Iruzkinak (0)

Egunotan bolo-bolo dabilen berria da hau, Yahoo, Deliciousen jabeak zerbitzua bertan behera utziko duela. Delicious, laster-markak gorde eta etiketatzeko zerbitzu ezaguna da, erabiltzaile asko dituena. 2003 urtean hasi zuen bere ibilbidea, eta 2005 urtean Yahook erosi zuen. Twitter bidez jakin da Yahook zerbitzu honen inguruan lan egiten duten langile batzuk kaleratuko dituela eta zerbitzua bera eteteko asmoak dituela.

Hain zerbitzu erabilia izanik, burrunba handia sortu da berriaren inguruan. Ba da, gertaera honek “hodeian” (ingelesez cloud) eskaintzen diren zerbitzuen ahultasuna nabarmentzen duela esaten duenik. Beste batzuk, Yahoori bere zerbitzu hau komunitatearen esku jarri dezala eskatu dute, software librea bilakatu eta komunitateak zerbitzuaren mantenua bere gain hartu dezan. Eta azkenik, ba da, Yahook publizitatea lortzeko askatu duen zurrumurrua dela dioenik ere.

Berria Yahoo beak ezeztatu badu ere, ez litzateke txarra gure laster-markak salbu jartzeko ordezko zerbitzu batzuk bilatzea; Diigo edo Evernote ordezko zerbitzu bikainak izan daitezke. Delicious berak eskaintzen duen APIa baliatuz, posible da laster-marka guztiak XML fitxategi batean jasotzea, ondorengo twitaak erakusten duen bezala: http://twitter.com/#!/andresb/status/15505961854705664

Iruzkinak (1)

Arazoa begi bistakoa da: hainbat gailu erabiltzen ditugu leku ezberdinetan, eta guztiek, fitxategiak eta datuak gordetzeko diskoa eskaintzen dituztenez, azkenean, buruhauste franko sortzen da zer non dagoen jakin nahi denean. Demagun, erabiltzaile batek lantokiko ordenagailuan dokumentu baten edizioa hasi eta etxeko ordenagailuan lanean jarraitu nahi duela. USB giltza bat hartu lezake eta fitxategia bertan gorde bere etxean edizioarekin jarraitzeko. Lantokitik bere buruari zuzendutako posta mezu bat bidaliz ere, gero, etxean, posta mezua jaso eta txertatutako dokumentua berreskuratu lezake edizioarekin jarraitzeko. Azkenean, dokumentuaren hainbat kopia kudeatu beharko ditu erabiltzaileak: laneko ordenagailuan dagoena, etxeko eramangarrian dagoena, USB giltzan edo posta kontuaren sarrera-erretiluko zoko ezkuturen batean dagoena.

Nahas-mahasa hau konpontzeko, online eskaintzen diren web biltegi zerbitzuak erabili daitezke.

Zer dira web biltegi zerbitzuak?

Web biltegi zerbitzuak, aurreko atalean aipatu den arazoa konpontzea dute xede, hots, sinkronizazio ezaren arazoa. Zerbitzu hauek erabiliz, gailu ezberdinak Interneten dagoen biltegi batekin sinkronizatzen dira, eta erabiltzaileak, bere etxeko ordenagailu nahiz mugikorrarekin ari dela ere, dokumentuaren azken bertsioa izango du eskura sinkronizazioan parte hartzen duten gailu guztietan.

Aurreko adibidea jarraituz, erabiltzaileak, bere lantokiko naiz etxeko eramangarrian, web biltegi zerbitzua eskaintzen duen software bat instalatu beharko du. Lantokiko ordenagailuan dokumentu bat sortzen denean, ordenagailuan instalatutako softwareak, Internetera igoko du fitxategia, eta etxera joan eta bertako eramangarria pizten denean, eramangarriak, saretik, dokumentu berria jaitsiko du eta erabiltzailearen eskura utziko du karpeta jakin batean.

Zerbitzu batzuk, doan, giga batzuetako edukiera duten biltegiak eskaintzen dituzte, eta ordainpeko harpidetzaren truke, edukiera handi edo mugarik gabeko edukiera duen zerbitzua eskaintzen dute. Hainbat dira horrelako zerbitzuak eskaintzen dituzten guneak; adibidez: DropBox, Wuala, Mozy edo Windows Live Mesh.

DropBox dugu zerbitzu ezagunenetako bat. 2GBko biltegia eskaintzen du doan, eta ordainpeko harpidetza erabiliz, gehienez 100GB. Windows, Mac edo Linux sistema eragileak dituzten ordenagailuetan erabili daiteke eta baita Iphone, Ipad, Blackberry eta Android sistema eragilea duten mugikorretan ere. Sinkronizatutako fitxategiak edozein lekutatik atzitzeko, webgunea ere eskaintzen du: http://www.dropbox.com/

DropBoxen, erabilera

DropBox ordenagailuan instalatzean, disko gogorrean karpeta bat sortzen du software honek, aurrerantzean “DropBox karpeta” bezala izendatuko dena. Karpeta honetan jartzen den edozein fitxategi, DropBox instalatu dugun beste ordenagailu edo gailu mugikor guztiekin sinkronizatuko da. Sinkronizazioa lortzeko, lehenik eta behin, fitxategia Internetera igoko da, DropBoxek kudeatzen duen biltegira eta gero, beste gailuak Interneten eduki berria dagoela ohartzen direnean, fitxategi hau beste gailu horietara jaitsiko da.

Demagun erabiltzaile bat DropBox karpeta barruan dagoen fitxategi bat editatzen dabilela. Fitxategia gorde bezain pronto, DropBox zerbitzuak, fitxategi hau erabiltzaileak DropBox instalatu duen ordenagailu eta gailu mugikor guztietan sinkronizatuko da, hau da, fitxategi hau beste ordenagailu eta gailu mugikor guztietan ere gordeko da.

Fitxategiak partekatu nahi badira eta lantalde bati fitxategi batzuetan lan egiteko aukera eskaini, DropBox karpeta barruan dagoen karpeta bat hautatu eta DropBoxen kontua duten erabiltzaileekin partekatu daiteke karpeta honen edukia. Nahi den bakarra hirugarren bati fitxategiaren berri ematea bada, fitxategia atzitzeko URL edo helbide bat eskaini dezake DropBoxek.

DropBoxen dauden fitxategiak automatikoki sarera igotzen direnez, ziurtasun kopia sistema bezala ere erabili daiteke DropBox. Ordenagailua ondatzen bada, Internetera jo eta DropBoxen aurkitu daitezke sinkronizatutako fitxategiak. Doaneko kontuak 2GB edukiera eskaintzen du, eta leku gehiago behar izanez gero, ordainpeko harpidetza kontratatu beharko litzateke.

Fitxategi bat editatu eta DropBoxek sareratzen duen bakoitzean, fitxategi horren bertsio berri bat gordetzen du. Horrela, fitxategiaren historia guztia dago eskura eta edozein bertsio berreskuratu daiteke. Ezabatzen diren fitxategiak ere berreskuratu daitezke DropBoxen webgunetik.

Iruzkinak (0)

Wikileaks irabazi asmorik gabeko nazioarteko erakunde bat da. Erakunde honek bere webgunearen bitartez, http://www.wikileaks.org/, mundu osoko gobernu eta administrazio publikoen dokumentu eta txosten sekretuak informazio korapilatsuarekin argitaratzen ditu.

Erakunde honen webgunea 2006ko abenduan argitaratu zen eta 2007ko uztailean elikatzen hasi zen. Harrezkero dokumentu eta txosten pribatuen kopurua handitzen joan da eta dagoeneko 1,2 milioi dokumentu sekretu argitaratu ditu. Erakunde honek, dokumentu sekretu hauen bitartez, gobernuen jokaera ez zilegiak plazaratu nahi ditu.

Wikileaks izenean «wiki» hitza egon arren, ez da wiki ohiko bat. Zeren eta internet erabiltzaileek eta irakurleek edukia ezin baitute ez aldatu ez sortu, ez badaukate horretarako baimena.

Wikileaks webgunean oso filtrazio garrantzitsuak plazaratu egin dira, Irak eta Afganistaneko gudaren inguruan, adibidez. AEBko nazioarteko politikari buruzko azken filtrazioek, esaterako, oihartzun handia lortu dute. Hori dela eta, Wikileaks erakundeak arazo dezente izaten ditu bere webgunea mantendu ahal izateko eta hainbat boikot eta eraso jaso ditu, bai gobernuen aldetik eta bai informatika enpresa eta hornitzaileen aldetik. Twitterrek zein Facebookek, batzuk aipatzearren, itxi dituzte proiektu honen aldeko kontuak eta orrialdeak.

Iruzkinak (0)

Asmakizun eta aurrerapen askorekin bezala, informazio eta komunikazio teknologiak, ez dira ez onak ez txarrak. Asmakizun bera baino, erabilera izan ahal da ona edo txarra. Izan ere, baliabide eta jakintza gehiago eduki ahal izatea ona izaten da. Baina baliabide eta jakintza horietaz baliatzen diren gizakiek batzuetan ez dute erabilera ona egiten. Informazio eta komunikazio garai honetan, edonoren eskura daude nahi beste informazio eta datu, «Interneten denetarik dago» esan ohi da. Baina babestu beharreko informazioa eta informazio pribatua ere askotan teknologia hauen eskura gelditzen da informazio horren jabearen jakin edo baimenik gabe.

Internet eta informatika enpresa erraldoiak

Beste batzuetan esan den bezala, sare sozialek beren erabiltzaileen inguruko informazio itzela gordetzen dute, erabiltzaileen datuak, gogoetak, egoerak, argazkiak, bideoak, loturak, ezagunak eta harremanak gordetzen dituzte esaterako. Erabiltzaileen kokapena ere gordetzen dute kasu askotan. Adibidez, Facebook, oso kritikatua izan da azken aldi honetan erabiltzaileen pribatutasuna ez zaintzeagatik behar beste.

Zer esanik ez Googleren inguruan, ia mundu osoko Internet erabiltzaileen kopuru izugarri baten bilaketak, bisitatutako webguneak, gustuak, mezu elektronikoak, kontaktuak, gogoko lekuak, dokumentuak, hitzorduak, gogoko artikuluak eta abarreko datuak gordetzen ditu. Era berean, erabiltzaileen ohitura digitalak eta noiz eta zenbat denboraz konektatuta dauden ere jakin lezake. Honez gain, egun, sakelako telefonoetarako Android, Googleren sistema eragilea, ere oso hedatuta dago, beraz, norberaren kokapena ere jakin lezake nahiz eta telefonoaren GPSa desgaituta izan.

Hala ere, informazio hau guztia oso delikatua eta erakargarria izan arren, sare sozialen kasuan batez ere, nolabait erabiltzaileek ematen duten informazioa da. Nahiz eta askotan ez izan oso kontziente ematen ari den informazio guztiaz. Baina, batzuetan erabiltzailearen baimenik gabe eskuratu ahal da informazioa. Hain zuzen ere, malware kopuru handi bat horretarako garatzen da, troiatarrak, spywarea, phising teknikak. Alabaina, malwaretzat jotzen ez diren aplikazio eta sistema eragileak ere erabiltzailearen baimenik gabe zurrupatu ahal dute informazio pribatua. Erabiltzaileak aplikazioa helburu zehatz baterako erabil dezake eta aplikazio honek ere beste gauza batzuk ere egin ditzake ezkutuan. Adibidez, musika entzuteko aplikazio batek erabiltzaileak entzuten duen musikaren inguruko informazioa bidal liezaioke enpresa edo pertsona zehatz bati. Mesfidantza edo zurrumurru hori informatika erabiltzaileen artean hedatu da hainbat alditan informatika enpresa erraldoien aplikazio eta sistemen inguruan, baina ezer frogatu gabe. Hala ere, hau gertatzen ez dela frogatzea errazagoa da software librearen kasuan software itxiaren kasuan baino, aplikazio eta sistema libreetan zehatz-mehatz zer egiten den aztertu daitekeelako.

ECHELON

Espioitza digitala aipatutakoan, ECHELON izena etorriko zaio burura jende askori. Izan ere, ECHELON espioitza nazioarteko sarerik handienatzat jotzen da. Hain zuzen ere, sare hau irrati, telefono, fax eta internet komunikazioak zurrupatzeko eta automatikoki aztertzeko gai da. AEBk, Erresuma Batuak, Kanadak, Australiak, Zeelanda Berriak kontrolatua omen da. ECHELON 1976.urtean aipatu zen lehen aldiz publikoki. Hona hemen informazio gehiago: http://eu.wikipedia.org/wiki/ECHELON

RFID

IzenaEspiotza digitalaren inguruan aipatu daitekeen beste gai bat RFID txipa da. RFID hitzak, Radio Frequency Identification esan nahi du ingelesez, alegia, irrati-maiztasunaren bidezko identifikazioa. RFIDren bitartez edozein motatako objektuak irrati-maiztasunaz (uhinen bitartez), hau da kontaktu zuzenik gabe, identifikatzeko sistema da.

RFID txartelen tamaina txiki-txikiari esker, leku ezkutuenetan ezar daitezke, eta eramangarriak dira. Pegatina baten itxura dute eta pegatinaren barnean espiral moduko bat ikus daiteke, hori RFIDren antena da. Espiral hau konektatuta dago erdian dagoen RFIDren txiparekin. Egun, leku eta artikulu askotan erabiltzen da eta Euskal Herriko edozein merkataritza-zentrotako produktuetan ikus daiteke. Artikuluei jartzen zaien RFID honek ahalbidetzen du lapurretez ohartaraztea edo stock eta produktuen kokapena automatizatzea, esaterako.

Alabaina, RFID sistemekin, posible da merkataritza-ikerketak egitea, erosleen jarraipena egitea eta kontsumitzaileen ohiturak aztertzea, bezeroaren inolako baimenik gabe.

RFID teknologia hau, merkataritza-produktuetan ez ezik, beste objektu are delikatuagoetan ere txerta daiteke, pasaporteetan, nortasun agiri elektronikoetan edo billeteetan, esaterako. Hemen ikus daiteke informazio gehiago: http://eu.wikipedia.org/wiki/RFID.

Iruzkinak (0)

Google Business Photos da Googlek jarri duen zerbitzu berri bat komertzioetara bideratuta. Zerbitzu hau doakoa da, eta honen bitartez, edozein komertzio edo negozioren jabeak eskatu ahal dio Googleri bere negoziora joateko eta komertzioaren argazki-erreportaje profesionala egiteko. Argazki hauek, ondoren, Google Places-en eta Google Maps-en sartuko ditu Googlek. Ziur asko, etorkizunean Google Street View zerbitzuan ere txertatuko ditu.

Aukera hau oso onuragarria izan daiteke kaleko komertzioetarako, alde batetik lortzen da doako zerbitzu profesional bat, negozioaren kalitatezko argazkiak lortzeko. Bestetik, Googleren gune ezberdinetan ikusgai egotea lortzen da.

Oraingoz zerbitzu hau Australian, Zeelanda Berrian, Japonian eta AEBko hiri batzuetan ari dira Googleko argazkilariak. Beraz, Europan zain egon beharko da. Hala ere, laster espero da Europara ere heltzea, beraz hadi egon beharko da.

Webgune honetan ikusi ahal da proiektuari buruzko dokumentazioa eta hirien jarraipena egin:

http://maps.google.com/help/maps/businessphotos/

Iruzkinak (0)

Megaupload oso zerbitzu ezaguna da Interneten tamaina ezberdineko fitxategiak gordetzeko. Premium kontuak zerbitzu gehigarriekin eskaintzen baditu ere, dohainik erabili ahal diren oinarrizko kontuak oso ondo daude eta aukera asko eskaintzen dituzte. Izan ere, Megauploadek oinarrizko erabiltzaileei 200GB eskaintzen dizkie, nahi beste fitxategi Interneteko leku honetan gordetzeko, beti ere fitxategia 2GB baino txikiagoa bada. Premium erabiltzaileek, ordea, espazio mugagabea daukate fitxategiak gordetzeko eta fitxategiaren tamainan ere ez dago mugarik. Honez gain, premium erabiltzaileak azkarrago jaitsiko ditu fitxategiak eta ez du publizitaterik jasan beharko. Izena eman gabe ere fitxategiak deskargatu daitezke, baina ezin dira igo. Kasu honetan, fitxategiak jaisteko abiadura doako erabiltzaile erregistratuarena baino motelagoa da eta publizitate gehiago ere jasotzen da.

Megaworld

Megaupload zerbitzuaren sortzaileek Megaworld atera berri dute. Izen eta webgune horren azpian, http://megaworld.com, Megaupload ez ezik beste hainbat zerbitzu on-line eskaintzen dituzte. Guztietan doako zein ordainpeko kontuak daude, gainera, logikoa den bezala, erabiltzaile berdina mantentzen da kontu guztietarako. Horrela, Interneten fitxategiak gordetzeko zerbitzu ezberdinen artean berezia izatea lortu du.

Zerbitzurik interesgarrienak

Megavideo da eskaintzen duten zerbitzuetariko bat. Zerbitzu honen bitartez bideoak igo eta streamingean ikusi daitezke, Youtuben bezala. Gainera, HTML kodigoa ere eskaintzen du bideoa edozein webgunetan txertatzeko. Kalitate handiko bideoak onartzen ditu eta bideoen iruzkinak egin ahal dira edo gogokoen artean gorde. Hau da webgunea: http://www.megavideo.com/.

Megalive zerbitzuaren bitartez bideo zuzenean igorri ahal da Interneten bidez, bai era publikoan bai era pribatuan, gainera txat gela bat eskaintzen du emisio bakoitzeko. Kasu honetan ere HTML kodea ere eskaintzen du zuzeneko igorpena edozein webgunetan txertatzeko. Zerbitzua ikusteko http://www.megalive.com/ webgunera joan daiteke.

Megabox zerbitzuak norberaren musika fitxategi guztiak igotzea eta Interneten bitartez edonon eta gailu ezberdinetatik entzutea ahalbidetzen du, gainera erreprodukzio-zerrendak ere kudeatu ahal dira. Megaboxen bitartez musika on-line ere eros daiteke. Hau da zerbitzuaren webgunea: http://www.megabox.com/.

Megapix zerbitzuaren bitartez igo ahal dira argazkiak eta album ezberdinak sortu zein partekatu. Gainera argazkiak erosi eta saldu ahalbidetzen du, era honetan, profesional batek bere argazkiak saldu ahal ditu on-line. Hala ere, Flash gehiegi erabiltzen da zerbitzu osoan orokorrean eta beraz, Flickr baino astunagoa eta motelagoa da webgunea. Gainera, norbaitek ez badauka nabigatzailerako flash gehigarri eguneratu bat ezin izango ditu ikusi, sakelako telefono askotatik, esaterako. Megapix zerbitzuaren webgunea hau da: http://www.megapix.com

Beste zerbitzu batzuk

Arestian aipatutako zerbitzuez gain, beste batzuk ere atera dituzte. Besteak beste, Megaclick (http://www.megaclick.com/) Google AdWords eta AdSenseren antzekoa publizitatea jarri ahal izateko norberaren webgunean; Megapay (http://www.megapay.com/) sakelako telefonoaren bidezko ordainketa seguruak egiteko Interneten; Megafund (http://www.megafund.com/) zerbitzu berritzaileak on-line atera nahi dutenentzako laguntza eta zerbitzu ezberdinak.

Laster aterako dutena

Honekin guztiarekin nahikoa ez balitz, ez dira geldituko eta laster zerbitzu berriak ateratzea espero dute. Megamovie eta Megabackup 2011rako ateratzea aurreikusita dago. Lehenengoa, kalitate handiko film eta telesailak saltzeko eta on-line ikusteko merkatua izango da. Bigarrena on-line ziurtasun kopia egiteko sistema izatea nahi dute. Dohainik eskainiko dute kopia egiteko sistema, software librea eta doakoa izango omen den aplikazio batekin. Ez dute espazio mugarik jarriko eta soilik kobratuko dute datuak berreskuratu behar izanez gero. Nolabait, edozein erabiltzailerentzat datu digitalen doako aseguru bat izan nahi du.

Iruzkinak (0)

Ordenagailu eramangarria norbaitek lapurtuz gero faena handia izaten da produktu merke bat ez delako. Hala ere, enpresen zein norbanako askoren kasuan, datuak dira balio delikatuena ordenagailu eramangarria edo sakelako telefonoa norbaiti lapurtzen diotenean.

Bada, badago aplikazio bat Mac Os X, GNU/Linux, MS Windows eta Android sistemetan erabili ahal dena eta lapurreta baten ostean, baliabide ezberdinen bitartez, ordenagailu eramangarria berreskuratzea ahalbidetzen duena. Gainera, doakoa eta software librea da. Prey du izena eta hau da deskargatzeko eta informazioa ikusteko webgunea: http://preyproject.com/.

Aplikazio hau egikaritzen da sisteman bigarren planoan, hau da, ez dago ikusgai leiho bezala. Ordenagailua edo sakelako telefonoa lapurtu diotenean erabiltzaile bati, honek urrutiko kudeaketa sistema baten bitartez gaitu ahal du Prey aplikazioa, beti lapurtutako ordenagailua edo telefonoa piztuta baldin badago. Orduan Prey aplikazioa saiatuko da ordenagailua edo telefonoa geolokalizatzen GPS sistemaren bitartez edo detektatutako wifi sareen bitartez. Gainera web-kamera gaitzea ahalbidetzen du eta horrela lapurrari argazkia atera lekioke. Era berean, saguaren mugimenduak eta mahaigaina ikustea ahalbidetzen du hala nola ordenagailua blokeatzea, beste hainbat aukeren artean.

Iruzkinak (0)

Ziur-asko, lagun batzuek bideo-zaintza sistema bat beren etxean instalatzea pentsatu dute. Alabaina, diru hori ez zutelako gastatu nahi, edo segurtasun enpresen sistema profesional horrek ekartzen dituen ohitura aldaketak onartzen ez zituztelako, ideia baztertu dute azkenean. Hala ere, informatikari esker, posiblea da martxan jartzea bideo-zaintza sistema bat etxean, era erraz batean eta oso merke. Izan ere, ordenagailu bat, web-kamera bat eta eskuragarri dauden bideo-zaintzarako doako aplikazioetariko bat besterik ez da behar etxean bideo-zaintza sistema jator bat jartzeko. Zer esanik ez, ez da izango segurtasun enpresa profesionalek jartzen dutenaren parekoa, askoz xumeagoa da, eta ez du izango poliziarekiko konexioa ezta segurtasun enpresek eskaintzen dituzten beste zerbitzu gehigarri batzuk; haatik nahikoa izan daiteke pertsona batzuentzat.

Bideo-zaintza MS Windows sistemetan

Dorgem bideo-zaintzarako doako aplikazioa da, software librea da eta MS Windows sistemetarako prestatuta dago. Software hau webgune honetatik deskargatu daiteke: http://dorgem.sourceforge.net/. Ondoren instalatu beharko da, oso erreza da instalatzea eta konfiguratzea, hori bai, ingelesez baino ez dago. Behin instalatuta, web-kamera konfiguratu beharko da eta “Preview” aukeraren bitartez ondo konfiguratuta dagoela ziurta daiteke. Aplikazioaren hobespenen artean, “Use motion detection” aipatzeko modukoa da, ezaugarri hau markatuz gero, mugimendu-detekzioa gaitzen da. Aplikazio honek web-kameraren bitartez kapturatzen dituen irudiak, FTP zerbitzari batean edo etxeko ordenagailuan gorde daitezke. Irudi izen bezala eman ahal zaio izen finko bat, eta orduan ordezkatzen joaten da fitxategi berdina behin eta berriz, edo izenaren barnean karaktere bereziak erabil daitezke fitxategi ezberdinak sortzeko data eta orduarekin, esaterako. Aplikazio honen alde txarra da 2008tik bertan-behera gelditu dela garapena, azken bertsioa 3.0 da.

Beste aukera libre eta doakoa MS Windows sistemetarako iSpy da, hau da proiektuaren webgunearen helbidea: http://ispy.developerinabox.com/default.aspx, bertatik aplikazioa deskargatu daiteke eta proiektuari dohaintza bat emateko aukera eskaintzen du. Aplikazio honek ordenagailuaren web-kamera eta mikrofonoa erabiltzen du audioa zein mugimendu-detekzioa egiteko. Audioa edo mugimendua detektatzen duenean posta elektroniko bat irudiarekin bidaltzen dio erabiltzaileari, horrela denbora errealean ikus daiteke etxean gertatzen ari dena. Horrez gain, konfiguratu daiteke SMS bat ere bidaltzeko edo aplikazio zehatzen bat exekutatzeko. ISpy aplikazioaren bitartez web-kamera bat baino gehiago edota ordenagailu bat baino gehiago kudeatu ahal dira. Halaber, iPhone, Android edo Widnows 7 mobile sistema duten sakelako telefonoetatik bideoa denbora errealean ikustea ahalbidetzen du iSpyk. Gainera, web-kameren aktibitatea ere grabatu daiteke.

Esan daiteke instaltzeko iSpy Dorgem baino zailagoa dela, baina askoz osatuagoa da aplikazioa.

SecuritySpy Mac Os X sistemetarako

Mac Os X sistemetan ere bideo-zaintza sistema instalatu ahal da dohainik, SecuritySpy erabil daiteke horretarako, webgune honetatik deskargatu daiteke: http://www.bensoftware.com/ss/index.html. Kasu honetan ere hainbat web-kamera kudeatu daitezke. Halaber, audio eta mugimendu-detekzioa ere ekartzen du. Eta beste adibideetan bezala zerbait gertatuz gero erabiltzaileari jakinarazten dio mezu elektronikoz. Honez gainera, FTP zerbitzari batera igo ahal dira argazkiak edo nabigatzaile batekin web-kamerak grabatzen ari direna ikustea posiblea da.

ZoneMinder GNU/Linuxpean

GNU/Linux sistemetan ZoneMinder softwarea erabil daiteke. Hau da proiektuaren webgunea: http://www.zoneminder.com, bertan aplikazioa jaitsi eta dagoen dokumentazioa ikus daiteke. Hala ere, Ubuntu Software biltegitik edo Synaptic pakete kudeatzailetik ere instalatu daiteke. Aplikazio hau oso osatua da, bideo-kamera bat baino gehiago kudeatu daiteke. Gainera, aukera asko konfiguratu daitezke, adibidez, ea soilik irudiak edo bideoa gorde behar duen edo programatu ahal da bideo-kamerek grabatu behar duten ordutegia. Beste kasuetan bezala mugimendu-detekzioa dauka eta erabiltzailea ohartarazten du posta elektroniko baten bitartez mugimendu-alarma sortu duen irudiarekin. Aterisk (http://www.asterisk.org/) telefonogune bat instalatuta edukiz gero jakinarazpenak ere telefonoaren bitartez egin ahal ditu.