Urr, 17
2013
Google, Sare sozialak eta Microblogging, Segurtasuna

Googleko informazio pertsonala, iragarkietan

Google kontua edukitzean hainbat zerbitzutarako sarbidea eskuratzen da. Adibidez, kontu berdinari lotuta eros daitezke telefonorako aplikazioak Google Play dendan, geroago mezu elektroniko bat bidali Gmail posta zerbitzutik, zein Google+ sare sozialean argazki bat partekatu lagunekin. Joan den asteburuan hasita, hasiera orrian urdin koloreko agerkari bat jasotzen hasi dira erabiltzaileak konektatzean; azken orduko baldintzen eguneraketa baten berri ematen du. Askok oharkabean mezuari kasurik egin gabe zereginetan jarraitu duten arren, berdin eragiten die: haien profileko argazkia, izena eta iruzkinak edo komentarioak erabil ditzake Googlek, eta Interneteko iragarkietan erantsi.

Beste modu batean esanda, nabigatzailean norbaitek produktu baten izena sartzerakoan, bilaketarekin erlazionaturiko iragarki emaitzekin norberaren informazioa ager daiteke. Jakinaren gainean egotea gutxienekoa da, behintzat, sorpresak saiheste aldera.

Esan beharrik ere ez dago, sare sozialek erabiltzaileengandik informazio ederra biltzen dutela, inolako etenik gabe. Bakoitzaren eguneroko jardunaren berri badute, baita atsegin denaren edo egiten diren erosketei buruzkoa ere. Hain zuzen ere, horregatik dira saltzaile eta iragarleentzat hain baliotsuak datu horiek guztiak. Lehenengo mailako informazio iturri dira: interesik gabe kontsumitzaileek zuzenean emandako aholkuak dira, eta eraginkorragoak dira iragarkirik arrakastatsuenak emandako mezua baino.

Iragarkiak, beste izen batekin

Gomendio partekatuak da sistemari jarritako izena. Eta labur esanda, erabiltzaile bakoitzaren jardueran bilatu eta produktu bat probatu dutenak lortzean datza. Ondoren, emandako iritzia edo puntuazioa positiboa bada, produktu horren bilaketa egiten dutenei publizitate gisa txertatuko dizkiete haren profileko aurpegia, egindako iruzkina, jarritako izar kopurua, edo, besterik gabe, +1 egin dioenaren datua.

Facebook programak bere garaian antzeko ekintzengatik jaso zituen kritiken antzera, Googleri ere askorik gabe hasi zaizkio kolpeak etortzen. Ubeldurak agertu orduko, baina, bizkor atera dira esatera Google+ sarean pribazitateari dagozkion ezarpenak behar bezala jarrita dituenari ez diola larregi eragiten eguneraketak. Behintzat, norbere informazioa lagunekin bakarrik partekatzeko aukera egin dutenen gomendioak, lagunen zirkuluko kideen emaitzetan bakarrik agertuko dira, mundu osoko erabiltzaileen emaitzetan agertu ordez. Beraz, gutxi gorabehera, lagunek gustuko dituzten produktuak kontsumitzera bultzatzen duen sistema da.

Nola eragotzi norbere irudia

Dena dela, partekatzen diren gomendioak izan edo ez, iragarkiak direla nabaria da. Hortaz, parte hartu nahiko ez dutenetan pentsatuta helbide bat prestatu dute: https://plus.google.com/settings/endorsements.

Ezarpen horren inguruko informazio xehetuagoarekin batera, desgaitzeko aukera azaltzen da. “Nire jardueretan oinarrituta, Googlek nire izena eta profileko argazkia erakuts ditzake iragarkietan agertzen diren Gomendio Partekatuetan” aukera desgaitu eta Gorde botoia sakatuta, hain zuzen. Googleren neurri berria, datorren azaroaren 11an jarriko da indarrean.

Urr, 10
2013
android, Aplikazioak, Apple, ebook, tabletak

Readmill irakurgailu soziala, Android sistemetan ere bai

readmill2Gizakia animalia soziala dela esaten da, eta horrela frogatzen dute erabiltzaileek behin eta berriro. Telefonoetarako Readmill liburu digitalen irakurgailuaren berezitasuna horretan datza, eta hortik ere bere arrakasta. Ohiko klixeak alboratu, eta irakurketa esperientzia soziala bihurtzen da horrela, azpimarratuak partekatu, lekuan lekuko iruzkinak egin, edota gomendioak egiteko aukerekin.

Sinplea da: posta elektronikoa edo Facebook kontuaren bidez erregistratu, eta jarraian, irakurtzen den liburu bakoitza norbere profilean erakusten has daiteke. Nabarmendu nahi diren testu zatiak ere azpimarratu, eta Twitter edo Facebook-era bidaltzea dago; deigarria egiten den pasarte hori lagun artean goraipatzeko.

Liburuak eskuratzeko bi era

Liburuak eskuratzeko lehen bidea aplikazioak daukan irakurketa klasikoen datu base erraldoian bilatzea bada ere, norberak lokalean dituen liburu digitalak kargatzerik ere badago, Readmill-en webera bidalita: https://readmill.com/library. PDF eta ePub formatuak onartzen dituela jakinda, beste behin ere hodeia baliatuko da bakoitzaren liburutegia osatzeko, eta ondoren, aplikazioa dagoen iPad edota telefonoetan aldi berean agertzeko.

DRM daramaten liburuak edo gabekoak —alderik gabe— igo daitezke; kopiaren kontrako neurrien edo DRM berri ez dutenek: http://zibergela.bitarlan.net/2013/06/20/kopiaren-kontrako-neurriak/.

Gaian adituek ez direnek jakin dezatela P2P teknologiak erabiliz liburu trukerako bilguneak daudela amaraunean. http://epubgratis.me/ gunea horietako bat da, eta bertan, bakoitzarenak partekatu daitezke, edo berriak jaso. Era berean, liburuen banaketa etxeak dagoeneko hasi dira sartzen estekak haien atarietan, erositako liburuak Readmill aplikazioan zuzenean sinkronizatzeko.

Telefonotik gehiago irakurtzen da tabletatik baino

Irailera arte Apple gailuetarako bakarrik zegoen eskuragarri Readmill. Arduradunak komunitatearen etorrera ona aintzat hartu, eta beste plataformetara hedatzeko merkatu analisian ohartu ziren jendeak telefonoak erabiltzen dituela irakurtzeko, eta ez tabletak. Ondorioz, irailaren 18an kaleratu zuten bertsioa Android euskarria duen telefonoetarako dago bakarrik eskuragarri. Bibliofilo berrien aplikazio estimatuena dena App Store-n aurkitu daiteke iPhone nahiz iPad-entzat, baina Google Play dendan, sakelakoentzat soilik aurki daiteke.

Urr, 10
2013
Internet, Telebista

Pantaila kurbatua eta 4K-ko bereizmena duen telebista, mesedez

Sony-4K-TVBeste hainbat arlotan gertatzen den legez, telebisten garapenak ere erritmo geraezina darama. Full HD telebistak merkatu eta etxeetan sartzen hasi direnean, oinordeko modernoagoak heltzear daude. Akituta geratu dira 1080p bereizmeneko Blu-Ray pelikulak eta berriaren ateetan dauden bideo jokoen belaunaldia. Full HD estandarra egonkortzeko zain egon gabe, garatzaileek berrikuntza gehiago dakartzate erosleak zorabiatzen dituzten eskaintzetan. Smart TV edo Interneterako sarbidea, hiru dimentsioko edukia erakusteko gaitasuna… azkenean, etxerako aukera egiteko orduan, prezioari bakarrik begiratzen diote gehienek.

Berehalako telebistak: pelikulak, ondo; zuzenekoak, mantsoago

Irudi digital bat handitzerakoan, edo zoom egiterakoan, ikusten diren karratu txikiei deitzen zaie pixel. Beraz, gero eta pixel gehiago, hainbat eta hobe; kalitate hobea lortzen da, eta unitate txiki horiek hor daudela ere bereiztea zailago da. Bereizmen dantza horretan ordena jartze aldera, orain puntakoak diren Full HD pantailek 1920×1080 pixel edo 1080p dituzte. 1280×720 pixelekoa edo 1080i da bereizmen handia deitzeko minimoa, edo HD Ready panelek ezarria. DVD kalitate xumeagoek adinako bi: horiek 720×420 pixelekoak dira. Orain datorren teknologiak lortu du 4.096×2.160 pixeleko bereizmena, eta hortik dator izena: 4K.

4k_comparison

Begi bistakoa da aurrerakuntza, edo ez hainbeste: 4K-ko bereizmenari esker, pantailaren pixelak ikusteari utziko dio giza begiak, eta zinema aretoen bizipenetik gertuen dagoen esperientzia lortu, kalitatean eta tamainan. Izan ere, hainbeste pixel sartzeko, pantailek hazi beharra daukate ezinbestean. Dagoeneko erakutsi diren batzuk, 90 hatz-bete izateraino. Hori jakinda, ez dirudi oso zentzuzkoa Japoniatik datorren 8K estandarra, eta are gutxiago, hori ezartzeak dakartzan eragozpenak bere gain hartzeak.

Aurrekoa egonkortu barik, berriak eduki eskasia oztopo

Garestiak diren kamera bereziak behar dira 4K eran grabatzeko, eta dagoeneko ekoizpen handiak gisa honetara filmatzen diren arren —Tarantino-ren Django, Nolan-en Batman, eta Jackson-enHobbit, hainbaten artean—, oraindik telebistako zuzeneko emanaldiak formatu horretan ikusteko asko falta da, inbertsio latza behar dute eta. Alor horretan, erronka handia da, eta arazoak kateatuak daude: hasteko, LTD seinalearen banda zabalerak ezin dio eutsi eskaera berri horri, eta konpresio era berri bat asmatuta ere, egungo sarearen espektro erradioelektrikoari eusteko, etxeetako kodifikatzaile guztiak aldatu beharko lirateke seinale hori berriz iruditan bihurtzeko. Beste hainbeste gertatzen da zinema aretoekin, batzuk jada eguneratzen hasi badira ere. Hala ere, pelikula zaharrek ez dute eragozpenik izango: 35 milimetrotan grabatutako zintetan analogikotik bihurtzen denez, edozein pelikula bihur daiteke 4K formatu digitalera eskaneatuta.

Sony hasi da industria zirikatzen, eta, dagoeneko, Hollywood-eko filmetan 4K edukia ekoizten hasteaz gain, Blu-Ray batek ematen duen Full HD bereizmena 4K formatura bihurtzen duten gailuak eta puntako 4K telebistak erraldoiak merkaturatzeari ekin dio. Urrutirago gabe, uda honetan Berlinen ospatutako IFA 2013 azokan erakutsi zituzten haien eta beste konpainien apustuak; Samsung, LG, Panasonic, Philips eta Sonyk berak erakarri zuten arreta. Hara bildu zirenek hainbat proposamen ikusteko aukera izan zuten, alfonbra gorriaren gainean. Izarrak oraingoan, prezioak: 5.000 eta 15.000 euro artekoak.

1 2 3