Webgune batera jotzeko gizakiek, helbideak izenekin edo domeinuak idazten eta ulertzen dituzte, baina berez, helbide hauek zenbakiak dira, telefono zenbakiak izango balira bezala. Web zerbitzari bakoitzari dagokion zenbakia bakarra da Interneten eta IP helbidea du izena. Errazagoa denez gogoratzea helbide bat izen baten bitartez zenbakien bitartez baino, domeinuak erabiltzen dira zerbitzarien helbideak zehazteko IPak erabili beharrean. Hau ez da soilik gertatzen webguneen kasuan, beste zerbitzari mota batzuetan ere gertatzen da, posta zerbitzarietan, ftp zerbitzarietan, edo intranetetan eta sare lokaletan. Hala, bada, DNS zerbitzariek ordezkatzen dituzte nabigatzailean idazten diren internet domeinuak, webguneen izenak, alegia, webguneari dagokion IP helbidearekin. DNS zerbitzari hauen IP helbideak ISP-k (Internet Zerbitzu Hornitzailea), internet konexioa eskaintzen duen enpresak, alegia, eskaintzen dizkie bezeroei. Baina Googlek beste urrats bat ematea erabaki du, Amaraunaren bere konkista prozesuan. Eta DNS zerbitzari publiko batzuk eskaintzea erabaki du edozein internet erabiltzailek erabil ditzan. DNS zerbitzarien IPak 8.8.8.8 eta 8.8.4.4 dira eta ordenagailuaren sarearen konfigurazioan zehaztu behar dira erabili ahal izateko, ISParen DNSeen ordez.
Google profilak Open ID dira dagoeneko
Googleren profilak Open ID profil bihurtu dira dagoeneko, horrek esan nahi du Open ID identifikazioa erabiltzen duen edozein webgunetan, Googleren profilaren helbidea jarri baino ez dago, Googleren profilaren helbidea hauxe da: http://www.google.com/profiles/erabiltzailea, non erabiltzailea da bakoitzak Googlen duen erabiltzailearen izena. Profila eduki ezean, “Nire kontua” loturan klik egin daiteke Google-n behin saioa hasita GMail kontuarekin (Google zerbitzu guztietarako balio du kontu honek). Behin kontura sartuta, profila sortzeko aukera dago.
Open ID, izena eman behar den webgune askotan identifikazio bakarra egiteko saiakera da, Windows Live ID aren antzekoa, baina benetan erabilgarria izateko, oraindik lortu behar du hedapen handiago bat orain duena baino, agian Googleren urrats honek laguntzen du xede horretan.
Googlek Google Chrome Os bere sistema eragilea erakutsi du
Azkenik, Googlek erakutsi du bere sistema eragilearen ideia eta itxura. Sumatu litekeen bezala, funtsean, Chrome nabigatzailea, sistema eragilearen oinarria da eta aplikazio gehienak web ingurunean egikaritzen dira. Honek, neurri batean, aldaketa nabarmena da sistema eragileen munduan.
Chrome OS, hasiera batean, Netbooketan erabiltzeko pentsatuta dago eta urte bete barru banatzen hasiko da. Momentuz, sistema eragilearen bertsio librearen iturburu kodea eskuragarri jarri dute proiektuaren web gunean, http://www.chromium.org/chromium-os . Chromium OS da bertsio libre honen izena, eta probatzeko jaitsi eta konpilatu beharko da gailu birtual batean. Horretarako jarraipenak proiektuaren webgunean zehazten dira eta gailu birtuala instalatzeko edozein ordenagailutan, VirtualBox edo VMWare bezalako aplikazioak erabili ahal dira. Ez da gauza hutsala, oraingoz, sistema eragile hau proba nahi duenarentzat.
Google Chrome OSren azalpen bideoa:
Interfazea ikusteko bideoa:
