Ots, 14
2013
Aplikazioak, Apple, kontzeptuak, Mac OS X, Multimedia, tabletak, Ubuntu, Windows

iOS 6-rako ‘Jailbreak untethered’ egiteko mauka berria

Evad3rs taldekoek iragan otsailaren 4an jakinarazi zuten ohar bidez askok itxoiten zuten albistea: Apple gailu guztientzat, haien sistema eragilearen azken bertsioa edo iOS6 askatzen duen programa eskuragarri dagoela sarean. Horretaz baliatuko direnek saihestu ahal izango dute Apple etxeak izenpetu ez dituen aplikazioak instalatzeko haien gailuek izaten duten debekua. Programa horri EvasiOn deitu diote, osatzen duen prozesuaren izenarekin hitz jokoa eginez; kartzela apurtzea (Jailbreak) eta ihesa (evasion).

Hackerrek Appleren azken sistema eragilearen segurtasun hesiak laster gainditu zituzten; baina albistea izan dena da untethered gisa lortzea. Gogoan izan, untethered eran egiten bada jailbreak-a, erabiltzaileak gailua itzali eta piztu ahalko duela, ordenagailu eta iTunesen beharrik gabe. Aldiz, tethered eran egiten bada prozesua, eta gailua itzaltzen bada —bateria barik geratu delako edo nahita itzali delako—berriz ere jailbreak prozesua pasatu beharko zaio ondo ibiltzeko. Astunegia bihurtzen da bigarrena, beraz.

Izugarrizko arrakasta

Iturri batzuen arabera, aurreneko lau egunetan zazpi milioi erabiltzailek egin zuten ekintza haien gailuetan. Hala ere, oraindik aldaketa egiteko zalantzati dagoenarentzat, baliagarri gerta daiteke iOS 6 kaleratu zenean haren berrikuntzei buruz aurreratutakoa: http://zibergela.bitarlan.net/2012/10/05/appleren-gailuetarako-eskura-dago-ios-6/. Edo Jailbreak egitearen onuren eta legezkotasunaren inguruko beste honek anima dezake: http://zibergela.bitarlan.net/2012/11/22/jailbreak-a-appleren-gailuetan/.

EvasiOnekin, orain arteko prozesurik sinpleena egitea lortu dute; aditua izan gabe edonork etxean egiteko modukoa. Egin beharrekoak errazteaz gain, hainbat euskarritara eraman dute eskaintza. Windows, Linux eta Mac sistema duten ordenagailuetan exekutatu ahal diren EvasiOn bertsioak daude erabilgarri. Pauso bakarrean egiten den prozesua da oraingo hau, eta hasi aurretik iOS 6, 6.0.1, 6.0.2 edo 6.1 gailuan ezarrita edukitzea da baldintza bakarra. Jailbreak oro ere software ofizialaren gainean egiten denez, Applek haien gailu zaharkituenak software eguneraketetatik kanpo uzteko ohitura berberak baldintzatzen du. iPhone 5, iPhone 4S, iPhone 4, iPhone 3GS, iPad 4, iPad 3, iPad 2, iPad mini, iPod touch 5, iPod touch 4 eta Apple TV 2 gailuetan osatu liteke, beraz.

EvasiOn 1.2 deskargatzeko jo: http://evasi0n.com/. Ezertan hasi orduko argi izan behar dira honako kontzeptuak: Jailbreak edo kartzela apurtzea ez da terminala liberatzea; EvasiOn erabili arren, terminalak hornitzaile berdinera lotuta jarraituko du.

Prozesua pausoz pauso

Hasteko eta behin, iTunes bitartez norbere gailuaren pasahitzik gabeko segurtasun kopia bat egitea gomendatzen da. Horrela, evasiOn erabiltzearen prozesuan okerren bat gertatuko balitz, leheneratu ahal izango da gailua. Badaezpada, pantailaren blokeoa kenduta izatea komeni da, horrekin arazoak izan daitezkeelako. Logikoa denez, bateria gutxirekin ere ez hasi ezertan; prozesuaren erdian itzaltzea hondamendia bailitzateke.

Ondorengo pausoak eman behar dira prozesua ondo egiteko: 1. Begiratu zein iOS bertsio darabilzun. Begiratu Settings/General/About/Version ataka horretarako. iOS 6.1 edukitzea hoberena da, bestela, ordenagailuko iTunes bidez konektatu eta bertsioa berritzeko mezuari baietz esan. Lehendik Jailbreak eginda duenak, litekeena da prozesu horren azkenean akats mezu bat jasotzea; ez egin kasurik, eta berriz eman iTuneseko Restore and Upg rade aukeran. 2. Ireki EvasiOn 1.2. Windowseko bertsioaren kasuan, administrari gisa ireki. 3. Konektatu gailua, eta jarraian itxi iTunes. EvasiOn-ek hauteman ostean, Jailbreak botoia gaituko du. 4. Botoiari eman, eta egoera barra bete arte itxaron. 5. Bukatu ostean, gailua desblokeatzeko adieraziko du. Ondoren, aplikazio berri gisa agertuko den Jailbreak izeneko ikonoa zanpatu beharko da bertan (behin). 6. Prozesuak bukatu arte itxarotea besterik ez da falta. Gailua behin baino gehiagotan berrabiaraziko da bakarrik, eta desblokeatzeko pantaila erakutsiz amaituko da guztia.

Antza denez, azken pausoak 5 minuturik ez luke iraun beharko; horrela balitz, EvasiOn itxi daiteke eta berriz abiarazi. Kasu honetan, gailua ere berrabiarazi beharko litzateke: Power + Home botoiak sakatuta edukita (pizteko goikoa eta pantailaren behealdekoa, bestea). Berriz ere, 3. pausora itzuli beharko litzateke, kasu honetan.

Bestela, gailuaren mahai gainean Cydia izeneko biltegiak instalatuta behar luke, Applekoek baimendu gabeko aplikazioen denda. App Store-ren baliokidea da, baina kode irekiko aplikazioduna. Horrela, untethered erako askapena egin dela ziurtatu (itzali eta piztu ondoren Cydiak hor jarraitzen duela ikusita) eta norbere datuak gordetzen dituen segurtasun kopia —iTunes erabilita beste behin ere— berreskuratuta bukatzen da tailer hau.

Ots, 07
2013
android, Aplikazioak, Apple, Jokoak, Mac, Windows

Super Hexagon, ‘retro’ kutsuko aisialdiko erronka jokoa

Aisialdiko jokoen artean 29 urte luzetan aurkaririk ez du izan Tetris puzzleak. Haren sinpletasunak eta aurkezten duen erronkak adin guztietako jendearen kutuna bihurtu zuten 1980ko hamarkadan. Orain, badirudi bitxikeria berri batek fenomenoa berregingo duela. Historiako bideo-jokorik jokatuena izan daiteke Tetris jokoa, eta poliedro batek eman duen jokorik dibertigarriena da Terry Cavanagh sortzailearen Super Hexagon. Argotean Indie gisa ezagutzen diren aplikazio apal horietakoa da, egile bakarrak edo talde oso txikiek sortzen dituztenetarikoa.

Lehendabizikoaren helburua goitik behera zetozen piezak elkarrekin batu eta lerroak ezabatzea zen, pilatuz zihoazen piezak goiko mugara iristea eragozteko. Hori egin ezean, partidaren azkena iragartzen zuen Game Over mezu gorrotagarria jasoko zen. Planteamendu erraz eta liluragarri hark milaka jarraitzaileren babesa lortu zuen, gaurdaino irauten duen atxikimendua. Beste joko honetan, berriz, hexagono baten inguruan biratzen duen gezia gidatzea da helburua; koloretako zurrunbilo batean gerturatzen doazen formak saihestuz musika taupaden erritmoan.

Hemen ere, norbere trebezia da muga bakarra, eta ahalik eta denbora luzeenean irautea helburua. Hala, 60 segundoz eutsiz gero, hurrengo maila zailago baterako sarbidea jasotzen da. Retro-a modan dago, eta geratzeko bueltatu da.

Adituen kritika ezin hobeak jasotzen ari da Super Hexagon, eta sariren bat edo beste ere jaso du dagoeneko; diseinuaren burutazioagatik horietako bat. Hiru euroren truke PC, Mac, iOS eta Android sistementzat dago eskuragarri jokoa, haien webgunetik nahiz euskarri bakoitzaren sareko dendatik: http://www.superhexagon.com.

Urt, 10
2013
Aplikazioak, Apple, Mac OS X, Mugikorrak, Sakelako Telefonoak, Sistema Eragileak, tabletak, Windows

Appleren aplikazioen dirua berreskuratzea posible da

Applek itzulketei buruzko politika garbia dauka aspalditik, eta garbi asko ageri da hori iTunes Store zerbitzuaren zehaztapenen eta baldintzen atalean: erositako eta alokatutako produktu guztiak behin betikoak dira haientzat. Ez dela itzulpenik onartzen, alegia. Baina Apple gailuen erabiltzaile gehienei —guztiei ez esatearren —gertatu izan zaie noizbait App Storetik jaitsitako aplikazioak ez zituela haien usteak betetzen, edo akatsak zituela; ez zuela nondik heldu ere, laburki esanda.

Hori gertatzeko arrazoien artean bi nabarmendu daitezke: alde batetik, hango aplikazioen prezioak ez dira oso garestiak izaten; eta bestetik, probatzeko bertsiorik ere ez dago inoiz eskuragarri. Applek jartzen dituen kontrolak zorrotzak izan ohi dira haien aplikazio biltegian agertzeko, baina, hala ere, noizean behin gertatzen da horrelako okerrak salgai jartzea. Orduan, euro pare bat besterik ez bada ere aplikazioarengatik ordaintutakoa eta bueltan eskatzekoa, badago egoerari buelta eman eta dirua jasotzeko eskubideaz baliatzeko bidea.

Itzulera politikaren arabera, Applek ez du inoiz onartuko erositako aplikazioa ez gustatzearen arrazoi bakarra; zaila izango da horrela dirua itzultzea. Hori horrela ez izateko, aurreikusiak dituzten arrazoietako bat izan beharko da abiapuntua, beraz: aplikazioa ez jaso izana, nahi gabe erosi izana, espero bezala ez dabilela, norbere gailuarekin bateragarria ez den bertsioa deskargatu dela, edo erosketa deskargari lotutako zalantzaren bat dagoela.

Izan ere, iragan urtean hainbat erabiltzaileri ziria sartu zieten ofiziala ez zen Pokemon marrazkien aplikazio bat App Store-n jartzean, ibili ere ez zebilelako besteak beste. Orduan, Appleri azaldu beharreko arrazoiak gehiago hurbiltzen dira aurrekotik, erositakoa gorroto dugula esatetik baino. Horregatik da gomendagarria aplikazio bat erosi ondoren norberaren iritzia uztea: idatziz edo batetik bosterainoko izarrak jarriz. Eta are gehiago, besteek utzitako oharrak erosketa egin aurretik kontuan hartzea ere garrantzitsua da.

Dena dela, ez ahaztu aplikazio garatzaileek ere jan beharra dutela, eta benetan oker dabiltzan aplikazioak itzultzeko metodoa edo bidezidorra besterik ez dela hau.

Mac OS aplikazioak

Erositako aplikazioa Mac OS sistemaren azken bertsiotan lehenetsitako App Store-tik jaitsi bada, desadostasuna adierazi beharko den esteka ondorengoa da: https://expresslane.apple.com/GetproductgroupList.action.

Hortik, All Products & Services/ Apps & Software/ Mac Apps/ Mac App Store atalera joan behar da. Ondoren, Other Mac App Store Topics/ Troubleshooting Mac Apps zanpatu eta leiho berri bat agertuko da, mota horretako arazoentzat lehentasunezko konponbidearekin. Interesgarriena, baina, ezkerraldean, behean ikusten den e-posta bidaltzeko esteka da: sistema aukeratu, aplikazioaren izena eta herrialdea. Aurrerago aipatu arrazoietako bat emanez argudiatzen bada, ez da egongo arazorik diru itzulketa erdiesteko.

iOS aplikazioak

Deskargatutakoa iTunes edo norberaren iPhone edo iPad gailutik egin bada, prozesua oso antzekoa da. Esteka beretik abiatuta, kasu honetan joan beharreko atala da ondorengoa da: All Products & Services/ iTunes/ iTunes Store/ Purchases, Billing & Redemption/ Quality of purchased content. Hemen jada zuzenean inprimaki bat bete beharko da, berriz ere desadostasuna azalduta. Bestela, nahiago bada, iTunes programatik egin daiteke eskaera: Account/ See All/ Report a Problem menura joanda, gure erosketen artetik atzera bota nahi dena aukeratu, eta azkenik, lehenago aipatu arrazoietako bat eman beharko da.

1 … 3 4 5 6 7 … 15