Lapse It, paisaien argazki edarrak ateratzeko

Denboraren igaroa da Time-Lapse. Argazkilaritza eta bideogintzan joera bihurtu den teknika ezagunari dagokio. Wikipediaren arabera, bideo sekuentzia baten abiadura azkartzean lortzen den teknika bat da; non gauzak benetan baino agudoago mugitzen ikusten diren.

Bideo arrunt bat grabatzen segundoko jasotzen diren irudi kopurua baino gutxiago jasota lortzen da efektua. Adibide batez, ohiko bideo bat 25 fps edo irudi segundoko abiaduran jaso, eta abiadura berean erreproduzitzen da normalean. Time-Lapse itxurako bideoa sortzeko, aldiz, 12 segundoko tartetan irudi bakarra jasoko da, eta ondoren bideo hori abiadura normalean egikaritu. Ezarpen horiek bakoitzaren nahien arabera doitu daitezke, noski. Dena den, hodeiak, autoak, hiriko argiak edo zerukoak aitaren batean igarotzen ikusten diren sekuentzia bitxiak lortzen dira horrela egiten denean. Irudimena gainezka dutenek panpinekin laburmetriak grabatzeko baliatzen dute teknika.

Bideoen ezaugarri teknikoetan haria galdu dutenentzat, xehe-xehe azaldu genuen Zibergelan berriki: http://zibergela.bitarlan.net/2014/04/03/bereizmen-handiaren-amarruak/.

Denbora igaroa lortzeko ez da tresneria berezirik behar, kamera digital bat eta ordenagailuan bideo edizioko programa bat besterik ez. Are gutxiago beharko dute Lapse It aplikazioa deskargatzen dutenek. Sakelakotik bertatik eskuratu daitezke irudiak eta baita editatu ere.

Gainontzeko argazki aplikazioekin alderatuta prestakuntza batzuk beharrezkoak dira hemen. Sakelakoa patrikatik atera eta disparadorea edo kliskagailua etengabe zanpatzea baino landuagoa da prozesua: telefonoarentzat tripode bat edo euskarria eta telefonoa elikatzeko aparteko bateria edo entxufe bat eskura edukitzea gomendatzen da. Hurrenez-hurren, dardarak saihesteko eta argi kontsumo handia hornitzeko.

Kapturen ezaugarriak nahieran doitu daitezke Lapse It aplikazioan. Erabiltzaileak grabatzen hasi orduko ezarriko ditu batzuk, eta gainontzekoak ondoren. Hasi orduko: iraupena, irudien arteko denbora tartea, argazki kopurua edo hark eskuz geratuko duen ezarriko dira. Ordu zehatz batean jardun dezan programatu daiteke Lapse It, eta lasai oheratu esaterako. Bereizmena eta argitasuna ondo aukeratzea erabakigarriak dira, eta besterik ezean, froga-akats bidez gustuko sekuentzia lortu arte eutsi. Bukatzeko: bideora bihurtu edo renderizazio garairako ezagunenak diren formatuetara bihur daiteke sekuentzia: MOV, MP4 edo FLV. Eta aldi berean, bideoaren irudi maiztasuna eta abiadura erabaki. Oso motel grabatzen denez, 25 fps jarrita ere denbora geldiro ikusiko da igarotzen; baina efektua areagotzeko 50 fps edo gehiagora ezarri daiteke. Aplikazioak aukera bakoitzaren azalpentxoak dakartza han-hemenka, inor gal ez dadin. Musika ezarri, besteen lanak ikusi, denetarik egin daiteke.

Lapse It aplikazioak doako bertsioa du eskuragarri, baina bideoaren bereizmena 480p kalitatera mugatuta dago eta bestelako efektu bereziak ere ezgaituta dakartza. Ostera, probatu ondoren gustuko duenak, Lapse It Pro bertsioa lortu dezake 1,99 euroren truke eta mugarik gabe baliatu. Android eta iOS plataformetarako dago eskuragarri.

Mai, 22

2014

android, Aplikazioak, Apple, Internet, Jokoak, kontzeptuak, Mahaigaina, Microsoft, Mugikorrak, Multimedia, musika, Nabigatzaileak, Pribatutasuna, Sakelako Telefonoak, Segurtasuna, Streaming, tabletak, Telebista, Windows Phone

Haurren erabilera, koltrolpean

Haurrek ikusten dutena behar izaten dute. Eta guztien artean, ukipenezko pantaila argitsu eta distiratsuak izugarri erakargarri zaizkie. Gailu elektronikoetan Parental Control edo Gurasoen Kontrola izeneko ezarpenak konfiguratu daitezke, eta, ikusteko edukiak eta sarbideak mugatu. Lehentasunez debeka daiteke denda birtualetan ustekabeko erosketak egitea, edo nabigatzailean sartzea Interneten ibiltzeko. Era honetako kontrol neurriak batez ere tablet, telefono eta bideo jokoek izaten dituzte. Baina tamalez oharkabean pasatzen den ezaugarria dira.

Puri-purian dagoen eztabaida da haur eta gaztetxoen teknologiaren erabilera. Atzeratu daiteke erabilera goiztiarregia, baina aurrez galdutako bataila da. Ikuspegi positibo batetik, Onuragarriak dira etorkizunean beharrezko izango dituzten gaitasunetan trebatzeko hasteko. Bistakoa da neurtuta izan behar dela, baina gurasoarentzat astuna gerta gabe egin daiteke. lehentasunezko mugak ezarrita arindu daiteke piskat bat gainbegiraketa.

gehiegizko erabilerak edota okerrak dira zaintzekoak. Adituek ez dute gomendatzen debekurik ezartzerik. bai alegia dosifikatzea. Asteburuetara mugatzeak, esaterako, ezinegona edo antsietatea sor diezaieke. Bestelako egoera duten lagunekiko desberdin sentiaraztea. Egokiena, eguneko edo asteko aisialdirako gutxienez gustuko hiru egitekotan banatzea omen da. Bakoitzerako dagokion denbora pusketa zuzendu. Eta premisa hori betetzen lagun dezake Guraso Kontrolak, hain zuzen.

Bideo jokoek aste osoko planifikazioa egitea ahalbidetzen dute. Gehienezko Ordu muga bat edo kuota ezarri dakieke, edo xehatuago, asteko egun bakoitzerako ordutegia finkatu. Horietatik kanpo ez dira ibiliko. Edukiak zein jolasak adinaren arabera sailkatu eta eragotzi ditzakete, Internet erabilera iragazkiekin bideratu edo informazio pertsonala partekatzea debekatu.

Telefonoen kasuan inplementazioa makurra dute, erabilpena mugatzea baino debekuak bakarrik ezartzeko direlako kontrol neurriak. Zelatatzeko ere badira gainera, ibilbidearen jarraipena egiteko balio baitezakete. Txiki egoskorrek gailu elektronikoak eskatzen dituztenean, ez dakite norainoko amarruan erortzen ahal diren.

Android

Gurasoen kontrola Android euskarrira 4.3 Jelly Bean bertsioarekin iritsi zen iaz. Traba izan daiteke, batik bat eguneraketa hori Nexus lerroko tablet eta telefonoetaz gain beste gutxik dutenean oraindik ere. Baina ezintasun hori dutenek larritu gabe, Google Play dendan hainbat aplikazio dituzte aukeran zeregin berdinetarako. Ospetsuenak, ‘Kids Place’ eta ‘Norton Family’ doakoak dira, eta bertsio guztietan balio dute.

Bestela, telefonoaren lehentasunezko Guraso Kontrola, erabiltzaile bati debekuak jartzera mugatzen da: Settings barruan Add User or Profile aukeratu eta bertan Restricted Profile.Profila sortu eta izendatu; eta zerrendan ageri diren aplikazio batzuetarako sarbidea ukatu. Ez dago era bateko erabilpena zehazterik edo iragazkirik sortzerik.

iOS

iPhone, iPad eta azken belaunaldiko iPod gailuen kasuan ere, erabiltzaile batek erabili ditzakeen aplikazioak aurrez erabaki daitezke. Pasahitz bidez babestuko da gainera kontrara egiten saiatzean. Honela: Settings lasterbidean General atalean Restrictions aukeratu.

Debekuen botoia bertan gaitzen da, eta jarraian pasahitza ezartzen. Zerrenda batean erabiltzeko pasahitza eskatuko duten aplikazioak ageriko dira behealdean. Ondoren aukera gehiago era badira; besteak beste, Apple etxekoak ez diren aplikazioak erabiltzeko debekua edo GPS geokokapena ezin kentzearena.

Kindle Fire

Ukipenezko pantaila goitik behera igurtzi eta ezarpen apur batzuk ageriko dira. Settings eta gero Parental Controls hautatu. Umeek ezagutuko ez duten pasahitz bat ezarri. INDENT-PLACEHOLDER debekatu eta multzo horren barruko egitekoak pasahitza ezagutzen dutenek bakarrik egin ahalko dituzte.

Xbox One eta Windows 8 tabletak

Microsoftek, haien gailuen erabiltzaileei erabilera erraztu nahirik, Surface tableten Windows 8 eta Xbox One bideo kontsola ahalik antzekoenak egin ditu. Eskema bera errepikatzen dute: hasi saioa kontsolan; agintean Menu botoia sakatu eta Settings hautatu; eskuineraino jauzi egin, Family aukerara; mugatu beharreko profila hartu; banaka nahi diren debekuak ezartzen joan, zein informazio erakutsi edo Interneterako sarbidea, hainbaten artean. Xbox Live web ataritik erosoago egin daiteke. aurreko kontsola Xbox 360 zein One berria ezarpen berdinekin konfiguratu daitezke bertan, erabiltzaile berdina partekatzen badute.

Play Station 4

Sony-ren kontsolaren kasuan, erabiltzaile kontu nagusi bat edo kudeatzaile bat dago. Horrekin saioa hasteko pasahitz bat ezarri beharko da, eta Gurasoen Kontrola doitzeko, beste berri bat: Settings atakan, Parental Controls. Leku berean dago Manage Sub Accounts eta horrekin haurrentzat kontua sortuko da, muga eta debekuak ezarriz unean: joko batzuk debekatu; aplikazioak, filmak adinaren arabera; sarean jolasterakoan ahotsa, testu eta bideo trukaketak eragotzi; jolaskideentzako erabiltzaile gonbidatuak sortzea aukera kendu; edo Play Station Store dendan erosketa mugak ezarri, besteak beste.

Play Station Vita eta Nintendo 3DS eskuko bideo kontsola eramangarriek ere mekanika berdina jarraitzen dute Guraso Kontrolerako. PIN zenbaki bidez babestuko dira nahi diren funtzioak, baita ordutegia ezarri ere, eta aurreko adibideen gisara konfiguratzekoak dira.

Mai, 15

2014

android, Aplikazioak, Apple, kontzeptuak, Mugikorrak, NFC, Sakelako Telefonoak, Telebista, web semantikoa

Gauzen Interneten atarian

Gauzen Internet kontzeptu teoriko bat da, baina jada hurbil dagoen egitasmoa. Etorkizun berri baten ataria da. Edozein objektu Internet bidez identifikatu eta besteekin komunikatzeko balioko lukeen ideia sinplea da oinarrian, baina zaila lortzen. Teknologiaren eta informazioaren gizarte honen erronka nagusia izango da hurrengo urteetan.

Ez da atzo goizeko kontua. Kevin Ashton ikerlariak RFID teknologia asmatu zuenean egin zen ezagun ideia, 1999an. Irrati uhinak erabiltzen zituzten doitutako gailuak elkarren artean bereizteko balio zuen. Erabilerak, haatik, erantsita zeraman objektu zein pertsonak identifikatzea. RFID teknologia mugarri izan zen hor. Pertsona eta objektu orok eguneroko bizimoduan identifikatzaileak eramanez gero, ordenagailuen bidez erregistratu eta kudeatu ahalko lirateke. Gauzak etiketatzea errazteko, NFC, barra kodeak edo QR kodeak erabiltzea legoke.

Horrek, elkarrengandik bereizteko eranskinak erabilita, edari laten, liburuen edota auto baten zati bakoitzaren jarraipena ahalbidetuko luke, ordenagailu sistemek kontrolatutako auditoria erraldoi bat balitz bezala. Sistemak une bakoitzean jakingo luke gauza bakoitza non falta den eta nondik eskuratu. Lapurretak egitea eta gauzak galtzea iraganeko kontua litzateke. Horri guztiari eutsiko liokeen sarea Internet da.

Egunero erabiltzen diren gauza guztiak banaka etiketatzea lan nekeza da. Teknologiaren garapenari esker, baina, hasierako kontzeptu hori moldatu egin da pixka bat. Gailu elektroniko orok Interneterako sarbidea dutenez, guztiak konekta daitezke sarera. Guztiak identifikatu eta ikuskatu daitezke laster batean.

Hau da, elkarrekin konektatu eta informazioa truka dezakete giza esku hartzerik gabe; gauzen Internet osatu, azken batean. Hozkailuan zerbait falta denean sakelakoan alerta bat programatzea edo zuzenean merkatuan erosketak egitea bezalakoa da. Jarraian, drone batek etxera ekarriko du mandatua.

Batik bat azpiegiturak izan dira eragozpena orain arte, Internet horretarako baliatzeko garaian. Izan ere, Internetera konektatzen den gailu bakoitzak helbide birtual bat izaten du, sarean duen lekua markatzeko. Baina, egungo arkitekturan edo iPv4 ereduan, helbide horiek finituak dira, eta maileguan jasotzen da helbidea; hots, itzaltzean beste batek jasotzen du. Ez dago nahikoa sarbide gailu guztiak aldi berean konektatuta egoteko. Bestelakoa da iPv6 eredu berria, eta hor dago gakoa. Eredu hori abian da iaz geroztik: http://zibergela.bitarlan.net/2012/10/11/trantsizio-isila-interneten/.

Hein batean, Gauzen Internet egitasmoa mamitzeko lehen pausoak ematen ari dira. Tresna elektroniko guztiak adimentsu bihurtzea joera da. Ikusi besterik ez dago azkenaldian smartphone,smartwatch, smart tv, kotxe adimentsu eta enparauek izan duten gorakada. Hasi dira Internetera konektatzen eta haietara moldatutako eginkizunetarako baliatzen; eta gailu bat baino gehiago elkarrekin lotzen.

Telefonoetan Internet erabiliz, dituen nahietara edo beharretara egokitzen du erabiltzaileak gailua. Deskargatzeko aplikazioak erabiltzen eskarmentua du honezkero edozeinek. Beste esparru batzuetako erabilerak zalantzak eragiten ditu oraindik, hala ere. Telebistetan eta autoetan teknologia adimentsuak ekar ditzakeen abantailez aritu izan gara sasoi honetan: http://zibergela.bitarlan.net/2014/01/30/zertarako-dira-smart-tv-edo-telebista-adimentsuak/ etahttp://zibergela.bitarlan.net/2014/04/17/autoak-berehalakoan-dira-adimentsuak/.

Testuinguru horretan, ematen du argi dagoela Interneten beraren garapenak ere zeresana izango duela. Makinen eta gizakien arteko harremana ere leunduz doa, eta esatari elektronikoen ahotsa jada ez da arrotza belarrira. Esaldien esanahian ere sakonduz doa teknologia, eta web semantikoa ere abian da: hitzak letraz letra parekatzeaz gain bilaketak egitean horiek esan nahi dutena jakiteko gai izango den amarauna, hain zuzen ere. Web 3.0 deitu duten mugarria izango da hori. Hor daude ahots bidezko telefonoentzako aginteak ere. Appleren Siri, Google Voice eta Euskal Herriko Sherpa, besteak beste, aurrerapen handiak egiten ari dira.

Oinarri horien gainean, Internet laster batean izango da esaten zaiona ulertzeko gai, adimen propioa garatzeko eta bere kabuz ikasteko. Web 4.0 deitutako hori orain ez da zientzia fikziozko kontua.

Ingurumari horretan, etekin handiena domotika esparruan nabarituko da datozen urteetan; hau da, etxeko tresnen egitekoak errazteko, automatikoki irakurketak egin eta erabakiak hartzeko gaitasuna izango duten etxetresnetan.

Google Nest eta etxeko hotz-beroak

Domotikara bideratutako teknologia da Nest. Zeresan handia ematen ari da alor horretan, eta Googlek erosi berri du proiektua, 2,3 bilioi euroren truke, hain zuzen ere. Merkatu berrian indartsu sartu da, gainera. Gadget edo tramankulu bat ezartzen da, eta, telefonotik aginduta, etxeko tenperatura egokitzen da. Berezia da, kontsumoa aurrezten duelako etxekoen jardueraren arabera. Energiaren kontsumoa erdira murrizteko gai omen da horrela. Horrek, eta gailuaren prezio apalak —30 euro balio du— eman dio arrakasta. Hasieran, Appleren iPhone sakelakorako sortu zen Nest. Googlek erosi ondoren, bistakoa da Android plataformara ere moldatuko dutela orain.