Abe, 27
2012
Amazon, android, Apple, Hardware, tabletak

Tableta erosterakoan aintzat hartzekoak

Tablet bat ordenagailu eramangarri bat besterik ez da. Beste edozein ordenagailuk eskaintzen dituen aukera berberak balia ditzake erabiltzaileak, baina ukimen bidez dabilen pantailaren edo touchscreen-aren bidez. Haien erabilpena intuitiboagoa da. Edozein eratako dokumentutara sarbidea emateaz gain, Interneten erabilpen bizkorragoa eta askeagoa izateko ere bide ematen dute. Edozein ordenagailu eramangarrirekin alderatuta, begi bistakoa da arinagoak direla eta edonora eramateko erosoagoak. Leku handirik ere ez dute behar. Azken belaunaldiko teknologia darabilten gailuak dira, erabiltzaileei egunerokoa errazteko eta produktibitatea areagotzeko xededunak; ordenagailu baten onura berberak eskuragarri jartzen dituzte, baina arinagoa den gailu batean.

Oro har, tablet batetik egin daitezkeen oinarrizko ekintzak ondokoak dira: liburu elektronikoen irakurketa, dokumentuak ireki eta editatzea, Interneten ibiltzea —wifi bidez, USB modem edo 3G konexio propioaz—, telefono deiak egitea, musika eta bideoak erreproduzitzea, GPS bidezko geokokatzea, bideo konferentziak egitea, jokoetan aritzea, argazkiak ateratzea eta bideoak grabatzea, besteak beste. Hori guztia egiteko lehentasunezko programak izateko —telefonoetan gertatzen den bezala—, euskarri bakoitzari dagokion denda birtualera (Google Play edo AppStore-ra) jo daiteke. Horrela jaitsi ahalko dira nahi diren aplikazioak, egunero hazten doan aplikazio edo App aukeraz baliatuta. Ez da harritzekoa, beraz, azken belaunaldiko sakelakoentzat aplikazio bat kaleratzean, tabletentzat dagokion bertsioak garatzea. Doikuntza txiki batzuk eginda eskuragarri jartzen dituzte denda berean bertan.

Laburbilduz, tableten indarra eramangarritasunean eta erabilerraztasunean datza. Edozein ekintza egitea errazten dute hatzen mugimendu soilen bidez, beste ezeren beharrik gabe.

Tableten lehia

2010eko udaberrian, smartphone baten eta ordenagailu eramangarri baten arteko nahasketa proposatuz iPad deituriko tresna atera zuten mundura. Applek abiarazi zuen gurpil zoroa, eta hainbesterainokoa izan zen iraultza, ezen bi urte geroago ezinezkoa dela merkatuan dauden tablet guztien zerrenda egitea; are gutxiago haien arteko konparaketa bat. Kaliforniako erraldoiaren tabletaren nagusitasunari aurre egiten diotenen artean Hego Koreako Samsung Galaxy Tab aipa daiteke. Baina esan bezala, etxe asko dira bakoitzak bere produktuarekin lehiatzen ausartutakoak: Google, Sony, Motorola, HP, LG, Asus, Lenovo, Archos, Toshiba eta Acer etxeek ere haien tableta propioak dituzte. Teknologia enpresa gehiago saiatu dira tableten munduan sartzen, baina ezinak bultzatuta, bertan behera utzi dute ahalegina. Softwarearen aldetik egurra jasotzen hasi bada ere, hardware kalitatearen aldetik ez dago Appleri aurre egiterik oraingoz. Izenak jartzearren, bada laugarren belaunaldiko iPad-a edo iPad Retina Display (499 euro), Galaxy Note 10.1 (529 euro), Asus Trasformer Pad Infinity (579 euro) eta Nexus 10 (399 euro). Horiek dira oniritzirik gehienak jasotzen ari direnak.

Egun hala ere, bi segmentutan bereizten dira tabletak, pantailaren tamainaren araberakoak: 10 hazbetekoak eta 7 hazbetekoak. Hasieran, estandarra zen lehena, baina Appleren nagusitasunari aurre egin ezinik, beranduago agertu ziren bigarren multzokoak; hein batean, liburu elektronikoen bihurketak ziren. Era honetan, Google-n Nexus 7, Amazon-en Kindle Fire HD eta Samsung Galaxy Tab 2 dira esanguratsuenak, guztiak kalitate ezin hobeagokoak. Ezin ahaztu, baina, berriki Applek alternatiba gisa emandako erantzuna, segmentu berrian ere haien legea ezartzeko asmotan: iPad Mini-a.

Hasieran lehia zena jada tableten guda gisa ezagutzen hasi da, eta hain urte gutxiren buruan izandako garapenari begiratuta, ez da burua apurtu behar tabletak laster ordenagailuak baino gehiago salduko direla irudikatzeko. Erakusgarri gisa: aurten 117 milioi ale saldu dira mundu zabalean.

Aintzat hartu beharrekoak

Jendearen ohiturak moldatzen doaz garai berrietara, eta orokorrean nahiago izaten da iraungo duen kalitatezko produktu bakarrean gehiago gastatzea, merkeagoak eta eskasagoak direnak erosten baino. Eta tabletak garestiak dira; baina halako bat aukeratzean gogoan izatekoa da betiere merkeak garesti irteteko joera daukala. Patrikaren irizpidea bakarra izatea motz suerta daiteke azkenean. Pantaila txikiagokoa dutenak merkeagoak izan ohi dira pantaila handiagoa dutenak baino. Telefono bat izatetik gertuago daude pantaila txikikoak: erosoagoak eramateko, deserosoagoak lanerako.

Hardwarea irizpide ona da aukeratzeko garaian, eta bertan kalitatea edo baliabide teknikoak hausnartu beharrekoak dira. Oro har, lau edo bi nukleodun prozesadoreak erabili beharko lukete, eta RAM aldetik Gb bakarra eta biren artean edukitzea izango litzateke gomendagarriena. Pantailaren bereizmena ere garrantzitsua da, eta ziurtatu 1280×800-tik gorakoa dela egiten den aukera, kalitatezko irudiaz gozatu nahi bada behintzat.

Bestalde, hardwaretik haratago, pertsonalizazioen zalea den erabiltzaileari mesedegarriagoa suertatuko zaizkio Android euskarria darabilten tabletak, iPad edo Kindle Fire gailuen sistemak itxiak baitira. Ondorioz, ez diote erabiltzaileari sistemaren itxurari aldaketarik egiten uzten.

Abe, 27
2012
android, Aplikazioak

PintxoPotter, eskuragarri Android sakelakoetan

Askotan esan izan da dastamena euskaldunentzat zentzumenik gogokoena dela. Ospea izateari lotuta joan ohi da, eta txoko asko dira inguruotan pintxo eskaintza ederrekoak. Zalantzarik gabe, Donostia eta Pasaia horien artean daude. Hemendik aurrera patrika asko astindu gabe eta dastamenaz gozatu nahi duenak bi leku horiek bisitatzeko gida oso bat dauka eskuragarri. Android euskarria erabiltzen duten sakelako telefonoetan deskargatu besterik ez dago aplikazio berria: PintxoPotter. Geokokapena pintxoen eta poteoaren zerbitzura jarri dute.

Oraingoz BETA fasean dagoen aplikazioa da. Motz gera liteke geografikoki, baina hasten dagoen edozein egitasmoren antzera, lankidetzarako deia egin dute Lautech Kooperatibakoek. Izan ere, haien webgunetik gidan sartzeko leku gehiagoren bila dabiltza, eta horien jabeak egitasmora batzera animatu nahi dituzte pintxo-pote eskaintza berriak batzeko. Laster gabe, herri eta hiri gehiago ere batuko dira, beraz.

PintxoPotter aplikazioaren menua ondorengoa da: asteko egun bakoitzeko eskaintza berezien egutegia adierazteaz gain, taberna bakoitzaren deskribapena eta argazki bat ere erakusten ditu. Sare sozialekin integratuta dago, Twitterren nahiz Facebooken norberaren eguneraketak jaso daitezke. Pintxo-pote gogokoen zerrendak osa daitezke, eta beranduago kontsultatu. Azkenik, smartphone-ren geokokapenari esker, gertu dauden txokoen eta eskaintzen berri emango du aplikazioak automatikoki. Hori guztia Internet konexiorik gabe egiteko gai ere bada gainetik, lehendabiziko aldian kargatutakoa gordetzen baitu geroko. Zer esanik ez eskatzen duten bultzada jasoz gero, kontuan izateko mauka iturria izango dela aplikazioa etorkizunean.

PintxoPotter, Google Play dendatik jaitsi ahal da, doan. Informazio gehiagorako, haien webgunera jo daiteke: http://pintxopotter.com/eu/.

Abe, 20
2012
AR, kontzeptuak

Errealitate Areagotua: Munduaren beste ikuspegi bat

Errealitate birtualean edo guztiz birtuala den mundu batean, erabiltzailea erabat murgilduta dago mundu horretan, eta ez dauka inguratzen duen ingurune errealaren noziorik. Tankerako murgiltzea lortzen da buruan jartzen den ikusgailu berezi batetik ordenagailu bidez sortutako irudi multzo bat erakutsita. Teknologia horren ekipamendua aginterako gailu zein zentzuak suspertzeko sentsoreek osatu ohi dute.

Errealitate areagotuaren teknologiarekin, ordea, erabiltzaileak mundu erreala ikusten duen bitartean, alegiazko irudiak mundu horretan gainjarrita agertzen zaizkio; hau da, errealitatea eta elementu birtualak espazio berean bizikide bihurtzen dira. Alderantzizko murgiltzea lortzean datza, beraz: errealitatean txertatzen diren elementu birtualak nabarituko dira inguruan soilik, betaurreko berezi edo smartphone-ren pantailen bidez.

Aisialdirako eta ikuskizunetarako sortzen diren pareko teknologia gehienak bezala, egunerokotasunean barneratu den beste aurrerakuntza bat bihurtu da errealitate areagotua; eta egun publizitatea, geokokapena edo beste askotariko xedeetarako erabiltzen bada ere, txikienentzako bideo jokoetan eman zitzaizkion lehendabiziko erabilpenak: Sony Play Station Portable eta PSP euskarriaren Invizimals jokoa, kasu.

Teknologiaren potentziala nabarmena da; baina ezingo da inor harritu orain artean irudimenari edo zinemari esker bizi ziren momentuak berregiten badira azken belaunaldiko edozein gailutatik. Dagoeneko, begiak irekita amesten duen hori ez da bakarrik egongo, inguruan hiria bere horretan dagoen artean, pantaila batera begiratu eta martetarren erasopean dagoen hiri bera ikustea posible baita. Bideo jokoez gain, era askotarikoak dira etekina ateratzen dioten aplikazioak: GPS nabigazioa, meteorologia, bidaia gidak, hezkuntza, kirola, turismoa, zuzeneko itzulpenak, laguntzak, topografia edo aplikazio militarrak dira, besteak beste, erabilpena ematen diotenak.

Atari adituak zerrenda egin zaleak dira, eta errealitate areagotua darabilten aplikazioak ez dira salbuespena haientzat. Jakin-mina daukanarentzat, esteka parea: iPhone-an, http://www.iphoneness.com/iphone-apps/best-augmented-reality-iphone-applications/ eta Android-en, http://www.androidauthority.com/best-augmented-reality-android-apps-93950/.

Teknologiak, gailuek baldintzatuta

Oro har, multzo bitan bereiz daitezke errealitate areagotuko aplikazioak, sakelakoetan eta tabletetan exekutatzen direnak, alde batetik, eta betaurrekoetan egiten direnak, bestetik. Azken horietan, aplikazioa ordenagailu batean exekutatzen da; aurrekoetan, ordea, gailuaren prozesadorean egiten dira kalkuluak, hau da, hardware mugatuago batean.

Telefono euskarrietan eta tabletetan, haiek dakartzaten sentsoreak erabiltzen dira —azelerometroa, giroskopioa, GPS, kamera, eta abar— eta erabiltzailearen aurrean modelo birtuala non gehitu zehazten da horrela, ingurura egokituta. Azken horri, tracking deritzo. Halaber, sentsore horiekin egindako tracking-a ez da idealena, eta horregatik, orokorrean modelo birtual horiek 2Dkoak dira. 3Dko modelo bat gehitzeko, errealitatearen tracking oso zehatza behar da.

Hasiera batean, markatzaileak erabiltzen ziren erreferentzia gisa. Markatzaileak izan daitezke, lurrean kokatzeko fitxa batzuk, edo orri zuriak. Oraindik erabiltzen dira, baina esan daiteke atzean geratzen ari direla, logikoena inguruan markatzailerik jarri behar ez izatea baita.

Harira itzuliz, tracking zehatza egiteko, onena dudarik gabe ikusmen artifiziala erabiltzea da, hau da: gailuek dakartzaten sentsoreak eta ikusmen algoritmoak gailua munduan kokatzeko une oro. Baina teknika horrek prozesamendu ahalmena eskatzen du, eta esan bezala, sakelakoek prozesamendu makalagoa daukate ordenagailu konbentzionalekin alderatuta. Orduan, lan-karga gutxiagotzeko baina tracking zehatza erdiesteko, bi tekniken arteko nahasketa egiten da; sentsoreak eta ikusmena, biak batera erabiliz.

1 2 3