Bizikleta bideak dituzten Ipar Euskal Herriko hirigune nagusietan baliatu ahalko da. Eskaintza berria era horretako bideak hirietako mapetan jasotzen dituzten herrialdeetara zabaldu dute: Ameriketako Estatu Batuak, Australia, Austria, Belgika, Danimarka, Eskozia, Finlandia, Frantzia, Gales, Herbehereak, Ingalaterra, Kanada, Liechtenstein, Luxenburgo, Monako, Norvegia, Suedia eta Suitza, alegia.
Dagoeneko bizikletaz egiteko 53.000 kilometro estali dituzte, eta asmoa dute etorkizunean hiri gehiagotako bizikleta bideak sartzen jarraitzeko.
Gaur-gaurkoz ahotsa ez dago euskaraz entzuterik. Horretarako, autorako Waze doako nabigatzailea deskargatu daiteke. Zibergelan jaso genituen haren gorabeherak: http://zibergela.bitarlan.net/2013/06/06/waze-aplikazioa-gidarien-sare-soziala/.
Bestetik, aurrerantzean Internet seinalerik gabeko guneetan erabiltzeko doitu dute Google Maps. Oporretan atzerrira joan, eta roaming tarifatan gastatu gabe, errepideetan laguntza jasotzen jarraitzeko aukera zabaltzen du horrela Googlek. Roaming atxikipen bat da; telefono hornitzaileek bezeroei ezartzen diete; horrekin, aparteko ordainsaria kobratzen diete atzerrian Internet sakelakotik erabiltzearren. Europako ganberak 2015eko abendua jarri du muga gisa roaming tarifak kentzeko; baina, bien bitartean, errepideetan Internet kenduta dabiltzan nabigatzaileak erabiltzea besterik ez dago.
Egin beharrekoa sinplea da: gordetzea nahi den mapa kargatu konexioa dagoen bitartean. Bigarren mailako aplikazioen artetik kentzen ez bada, edo ordenagailu eramangarrian nabigatzailea ixten, mapa ez da desagertuko. Gainontzekoa, telefonoaren geokokapenaren esku geratzen da; eta hori doakoa da, noski.
Bizikleta ibilbideen ahotsezko jarraibideak Ipar Euskal Herrian
Twitterrific, argitaratutako txioak editatzeko aukera bat
Bazen garaia norbaitek burutazioa izateko Twitterren argitaratzen diren txioak editatzeko. Arazoaren konponbidea, hala ere, ez du ofizialki Twitterrek kaleratu. iOS plataformarako Twitterrific aplikazioak azkenengo eguneraketan txertatu du aukera, eta atrebentziak App Storean kritika onak jasotzeko balio izan dio.
Karaktere gutxitan eta bizi-bizi idazteko den microblogging sarea da Twitter; eta hortik duen arrakasta. Baina freskotasun horrekin edo presaka idazten dutelako, erabiltzaileei bidalketetan han-hemenka ihes egiten diete akats ortografiko, gaizki esan edo datu okerrek. Sare sozial gehienek mezuak editatzeko aukera aspaldi gehitu zuten, eta, besteak beste, Facebooken jada ez dago halako eragozpenik. Twitterrek temati eusten dio bereari, baina asko kexu dira esanak eroso zuzendu ezin dituztelako. Gaur-gaurkoz dagoen era bakarra gogaikarria da erabat: eskuz txioa ezabatu eta berriz idatzi. Mugarria eta albiste ona da Twiterrific aplikazioaren egitasmoa, beraz. Behinik behin, iPhone erabiltzaileek, ez dute trabarik izango txioak zuzentzeko.
Txiolariek hainbeste aplikazio edo bezero dituzte haien kontuak telefono edo tabletetatik kudeatzeko. Twitterrek badu aplikazio ofiziala hainbat plataformatarako eskuragarri, baina nahiko mugatua da, eta besteek gehitutako funtzionalitateak berandu eransten dizkiote. Besteak beste, menuak pertsonalizatzeko edo nahi den traolaren lasterbidea erakusteko aukerarik gabe jarraitzen du. Twitterrific da azkena erabiltzaile askoren eskaerari erantzun eta Twitterri aurre hartzen.
Idatzi den txioa aukeratu, oinean eskuinean dagoen More Actions» hautatu, eta Delete and Edit Tweet emanda edita daiteke. Twitterrific doan dago eskuragarri App Store-n.
Hala eta guztiz ere, publizitaterik gabe baliatu edo Twitterreko abisuak ematea nahi bada, ordaindu beharreko gehigarriak dakartza aukeran.
IFTTT eta amarauna erabiltzailearen morroi
Internet zerbitzuz josita dago, baina gutxi dira haien artean komunikatzen direnak. IFTTT bi web aplikazio elkarrekin konektatzeko balio duen tresna da. Interneteko gune soil bat da, baina denbora erruz aurrezten lagun dezake askotan egin beharreko gauzak automatiko eginez. Esaldi bakar bat nahikoa da sareko zerbitzuak zelatatu ditzan, eta ezer bada, haiek elkar eragiten jartzeko. IFTTT oharkabean harrapatzerik ez dago, eta beti betetzen du esana. Nahi beste zerbitzu kudeatzen ditu.
Aurrez zehazten diren baldintzak edo abiarazleak gertatzen direnean, hartu beharreko ekintzak zehaztuta uztean datza. If This Then That, edo hau jasotzen bada (abiarazlea), egin beste hau (ekintza).
Esaldi edo arau horiek errezeta izena jasotzen dute. Abiarazle bat norbait Twitterren etiketatzea izan daiteke, eta ekintza Facebookeko horma eguneratzea. Batzuetan abiarazleen barruan balio batzuk erabili beharko dira, eta horiei osagai deitzen zaie. Adibidez, ordu zehatz batean euria egingo duen mezu bidez abisatzeko eska dakioke. Edo gustuko blogean argitaratzen den azken sarrera automatikoki txio bidez lagunekin partekatu. Bakoitzak bere errezetak sor ditzake, edo besteenak erabili. Kanal bidez antolatzen dira guztiak, eragiten dituzten zerbitzuen arabera, alegia. Facebook, Blogger, Twitter, sakelako kontaktuak, posta elektronikoa… kanal bakoitzak bere abiarazle eta ondorengo ekintzak jasotzen ditu. Errezetaren osagaiak pertsonalizatu, eta kito. Baldintza betetzen denean hodeiak norbere ordez egingo du.
Aurrez zehazten diren baldintzak betetzen ditu IFTTT-k.
85 kate dira denera, eta aldian binaka lotzen diren arren, kateak osa daitezke batak bestea eragitea lortuz. Errezetak desgaitu egin daitezke une oro, eta beharra ikusten denean, berriz ere abiarazi. Zehatza eta metodikoa da IFTTT, eta errezetek 15 minututik behin egiaztatzen dituzte haien egitekoetan aldaketarik jaso den.
Webgunea erabil daiteke https://ifttt.com/ lekuan, edo sakelakoetarako aplikazio gisa deskargatu. Eskaintzen dituen aukerak izugarriak dira, eta muga bakarra bakoitzaren irudimenak ezartzen du.
Geokokapena baliatzen du
Azken eguneraketan sartu duten funtzio berriak ere molde guztiak apurtu ditu. Orain, iPhone edo Android sakelakoetako geokokapena balia daiteke errezetak sortzeko. Honela, etxera iritsi aurretik etxeko argiak pizteko edo jatetxe on baten aurretik pasatzean mezu bat jasotzeko programatu daiteke honezkero. Are gehiago, lanerako bidean egunero egiten diren denborak neurtu eta Google Drive zerbitzuko kalkulu horri batean gordetzeko, edo aireportu zehatz batera iristean norbaiti abisua bidaltzeko balia daiteke aurrerantzean.
iOS plataforman, GPS, telefono sarea, wifia edo bluetooth seinaletik eratzen da une oro posizioa. Nahiko berme da hori norbere kokapena beti zuzen neurtuko dela jakiteko, eta, haatik, IFTTT zehaztasunez ibiliko dela.
