Api, 24
2014
android, Aplikazioak, E-Learning, Euskara, formakuntza, Ikastaroak, Mugikorrak, Sakelako Telefonoak, tabletak

Ariketak egin eta EGA titulua prestatzeko Android aplikazioa

Euskaldunen ahozko zein idatzizko trebetasuna ziurtatzen duen proba edo azterketa da EGA edo Euskararen Gaitasun Agiria. Proba eta azterketa desberdinak gainditzea eskatzen die ikasleei: atariko proba, azterketa idatzia eta ahozko azterketa. Bat egin ahal izateko aurrekoa gainditzea ezinbestekoa da.

unnamedEuskal Herrian EGA banatzen duten erakunde bat baino gehiago dago: Eusko Jaurlaritza Araban, Bizkaian eta Gipuzkoan; Nafarroako Gobernua, Nafarroan; eta Euskaltzaindia, Ipar Euskal Herrian. Europako erreferentzia markoan C1 mailarekin da bateragarria EGA azterketa.

Ikasleen amesgaizto bihurtzen dira orduan ikasi beharreko esamoldeak, esaera zaharrak, sinonimoak zein berridazketak. Bada, aurrerantzean hori guztia prestatzeko era berri bat izango dute. Izan ere, Kaixo! euskaltegiak EGA APP izeneko Android telefonoentzako aplikazioa sortu du bere hamargarren urteurrena ospatzeko.

Aplikazio horrek EGA azterketako aurreneko bi probak prestatzeko 4.000 ariketa baino gehiago eskaintzen ditu. Ordenagailuarekin eta fotokopia zaharrekin ez ezik, belaunaldi berriko gailuen bitartez ere egin ahal izango dira EGArako prestaketa lanak.

Oraingoz Android sakelakoetarako baino ez dago eskuragarri Google Play-n, baina laister beste sistemetara iritsiko dela iragarri dute sortzaileek.

Api, 17
2014
android, Aplikazioak, Apple

Liburutegiak App, Euskadiko liburutegi publikoen sare soziala

imagen-03Jakintza eta ezagutza bilguneak dira liburutegiak, baina baita zalapartari ihes egiteko leku lasaiak ere. Lanerako edo aisialdirako isiltasuna bilatzen dutenentzako txokoak dira. Hala ere, gehiago zabaldu ahal izango dira, beharbada, Liburutegiak aplikazio berriari esker.

Teknologia berriak integratuz eta liburutegi publikoen sarea baliatuz, ohiko kontsultak edo maileguak egitea ahalbidetzen du. Euskal Autonomi Erkidegoko sare osoa baliatu daiteke horretarako. Baina benetako xedea zerbitzua garai berrietara moldatzea du: sare sozial eran antolatu eta jendearen parte hartzea bultzatu, alegia. Ikus-entzunezkoak hautatzeko, aplikazioko iritziak aintzat hartu daitezke aurrerantzean. Izan ere, iruzkinak zein esperientziak partekatzea posible egiten du. Erregistratu ondorenean, erabiltzaile bakoitzari puntuazio bat ematen zaio, ospe sistema eran funtzionatzen duena. Honela, jardueren eta parte hartzearen arabera, puntuak pilatzen dira profilean. Esaterako, edukietan iruzkinak eginez eta baloratuz, liburutegietan check-in eginez, eta abar.

Puntako baliabideekin bateragarria da Liburutegiak aplikazioa, sakelakoaren edo tabletaren geokokapena baliatzen baitu; eta ez erabiltzailearen jarraipenerako bakarrik. Sareko liburutegi guztiak mapan adierazita agertzeko, edo uneko kokapenaren arabera nahi denera iristeko argibideak eskuratzeko ere balio du.

Gainera, liburutegietan programatzen ari diren ekintzak ikus daitezke. Zehaztasun maila ezberdinetan banatzen da informazio hori; hurrenez hurren, bakoitzaren lehentasunezko liburutegia, momentuko kokapenetik gertuen daudenak eta liburutegi sareko gainontzekoen artean.

Liburutegiek antolaturiko ekintzen berri jaso ostean, hala nahi izanez gero, horietan izena emateko aukera dago, baita gainera telefonoko egutegira esportatzeko aukera ere. Alerta bat programatzeko balio dezake horrek.

Katalogoa kontsultatzeko atala ere badu: tituluaren, egilearen eta hitz gakoaren bidez iragazteko aukera eskaintzen du. Bilaketa bertako liburutegien katalogora ere muga daiteke. Ondoren, liburu berrien hautaketa bat jaso daiteke, aipamen labur eta guzti. Eta horiekin batera, gehien mailegatutako dokumentuen sailkapena ikus daiteke, tipologiaren eta generoaren arabera ordenatua.

Aipamen berezia merezi dute blog eta bideoen kanalek. Horien bidez, liburutegi bakoitzaren blogak bisita daitezke, gertueneko egunerokoen berri izateko. Bideoen bidez, tutorial eta gida txikiak eskaintzen dira, informazio eta prestakuntza iturri gisa erabiltzekoak. Hemen ere kutsu soziala baztertu gabe, boluntarioek bideoak eskegi ditzakete, haien ezagutzak partekatzeko.

Eusko Jaurlaritzaren egitasmoa da Liburutegiak App. Euskaraz erabilgarri dago, Android zein iOS gailuetan eskuratu daiteke dagoeneko.

 

Api, 17
2014
android, Aplikazioak, Apple, Google, Hardware, kontzeptuak, Microsoft, Segurtasuna, Windows Phone

Autoak berehalakoan dira adimentsuak

mercedes-carplay-antiguoOrain dela gutxi iritsi ziren ordenagailuak autoetara. Kalkulu sinpleak egiteko eta informazio panelean adierazle batzuk erakusteko erabiltzen dira: dagoen erregaiarekin gasolindegira iristerako kilometro kopuruaren estimazioa, ehun kilometroka kontsumitzen den batez bestekoa, azkenekoz bete zenetik xahututakoa, gurpilen presioaren gorabeherak eta abar.

Konektibitatea areagotu eta funtzionalitate berriekin doitzeko asmoz, telefono garatzaileek autoak dituzte azkenaldian jomuga.

Gidaria eragotzi gabe, eta aisialdiko egiteko praktikoagoetarako, autoetan integratzeko sistemetan lanean dabiltza Apple eta Google. Besteak beste, telefonoa erosotasunez erabili eta haren aplikazioak egoera berrira moldatzeko egitasmoak dira. Microsoft ere batu zaie demara azken orduan, proposamen eta aliatu berriekin.

Haien eredua aurrekoekin alderatuz gero, irekiagoa izateagatik da ezaguna. Autoko pantaila konektatzen den sakelakoaren ispilua bezalakoa izatea nahi dute, inola ere moldatu gabe. Appleren proposamena bideratuagoa da, eta haiek erabakitzen dute gidariari zer komeni zaion; eskaintza mugatuagoa du, zurrunagoa.

Ez da aurreneko aldia automobilen sektorean Redmondekoentzat, aurretik ere Windows sistema eragilearen bertsio batzuk moldatu baitzituzten Ford, Kia, BMW, Nissan eta Fiat etxeentzat. Ahalegin berri honetan, baina, multimedia gailu ekoizle ezagunekin saiatuko dira arrakasta bilatzen: Alpine eta Pioneerrekin, hain zuzen. Zuhur ibili dira aukeraketa honetan, litekeena delako berandu iritsi arren gehigarrien merkatua bereganatzeko balio izatea. Autoetan lehentasunez agertzea zaila zaie, honezkero.

Hots, auto fabrikatzaile gehienek jada egin dute apustua Apple edo Googleren alde. Kasuren batzuetan biekin, gainera. Ferrari, Mercedes-Benz edo Volvo Appleren iOS 7 plataformaren alde agertu dira. Hiru etxeek iragarri dute datorren urtean kaleratuko dituztela CarPlay sistemarekin bateragarriak izango diren hainbat modelo. Beste hainbeste egitekotan dira Honda, Hyundai, BMW, Ford, Jaguar, Land Rover, Kia, Mitsubishi, Missan, Peugeot, Toyota, Subaru eta General Motors. CarPlay da Applek garatu duen estandarra haien iPhoneak konektatzeko, eta, besteak beste, Siri ahots sistemaz kontrolatzeko hainbat egiteko. Siri zer den jakiteko: http://zibergela. bitarlan. net/2012/09/24/ahotsezko-agintea-telefonoetan/.

Autoko segurtasuna 

Microsoften aurkezpenean, autoaren altzamahaian kokaturiko ukipenezko pantaila bat erakutsi zuten; ordenagailu eta tabletetako Windows berrienen erara, koloretako laukiz osaturiko interfaze edo itxurarekin. Eskuinera irristatuta pantaila nagusia eta ondorengoak agertzen dira, bata bestearen atzetik. Sistemak zalantza handiak sortu zituen, batik bat erakustaldian bertan behera geratu zitzaielako. Hala ere, autoan erabiltzeko diren aplikazioen atal bat bereizteak oniritzia jaso zuen.

Lehia honetan software garatzaileak ere busti behar, eta aplikazio ezagunen artean, guztiekin bateragarri izateko interesa erakutsi du Spotify musika zerbitzuak.

Deigarria da Googleren asmoa, pantaila eta telefono arteko elkarreragintza baino zerbait sakonago egitekotan baita. Nvidia tabletentzako txip fabrikatzailea batu zaie egitasmora, eta autoa gaitasun informatiko propioz doitzekotan dira. Kanpoan eta barruan sentsoreak ezarri eta gidatzea seguruagoa egingo omen dute. Android integratuko dute, noski, eta Open Automotive Alliance barruan dauden hainbat marken babesa izango dute. Horien artean, batzuk Applerekin akordioa duten Audi, General Motors, Honda edo Hyundai.

1 2 3 4 5 6 … 51