Iruzkinak (0)

Webguneak arakatzearekin batera, posta elektronikoa da Internet zerbitzurik erabilienetarikoa. Mezu elektronikoak hainbat eratan idatzi eta irakur daitezke, sakelako telefonotik, webgune batetik nabigatzaile baten bitartez (webmail deitzen dena) edo mahaigaineko aplikazio batekin. Posta elektronikoa izenarekin baino, munduan zehar ezagunagoa da bere anglosaxoniar hitzarekin, “e-mail”. Eta bere ikurrik ospetsuena @ da, a bildua, ingelesez “at” hitzetik datorrena.

Posta protokoloak edo zerbitzuak

Posta elektronikorako protokolo izenak, ezagunak egingo dira noizbait posta elektronikoa irakurtzeko eta idazteko aplikazio batean, bere kontua konfiguratu behar izan duen erabiltzailearentzat. Izan ere, konfiguratzerakoan, galdetu ohi da ea IMAP edo POP3 kontua konfiguratuko dugun eta POP3 sarrera zerbitzaria edo SMTP irteera zerbitzaria bezalako kontzeptuak agertzen dira.

SMTP irteera zerbitzaria

SMTP da irteera zerbitzaria, alegia, posta elektronikoak bidaltzeko erabiltzen den protokoloa edo zerbitzua. Bere izena, Simple Mail Transfer Protocol hitzetatik dator, posta transferentzia protokolo sinplea, alegia. Normalean, protokolo honek 25 ataka erabili ohi du zerbitzarian.

Beste noizbait ere ataka logikoa zer den azaldu da Zibergelan. Baina, nolabait esateko, honek esan nahi du zerbitzari batean zerbitzu ezberdinak ostatzen badira, web, posta elektronikoa edo ftp, esaterako, bakoitzak erabiltzen duela ataka zenbaki bat. Ataka hauek 1024 zenbakira arte zehaztuta daude eta ezagunak dira, aldatu ahal badira ere zerbitzaria konfiguratzerakoan. Hala bada, honelako zerbitzu batera konektatu nahi denean, konektatzen den aplikazioak, helbidea eta ataka zehaztu behar du, ez soilik helbidea. Hau erabiltzailearentzat nahiko gardena da, aplikazioek egiten dutelako eta erabiltzaileak ez du jakiten zein portutara konektatzen ari den. Baina behin edo behin, portu hau zehaztuta dagoena ez bada, erabiltzaileak idatzi behar du.

POP3 sarrera zerbitzaria

POP3 da sarrera zerbitzaria, alegia, posta elektronikoak jasotzeko erabiltzen den protokoloa edo zerbitzua. Zerbitzu honek 110 ataka erabiltzen du eta bere izena Post Office Protocol hitzetatik dator, posta bulego protokoloa, alegia.

IMAP

IMAP, Internet Message Access Protocol hitzen akronimoa da eta 143 ataka erabiltzen du. Protokolo honek ahalbidetzen du jasotako posta elektronikoa kudeatzea zerbitzaritik, zuzenean. Hau da, jasotako posta karpetaka antolatzea edo irakurrita bezala markatzea ahalbidetzen du, baina ez norberaren ordenagailuan, baizik eta zerbitzarian. Honek ekartzen duen abantaila mugikortasuna da. IMAP posta kontu bat konfiguratu daiteke hainbat ordenagailutan, etxeko ordenagailuan, ordenagailu eramangarrian, bulegoko ordenagailuan. Eta bakoitzean egindako aldaketak, ez direnez lokalki egiten, zerbitzarian baizik, beste ordenagailu batean, posta kontu hori erabiliz gero, beste ordenagailuetan egindako aldaketak ere ikusiko dira, zerbitzaritik irakurtzen direlako. Beraz, oso egokia da, mugikortasun handia behar duten erabiltzaileentzat. Are gehiago, erakunde edo elkarte baten posta kontua bada, elkarte edo erakundeko pertsona ezberdinak ere sartu ahal dira ordenagailu ezberdinetatik. Orduan mezu bat, batek irakurtzen badu, edo erantzuten badu edo karpeta batean sailkatzen badu, besteek ikusiko dituzte aldaketa horiek guztiak.

Posta zerbitzu doakoak

Badaude hainbat gune posta kontu doakoak eskaintzen dituztenak, oso ezagunak badira ere, hemen aipatuko dira horietariko batzuk.

Microsoften posta zerbitzu doakoa Hotmail du izena eta webgune honetan eskuratu daiteke: http://www.hotmail.com. Honek webmail baino ez du eskaintzen, berez, ez du eskaintzen POP3, SMTP ez IMAP mahaigaineko aplikazio batean konfiguratzeko aukera. Norberaren postontzirako espazioa handitzen joaten da denbora pasa ahala.

Googleren GMail, http://mail.google.com/, hau euskaraz dago; Webmail zerbitzua eskaintzeaz gain, POP3 eta SMTP protokoloak zein IMAP konfiguratzea ahalbidetzen du mahaigaineko aplikazio batean. Norberak duen postontziaren espazioa handitzen doa denbora pasa ahala.

Euskalerria.org, http://www.euskalerria.org, euskara hutsez eskaintzen dira posta elektroniko kontu doakoak eta webmail eskaintzeaz gain POP3 eta SMTP konfiguratzea baimentzen du mahaigaineko aplikazio batetik.

Beste batzuk ere badaude, esaterako: Yahoo, http://mail.yahoo.com edo GMX, http://gmx.com/.

Iruzkinak (0)

Buzz-en bitartez, Google beste saiakera bat egiten ari da Internet sozialaren trena hartzeko. Googleren dema, micorblogging omen da kasu honetan, zeren eta zerbitzu honen bitartez, egoerak eta iruzkiank jarraitzaileekin partekatu daitezkeelako. Loturak eta argazkiak ere txertatu daitezke iruzkinetan, eta era berean erabiltzaileen bidalketetan iruzkinak ere egin daitezke.

Buzz GMailetik irakur daiteke, hara heltzen dira jarraitutako erabiltzaileen bidalketak eta bakoitzaren bidalketeen gainean egindako iruzkinak. Beste zerbitzuekin ere integratuta dago, Google Readerrekin, esaterako, horrela erraza da partekatzea Google Readerren irakurritako artikulu bat.

Androind eta iPhone sakelako telefonoetarako ere eskuragarri dago: http://buzz.google.com helbidean.

http://www.google.com/buzz

Iruzkinak (0)

Nolabait, bere garaian, irratiari gertatu zitzaion bezala telebistarekin, gaur egun, telebistari lehiakide sendoa atera zaio, Internet, alegia. Eta ez soilik jada, erabiltzaileek, bereziki gazteek, denbora dezente ematen dutelako Internetek eskaintzen duen informazioa ikusten edo komunikatzeko eskaintzen dituen tresnak erabiltzen. Baizik eta Interneten bitartez, era interaktibo batean eta publizitate etenik gabe, bideoak ikusi eta kudeatu ahal direlako. Youtube izan zen zerbitzu hori eskaini zuen lehenengoetariko webgunea eta ezagunenetarikoa da, baina, egun aukera zabala da.

Youtube

Esan bezala, Youtube izan da aitzindaria zerbitzu honi dagokionez eta oso ezaguna da. Bere helbidea hau da: http://www.youtube.com. Jakina den bezala, Googlek zerbitzua erosi zien sortzaileei. Oso era erraz batean bideoak igo eta kudeatu daitezke, igotako bideoak, flash erreproduzitzaile baten bitartez erakusten dira nabigatzailean, webgunetik bertatik, bideoa jaitsi behar gabe. Bideoetarako loturak jar daitezke norbanakoen zein entitateen webgune eta blogetan. Halaber, bideoak erreproduzitzailearekin txertatu daitezke webguneetan. Beraz, webgunearen jabeak hautatutako bideoak ikus daitezke bere webgunetik bertatik, Youtubera joan gabe. Bestetik, webgune garatzaileentzat APIa deritzon zerbitzua ere eskaintzen du. APIa da garatzaileen eskura jartzen diren metodo, funtzio edo programaziorako funtzionalitate ezberdinen multzoa, nork bere webgunetik Youtuberekin komunikatzeko.

Youtuben bideoak aurkitu daitezke bideoen deskribapenean eta etiketetan jartzen denaren arabera, gainera, Googlek erosi zuenetik, Googleren emaitzen artean ere Youtuberen emaitzak txertatzen dira.

Youtuberen erreproduzitzailea, oso erraza da, funtzio eta tekla gutxirekin. Bideoak igotzeko mugei dagokienez, 2 GB eta 10 minutu baino txikiagoak izan behar dira. Hala ere, handiagoak izanez gero, erabiltzaileek erabiltzen duten trukua da bideoa zatitan igotzea eta zati bakoitzari tituluaz gain, zenbaki bat jarri, ordena zehazteko. Kalitatearen aldetik, bideoak 320×240 eta 480×360 bereizmenekin grabatzen dira eta orain dela gutxi, Youtube, HD bideoekin probatzen hasi da.

Google Video

Google Video Youtube antzeko zerbitzu bezala jaio zen. Baina Youtube erosi ostean, Interneteko bideo bilatzaile bilakatzen joan da pixkanaka-pixkanaka, eta bideoak igotzeko eta kudeatzeko plataforma bezala Youtubera migratzen joan da. Hala, bada, Google Video-tik hainbat on-line bideo plataformatan bilatu daitezke bideoak, testua idatzita. Gainera, aurkitutako bideo batzuk Google Videotik bertatik ikustea ahalbidetzen du, beste batzuk ikusteko, beren jatorrizko webguneetara jo behar da. Hau da bere webgunea: http://video.google.es/

Euskaltube

Euskaltube da euskarazko plataforma bat, bideoak eta audioak kudeatzeko eta on-line ikusi edo entzun ahal izateko. 2007ko irailean sortu zen eta hau da web gunearen helbidea: http://euskaltube.com. Webgunea euskara hutsez izan arren, bideoen edukiak beste hizkuntza batzuetan, gazteleraz edo frantsesez bezala, aurkitu ahal dira. Gainera, bideoak atalka sailkatu daitezke eta audiotan zein bideoetan etiketak edo tagak jarri ahal dira bestelako datuekin batera, etiketen bitartez aurkitu ahal izateko. Beste zerbitzuetan bezala, bideoak edo audioak igotzeko, izena eman behar da webgunean. Erabiltzaile bakoitzak igo ahal du bere logoa edo argazkia bideoen datuen artean agertzeko.

Artikulu hau idatzi den momentuan, ia 5000 bideo dauzka Euskaltubek.

Blip.TV

Oso leku jatorra da bideoak igotzeko eta ikusteko. Ez daude Youtuben besteko mugak bideoak igotzeko orduan denboraren aldetik. Hainbat eratan igo daitezke bideoak, web ingurunean, mahaigaineko aplikazioaren bitartez, Mac Os X, GNU/Linux eta Microsoft sistemeetatik edo FTPren bitartez. Gainera, bideoak on-line ikusteaz gain jaitsi daitezke formatu ezberdientan. Audioak ere kudeatu daitezke gune honetatik. Norberaren webgunean, audio zein bideoak erreproduzitzailearekin txertatzea ahalbidetzen du. Hau da webgunearen helbidea: http://blip.tv

Telebista on-line zuzenean

Lievstream bezalako webguneetan, telebista on-line zuzenean sortzea ahalbidetzen dute oso baliabide ahulekin, webcam edo mugikor baten bitartez, alegia. Kanal ezberdinak sor daitezke eta kanal bakoitzean on-line telebista kudeatu daiteke. Hau da proiektuaren webgunea: http://www.livestream.com

Iruzkinak (0)

Acoolsoft PPT to Video da baliabide bat Power Point Aurkezpenak bideo bihurtzea era erraz batean ahalbidetzen duena.

Ordainpeko bertsio ezberdinak daude. Acoolsoft PPT to Video Pro, 49,95 $ balio du, Acoolsoft PPT to DVD bertsioak, 59,95 dolar balio du, Acoolsoft PPT to DVD Pro 79,85 dolarretan eros daiteke eta Acoolsoft PPT to flash bertsioak 39,95 $ balio du. Kasu honetan, Power Point aurkezpenak flash filma bihurtzen ditu.

Hala ere, doako bertsio bat jaitsi eta instalatu daiteke, horretarako Downloads atalean Free trials azpiatalera joan beharko da. Hor agertuko da Acoolsoft PPT to Video Free deskargatzeko aukera epe-mugarik gabe. Beste bertsioen probazko fitxategiak deskargatzea ere posiblea da, baina epe-muga batekin kasu hauetan.

Webgunea: http://www.acoolsoft.com

Iruzkinak (0)

Malenkoniatsuek, Windows 3.1 sistema eragilea on-line erabiltzeko aukera daukate jada. Horretarako http://www.michaelv.org/ joan beharko dira.

Hor, garaiko sistema eragilean zetozen hainbat aplikazio eta aukera erabil daitezke: MS-DOS prompta kontsolan komandoak exekutatzeko, kalkulagailua, ohar bloka, media player, irudi ikustatzailea, Dragamina, Internet nabigatzailea, etab. Sistemaren konfigurazio batzuk ere aldatu daitezke.

Web aplikazioa AJAX eta PHP-ren bitartez garatuta dago eta fitxategi sistema SQL-ren bitartez gordetzen da eta dinamikoa da. Nahiko lan txukuna da, shell-ean komando asko ez ibili arren oraindik.

Erabiltzeko, Mozilla Firefox 3 edo MS Internet Explorer 7 edo 8 gomendatzen da, nahiz eta MS Internet Explorer 6n ere ikusi ahal den. Eta 1024×768 baino handiagoko bereizmena gomendatzen da.

Iruzkinak (0)

Autodesk enpresak AutoCAD marrazki aplikazioa hodeira eramatea erabaki du. Beraz ingeniaritza eta arkitektura marrazkiak egiteko aplikazioa hemen dago eskuragai dagoeneko: http://butterfly.autodesk.com. Butterfly izena du Autodesk enpresaren on-line proiektuak. Ez da mahaigaineko aplikazioa bezain sendoa, baina, egia esan, oso ongi dago.

Flash-ez garatuta dago aplikazioa eta edozein nabigatzailetatik, flash gaituta eta Internet konexio batekin, eskuragarri dago, beraz. Honek ekartzen duen abantailetariko bat da sistema eragile ezberdinetan erabili ahal dela. Horrenbestez, MS Windows, GNU/Linux edo Mac Os X sistemetatik erabili ahal izango da.

Autocad fitxategiak gorde eta ireki daitezke, baina horretarako erabiltzaileak izena eman behar du webgunean. Izena emateko, posta elektronikoa, izena, abizenak eta pasahitza eskatzen da. Gainera, lizentzia ere onartu behar da eta proiektuaren posta zerrendan ere izena emateko aukera dago.

Iruzkinak (0)

Egun, pixkanaka-pixkanaka, ordenagailu batekin lan egiteko joera, lokaletik, hodeira bilakatzen doa. Alegia, gero eta gehiago erabiltzen diren aplikazioak, edukiak edo dokumentuak, Interneten daude, PC batean egon beharrean. Honek, mugikortasuna eta  berehalako erabilgarritasuna ematen du. Alde batetik, etxeko ordenagailutik, bulegoko ordenagailutik, ordenagailu eramangarritik, netbooketik, edo sakelako telefonoak bezalako gailuetatik, dokumentu, informazio edo askotan aplikazio bat eskuragarri eduki ahal du erabiltzaileak. Horretarako, Internet konexio bat baino ez da beharrezkoa. Dokumentu edo fitxategi ezberdinak, leku ezberdinetatik eta momentu ezberdinetan eskuragarri eduki eta landu ahal izatea ekartzen du honek. Eta batzuetan, beste erabiltzaile batzuekin partekatzea ere posiblea da, soilik irakurtzeko edo, idazteko baimenarekin, pertsona ezberdinen artean osatzeko.

Hala, bada, Google docs, oso baliabide jatorra da horretarako. Erabili ahal izateko, Google erabiltzaile eta pasahitza edukitzea eta http://docs.google.com helbidea Internet nabigatzailean idaztea besterik ez da behar. Google docs oraindik ez dago euskaratuta.

Dokumentuak edo idazkiak lantzea

Informazio mota ezberdinak kudeatzea ahalbidetzen du Google docs baliabideak. Dokumetuak edo idazkiak da haietariko bat. Dokumentu bat sortzeko, “Sortu berria” eta agertzen den menuan “Dokumentua” aukerari sakatu behar zaio. Hori eginda, on-line testu prozesagailua zabalduko da, MS Word edo Open Office Writer baino xumeagoa, baina, nahiko osatua, testu formateatuak sortzeko.

Behin dokumentua sortuta hainbat aukera eskaintzen ditu Google docs-ek: aldaketa historikoa ikustea; izena aldatzea; kopia bat sortzea; HTML, Open Office, PDF, RTF, MS Word edo testu bezala deskargatzea; inprimatzea. Hauek guztiak “Fitxategia” aukeretatik egin ahal dira.

Testua HTML eta CSS bezala ere editatu daiteke eta dokumentu orrialde edo web orrialde bezala ikus daiteke idazkia. Bestetik, marrazteko baliabide bat ere badu eta marrazkiak txerta daitezke honen bitartez. Halaber, loturak, irudiak, karaktere bereziak, taulak, iradokizunak, oharrak edo orrialde jauziak txertatu daitezke. Era berean, goiburukoa eta orri-oina ere jarri eta editatu ahal da.

Beste hizkuntza batzuetara ere itzul daiteke dokumentua eta ortografia zuzentzailea du, idazten den bitartean ortografia egiaztatzen joaten da. Aukera hauetan, hala ere, euskara ez dago eskuragarri. Hitzak, karaktereak eta esaldiak ere zenbatzen ditu eta beste datu estatistikoak ere ematen ditu, esaldiko batez besteko hitz kopurua, esaterako.

Aurkezpenak

Aurkezpenak ere sortu ahal dira Google Docs-en bitartez, horretarako “Sortu berria” botoiari sakatu eta irekitzen den menuan “Aurkezpena” aukeratu egin behar da. MS Power Point edo Open Office Impress aplikazioetan bezalako editore bat agertuko da orduan, aurkezpenak sortzeko diapositibaz diapositiba.

Behin sortuta, gainera, deskarga daiteke PDF, Power Point edo Testu formatuetan. Aurkezpenak on-line erakustea baimentzen du eta hizlariaren oharrak ere ikusgai jar daitezke.

Aurkezpenak egiteko gai ezberdinak konfiguratu daitezke, aurkezpenari itxura emateko eta edozein gai aukeratuta ere, atzeko irudia edo kolorea aldatu daiteke edozein momentutan.

Testuak, irudiak, bideoak, marrazkiak edo taulak txertatu daitezke. Era berean, posiblea da beste diapositiba batzuk inportatzea sortutako beste aurkezpen batzuetatik.

Kalkulu orriak

Kalkulu orriak egitea ere ahalbidetzen du Google Docs-ek, Excel, Open Office Calc eta CSV formatuetatik inportatu ahal dira datuak eta era berean, PDF, HTML eta lehen aipatutako formatuak bezala deskargatu ahal dira Google docs-en sortutako kalkulu orriak. Beste fitxategi motetan bezala, aldaketa historikoa ere ikus daiteke, eta hortik, kalkulu orrian aldaketa unean zegoen bezala erakusten da eta, era berean, zein momentutan aldatu den azaltzen da.

Kalkulu orriak sortzeko, “Sortu berriari” sakatu eta “kalkulu orriak” aukeratu. Hori eginda, MS Excel edo Open Office Calc bezalako aplikazioetan agertzen den kalkulu orria agertuko da. Hemendik, orri ezberdinak, kudeatu ahal dira, formulak, irudiak, marrazkiak, gadgetak eta grafikoak txerta daitezke. Formularioak ere sortu ahal dira eta taulak ordenatu nahi diren irizpideen arabera.

Formularioak

Formularioak galdeketekin ere sor daitezke eta posta elektronikoz bidali ahal dira edo webgune batean txertatzeko aukera ere eskaintzen du. Gero, ikus daitezke erantzunak era ezberdinetan

Beste aukera batzuk

Google docs-ek ahalbidetzen du on-line sortzen diren fitxategi ezberdinak karpetaka antolatzea eta hainbat fitxategi batera deskargatzea zip formatu konprimituan. Era berean, karpetak koloreztatu daitezke hobeto bereizteko. Eta orain dela gutxi, edozein fitxategi mota igotzeko aukera ere gaitu dute, beraz, fitxategi biltegia ere izan daiteke, irudiak edo pdfak gordetzeko, esaterako, beste dokumentu motekin batera.

Iruzkinak (0)

Twitter, webguneak edo blogak bezala, pertsona edo entitateen izaeraren beste isla bat bilakatzen ari da. Eta gero eta jende gehiago pasatzen da Twitterren erabiltzaile ezberdinen guneetatik, besteak beste, bilatzaileen hainbat emaitzatan agertzen direlako dagoeneko. Hala, bada, komenigarria da norberaren gustura moldatuta eta txukun edukitzea.

Tweety Got Back webgunean, bakoitzaren Twitter gunearen diseinua ederra jartzeko hainbat diseinu eskaintzen dira, 350 momentu honetan. Gainera, oso erraza da Twitterren gunean diseinua ezartzea, bakoitzak gustuko duen diseinuari sakatu eta Twitter kontuaren datuak eman besterik ez.

Diseinu gaiak aurkitzeko bilatzaile bat dator eta atalka sailkatuta daude.

http://www.tweetygotback.com/

Iruzkinak (0)

Google jaio zenetik, joan da pixkanaka-pixkanaka bilatzaileen eremua betetzen eta irabazten. Zerbait bilatu nahi denean amaraunean, Google da burura etortzen den lehenengo bilatzailea. Izan ere, munduko bilatzailerik erabiliena da, bilaketen %86 Googlen egiten dira. Baina, beste bilatzaile asko ere badaude Interneten informazioa aurkitu ahal izateko. Hala ere, Zibergela atalaren aurreko zenbaki batean Google bilatzailearen inguruko gaia jada garatu zenez, honetan, beste bilatzaile batzuk aipatuko dira.

Elebila, euskarazko bilatzailea

Elebilak Bing bilatzailea erabiltzen du bilaketa motorra bezala eta bilaketa egiten denean euskarazko emaitzak ateratzen ditu soilik. Nahi izanez gero, frantsesez edo gaztelerazko emaitzak ere atera ahal ditu, edo horrela aukeratuz gero, hizkuntza guztietan egiten du bilaketa.

Elebilak gainera, bilaketan ipinitako hitz edo hitzen sinonimoak erakusten ditu sinonimo horien arabera ere bilatu ahal izateko. Hitzaren esanahia ere kontutan hartuko da, alegia, adjektibo, izen edo aditza bezala.

Irudiak bilatzea ere ahalbidetzen du.

http://www.elebila.eu

Bing, Microsoft-en bilatzailea

Microsoftek atera zuen iazko ekainean bere bilatzaile berria, Bing. Microsoften aurreko bilatzaileak MSN eta Windows Live ordezkatu ditu Bingek. Bilatzaile honek, Interneten webguneak bilatzeko aukera ematen du baina era berean, irudietan, bideoetan, erosketetan, albisteetan eta mapetan bilaketak egin ahal dira. Gainera, atal hauetariko bakoitzean, zehaztu ahal dira, bilaketa ezaugarri bereziak, adibidez, irudiaren kolore nagusia eta tamaina edo prezio tartea erosketetan.

Bing bilatzailearen hobespenetan, nagusientzako edukiak iragaztea baimentzen du eta orrialdeko agertu behar diren emaitza kopurua.

Bing bilatzailearen itxura grafikoa ez da Google eta beste bilatzaileen bezain apala, eta egunero, munduko lekuren baten irudia du bilatzailearen atzealdean.

http://www.bing.com

Yahoo

Munduko estatistiketan Googleren ostean agertzen da bilatzaile hau, baina tarte handi batekin, 2009ko uztailean Microsoftekin sinatutako hitzarmenaren ondoren, Bing erabiltzen du bilaketa motorra bezala, baina bere interfaze propioa jarraitzen du izaten. Hitzarmenak 10 urteko iraupena du eta bere xedea Google-ri aurre egitea omen da.

Bilatzaile honek ere webguneetan, irudietan, bideoetan, albisteetan eta erosketetan ahalbidetzen ditu bilaketak, besteak beste.

http://search.yahoo.com/

Beste bilatzaile batzuk

Aipatutakoez aparte, beste bilatzaile asko daude, haien artean, All the Web http://www.alltheweb.com, AOL http://www.aol.com, ASK http://www.ask.com, edo Altavista http://www.altavista.com, aurrekoekin alderatuta nahiko erabilera kuota txikia daukate hauek, baina, ez dira ahaztu behar.

Specra, hainbat bilatzaileetan batera bilatu

Specra-k, Google, Yahoo eta Bing bilatzaileetan egiten du zehaztutako bilaketa, guztien emaitzak ateratzen ditu eta bilaketak bilatzaile bakoitzean duen posizioa ere adierazten du. Bilatzaile bakoitzari eman ahal zaio pisu bat eta horrela ateratzen da zerrenda ordenatuta bilatzaile bakoitzaren posizioa eta bakoitzari emandako lehentasuna kontutan hartuta. Pisu hau eman ahal zaio webgunearen azalean sartzen denean edo <<Open Control Panel>> aukeratik edozein momentutan.

http://www.specra.com

Bilatzaileen rankinga Market Sharen

Market Share-n argitaratu duten azken bilatzaileen rankingaren arabera, Google da erabiliena mundu osoan, ostean Yahoo eta Bing daude hurrenez hurren. Laugarren posizioan, Baidu dago, Baidu, txinatar hizkuntzazko bilatzaile bat da eta Pekin-en du egoitza. Bilatzaile honen ezaugarri nagusienetarikoa da mp3 edo wma bezalako audio fitxategiak bilatzeko aukera eskaintzen duela. Hori horrela da, txinatar estatuaren legeak zabalagoak direlako Interneten argitaratzen den musikarekin munduko beste estatu batzuenak baino. Bostgarren posizioan AOL dago, ostean, Altavista eta azken posizioetan Excite, All the Web eta Lycos aurkitzen dira.

http://marketshare.hitslink.com/search-engine-market-share.aspx?qprid=4

Iruzkinak (0)

Google City Tours proiektuak edozein hiritako eta herritako ibilbide turistikoak egiten ditu, helbide bat zehaztuta, helbide horretatik abiatuta zehaztutako hiri edo herrietatik ibilbide turistiko bat sortzen du, horretarako soilik Google Maps eta Googlen informazioaz  baliatzen da.

Zehazten ditu gainera ordutegiak, helbideak, eta baimentzen du leku bakoitzean erabiltzailea egongo den lekua zehatzago izan dadin Googlek proposatutako ordutegia, gainera.  Egun ezberdinetan banatzen du ibilbidea eta lekuak ezabatu edo bilatzaile baten bitartez gehitu daitezke eta ibilbidea zein ordutegia berkalkulatzen du. Proiektua oraindik garapenean dago eta Google Labs proiektuen artean dago, baina oso ideia ona izan daiteke.

http://citytours.googlelabs.com/

Iruzkinak (0)

Creative Commons lizentziak, ohiko copyright baino zabalagoak dira. Proiektu honen bilatzailearen bitartez, Creative Commons lizentzia duten  irudiak bilatu daitezke nahi den testua idatzita. Sprixik Openclipart.org-n, Flickr-en eta webgune honetako erabiltzaileek igotzen dituzten irudien artean bilatzen da.

Gainera, posiblea da baloratzea aurkitutako irudiak, baliagarriak izan diren ala ez edo bestela desegokiak diren. Honez gain, irudia deskargatzeko edo webgune batean jartzeko aukera eskaintzen du deskargatzeko estekarekin. Izena ematea ere posiblea da, horretarako erabiltzaile izena, pasahitza eta posta elektroniko helbidea bete beharko da. Hala ere, proiektu guztiak bezala Sprixi hobetu ahal da oraindik, esaterako, gutxieneko tamaina edo kolore nagusia zehaztu ahal izatea irudia bilatzeko.

http://www.sprixi.com/

Iruzkinak (0)

Egia esanda, ez da oso komenigarria flash orrialdeak sortzea, batez ere, soilik flashez eginda badaude, ez baitira oso irisgarriak, alegia, Google bezalako bilatzaileek edo itsuentzako nabigatzaileek zailtasun handiak dituzte irakurtzeko edo zuzenean, ezin dituzte irakurri. Honez gain, web astunak izaten dira eta bai banda zabalera dezente zein ordenagailuaren baliabide jatorrak eskatzen dituzte.

Hala ere, batzuetan bere erabilera badute eta ondo etor daitezke gauza batzuetarako. Hala, bada, Wix aplikazioaren bitartez, on-line eta era erraz batean sor daitezke flash orrialdeak proposatutako txantiloi batzuetatik abiatuta, gero irudiak eta ezaugarriak aldatzea baimentzen du norberaren gustura moldatu arte. Zerbitzua erabiltzeko izena ematea derrigorrezkoa da. Hala ere, posta elektronikoa, pasahitza eta erabiltzailearen izena, besterik ez da eskatzen.

http://www.wix.com/

Iruzkinak (0)

Blogak sortzeko Wordpress aplikazioaren 2.9 bertsioa liberatua izan da eta beraz, software honen bitartez sortuta dauden blogetan eguneraketak burutu daitezke jada. Bertsio honen berrikuntzen artean, irudi editore bat dakar kudeaketa panelean bertan integratuta. Editore honek argazkiak moztea, biratzea edo tamainaz aldatzea baimentzen du esaterako. Zakarrontzi sistema bat ere gehitu dute ezabatutako sarrerak edo iradokizunak berreskuratu ahal izateko eta on-line webguneetatik bideoak txertatzeko era erosoagoa ere gehitu dute, horrelako zerbitzu ospetsuenekin bateragarria.

http://wordpress.org/
http://wordpress.org/development/2009/12/wordpress-2-9/

Iruzkinak (0)

Filebox

Zenbait zerbitzu daude Interneten non fitxategiak gorde daitezkeen urrutiko zerbitzari batean edonondik Internet konexio baten bitartez eskuragarri eduki ahal izateko. Baina, edo ordaintzekoak dira edo ez dute eskaintzen leku handirik. Filebox, ordea 488 GBeko lekua eskaintzen du, alegia, gehienen disko gogorraren datu guztien kopia osoa egiteko modukoa,eta musu-truk. Hau, nahiko izango ez balitz, premium kontuak mugagabeko lekua eskaintzen du. Premium zerbitzuaren prezioak ere ez dira garestiak, 6,95 dolar hileko, 29.95 dolar urteko eta orain dagoen eskaintza baten bitartez, 49.95 dolar bizitza osorako.

Gainera, karpetak kudeatzeko eta fitxategiak partekatzeko aukera zein partekatzeko baimenak zehazteko aukera ematen du. Eta multimedia fitxategiak erreproduzitzeko zerrendak sortzea ere ahalbidetzen du. Hau guztia doako zein premium erabiltzaileentzat. Premium erabiltzaileek gainera, beren fitxategien jaitsierengatik ordainketak jaso ahal dituzte, fitxategiak azkarrago jaistea eta inolako mugarik gabe zein beste gehigarri batzuk ere lortu ahal dituzte..

http://www.filebox.com/

Iruzkinak (2)

Mozilla Firefoxen kasuan bezala, Google Chrome nabigatzaileak ere martxan jarri du webgune ofizial bat bere nabigatzailerako gehigarriak biltzeko. Webgune horretatik garatzaileek argitara ditzake bere gehigarriak eta erabiltzaileek era arin batean instalatu ahal dituzte Google Chrome nabigatzailean. Testuaren arabera bilatu daitezke edo berrienak zein gehien deskargatzen direnen zerrenda ikus daiteke. Aukeratutako gehigarrian klik eginda, azalpen luzeagoa eta instalatzeko botoia agertuko da.

Mac Os X eta GNU/Linux sistema eragileekin webgunea ikusten bada ere, oraingoz ez dago eskuragarri gehigarriak instalatzeko aukera. Beraz Google Chrome nabigatzailea MS Windows sistemetan erabiltzen duten lagunen eskura dago soilik.

https://chrome.google.com/extensions