Iruzkinak (0)

Url edo Internet helbide laburtzaileak oso ezagunak dira batez ere microblogging munduan. Izan ere, Twitter eta microblogging bezalako baliabideetan, sarrera bakoitzean idatzi ahal diren karaktere kopurua mugatuta dago. Twitterren kasuan 140 idatzi ahal dira. Hala, bada, webgune edo orrialde baten lotura jarri nahi bada, helbidea luzea izanez gero, zerbait gehiago esateko oso leku gutxi geldituko da. Url laburtzaile asko daude, batzuk oso ezagunak dira Tinyurl http://tinyurl.com edo Bit.ly http://bit.ly/, adibidez. Euskaraz ere badago bat, Ttiki http://ttiki.com/.

Hala ere, Trii.us laburtzailearen berezitasuna da webgunean izena emanez gero, urlak laburtzeko erabiltzaileak sartutako loturen ikustaldien estatistikak eskaintzen dituela .

Webgunea: http://trii.us/

Iruzkinak (0)

Googleren Google Places izeneko webgunean baliabide ezberdinak eskaintzen dira negozioen jabeek bere negozioak Interneten sustatu ahal izateko. Hasteko negozioa sortu behar da webgunean eta gero Google Maps-en kokatu daiteke eta nola agertuko den konfiguratu daiteke. Hala, bada, negozioaren telefonoa, webgunea edo posta elektronikoa jar daiteke, nola ez, baina gainera beste ezaugarri batzuk ere zehaztu daitezke, ordutegia edo onartzen diren txartel motak, esaterako. Gainera, produktuen argazki batzuk erakutsi ahal dira.

Haratago joaten da proiektu hau eta deskontu-bonoak ere sor daitezke Google Places edo Google Maps-en bitartez negozioa aurkitu duten erabiltzaileentzat.

Estatistikak ere eskaintzen ditu, bisitariek negozioa nola aurkitu duten jakiteko edo zein bilaketa egin duten negoziora heltzeko.

Hau da webgunea: http://www.google.com/places

Iruzkinak (0)

Web 2.0 delakoarekin, besteak beste, blogak, oso komunikabide baliagarri eta garrantzitsu bihurtu ziren. Hortik aurrera, pixkanaka-pixkanaka Internet erabiltzailea esparrua irabazten joan da amaraunean, eta irakurle hutsa izatetik idazle eta eduki sortzaile aktibo izatera pasatu dela esan daiteke.

Nolabait, Internet, gizartearen isla bat da, gizarte birtuala, edo, gizartearen eremu guztien artean, beste bat besterik ez. Honela, gizartearen kide bakoitzak bere isla du Interneten eta askotan, bilatzaile batean, pertsona anonimo baten izena bilatuta, bere inguruko hainbat informazio aurki daiteke eta amaraunean berak idatzitako gauzak irakurri ahal dira. Nolabait, batzuek, hau guztia intimitate eta pribatutasuna eza bezala uler dezakete eta kezka sor daiteke. Izan ere, arrazoia daukate horrela uste dutenek. Horregatik kontuz ibili behar da Interneten idazten denarekin eta jartzen diren datuekin. Beti pentsatu behar da, datu horiek eta idatzitako gauzak publiko bilakatzen direla eta munduko biztanle askoren eskura daudela, bretxa digitala delakoa era batean edo bestean pairatzen ez dutenen eskura hain zuzen ere. Gogoratu behar da Internetek edozein beste komunikabidek baino askoz audientzia handiago duela, mila milioi erabiltzaile baino gehiago.

Baina, bestetik, Internet oso komunikabide indartsua da eta oso baliabide interesgarriak eskaintzen ditu horretarako, honela, erabiltzaile bakoitzak informazio gehiago eta azkarragoa eduki ahal du. Ohiko komunikabideek eskaintzen ez duten informazioa ere lor daiteke eta beraz, gogoko gaien inguruan gehiago sakondu daiteke. Honetaz gain, norbera ere informazio sortzaile izan daiteke eta bere jakintza parteka dezake.

Sare sozialak

Gizarte birtual hori edo gizartearen eremu hori sortzeko bidean, bere alde txar eta onekin, microblogginga eta sare sozialak daude pil-pilean egun. Ziur aski, erabili ala ez erabili inori ez zaizkio arrotzak suertatuko kontzeptu hauek. Sare sozialen bitartez, kontaktu ezberdinak egiten dira eta norberak bere kontaktuen informazio ezberdina jasotzen du. Informazio hau izan daitezke mezu motzak eta zehatzak informazio konkretuarekin edo bakoitza zer egiten ari den edo momentu batean zer pentsatzen edo sentitzen ari den adierazteko. Bestetik, argazkiak, bideoak, audioak, estekak, artikuluak eta bestelako multimedia elementuak partekatu ahal dira kontaktuekin. Gainera, kontaktuek iradokizunak egin ahal dituzte partekatzen diren elementuetan edo eztabaidak sortu ahal dira. Bakoitzak helburu ezberdinekin erabiltzen ditu sare sozialak: normalean edo aspaldian ikusten ez duen jendearekin harremanari eusteko, maiz ikusten duen jendearekin beste komunikazio baliabidea edukitzeko (telefonoa edo posta elektronikoa bezala), lagun berriak edo harreman sentimentalak lortzeko, bere nortasuna eta izaera Interneten plazaratzeko edo bere arlo profesionala bultzatzeko zein enpresa baten publizitatea egiteko. Nolabait, sare sozialetan eta microbloggingaren bitartez eskaintzen den informazioa bideratuago dago. Izan ere, webgune batean mundu zabalera argitaratzen dira gauzak, baina sare sozial batean, erabiltzaile baten kontaktua denari, nolabait ere, interesatzen zaio erabiltzaile horrek esan dezakeena edo zabaldu ahal duen informazioa.

Sare sozial ezberdinak

Sare sozial batzuk erraldoiak dira eta erabiltzaile kopuru itzela dute, Facebook-ek, esaterako, 400.000.000 erabiltzaile aktibo inguru dauzka. MySpace-k, ordea, 200.000.000 baino gehiago, ez da gutxi. Facebook-en webgunea http://www.facebook.com da eta MySpace-rena http://www.myspace.com/. Sare sozial hauek helburu orokorrekoak dira, alegia, ez daukate helburu edo ikuspuntu zehatz bat. Beste sare sozial batzuek, aldiz, arlo berezi batera bideratuta egon ahal dira. Linkedin http://www.linkedin.com/ edo Xing http://www.xing.com/, adibidez, helburu profesionalei eta negozioak, lankideak eta lan-harremanak orokorrean sortzeari begira sortuta daude. Alegia, norberaren arlo profesionala sustatzeko. Meetic, http://www.meetic.com/, ostera, harreman sentimentalak eta bikoteak lortzeko bideratuago dago.

Interneteko entitate erraldoiak ere saiatu dira sare sozialen munduan sartzen, baina arrakasta handirik gabe, hor daude Google-ren eta Microsoften saiakerak, Orkut http://www.orkut.com/ eta Townsquare (honek azkenean ez du argia ikusi), hurrenez hurren.

Euskarazko sare sozialak

Euskarazko sare sozialak ere badaude, Facebook bera euskaraz dago. Zutagu http://zutagu.net ere sortu da orain dela gutxi ezagutza partekatzeko edo Zugaz http://zugaz.com/, azken hau lagun girora zuzenduago. Bestetik, komunikatzaile euskaldun guztiek ere bere sare soziala dute, Komunikariak izenekoa http://komunikariak.ning.com/ hain zuzen ere.

Microblogginga

Microblogginga, Twitter webgunearekin sortu zela esan daiteke. Baliabide honen gakoa da informazioa ematea mezu motzen bitartez. Horrela, informazioa zehatzagoa eta zuzenagoa izaten da.  Esan bezala, Twitter da ideia honetan oinarritu zen lehenengoetariko webgunea eta gaur egun arlo honetan erabiliena dela esan daiteke. Zerbitzu honetan 140 karaktere gehienez idatzi ahal dira sarrera bakoitzeko. Webgune honek gainera sortzen du gune berezi bat non norberaren sarrerak agertzen diren eta gainera itxura eta estiloa aldatu eta konfigura daiteke. Adibidez: http://twitter.com/berria. Hala, bada, Twitterren bitartez microblogginga praktikatzen hasteko http://www.twitter.com helbidera joatea besterik ez da behar eta hor izena eman. Gainera, erabiltzaile ezberdinak jarraitu ahal dira beren sarrerak irakurtzeko eta era berean norberaren sarreren jarraitzaileak lortu ahal dira. Horrela, informazioa emateko eta zabaltzeko ez ezik informazioa edateko eta jasotzeko ere balio du.

Iruzkinak (0)

OffiSync Microsoft Officerako gehigarri bat da, Microsoft Office eta Google Docs bateratzea ahalbidetzen duena. Alegia, Google Docs dokumentuak, zuzenean ireki daitezke MS Officetik deskargatu behar gabe. Era berean, dokumentuak aldatu eta gorde daitezke Google Docs-en zuzenean. Hau da, MS Officetik zuzenean lan egin daiteke Google Docs-en dauden dokumentuekin.

OffiSync gehigarria instalatutakoan, aukera berri bat agertuko da MS Word, MS Excel eta MS Powerpoint aplikazioetan. Aukera horretatik, Google kontuarekin izena eman ahal da eta hortik aurrera Google Docs-en dauden dokumentuak arakatu ahal izango dira. Bilatzaile bat ere eskaintzen da gehigarri honekin, dokumentuak erraz aurkitzeko. Gainera, Google Docs-eko dokumentuak elkarlanean eratzeko sistema ere erabil daiteke OffiSync-etik.

Plugin honek “.NET Framework 3.5″ behar du ondo ibil dadin.

http://offisync.com/

Iruzkinak (0)

Autodesk Homestyler etxeak hiru dimentsiotan diseinatzeko web aplikazio bat eta AutoCAD sortzaileen proiektu bat da. Web aplikazio honen bitartez, era erraz batean, etxeko solairua eratzen joan daiteke eta gela ezberdinak sortu. Solairu ezberdinak ere sortu ahal dira eta solairu bakoitzeko egitura sortu.

Gero elementu ezberdinak txertatu ahal dira sortutako geletan. Elementu ezberdinak sailkatuta daude menu baten bitartez. Elementuak gehitzeko, elementua arrastatu eta nahi den lekuan askatu baino ez da egin behar. Diseinua bi dimentsiotan egin daiteke eta edozein momentutan 3D moduan ikusi ahal da.

Izena eman ahal da webgunean, bakoitzaren diseinuak gordetzeko eta horrela, nahi den momentuan diseinu horiek ikusi edo aldatu ahal izateko.

Webguneak Adobe Flash teknologia erabiltzen du.

http://www.homestyler.com/

Iruzkinak (0)

Ordenagailuek ulertzen duten hizkuntza bakarra lengoai bitarra da. Horrenbestez, ordenagailuek prozesatzen duten informazio guztia, lengoai honetara itzuli behar da. Halaber, horrela gertatzen da irudiekin eta argazkiekin, esaterako. Eta orduan, gezurra badirudi ere, ordenagailuan ikusten diren paisai eder horiek edo lagunen eta senideen argazkiak, tentsio elektriko bi maila ezberdinen bitartez osatuta daude, alegia, 1 eta 0 multzoak baino ez dira.

Hala, bada, honen erronka da sistema bat erabiltzea, 1 eta 0 soilik erabiliz, argazki edo irudi batean dagoen informazio guztia gordetzeko. Informazio hau,funtsean, puntuak edo pixelak eta puntu edo pixel bakoitzaren kolorea da. Zenbat eta pixel gehiagoren informazioa gorde, bereizmen handiagoa izango du irudiak eta beraz, zehaztasun eta  garbitasuna irabaziko du. Halaber, pixel edo puntu bakoitzeko zehaztu ahal diren koloreak zenbat eta gehiago izan orduan eta zehatzagoak izango dira puntu ezberdinen koloreak eta errealagoak izango dira argazkiak.

Guzti honen ondorioz, formatu eta estandar ezberdinak adostu dira nazioartekoki, argazki eta irudien informazio bitar hori ikusi eta gorde ahal izateko sistema ezberdinetan, sistema eragile ezberdinetan zein gailu ezberdinetan. Alegia, argazki-kamera digital batekin ateratako argazki bat ordenagailu batean ikus daiteke zein sakelako telefono batean. Gainera, ordenagailuan ikusiko da bai MS Windows sistema baldin badu edo GNU/Linux, Mac Os X edo bestelako sistema eragilea edukiz gero. Era berean, sakelako telefono batekin ateratako argazki bat, ordenagailu batean, bideo batean edo beste marka bateko sakelako telefono batean ikusi ahal izango da.

Zer dira Pixelak

Pixelak dira irudi edo argazki bat osatzen duten puntuak. Argazki formatu digitaletan, pixel bakoitzeko, dagokion kolorearen informazioa gordetzen da. Arestian esan den bezala, zenbat eta pixel gehiago eduki, orduan eta bereizmen handiagoa du irudi batek. Alegia, puntu gehiago ditu eta beraz zehatzagoa da. Horregatik, ematen zaio hainbesteko garrantzia argazki-kamera digitalen megapixel kopuruari, esaterako bost Megapixeleko argazki-kamera batek bost bat milioi puntu dituzten argazkiak ateratzen ditu. Beste era batean esanda, 3200 x 2400 bereizmenarekin ateratzen bada argazki bat, argazki hori 7,8 megapixel izango ditu.

Pixelak ikus daitezke argazki batean irudiak ikusteko edo aldatzeko programa batekin zoom bat aplikatuz gero. Zoomaren bitartez handitzen doan heinean, puntu laukiak nabaritzen joaten dira. Puntu lauki horiek pixelak dira.

Irudi formatuak

Irudi formatu asko daude, eta gehienak erabili ahal dira sistema eta gailu ezberdinetan, beste batzuk, ordea, oso ezagunak badira ere, ez dira hain orokorrak eta aplikazio zehatz batekin lotuta daude, “PSD”, Photoshop-en kasuan, esaterako.

BMP formatua

BMP formatua, bit-mapa bat da eta irudi mota hauetako luzapena “.bmp” da. Formatu honek, pixel matrize bat edo taula bat bezala gordetzen du irudien informazioa eta lehen esan den bezala, pixel bakoitzeko, bere kolorearen informazioa gordetzen da. Kolorearen informazioa, kolore-sakonera baten arabera gordetzen da. Honela, 24 biteko sakonera batekin, hamasei milioi kolore ezberdin zehatz daitezke pixel bakoitzeko, hau da , 2²⁴. Zortzi biteko sakonera batekin, ordea, soilik 256 kolore erabili ahal dira, 2⁸.

Formatu honen alde txarra da, orduan, argazkian dagoen pixel bakoitzeko, bere kolorearen informazioa gordetzen dela, horrek esan nahi du, bereizmen handiko irudiak oso-oso pisutsuak izango liratekeela.

GIF formatua

Gif formatua duten irudiek “.gif” luzapena izaten dute. Irudi hauek asko erabiltzen dira Internet munduan, webguneak eta web orrialdeak sortzerakoan, logo, marrazki, botoi edo animazio bezala. Izan ere, irudi hauek gardentasuna baimentzen dute, alegia, irudiaren atzealdea edo beste zati bat gardena izan daiteke eta gainera, irudi multzoak edo frameak erabiliz, animazioak egitea ere ahalbidetzen du formatu honek. Gainera, GIF formatua irudiaren tamaina txikitzeko gauza da, kalitatea galdu gabe. LZW izena du formatu honek erabiltzen duen algoritmoa. Alde txarra da, 8 biteko sakonera erabiltzen duela koloreetarako, 256 kolore, alegia, eta beraz, bideratuago dago marrazkietara edo logoetara, argazkietara baino. Kolore gehiago izanez gero, paletaren koloreak murriztu egin behar dira, eta horrek kalitate-galera bat ekartzen du.

PNG formatua

PNG (Portable Network Graphics) formatua kalitate-galerarik gabeko algoritmo batean oinarrituta dago. Formatu hau ez dago inongo patenterik menpe eta GIF formatuaren gabeziak konpontzeko sortu zen. Hala, bada, PNG formatuaren bidez, kolore sakonera eta gardentasun-maila handiagoa duten irudiak gorde ahal dira eta beraz, GIF formatuaren bidez baino kalitate gehiago edukiko dute. PNG formatuarekin, ordea, ezin da animaziorik egin, GIFekin bezala, horretarako, MNG formatua sortu zen. PNG formatua ere oso egokia da Interneten erabiltzeko. Formatu honetako fitxategiek “.png” luzapena dute.

JPEG formatua

JPEG formatuaren izen osoa Joint Photographic Experts Group da eta “.jpg”, edo “jpeg” batzuetan, da dagokion luzapena. Formatu honen algoritmoa kolore errealeko irudiak konprimitzeko pentsatuta dago, alegia, 24 biteko kolore-sakonera duten irudietarako. Beraz, asko erabiltzen da argazkietarako. Hala ere, JPEG formatuaren konpresioak kalitate galera ekartzen du, zenbat eta gehiago konprimitu, orduan eta txartoago ikusiko da argazkia, gutxiago okupatuko badu ere, printzipioz. Beraz, oreka bat bilatu behar da kalitate eta konpresioaren artean, formatu honen bitartez irudiak gordetzerakoan.

Iruzkinak (0)

Adobe software konpainiak Adobe Creative Suite 5 diseinu eta web garapenerako aplikazio paketea abiarazi du. Pakete honetan Adobe Photoshop, Fireworks, Dreamweaver, Illustrator, Premiere edo Flash bezalako aplikazio ospetsuak daude.

Adobe Creative Suitea oso erabilia da diseinu arloko profesionalen artean eta erabiltzaile ez profesionalen artean ere oso ezaguna da. Eta badela urte bat eta erdi CS4 bertsioa atera zutenetik, beraz, suit honen erabiltzaileak irrikan zeuden jada CS5 berria ikusteko eta erabiltzeko.

Adobe Creative Suitaren webgunea: http://www.adobe.com/products/creativesuite/

Webgunea frantsesez: http://www.adobe.com/fr/products/creativesuite/

Webgunea gasteleraz: http://www.adobe.com/es/products/creativesuite/

Iruzkinak (0)

Dragoman, Mac Os Xrako oso aplikazio erabilgarria da. Fitxategi formatu ezberdinen artean bihurketak egitea ahalbidetzen du.

Hala, bada, formatu grafikoen artean bihurketak egitea posiblea da PDF, JPEG, PNG, TIFF eta GIF formatuak erabili ahal dira. Era berean audio formatuen artean ere bihurketak egin daitezke eta MP3, OGG, VORBIS edo FLAC formatuak onartzen ditu, honetaz gain, musika CD batetik atera ahal dira abestiak, ripeatu deitzen dena, eta mp3 formatuan gorde.

Testu fitxategien arteko bihurketak egin daitezke TXT, HTML, RTF, XML edo Safari Web Archives formatuekin, DOC fitxategi sinpleak ere erabili ahal dira.

Artxibo konprimitu edo paketatuen artean ere aldatu ahal dira formatuak DMG, RAR, StuffIt, ZIP, TAR edo DMG formatuak onartzen dira.

Beraz, Mac Os X erabiltzaileentzako oso aplikazio erabilgarria izan daiteke, gainera, fitxategi batekin edo gehiagorekin lan egitea posiblea da.

Proiektuaren webgunea ikusteko eta deskargatzeko url honetara joan beharko da: http://creativebe.com/dragoman/

Iruzkinak (0)

Android sakelako telefonoetarako sistema eragile bat da eta 2007ko azaroan aurkeztu zenetik, joan da hedatzen eta interesa pizten bai telefono mugikorren fabrikatzaileengan zein erabiltzaileengan. Android software librea da eta bere ardura Open Handset Alliance erakundeak du. Open Handset Alliance Googlek bultzatutako partzuergo bat da eta partzuergo honetan estandar irekiekin konprometituta dauden hainbat entitatek parte hartzen dute, hardware, software zein telekomunikazio arlokoak, batik bat.

Sistema eragilearen ezaugarri nagusiak

Sistema eragileak web nabigatzailea integratuta ekartzen du, WebKit kode irekiko motorrean oinarrituta.

Androidek multimedia formatu arruntak onartzen ditu, audio, bideo zein irudietarako.

Bestetik, sakelako telefonoaren menpe dauden beste hainbat ezaugarri ere eskaintzen ditu, GSM telefonia, Bluetooth, 3G, Wifi, argazki-kamera, GPS, iparrorratza, azelerometroa. Ezaugarri hauek ibili ahal izateko Androidekin, telefonoaren hardwareak ere eskaini behar ditu ezaugarri horiek bere osagai elektronikoen bitartez.

Ukimen-pantailarekin erabiltzeko prestatuta dago. Izan ere, horretarako hainbat baliabide ekartzen ditu, ukimen-teklatua bezala. Pantaila biratzen da telefonoa biratzen denean eta zoom ezberdinekin ikusi eta irakurri ahal dira informazio ezberdinak, mapak edo webguneak zein pdfak edo irudiak, esaterako.

Sistemarekin hainbat aplikazio etortzen dira lehenetsita instalatuta: nabigatzailea, posta elektronikoa irakurtzeko aplikazioa, SMSak irakurtzeko eta idazteko aplikazioa, egutegia, mapak, kontaktuak.

Gainera, badago beste ezaugarri bat oso interesgarri bihurtzen duena Android. Market izeneko aplikazio biltegia da, hain zuzen ere.

Market da aplikazio biltegi itzela. Aplikazio biltegi honetan, ordainpeko zein doako aplikazio pilo bat aurkitu ahal dira eta atal ezberdinetakoak: jokoak, erosketak, komunikazioak, komikiak, kirolak, baliabide orokorrak, multimedia aplikazioak, albisteak eta eguraldia, aisialdia, jakintza eta bilaketa, osasuna, gizartea, produktibitatea, bidaiak, telefonorako gai ezberdinak, gehigarriak. Android Marketek ahalbidetzen du garatzaileek Market-en aplikazioak sartzea, ordainpekoak edo doakoak eta edozein Android mugikorretatik egongo dira eskuragai. Honela, sakelako telefonoaren erabiltzaileak deskargatu eta instalatu ahal du nahi duenean. Gainera, gune ofizialetik deskargatzen ari den bermearekin.

Market erabiltzeko eta Androiden beste ezaugarri batzuk ere erabiltzeko, sistemaren eguneraketak, mapak, posta elektronikoa edo web nabigatzailea, esaterako, beharrezkoa da Internet konexio bat mugikorrean. Wifi izan daiteke, edo noizbehinkako konexioak. Baina ahal bada, hobe da etengabeko Internet konexioa. Jada irisgarriagoak dira sakelako telefonoetarako Internet tarifa lauen prezioak. Etxeko ADSL edo kablearenak baino askoz merkeagoak aurki daitezke.

Aplikazio interesgarri batzuk

Androiderako Market biltegian denetariko aplikazioak daude, batzuk Google zerbitzuekin integratuta, era honetan, mugikorrean zein ordenagailu ezberdinetan egon daitezke datu batzuk, kontaktuak edo agenda, esaterako.

Google Sky Map aplikazioaren bitartez, planetario bat eraman ahal da sakelan. Ordua eta posizionamendurako teknologiak erabiltzen ditu jakiteko zeruaren zein zatia ikusten ari den momentu horretan erabiltzailea, eta mugimendu sentsorearen bitartez ere asmatzen du norantz begiratzen ari den. Era horretan izarrak, konstelazioak edo planetak identifikatu eta izendatzeko gauza da aplikazio hau. Gainera, izenaren arabera bilatu ahal dira elementu ezberdinak eta aplikazioak esango du nora begiratu behar den aurkitzeko.

WeatherBug aplikazioak asmatzen du non dagoen erabiltzailea eta eguraldiaren inguruko informazioa eskaintzen dio. Eskuz ere aukeratu daitezke leku ezberdinak leku horietako eguraldiari buruzko informazioa jasotzeko.

Docs To Go aplikazioaren bitartez, bulegotika dokumentu ezberdinak ikusi ahal dira mugikorretik, hurrengo formatuak onartuta: doc, docx, xls, xlsx, ppt, pptx, pdf.

Gtasks aplikazioarekin atazak kudeatu ahal dira eta bateragarria da GMailen dauden atazekin. Google Talk aplikazioaren bitartez GTalk kontaktuekin hitz egin ahal izango da.

Andando edo Hi-Hiker Pro-ren bitartez gorde ahal dira ibilbideak, jakitea zenbat ibili den edo pasatu diren altuera ezberdinak, GPSa erabiltzen dute. And Explorer fitxategi arakatzaile ezaguna da. Barcode Scanner aplikazioaren bitartez barra-kodeak eta QR kodeak irakurri ahal dira argazki-kamera erabilita. ShopSavvy barra-kodeak irakurtzeaz gain saiatzen da produktu ezberdinak identifikatzen eta produktuen prezio ezberdinak lortzen, horretarako norberaren posizioa ere erabiltzen du. Scan2PDF mobile, argazki-kameraren bitartez pasatu ahal da argazki edo dokumentu bat PDFra. BeamReader erabil daiteke PDFak irakurtzeko. Bubble-ren bitartez nibela instalatuko da telefono mugikorrean eskulanetan laguntzen duena zerbait zuzen dagoen jakiteko edo daukan angelua jakiteko. Dog Whistler aplikazioak txakurrentzako txilibitua eskaintzen du frekuentzia ezberdinekin. Draw-ren bitartez hatzarekin marraztu ahal da telefonoaren pantailan eta Solo Lite-ren bitartez gitarra bat egongo da eskuragarri mugikorrean. Voice Recorder aplikazioarekin, mugikorra ahots-grabagailu bihurtzen da. Goggles aplikazioaren bitartez argazki-kamerarekin ateratako irudiak bilatu ahal dira interneten eta Layar edo Wikitudek, argazki kamera, posizionamendua eta mugimendua erabilita gertu dauden elementuen inguruko informazioa ematen dute, dendak, jatetxeak edo mendiak, esaterako.

Microblogging eta Sare sozialetarako aplikazioak ere badaude, Twitroid Twitter zerbitzurako edo Facebook, esaterako.

Iruzkinak (0)

Microsoftek abiarazi du Mac Os X sistemetarako Messenger bertsio berriaren beta bat eta dagoeneko eskuragarri dago sistema eragile honen erabiltzaileentzat. Bertsio honen berritasunik handiena da audio eta bideoarekin txat egiteko aukera sartu izana.

Hala ere, Microsoftek jakinarazi du oraingoz fitxategi-transferentzia aukera ez dabilela probazko bertsio honetan, beste gabezi batzuen artean.

http://www.microsoft.com/mac/downloads.mspx?pid=Mactopia_Messenger&fid=573C3149-EF09-4729-97BA-5200DD320FFE

Iruzkinak (0)

Shutter GNU/Linux sistemetan pantaila-argazkiak ateratzeko oso aplikazio interesgarria da. Shutter software librea da eta instalatu daiteke Ubuntu edo GNU/Linux sistemetan Synaptic-etik, Ubuntu Software Biltegitik edo edozein pakete kudeatzailetatik, shutter izeneko paketea bilatu eta instalatzeko markatu besterik ez da behar. Aukeratutako area bat, leiho bat edo pantaila osoaren argazkia ateratzea baimentzen du. Ondoren argazki pantaila hau editatu daiteke gainean marrazteko, elementu ezberdinak azpimarratzeko edo bertan idazteko edo argibideak jartzeko. Gero argazki hau gorde ahal da formatu ezberdinetan, jpg, png, bmp, gif, svg eta beste hainbatetan.

Gainera oso ezaugarri interesgarria du, hau da, plugin ezberdinak dituela funtzionalitate anitzekin. Plugin hauen bitartez, PDF bezala gorde daitezke pantaila-argazkiak, edo efektu grafiko ezberdinak aplikatu daitezke, hala nola 3D efektuak, sepia edo polaroid efektua, ur-marka irudia babesteko eta beste hainbat.

Hau da proiektuaren webgunea: http://shutter-project.org/

Iruzkinak (0)

Aurreko astean Zibergela atalean RSS jarioak zer diren azaldu zen. Aste honetan, aurrekoaren artikulua osatzeko RSS jarioak kudeatzeko aplikazio ezberdinak aipatuko dira. Izan ere, hainbat aplikazio daude, bai on-line aplikazioak, nabigatzaile batekin erabili ahal direnak eta bai mahaigaineko aplikazioak, instalatu behar direnak eta gero ordenagailuan bertan kargatu. Posta elektronikoa erabiltzeko aplikazio askok ere RSS jarioak irakurtzeko aukera ematen dute. On-line aplikazioen alde, esan daiteke beti kasu hauetan bezala, mugikortasuna eskaintzen dutela eta orduan edozein ordenagailutatik ikusi ahal dira norberaren RSS iturriak, irakurtzeke eta irakurrita dauden artikuluak eta edozein ordenagailutatik beti konfigurazio eta RSS iturrien sailkapena berdina mantentzen da. Mahaigaineko aplikazioek ez dute eskaintzen mugikortasuna, baina azkarragoak izan ohi dira eta arinago abiarazten dira zuzenean sistema eragilearen menutik, nabigatzailera aurretik sartu behar gabe.

Artikulu hau RSSak kudeatzeko on-line aplikazioetara bideratuko dugu batik bat.

Alesti

Alesti, RSSak kudeatzeko on-line aplikazio bat da. RSS jarioak etiketen bitartez sailkatzea ahalbidetzen du. Ezkerraldean RSS jario zerrenda agertzen da eta eskuman ikus daitezke jario bakoitzeko artikuluak, aurrebistarekin ala ez. Artikulu batean klik egiten denean edukia erakusten da eta irakurrita bezala markatzen da. Alestik baimentzen du irakurritako artikuluak irakurtzeke bezala edo beranduago irakurtzeko markatzea, hala nola posta elektronikoz bidaltzea. Jario bakoitzean, erakuts daitezke soilik irakurri gabeko artikuluak edo guztiak. Goian dagoen “gehitu” izeneko botoiaren bitartez gehitu ahal dira RSS iturri berriak RSS jarioaren urla idatzita. Izena emateko aukeratu nahi den erabiltzailearen izena, posta helbidea eta nahi den pasahitza besterik ez da behar. Alesti euskaraz dago.

Hau da proiektuaren helbidea: http://www.alesti.org/

Bloglines

Bloglines da RSS jarioak kudeatzeko on-line aplikazioen artean lehenengoetarikoa eta asko erabiltzen zen bere urrezko garaian. Oraindik ere nahiko erabiltzen da, baina esparrua galtzen joan da, beste web aplikazioen mesedetan, neurri batean eguneraketa ezagatik eta batez ere Google Reader sortu zenetik. Izena emateko posta helbidea eta pasahitza besterik ez da eskatzen. RSS jarioak karpeta eta azpikarpetaka antola daitezke era hierarkiko batean. Ezkerrean zerrenda sailkatuta agertzen da eta eskuman, erabiltzaileak aukeratu duen RSS jarioaren artikuluak agertzen dira. RSS jario batean klik egiten denean automatikoki jario horretako artikulu berri guztiak irakurrita bezala markatzen dira. Hau, nire iritzi pertsonalean, ez da oso egokia, zeren eta egon daitezkeen artikulu asko irakurri gabe RSS jario batean eta erabiltzaileari agian ez dio ematen denborarik guztiak irakurtzeko aldi bakar batean. Aukera dago banan-banan irakurri gabe bezala markatzeko, horrela markatutakoak gero eskuz desmarkatu behar dira. Posiblea da erakustea RSS jario bakoitzeko artikulu zerrenda berrienetik zaharrenera edo alderantziz.

Hau da bere webgunea: http://bloglines.com/

Google Reader

Google Reader, Googleren proiektu gehienak bezala, erraldoi bat da. Google erabiltzailea edukita jada erabil daiteke Google Reader zerbitzua. Google Readerrek RSS jarioak karpeten bitartez edo etiketen bitartez sailkatzea ahalbidetzen du. Jario bakoitzean klikatuta bere artikuluak agertzen dira, irakurri gabekoak edo guztiak, eta irakurrita bezala markatzen dira automatikoki pantailatik pasatzen joaten diren heinean. Hasierako orrialdean jario guztietako artikulu guztiak agertzen dira eta karpeta batean klik eginda karpetako jario guztietako artikuluak. Artikulu bakoitzeko posiblea de etiketen bitartez sailkatzea, partekatzea beste erabiltzaile batzuekin, gustuko bezala markatzea edo nabarmentzea. Artikuluak ordenatu daitezke berrienetik zaharrenera, alderantziz edo ausaz. Horrela jario bakoitzeko edo orokorrean. Gehitzeko jario berri bat “Harpidetza gehitu” izeneko botoiari sakatu ahal zaio eta RSS jarioaren helbidea jarri. Oso bilatzaile jatorra du artikuluak aurkitzeko, nola ez. Oraindik ez dago euskaraz, ea laster Googleren beste proiektu batzuk bezala euskaratuta ikusi ahal den.

Hau da Google Reader proiektuaren webgunea: http://reader.google.com/

Jarioen inportazioa eta esportazioa

On-line zein mahaigaineko aplikazio ezberdinen artean, fitxategi estandarrak erabiliz, alegia, OPML fitxategiak, inportatu eta esportatu ahal dira RSS jarioak.

Iruzkinak (0)

Micorosftek iragarri du Microsoft Windows Vista RTM sistema eragilearen zerbitzu teknikoa etengo duela apirilaren 13an. Gauza bera egingo du Micorsoft XP SP2 sistema eragilearekin uztailaren 13an.

Honek esan nahi du sistema eragile horiek ez dutela jasoko eguneraketa gehiago data horietatik aurrera. Beraz, garrantzitsua izango da instalatzea azken Service Pack hauetariko sistema eragile bakoitzeko. Izan ere, bestela, ziurtasun eguneraketarik ere ez da jasoko. Windows XP-ren kasuan, Service Pack 3 instalatu beharko da eta Windows Vista erabiliz gero, Service Pack 1 instalatu beharko da. Windos XP SP2ren 64 biteko bertsioan zerbitzu teknikoak jarraituko du, ez baitago Service Pack 3 bertsio honetarako.

http://windows7news.com/2010/03/24/xp-sp2-x86-and-vista-rtm-support-ending-soon/

Iruzkinak (0)

RSS jarioak eta RSS jario hauek kudeatzeko aplikazioak erabiltzea ezinbestekoak dira hainbat blog irakurtzera ohituta dauden Internet erabiltzaileentzat. Batez ere, sarritan irakurtzeko ohitura badaukate. Era berean, norberaren beharrak edo nahiak ondoen asetzen duen aplikazioa aurkitzea oso onuragarria izango da informazio hori guztia partekatzeko, antolatzeko edo aurkitu ahal izateko behar denerako.

Zer dira RSS iturriak edo jarioak

RSS iturriak, nolabait esateko, webguneetan eta blogetan batez ere, argitaratzen den informazioa hedatzeko era estandar bat da. Hala, bada, RSS jarioak edukiz gero, webgune edo blog batek hedatu ahal ditu argitaratuko informazioa eta artikuluak beste aplikazio eta webgune batetik irakurri ahal izateko.

Era honetan, sortu ahal dira aplikazioak RSS jario hauek irakurtzen eta prozesatzen dituztenak. Aplikazio hauek ahalbidetzen dute Internet erabiltzaile batek izena ematea eta gustuko dituen blogak edo RSSak dituzten webguneak gehitzea. Era berean, RSS iturri hauek karpetaka edo etiketekin sailka daitezke. Honela, ez da sartu behar blog edo webgune bakoitzera informazio berria dagoen ikusteko eta informazio hori irakurtzeko, baizik eta RSS jarioak kudeatzeko aplikazioak berak esango dio erabiltzaileari blog bakoitzean zenbat artikulu berri irakurtzeke ditu. Posta elektronikoa irakurtzeko aplikazioek egiten duten antzera heltzen diren posta elektroniko berriekin.

RSSak irakurtzeko, hainbat on-line aplikazio daude, Internet ingurunean irakurri ahal izateko. Aplikazio hauek mugikortasuna eskaintzen diete erabiltzaileei. Izan ere, edozein ordenagailutatik edo Interneta duen edozein gailutatik, erabiltzaileek eskura izango dituzte beren RSS jarioak eta irakurri gabeko artikuluak edo irakurritakoak, hala nola RSS jarioetarako sailkapen berdina. Bestetik, mahaigaineko aplikazio asko ere badaude RSS iturriak kudeatzeko eta irakurtzeko, sistema eragile guztietarako. Besteak beste, posta elektronikorako aplikazio askok ere RSS iturriak kudeatzeko aukera daukate.

Nola jakin webgune batek RSSak dituen eta nola harpidetu

Webgune edo blog batek RSS jarioak dituenean webgunearen leku batean edukiko du ikur bat puntu batekin eta bi uhinekin, gehienetan laranja da. Edota “RSS” izeneko lotura bat eduki behar du nonbait. Lotura bat baino gehiago egon daitezke, esaterako, “RSS sarrerak” eta “RSS komentarioak” izeneko loturak dituzte blog askok, artikuluen jarraipena eta artikuluetan egiten diren komentarioen jarraipena banatzeko. Bakoitza harpidetu ahal da batera, bestera edo bietara. Bestetik, nabigatzaileek ere jakinarazten dute era batean edo bestean erabiltzailea ikusten ari den webguneak RSS iturriak dituenean. Mozilla Firefox nabigatzailean, helbide barran agertzen da RSS iturrien ikonoa eta bertan klikatuta RSS helbidea kargatzen da, edo jario bat baino gehiago egonez gero, menu bat zabaltzen da erabiltzaileak nahi duenean klik egiteko eta kargatzeko. Microsoft Internet Explorer nabigatzailean home botoiaren alboan dagoen RSS ikonoa ere pizten da RSS iturriak dituen webgune batean sartuz gero. Hor klikatuta erakutsiko dira webguneak dituen RSS iturriak, eta batean klikatuta RSS iturriaren helbidea kargatuko da. Izan ere, webgune baten RSS iturrira harpidetzeko, helbide hau da jakin behar dena. Helbide hau lor daiteke behin RSS iturria nabigatzailean kargatuta, nabigatzailearen helbide-barran agertzen den urla kopiatuz, edo saguaren eskumako botoiarekin webgunean dagoen RSS estekaren gainean klik egin eta loturaren helbidea kopiatzeko aukerari sakatuz. Ondoren, RSS iturriak irakurtzeko erabiltzen den aplikazioan egongo da RSS jario berri bat gehitzeko aukera eta hor itsatsi beharko dugu lehen kopiatutako helbidea, alegia, RSS jarioaren urla.

Hala, bada, hainbat blog edo webgune lantzean behin irakurriz gero eta oraindik RSS jarioak erabili ezik, jada begiratu ahal da webgune horiek RSS iturriak dituzten. Horrela, artikulu honen bitartez eta datorren astekoaren bitartez non RSS jarioak kudeatzeko aplikazio ezberdinak aipatuko diren, ea Internet erabiltzaile gehiago animatzen diren RSS iturri hauek erabiltzen, oso erabilgarriak dira eta.