Api, 17
2014
android, Aplikazioak, Apple, Google, Hardware, kontzeptuak, Microsoft, Segurtasuna, Windows Phone

Autoak berehalakoan dira adimentsuak

mercedes-carplay-antiguoOrain dela gutxi iritsi ziren ordenagailuak autoetara. Kalkulu sinpleak egiteko eta informazio panelean adierazle batzuk erakusteko erabiltzen dira: dagoen erregaiarekin gasolindegira iristerako kilometro kopuruaren estimazioa, ehun kilometroka kontsumitzen den batez bestekoa, azkenekoz bete zenetik xahututakoa, gurpilen presioaren gorabeherak eta abar.

Konektibitatea areagotu eta funtzionalitate berriekin doitzeko asmoz, telefono garatzaileek autoak dituzte azkenaldian jomuga.

Gidaria eragotzi gabe, eta aisialdiko egiteko praktikoagoetarako, autoetan integratzeko sistemetan lanean dabiltza Apple eta Google. Besteak beste, telefonoa erosotasunez erabili eta haren aplikazioak egoera berrira moldatzeko egitasmoak dira. Microsoft ere batu zaie demara azken orduan, proposamen eta aliatu berriekin.

Haien eredua aurrekoekin alderatuz gero, irekiagoa izateagatik da ezaguna. Autoko pantaila konektatzen den sakelakoaren ispilua bezalakoa izatea nahi dute, inola ere moldatu gabe. Appleren proposamena bideratuagoa da, eta haiek erabakitzen dute gidariari zer komeni zaion; eskaintza mugatuagoa du, zurrunagoa.

Ez da aurreneko aldia automobilen sektorean Redmondekoentzat, aurretik ere Windows sistema eragilearen bertsio batzuk moldatu baitzituzten Ford, Kia, BMW, Nissan eta Fiat etxeentzat. Ahalegin berri honetan, baina, multimedia gailu ekoizle ezagunekin saiatuko dira arrakasta bilatzen: Alpine eta Pioneerrekin, hain zuzen. Zuhur ibili dira aukeraketa honetan, litekeena delako berandu iritsi arren gehigarrien merkatua bereganatzeko balio izatea. Autoetan lehentasunez agertzea zaila zaie, honezkero.

Hots, auto fabrikatzaile gehienek jada egin dute apustua Apple edo Googleren alde. Kasuren batzuetan biekin, gainera. Ferrari, Mercedes-Benz edo Volvo Appleren iOS 7 plataformaren alde agertu dira. Hiru etxeek iragarri dute datorren urtean kaleratuko dituztela CarPlay sistemarekin bateragarriak izango diren hainbat modelo. Beste hainbeste egitekotan dira Honda, Hyundai, BMW, Ford, Jaguar, Land Rover, Kia, Mitsubishi, Missan, Peugeot, Toyota, Subaru eta General Motors. CarPlay da Applek garatu duen estandarra haien iPhoneak konektatzeko, eta, besteak beste, Siri ahots sistemaz kontrolatzeko hainbat egiteko. Siri zer den jakiteko: http://zibergela. bitarlan. net/2012/09/24/ahotsezko-agintea-telefonoetan/.

Autoko segurtasuna 

Microsoften aurkezpenean, autoaren altzamahaian kokaturiko ukipenezko pantaila bat erakutsi zuten; ordenagailu eta tabletetako Windows berrienen erara, koloretako laukiz osaturiko interfaze edo itxurarekin. Eskuinera irristatuta pantaila nagusia eta ondorengoak agertzen dira, bata bestearen atzetik. Sistemak zalantza handiak sortu zituen, batik bat erakustaldian bertan behera geratu zitzaielako. Hala ere, autoan erabiltzeko diren aplikazioen atal bat bereizteak oniritzia jaso zuen.

Lehia honetan software garatzaileak ere busti behar, eta aplikazio ezagunen artean, guztiekin bateragarri izateko interesa erakutsi du Spotify musika zerbitzuak.

Deigarria da Googleren asmoa, pantaila eta telefono arteko elkarreragintza baino zerbait sakonago egitekotan baita. Nvidia tabletentzako txip fabrikatzailea batu zaie egitasmora, eta autoa gaitasun informatiko propioz doitzekotan dira. Kanpoan eta barruan sentsoreak ezarri eta gidatzea seguruagoa egingo omen dute. Android integratuko dute, noski, eta Open Automotive Alliance barruan dauden hainbat marken babesa izango dute. Horien artean, batzuk Applerekin akordioa duten Audi, General Motors, Honda edo Hyundai.

Ira, 26
2013
Google, Microsoft, musika, Streaming

‘Streaming’ musika zerbitzuak, gora

streaming-musicGaur-gaurkoz bistakoa da negozio ederra dela streaming musikarena. Mugarria Napster izeneko ataria izan zen: edozein talde eta abesti Internet bidez entzuteko eskaintza erakargarria eta garaian parekorik gabekoa ematen baitzuen, baina Metallica taldearekin epaitegietan topo egin zuten. San Frantziskoko (AEB) taldeak ez zuen gogoko izan haien musika sarean denen eskura jartzea, eta are gutxiago etekinik ez usaintzeak. Ordutik, Napster-ek zein agertu diren beste streaming zerbitzuek, hainbat harpidetza dituzte. Doakoak diren arren, gehienetan hileroko ordainketak egin behar izaten dira iragarki gogaikarriak saihesteko edo sakelakoan non-nahi musika entzun ahal izateagatik. Napster, Spotify, Grooveshark, Pandora, Ubuntu One Music, Last.fm… Streaming musika zerbitzuen zerrenda ia amaigabea da, honezkero.

Ondorengo proposamenak kaleratu berriak edo kaleratzear daudenak dira. Era askotarikoak dira aurrekoei batzen zaizkienak: musika liburutegi zabalekoak, sare sozialetan gehien ematen ari diren abestiak identifikatu eta eskuragarri jartzen dituztenak edo musika negozio eredu berri bat dakartzatenak dira horietako batzuk.

Google Play Music All Access

Astiro baina pauso irmoz joan da bidea eginez Googleren zerbitzua. Beta eran egon ostean, lehengo astean iritsi zen Euskal Herrira beta bertsioan. Android sistemarako aplikaziotik eta webetik lor daiteke, eta 7.99 euroren truke ordenagailuan gordeta ditugun 20.000 abesti ere igo litezke hodeira. Bakoitzaren musika liburutegira sartzea egongo da offline eran edo Internet konexio beharrik gabe. Norbere musikaz gain, munduan dagoen —ia— edozein abesti berri nahiz zahar entzun daitezke. Aurreneko hilabetea dohainik eskaintzen dute, eta askorentzat dagoeneko nagusi den Spotify Premiumaren lehiakide gogorrena da. https://play.google.com/ about/music/.

Xbox Music

Microsoften musika zerbitzuak urtebeteko bizitza dauka jada. Baina orain atera dituzte saretik telefono eta sakelakoentzat aplikazioak: Android sistemetan eta iPhone nahiz iPadetarako eskuragarri dago. Aurreneko pausoa, 30.000 abesti baino gehiago eskaintzea izan zen hainbat gailutik entzuteko: ordenagailu, telebista adimentsu edo Xbox 360 bideo kontsolatik. Datorkion erronka ez da nolanahikoa; Android eta iOS sistemetan ibilbide luzea eta bezero oinarri handia daukaten zerbitzuekin borrokatzea ia ezer berririk eskaini gabe: offline sarbidea, irrati propioak sortzea eta partekatzea, besteak beste. Berezitasuna webgunean dago, lehen sei hilabetekoan mugarik gabeko zerbitzua eta erabat doakoa ematen dute; hortik aurrera, hileko ordu kopuru bat egongo da muga gisa. Bestela, 9.90 euroko kuota ordaindu beharko da Xbox Music erabiltzeko. Webgunea ondorengoa da: http://music.xbox.com/.

Twitter #Music

Ideia originala da beste hau. Twitter sare sozialean presentzia handiena daukaten abesti, artista eta taldeen zerrenda bat osatzen da eta jakin-mina daukatenek aipatu doinuen zatiak entzuteko aukera daukate. Asmoa zeresana ematen dabiltzan artista berriak bilatzea omen da. Beste musika zerbitzuekin bateragarritasuna bilatzen dabiltza, eta haientzat iragazki geruza gisa funtzionatzea. Gehigarri gisa dago eskuragarri dagoeneko, adibidez, Spotify edo Rdio zerbitzuetan. Doinu erakargarri baten berri izan eta zati bat entzun ostean, osorik entzun nahi duena beste zerbitzuetara bideratu nahi dute. Astebete baino gutxiago darama Euskal Herrian abian. Interesa duenarentzat https://music.twitter.com/ da helbidea.

Baboom

Urtarrilean Mega hodeiko biltegi zerbitzuarekin hautsak harrotu ostean, bueltan da gorazarre egin zion musika zerbitzu iraultzailea aurkezteko. Hasieran, Megabox gisa izendatu zuten, eta Baboom izena jaso du azkenik. Baina funtsa orduan azaldu zen bera da orain ere: musika zigilu ahalguztidunen kontra egin eta beste era bateko negozioa proposatzea, doako abesti libreen sare baten bidez.

Beste zerbitzuekin lehiakorra izan eta eskaintza sendoa eskaini ahal izateko, eduki sortzaileentzat erakargarria egitea da gakoa. Diru sarreren %90 banatu, eta erosleetan nahiz publizitatean oinarritutako negozioa ezartzen du. Musikariek, adibidez, abestiak zuzenean saldu ahalko lituzkete, eta doan jaitsi nahi duten erabiltzaileengandik ere etekina jasoko lukete. Eurei jarritako publizitatearen gaineko irabaziak jasoko lituzketelako, hein batean.

Oraindik ez dago kaleratze dataren edo harpidetza kostuen berririk; eta doako bertsioaren iragarkien maiztasunaren gainean ere ez dago informaziorik. Hurrengo hilabeteetan albiste izango da.

Mar, 07
2013
Apple, GNU/Linux, Internet, lizentzia libreak, Mac, Mac OS X, Mahaigaina, Software Librea, Windows

Pantailan gertatzen dena grabatzeko software librea

Hitzez azaltzeko zailak diren egitekoak erraz ulertzen dira ikuste hutsarekin. Egiten ikastea da gehien baloratzen den gaitasuna hezkuntzan nahiz lan munduan; baina, tartean, bultzadatxoa eskertzen duenik ere bada. Bideo tutorialak baliabide erabilgarriak bihurtu dira egun, auto-ikaskuntza edo self-learning delakoan. Lagungarri den materiala izaten da sarri; ordenagailuan egitekoa den ataza berri bat edo ezagutzen ez den aplikazio baten funtzionamendua ikas daiteke bideo bakarrarekin. Azkenaldian —Youtuberi esker gehienbat—, era honetako baliabideak hedatuz joan dira amaraunean, eta jada ez dago arazorik ia nahi den guztiaren gaineko azalpen bisuala eskuratzeko. Inoiz ez da hain erraza izan ikasleentzako materiala prestatzea, edo Internet bidezko bideo-jokoetako balentriak besteekin partekatzea.

Screenshot argazkia edo pantailako uneko irudia jasotzea ezagunagoa da erabiltzaileentzat. Ez da gutxiagorako, teklatuko Imp Pan botoia ere zehazki horretara zuzenduta baitago. Screencasting egiteko edo pantailan gertatzen dena grabatzeko, ostera, programa berezien beharra dago. Horiek instalatu eta abiarazita, laster batean egiten ahal dira azalpenez jositako bideoak. Interneten ere erraz zintzilikatu daitezke, gainera.

Screencast-ek, beraz, aspergarriagoak izaten diren idatzizko azalpenak ordezkatzen ditu. Ordea, ordenagailuaren aurrean eseri eta grabatzeko botoiari eman ostean egiten dituen ekintzak erakutsi eta komentatzen dituena edozein izatea ez da ahuntzaren gauerdiko eztula, aurrerapen nabarmena baizik. Azalpen tekniko konplexuak baztertzen dituzten hainbat laguntza iturri lortzen dira horrela; irakaskuntzan, marketinean edo sustapenean baliagarri direnak.

Screencast tresna batzuk aipatu orduko, ohar bat: ahalik eta erabiltzaile gehienetara iristea nahi bada, norbere grabazioa, jabedun formatuak baztertu eta, komunak eta estandarrak direnak aukeratzea beharrezkoa da: Avi, Mpeg edo Ogg izan daitezke batzuk. Interneten zintzilik uztea da beste aukera, nahi duenaren eskura jarriz.

Erabilera aldetik, antzekoak eta erabiltzeko errazak dira grabazio programak: pantailako eskualdea aukeratu, irteera formatua ezarri eta grabatzeari eman besterik ez da egin behar. Batzuek norbere ahotsa sartzen lagatzen dute. Are gehiago, webcam bidez jasotakoaren irudia gehitzea ere posible da, bideoaren albo batean.

Camstudio

Kode irekiko egitasmoa da Camstudio, Windows sistema eragilearentzako. Gainerako bideo kapturatzaile gehienak bezala, pantailaren eskualde jakin bat hauta daiteke, bideo irteera —codecs— desberdinak onartzen ditu, norbere ahotsa edo sistemaren soinua jaso daitezke aukeran, eta bideoaren oinean oharrak txertatu daitezke. Aipagarria da bideoari irudi gardenak txertatzeko aukera dakarrela. Deskargatzeko: http://camstudio.org/.

Taksi

Fraps izeneko Windows inguruneetarako tresna ahaltsuaren kode irekiko baliokide gisa sortu dute Taksi. Bereizmen oso altuak onartzen ditu, eta berezitasun gisa, DirectX, OpenGL edo GDI darabilten azken belaunaldiko bideo-jokoak grabatzeko gaitasuna dauka. Deskargatzeko webgunea: http://sourceforge.net/projects/taksi/.

Freeseer

Python/Qt4 lengoaian garatutako beste kode irekiko proiektu bat da Freeseer, Windows eta Linux sistemetarako bertsioduna. Eskualdea aukeratzea, software edo hardware bidezko grabaketa, bideoaren bereizmena zehaztea edota streaming jarioa onartzen ditu. Dokumentazioa, wikiak eta Git biltegiak dauzkate eskuragarri aplikazioa deskargatzeko nahiz informatzeko: http://freeseer.github.com/.

GNU / Linux sistema

Ubuntun eta GNU/Linux sistemetan gehien erabiltzen den screencasting programa ‘gtk-RecordMyDesktop’ da, zalantzarik gabe. Errekurtso gutxi behar ditu, eta sinplea da erabiltzeko. KDE ingurunean moldatzen direnentzat interfazea ere badauka, ‘RecordItNow’ izenekoa. Webgunea, http://recordmydesktop.sourceforge.net.

Aukera polita osatzen du ‘Istanbul’ aplikazioak, sinplea izanagatik aukera aurreratuagoekin baliatua baita. ‘Pongo’ gehigarria instalatzen bazaio, gainetik, hiztunaren aurpegia edo nahi denaren irudia gehi daiteke grabazioaren albo batera. Estepan Aldamiz-Etxeberriak “Bakarrik edo Parle Vous Français?” saiotan egin ohi zuen gisara, hain zuzen ere.

Instalatzeko garaian, Ubunturen Software Zentroan bilatu ahalko dira. Bestela, terminala ireki, sudo apt-get install… agindua idatzi, eta, jarraian, nahi den programaren izena idaztea aski izango da. Pongo fitxategi bat da eta ez dago instalatu beharrik. Jaitsi hemendik eta egikaritu beharko da ondorengoa terminalean: python pongo.py.

Youtuben eskegitzeko?

Nahasteko gogo handiegirik ez eta zuzenean Youtubera igotzeko asmoa daukan Windows erabiltzailearentzat, ezinbesteko aukera da Ezvid. Instalatu beharra dago, baina ondoren ezin errazago grabatu, ahotsa gehitu edo atzeko musika gehitu ahal zaio —jabetza eskubiderik gabeko lehenetsitako zerrenda batetik— bakoitzaren screencast-ean. Gogoan izan ez dagoela aukerarik emaitza lokalean gordetzeko. http://www.ezvid.com/ da web orria.

Battlefield 3 bideo-jokoaren momentu batzuk grabatzen.

Ezer instalatzeko aukerarik edo asmorik ez dutenentzat baliagarriak gertatuko dira pantailakoa jasotzeko saretik zuzenean —eta edozein euskarritan, beraz— balio duten beste bi aukera hauek. Aukera onak dira: http://www.screenr.com/ eta http://www.screencast-o-matic.com/.

Beste aukera batzuk

Dohaineko aukera nahi izanez gero, Jing, Wink edo Hypercam (2. bertsioa) aplikazioak oso ezagunak dira. Windows eta Linux sistemetan eskuragarri daude lehenengo biak, eta Windowserako soilik da azkenekoa. Mac euskarrirako ere badago screencasting aukerarik: SnapZ Pro X, Screenography, Screen Movie Recorder edo Display Eater erabilgarri daude Mac OS X ingurunean.

1 2 3 4