Lansarean.org lan eskaintzak eta hautagaiak euskaraz kudeatzeko webgunea

Bai Euskarari Ziurtagiriaren Elkarteak alor sozioekonomikoaren euskalduntzean eragitea du helburu, eta LANSAREAN.org helburu horretan bidea egiteko beste tresna bat da Enpresarean egitasmoaren barruan.

Baina, zer da LANSAREAN?

Lan-atari bat da, enpresa edo-eta profesional euskaldunak ezagutzeko aukera erraztuko duen lan-ataria:

Alde batetik, enpresek euren lan-eskaintzen berri zabaldu ahal izango dute. Hautaketa-prozesuak kudeatu ahal izango dituzte eta eskaintzen dituzten lanpostuetarako hautagaiak aurkitu ahal zango dituzte.
Bestetik, lan bila ari diren pertsonek enpresen lan-eskaintzen berri izan eta horietan izena eman ahal izango dute.

LANSAREAN.org erreminta berriak Bai Euskarari eta Enpresarean proiektuak indartuko ditu, balio erantsi handiko zerbitzua gehituz eta euskaraz lan egin nahi duten enpresen eta pertsonen arteko harremana sustatuz.

Lansarean proiektuaren bidez, enpresa eta profesional euskaldunak harremanetan jarri nahi dira. Euskaraz lan egiteko aukera izatea funtsezkoa delako.

Arlo teknikoari dagokionez

Lansarean.org diseinu eta maketazio responsive batean garatu da, beraz bereizmen ezberdineko pantailetara moldatzen da: tablet, sakelako telefonoak, mahaigaineko ordenagailuak eta ordenagailu eramangarriak.

LANSAREAN.org garatzeko orduan, erabilerraztasuna eta erabiltzeko azkartasuna bilatu da. Hau da, erabiltzaileek era erraz eta azkar batean erabil dezaten diseinatuta dago. Horretarako, AJAX bezalako teknologiak erabili dira interfazean.

Nola erabili behar da?

Sakelako telefono, tablet zein ordenagailu batetik webgunera sartu eta erabiltzaileak ikusiko duen lehenengoa bilatzaile azkarra da. Bertan, nahi duena bila dezake, adibidez: “sukaldaria” edo “Arakaldo”. Alboan, herrialdea zehazteko aukera ere agertzen da. Ondoren, bilaketa gehiago zehazteko aukera dago, era honetan, arloak, eskualdea, herria, lan mota, soldata tartea edo data hautatu daitezke.

Lehenetsita, plataforman dauden lan-eskaintza guztien zerrenda agertzen da alderantzizko orden kronologikoan eta bilaketa eginez gero, bilaketarekin bat datozen emaitzetara mugatzen da.

Lan eskaintzak epostaz jasotzeko aukera dago egun bakoitzeko eta erabiltzaileak zehaztutako irizpideen arabera, RSS-en bitartez ere harpidetzeko aukera dago RSS irakurle batekin eta baita Twitter zein Facebook profiletan ere.

Webgunean izena emateko bi atal bereizten dira, “enpresa naiz” eta “hautagaia naiz”. Lehenengo atalean enpresa bezala izena emanda, lan-eskaintzak eta lan-eskaintza bakoitzeko hautagaiak zein hautaketa prozesua kudea daitezke. Bigarren atalean, hautagaiaren datuak eta Curriculum Vitaea osatu daitezke eta hautagaiak izena eman duen lan eskaintza zerrenda kudea dezake.

Izena emateko prozesua errazteko asmoz, sare sozial ezberdinen bitartez egin daiteke:Facebook, Google +, Linkedin edo Twitter bezala.

Mai, 29

2014

android, Aplikazioak, Apple, Kirola, Mugikorrak, Sakelako Telefonoak, Sare sozialak eta Microblogging, tabletak

Bizikleta ibilbideen ahotsezko jarraibideak Ipar Euskal Herrian

Google Maps 6.11 bertsiora eguneratu da, eta, horrekin batera, txirrindularientzat zerbitzu bat sartu dute. Orain, autoentzako errepideetan bezala, bizikleta bideetako argibideak jaso ahalko dira telefonoan. Eroso ibiltzeko, ahots batek gidatuko du txirrindularia bidezidorrean, sakelakoari begiratu eta arreta galtzeko beldurrik gabe.

Bizikleta bideak dituzten Ipar Euskal Herriko hirigune nagusietan baliatu ahalko da. Eskaintza berria era horretako bideak hirietako mapetan jasotzen dituzten herrialdeetara zabaldu dute: Ameriketako Estatu Batuak, Australia, Austria, Belgika, Danimarka, Eskozia, Finlandia, Frantzia, Gales, Herbehereak, Ingalaterra, Kanada, Liechtenstein, Luxenburgo, Monako, Norvegia, Suedia eta Suitza, alegia.

Dagoeneko bizikletaz egiteko 53.000 kilometro estali dituzte, eta asmoa dute etorkizunean hiri gehiagotako bizikleta bideak sartzen jarraitzeko.

Gaur-gaurkoz ahotsa ez dago euskaraz entzuterik. Horretarako, autorako Waze doako nabigatzailea deskargatu daiteke. Zibergelan jaso genituen haren gorabeherak: http://zibergela.bitarlan.net/2013/06/06/waze-aplikazioa-gidarien-sare-soziala/.

Bestetik, aurrerantzean Internet seinalerik gabeko guneetan erabiltzeko doitu dute Google Maps. Oporretan atzerrira joan, eta roaming tarifatan gastatu gabe, errepideetan laguntza jasotzen jarraitzeko aukera zabaltzen du horrela Googlek. Roaming atxikipen bat da; telefono hornitzaileek bezeroei ezartzen diete; horrekin, aparteko ordainsaria kobratzen diete atzerrian Internet sakelakotik erabiltzearren. Europako ganberak 2015eko abendua jarri du muga gisa roaming tarifak kentzeko; baina, bien bitartean, errepideetan Internet kenduta dabiltzan nabigatzaileak erabiltzea besterik ez dago.

Egin beharrekoa sinplea da: gordetzea nahi den mapa kargatu konexioa dagoen bitartean. Bigarren mailako aplikazioen artetik kentzen ez bada, edo ordenagailu eramangarrian nabigatzailea ixten, mapa ez da desagertuko. Gainontzekoa, telefonoaren geokokapenaren esku geratzen da; eta hori doakoa da, noski.

Mai, 15

2014

android, Aplikazioak, Apple, kontzeptuak, Mugikorrak, NFC, Sakelako Telefonoak, Telebista, web semantikoa

Gauzen Interneten atarian

Gauzen Internet kontzeptu teoriko bat da, baina jada hurbil dagoen egitasmoa. Etorkizun berri baten ataria da. Edozein objektu Internet bidez identifikatu eta besteekin komunikatzeko balioko lukeen ideia sinplea da oinarrian, baina zaila lortzen. Teknologiaren eta informazioaren gizarte honen erronka nagusia izango da hurrengo urteetan.

Ez da atzo goizeko kontua. Kevin Ashton ikerlariak RFID teknologia asmatu zuenean egin zen ezagun ideia, 1999an. Irrati uhinak erabiltzen zituzten doitutako gailuak elkarren artean bereizteko balio zuen. Erabilerak, haatik, erantsita zeraman objektu zein pertsonak identifikatzea. RFID teknologia mugarri izan zen hor. Pertsona eta objektu orok eguneroko bizimoduan identifikatzaileak eramanez gero, ordenagailuen bidez erregistratu eta kudeatu ahalko lirateke. Gauzak etiketatzea errazteko, NFC, barra kodeak edo QR kodeak erabiltzea legoke.

Horrek, elkarrengandik bereizteko eranskinak erabilita, edari laten, liburuen edota auto baten zati bakoitzaren jarraipena ahalbidetuko luke, ordenagailu sistemek kontrolatutako auditoria erraldoi bat balitz bezala. Sistemak une bakoitzean jakingo luke gauza bakoitza non falta den eta nondik eskuratu. Lapurretak egitea eta gauzak galtzea iraganeko kontua litzateke. Horri guztiari eutsiko liokeen sarea Internet da.

Egunero erabiltzen diren gauza guztiak banaka etiketatzea lan nekeza da. Teknologiaren garapenari esker, baina, hasierako kontzeptu hori moldatu egin da pixka bat. Gailu elektroniko orok Interneterako sarbidea dutenez, guztiak konekta daitezke sarera. Guztiak identifikatu eta ikuskatu daitezke laster batean.

Hau da, elkarrekin konektatu eta informazioa truka dezakete giza esku hartzerik gabe; gauzen Internet osatu, azken batean. Hozkailuan zerbait falta denean sakelakoan alerta bat programatzea edo zuzenean merkatuan erosketak egitea bezalakoa da. Jarraian, drone batek etxera ekarriko du mandatua.

Batik bat azpiegiturak izan dira eragozpena orain arte, Internet horretarako baliatzeko garaian. Izan ere, Internetera konektatzen den gailu bakoitzak helbide birtual bat izaten du, sarean duen lekua markatzeko. Baina, egungo arkitekturan edo iPv4 ereduan, helbide horiek finituak dira, eta maileguan jasotzen da helbidea; hots, itzaltzean beste batek jasotzen du. Ez dago nahikoa sarbide gailu guztiak aldi berean konektatuta egoteko. Bestelakoa da iPv6 eredu berria, eta hor dago gakoa. Eredu hori abian da iaz geroztik: http://zibergela.bitarlan.net/2012/10/11/trantsizio-isila-interneten/.

Hein batean, Gauzen Internet egitasmoa mamitzeko lehen pausoak ematen ari dira. Tresna elektroniko guztiak adimentsu bihurtzea joera da. Ikusi besterik ez dago azkenaldian smartphone,smartwatch, smart tv, kotxe adimentsu eta enparauek izan duten gorakada. Hasi dira Internetera konektatzen eta haietara moldatutako eginkizunetarako baliatzen; eta gailu bat baino gehiago elkarrekin lotzen.

Telefonoetan Internet erabiliz, dituen nahietara edo beharretara egokitzen du erabiltzaileak gailua. Deskargatzeko aplikazioak erabiltzen eskarmentua du honezkero edozeinek. Beste esparru batzuetako erabilerak zalantzak eragiten ditu oraindik, hala ere. Telebistetan eta autoetan teknologia adimentsuak ekar ditzakeen abantailez aritu izan gara sasoi honetan: http://zibergela.bitarlan.net/2014/01/30/zertarako-dira-smart-tv-edo-telebista-adimentsuak/ etahttp://zibergela.bitarlan.net/2014/04/17/autoak-berehalakoan-dira-adimentsuak/.

Testuinguru horretan, ematen du argi dagoela Interneten beraren garapenak ere zeresana izango duela. Makinen eta gizakien arteko harremana ere leunduz doa, eta esatari elektronikoen ahotsa jada ez da arrotza belarrira. Esaldien esanahian ere sakonduz doa teknologia, eta web semantikoa ere abian da: hitzak letraz letra parekatzeaz gain bilaketak egitean horiek esan nahi dutena jakiteko gai izango den amarauna, hain zuzen ere. Web 3.0 deitu duten mugarria izango da hori. Hor daude ahots bidezko telefonoentzako aginteak ere. Appleren Siri, Google Voice eta Euskal Herriko Sherpa, besteak beste, aurrerapen handiak egiten ari dira.

Oinarri horien gainean, Internet laster batean izango da esaten zaiona ulertzeko gai, adimen propioa garatzeko eta bere kabuz ikasteko. Web 4.0 deitutako hori orain ez da zientzia fikziozko kontua.

Ingurumari horretan, etekin handiena domotika esparruan nabarituko da datozen urteetan; hau da, etxeko tresnen egitekoak errazteko, automatikoki irakurketak egin eta erabakiak hartzeko gaitasuna izango duten etxetresnetan.

Google Nest eta etxeko hotz-beroak

Domotikara bideratutako teknologia da Nest. Zeresan handia ematen ari da alor horretan, eta Googlek erosi berri du proiektua, 2,3 bilioi euroren truke, hain zuzen ere. Merkatu berrian indartsu sartu da, gainera. Gadget edo tramankulu bat ezartzen da, eta, telefonotik aginduta, etxeko tenperatura egokitzen da. Berezia da, kontsumoa aurrezten duelako etxekoen jardueraren arabera. Energiaren kontsumoa erdira murrizteko gai omen da horrela. Horrek, eta gailuaren prezio apalak —30 euro balio du— eman dio arrakasta. Hasieran, Appleren iPhone sakelakorako sortu zen Nest. Googlek erosi ondoren, bistakoa da Android plataformara ere moldatuko dutela orain.