnak hura benetakoa dela egiaztatzeko, pertsonen arteko desberdintasuna irizpide daukatenak, alegia.

Desberdinak izatea, bereizgarri

Identifikatze biometrikoan, pertsona baten benetakotasuna zuzen idetifikatu dela bermatzeko, haren ezaugarri fisikoak edota jokabideak egiaztatzen dira, teknika matematiko eta estatistikoak erabilita. Egote hutsarekin, jokabidea aztertzearekin edo kontaktu fisikoarekin aski duten sistemak dira, sarbidea eman edo ukatzeko. Batetik, teknologia biometriko fisiologikoak daude: hatz aztarnak, aurpegi morfologia, irisa, erretina edo eskuko geometria aztertzen dituztenak. Eta bestetik, portaeraren araberako analisi biometrikoak daude: sinadura, ahotsa, tekleatzeko edo ibiltzeko era irizpide dituztenak.

Seguruagoak izan arren, arazoa haien kostu altua da. Nolanahi ere, benetakotzat egiaztatzeko sistemari, oro har, eta identifikatze biometrikoari, bereziki,beste buelta bat eman zaio Bodycom izeneko teknologiarekin.

Bodycom: sinplea eta, aldi berean, iraultzailea

Segurtasuna bermatzeko bi noranzkoko identifikatze sistema erabiltzen denean (subjektua nahiz gailua iruzurra ez izateko bermea), informazio truke segurua ziurtatzeko kanalak ezartzea izaten da erronka. Neurri horiek guztiak sobera daude, aire edo kable bidezko transmisioa ordezkatzen bada bakoitzaren gorputzarekin. Hori posible egiten duen teknologia da Microchip enpresaren lorpena, eta garestiak diren hainbat osagai elektroniko aurreztea da abantaila.

Hau da, Bodycom distantzia motzeko sistema da, eta bi puntu komunikatzeko giza gorputza erabiltzen da kable gisa, eroankortasuna baliatuta. Seinale ahul bat (125 kilohertz) bidaltzen duen gailu eramangarri bat eta hori jaso zain dagoen basearen arteko zirkuitua ixten da norbere kontaktuarekin. Teknologiaren begi-bistako aktiboak dira, prezio murritza (4 edo 5 euro bitartean gailuko), energiaren erabilpen eraginkorragoa eta sinpletasuna.

Etorkizunera begira, beste hainbat aukera eskaintzen dituen identifikatzeko sistemaren sorrera dirudi, eta lehengoak hobetzen dituena funtzionamendu eta azkartasun aldetik. Dagoeneko askoren ahotan dabil arma adimentsuak sortzeko aukera; ukitze hutsarekin aktibatuko liratekeenak erabiltzailea identifikatuz gero. Egunerokoan berehalako eragina luketen erabilerak aipatze aldera, giltzik gabeko ateak, kaskoa jarrita soilik arrankatzen diren motoak, edo IKT bidezko urrutiko jarraipena legoke (bideo joko aurrean egindako ordu kopurua, ariketa fisikoaren neurketak, azterketak distantziara egitea, eta abar).

1 2 3 4 5 … 11