Etorkizun teknologikoa lainoko zerbitzuen eta Internetera sartzeko hardware eramangarri txikien baitan dago. Kalkulu gaitasun apaleko gailuak izango direla aurreikusten dute adituek; pantaila bat sare sarbidearekin, esaterako. Erabiltzaile ikuspuntutik, alde handirik ez da nabarituko, tresna elektronikoak merkeagoak izatetik aparte. Baina, benetan, azpiegitura ikaragarria eta ahaltsua beharko du Interneteko hodeiak milioika erabiltzaileren eskakizunak aldi berean erantzuteko. Muturreraino joan beharrik gabe, tarteko aukerarik ez da faltako. Proposamen eta egitasmo asko bildu dira eredu horretara, eta haien artean Dell etxearenak dirudi merkaturatzetik gertuen.
Project Ophelia egitasmoaren bidez, asmoa zen sistema eragile bat euskarri txiki batean kargatu eta noranahi soinean eroso eramatea. Wise Cloud Connect deitzen da dagoeneko enpresentzat kaleratu duten aurreneko alea. USB memoria baten itxura dauka, eta, 95 euroren truke, edozein pantaila edo telebista ordenagailu bihurtzen du. USB erreten zein HDMI kablez konektatuta, Android oinarrizko sistema eragilea kargatzen du, eta aplikazioak, bideo jokoak, streaming erako filmak eta hodeian biltegiratutako dokumentuak erakusten ditu. Era berean, erabiltzaileek Google Play denda balia dezakete nahi dituzten aplikazioak deskargatzeko. Lanerako edo aisiarako beharrezko den guztia behatz baten tamainako euskarrian sartu eta poltsikoan doi-doi eramangarri uzten du.
Tableta baten gisako erabilpena izan dezakeen arren, urrutiko mahaigaineko moduan erabil daiteke. Mahaigaineko birtualak ere deitzen zaien zerbitzuetan, sarera konektatuta dagoen ordenagailura konektatzen da urrutitik Internet erabilita; eta lekuan balira bezala erabiltzen ditu bertako datu eta programa lokalak. Adibidez, hotel bateko gelan telebistara konektatu, eta etxeko ordenagailua bertatik erabiltzeko balioko luke.
Cloud Connect gailuaren eragozpen nabariena teklatu edo aginte tresna baten falta litzateke. Ez litzateke zentzuzkoa ordenagailu eramangarria ez erabiltzea deserosoa izateagatik, eta horren ordez teklatua eta sagua bizkarren hartuta ibili behar izatea. Horregatik dabiltza Dell Cloud Connect Controller aplikazioa garatzen. Horrek edozein telefono edo tableta hari gabeko teklatu bihurtuko du. Bluetooth bidez egingo da lotura, traste gehiagoren beharrik gabe.
Telebista adimendunak
Enpresen artean nolabaiteko arrakasta izan du, baina ez hainbeste beste merkatutan. Erabiltzaile arruntentzat erakargarriago egiteko azken prestakuntzak egiten ari dira, eta behin-behinean merkaturatzeko. Besteak beste, ordenagailua urrutitik erabili ahal izateko ordainpeko lizentzia moldatzen dabiltza.
Chromecast du izena USB giltza itxurako Googleren gehigarriak; USB erretena du telebistei sartzeko. Internet sarbiderik gabeko telebista zaharkituetan ere zerbitzu berriak jasotzeko balio dezake. Baina baita norbere ezarpenekin doitutako telebista propioa etxetik aldean eramateko ere: oporretan, negozio bidaietan edo atzerrirakoetan, besterik gabe. 35 euroren truke eskuratu daiteke dagoeneko, eta telefono zein tabletako argazki, musika, bideo, aplikazio edo Interneteko telebista kateak zuzenean telebistara bidali.
Ordenagailua poltsikoan
Haurren erabilera, koltrolpean
Haurrek ikusten dutena behar izaten dute. Eta guztien artean, ukipenezko pantaila argitsu eta distiratsuak izugarri erakargarri zaizkie. Gailu elektronikoetan Parental Control edo Gurasoen Kontrola izeneko ezarpenak konfiguratu daitezke, eta, ikusteko edukiak eta sarbideak mugatu. Lehentasunez debeka daiteke denda birtualetan ustekabeko erosketak egitea, edo nabigatzailean sartzea Interneten ibiltzeko. Era honetako kontrol neurriak batez ere tablet, telefono eta bideo jokoek izaten dituzte. Baina tamalez oharkabean pasatzen den ezaugarria dira.
Puri-purian dagoen eztabaida da haur eta gaztetxoen teknologiaren erabilera. Atzeratu daiteke erabilera goiztiarregia, baina aurrez galdutako bataila da. Ikuspegi positibo batetik, Onuragarriak dira etorkizunean beharrezko izango dituzten gaitasunetan trebatzeko hasteko. Bistakoa da neurtuta izan behar dela, baina gurasoarentzat astuna gerta gabe egin daiteke. lehentasunezko mugak ezarrita arindu daiteke piskat bat gainbegiraketa.
gehiegizko erabilerak edota okerrak dira zaintzekoak. Adituek ez dute gomendatzen debekurik ezartzerik. bai alegia dosifikatzea. Asteburuetara mugatzeak, esaterako, ezinegona edo antsietatea sor diezaieke. Bestelako egoera duten lagunekiko desberdin sentiaraztea. Egokiena, eguneko edo asteko aisialdirako gutxienez gustuko hiru egitekotan banatzea omen da. Bakoitzerako dagokion denbora pusketa zuzendu. Eta premisa hori betetzen lagun dezake Guraso Kontrolak, hain zuzen.
Bideo jokoek aste osoko planifikazioa egitea ahalbidetzen dute. Gehienezko Ordu muga bat edo kuota ezarri dakieke, edo xehatuago, asteko egun bakoitzerako ordutegia finkatu. Horietatik kanpo ez dira ibiliko. Edukiak zein jolasak adinaren arabera sailkatu eta eragotzi ditzakete, Internet erabilera iragazkiekin bideratu edo informazio pertsonala partekatzea debekatu.
Telefonoen kasuan inplementazioa makurra dute, erabilpena mugatzea baino debekuak bakarrik ezartzeko direlako kontrol neurriak. Zelatatzeko ere badira gainera, ibilbidearen jarraipena egiteko balio baitezakete. Txiki egoskorrek gailu elektronikoak eskatzen dituztenean, ez dakite norainoko amarruan erortzen ahal diren.
Android
Gurasoen kontrola Android euskarrira 4.3 Jelly Bean bertsioarekin iritsi zen iaz. Traba izan daiteke, batik bat eguneraketa hori Nexus lerroko tablet eta telefonoetaz gain beste gutxik dutenean oraindik ere. Baina ezintasun hori dutenek larritu gabe, Google Play dendan hainbat aplikazio dituzte aukeran zeregin berdinetarako. Ospetsuenak, ‘Kids Place’ eta ‘Norton Family’ doakoak dira, eta bertsio guztietan balio dute.
Bestela, telefonoaren lehentasunezko Guraso Kontrola, erabiltzaile bati debekuak jartzera mugatzen da: Settings barruan Add User or Profile aukeratu eta bertan Restricted Profile.Profila sortu eta izendatu; eta zerrendan ageri diren aplikazio batzuetarako sarbidea ukatu. Ez dago era bateko erabilpena zehazterik edo iragazkirik sortzerik.
iOS
iPhone, iPad eta azken belaunaldiko iPod gailuen kasuan ere, erabiltzaile batek erabili ditzakeen aplikazioak aurrez erabaki daitezke. Pasahitz bidez babestuko da gainera kontrara egiten saiatzean. Honela: Settings lasterbidean General atalean Restrictions aukeratu.
Debekuen botoia bertan gaitzen da, eta jarraian pasahitza ezartzen. Zerrenda batean erabiltzeko pasahitza eskatuko duten aplikazioak ageriko dira behealdean. Ondoren aukera gehiago era badira; besteak beste, Apple etxekoak ez diren aplikazioak erabiltzeko debekua edo GPS geokokapena ezin kentzearena.
Kindle Fire
Ukipenezko pantaila goitik behera igurtzi eta ezarpen apur batzuk ageriko dira. Settings eta gero Parental Controls hautatu. Umeek ezagutuko ez duten pasahitz bat ezarri. INDENT-PLACEHOLDER debekatu eta multzo horren barruko egitekoak pasahitza ezagutzen dutenek bakarrik egin ahalko dituzte.
Xbox One eta Windows 8 tabletak
Microsoftek, haien gailuen erabiltzaileei erabilera erraztu nahirik, Surface tableten Windows 8 eta Xbox One bideo kontsola ahalik antzekoenak egin ditu. Eskema bera errepikatzen dute: hasi saioa kontsolan; agintean Menu botoia sakatu eta Settings hautatu; eskuineraino jauzi egin, Family aukerara; mugatu beharreko profila hartu; banaka nahi diren debekuak ezartzen joan, zein informazio erakutsi edo Interneterako sarbidea, hainbaten artean. Xbox Live web ataritik erosoago egin daiteke. aurreko kontsola Xbox 360 zein One berria ezarpen berdinekin konfiguratu daitezke bertan, erabiltzaile berdina partekatzen badute.
Play Station 4
Sony-ren kontsolaren kasuan, erabiltzaile kontu nagusi bat edo kudeatzaile bat dago. Horrekin saioa hasteko pasahitz bat ezarri beharko da, eta Gurasoen Kontrola doitzeko, beste berri bat: Settings atakan, Parental Controls. Leku berean dago Manage Sub Accounts eta horrekin haurrentzat kontua sortuko da, muga eta debekuak ezarriz unean: joko batzuk debekatu; aplikazioak, filmak adinaren arabera; sarean jolasterakoan ahotsa, testu eta bideo trukaketak eragotzi; jolaskideentzako erabiltzaile gonbidatuak sortzea aukera kendu; edo Play Station Store dendan erosketa mugak ezarri, besteak beste.
Play Station Vita eta Nintendo 3DS eskuko bideo kontsola eramangarriek ere mekanika berdina jarraitzen dute Guraso Kontrolerako. PIN zenbaki bidez babestuko dira nahi diren funtzioak, baita ordutegia ezarri ere, eta aurreko adibideen gisara konfiguratzekoak dira.
Zertarako dira ‘smart TV’ edo telebista adimentsuak?
Internetera konektatzeko telebistak dira smart TV ezarpena dutenak. Gainontzekoek ez dituzten konexio eta konputazio gaitasunak dituzte; horregatik esaten zaie telebista adimentsuak edo smart TV-ak.
Atzealdeko Ethernet erretenean kablea sartuta edota haririk gabe wifi bidez konektatzen dira amaraunera. Kontuan izan behar da batzuetan wifi eranskina aparte ordaintzekoa dela.
Ordenagailuek eta sakelakoek bezala, sistema eragile bat dute, eta antzeko gauzak egiteko gai dira. Hau da, hainbat telebistak bezala, bereizmen handiko kateak eta kate arruntak erakusten dituzte. Baina, aldi berean, aplikazio sorta duen menu bat ere badute, batez ere musika eta bideo emanaldiak dituena.
Lehentasunezko aplikazioak dituen arren, aplikazio berriak instalatuta bakoitzak bere gustura jantz dezake smart TV-a. Izan ere, etxe bakoitzak bere aplikazio denda du; sakelakoetan eta gisakoetan bezala, nahi diren aplikazioak bilatzeko eta instalatzeko, alegia.
Internet zerbitzua
Ordenagailua piztu behar izan gabe, eguraldia begiratu, albisteak irakurri eta sare sozialak eguneratu daitezke. Litekeena da, alabaina, telebista adimentsuen gehigarri hoberena eskaripeko bideo zerbitzuena izatea. Alor horretan, eskaintza zabala da. Esaterako, Youtube erabiliz, doako musika bideoak, filmen trailerrak eta erorikoen bideo barregarriak jaso daitezke, besteak beste; Netflix alokairu edo harpidetza bidezko zerbitzuak erabil daitezke, eta haien ehunka pelikula eta telesail biltegirako sarbidea lortu. Zerbitzu hauetaz aritu gara jada aurten: http://zibergela.bitarlan.net/2013/10/31/telebista-bestelako-pantailetara/.
Eta, hori gutxi balitz bezala, halaber, Twitterren gertatzen ari denaren berri eman daiteke, edo Facebooken ikusten denarekin egoera eguneratu. Batzuetan, nabigatzailea ere izaten dute telebista horiek, eta sarea arakatzeko erabil daitezke zuzenean. Azken horietarako, gomendagarria da telebista adimentsua dagoen etxearekin bateragarria den haririk gabeko teklatu bat izatea, erosotasunagatik. Bestela, telefono eta tabletetarako aplikazioak ere badira, urrutiko aginte gisa erabiltzeko, horiek onartzen dituzten telebistentzat.
Hala ere, aukera horiek guztiak ez dira beti ematen, funtsean telebistak direlako, eta ez ordenagailu osoak. Eskaintza asko alda daiteke bertsio batetik bestera, eta, are gehiago, hainbat etxeren artean. Hots, denek ez dute sare sozialetarako sarbiderik; gutxiago dira nabigatzailea dakartenak. Bakan batzuek, berriz, bideo bidezko deiak edo bideokonferentziak ere egin ditzakete: Skype plataforma eta dakarten webcama baliatzen dutenek, hain zuzen.
Aplikazioak eta osagarriak
Azken belaunaldiko telefonoen funtzionamendua imitatzen dute smart TV-ek. Fabrikatzaile bakoitzak bere denda propioa erakusten du lehentasunezko aplikazioekin batera. Panasonic eta Samsung dira, gaur-gaurkoz, alderdi hori garatuen duten etxeak.
Hainbaten artean, Panasonic aplikazio dendan jokoak aurki daitezke. Ondoren, horietan jolasteko nahiz beste funtzio askotarako osagarriak ere kaleratu dituzte: bideo jokoetarako hari gabeko agintea; pantailan zuzenean idazteko Stylus edo arkatza, etxekoei oharrak uzteko; pisua kontrolatzeko eskumuturrekoa eta abar. Aginte erak ere garatu dira, eta jada badira ahots aginduekin edo eskuen mugimenduekin kontrola daitezkeen telebistak.
Smart TV telebisten eragozpen nabariena bertsio bateragarritasuna da. Hau da, 2012ko telebistaren softwarea zaharkitua gera daiteke, eta 2013ko etxe bereko aplikazioek ez diote balioko. Hori konpontzeko, Samsung etxeak beren telebistei atzean eransteko osagarriak prestatu ditu. Aurreko urteetako bertsioak azkenengo ezarpen eskaeretara irits daitezke telebistari gehigarria erantsita. Smart Evolution Kit moduan eska daitezke horiek, eta, horrela, telebista berria erosi beharrik ez dago.
Bestelako aukerak
Irakurritakoa gustuko dutenek telebista mantendu eta antzeko ezaugarriak dituzten alternatibak balia ditzakete. Interneterako sarbidea duten hainbat gailuk ematen dituzte halako zerbitzuak, eta telebistari lotzeko balio dute. Esaterako, top box, bideo kontsolak, egokitutako Blu Ray erreproduzigailuak, edo, besterik gabe barruan dutena partekatzeko norberak prestatutako ordenagailuak edo Home Theatre PC deituak.
Aipamen berezia merezi dute top box izenekoek. Horiek Google TV, Apple TV edo Boxee Box bezalako gailu txikiak dira, eta telebistaren aldamenean jartzen dira. Smart TV baten baliokideak edo ahaideak dira, eta edukiak streaming eran emateko aukera zabala dute.
