Urt, 24
2013
android, Aplikazioak, Apple, elkarlana, Mugikorrak, Sakelako Telefonoak

Wikiloc, aisialdiko jardueren zaleen aplikazio gogokoena

GPS ibilbide eta interesguneak partekatzen dituzten erabiltzaileen komunitatea da Wikiloc. Milioi erdi erabiltzaile dira mundu osoan, milioi bat pasa ibilbide jarri dituztenak edonon, eta nahi duenarentzat eskuragarri daudenak. Hortaz, ibilaldien aukera oso zabala dago haien atarian, kokapenaren nahiz egitekoak diren moduaren arabera sailkatuak: zaldiz, bizikletaz, oinez, motorrez, eskiekin, eta abarrez egitekoak. Ez dakar informazio hori bakarrik, baizik eta jarduera bakoitzaren zailtasuna, ibilbidea erakusten duten eta kolorez nabarmenduta dauden mapak, kilometro kopurua, desnibela, argazkiak, eta beste hainbat informazio gehigarri.

Mendizale amorratuentzat edo tankerako jarduera fisikoetan oso arituak ez direnentzat baliagarria suertatuko da bereziki sakelakoetara moldatutako aplikazioa; iPhone eta Android euskarridun smartphon-entzat egina. Horrela, geokokapenaz baliatuta, posible izango da uneoro ibilbidearen aterketa zuzena egitea; jarduera berri bat egiten bada, horren ibilbidea erregistratu eta besteentzat eskuragarri jartzea sarean; edo egitekoaren zehaztapenak kontsultatzea martxan eta abisuak jasotzea, bidegurutzean okerrik ez egiteko. Horretarako, norbere helbide elektronikoarekin erregistratu besterik ez dago, eta egin nahi den jarduera bilatu webgunean: bat aukeratu , Internet nabigatzaileko helbidearen ‘id=’ osteko zenbakiak apuntatu, eta sakelako aplikazioan ID bidez jarduera aurkitzeko atalean zenbaki hori sartu behar da. Bestela, geokokapenarekin telefonoko aplikaziotik eskaera egin daiteke, hurbilen dauden ekintzak bistaratzeko. Interneterako sarbidea dagoen artean sakelakora ekartzea komeni da, gero konexio gabe erabili ahal izateko mendian.

Wikiloc dohainik dago eskuragarri App Store eta Google Play dendetan, oinarrizko funtzioekin. Aplikazioa oso-osorik baliatzeko, gehigarria jaitsi beharko da, hiru euroren truke. Bestela, nahiago izanez gero GPS gailurako fitxategiak eskuratu edo zuzenean ordenagailutik ibilbidea ikusi, haien webgunera joan behar da: http://eu.wikiloc.com.

Urt, 17
2013
Internet

Mega eta Megabox, Megaupload polemikoaren oinordekoak

Datorren urtarrilaren 19a da aukeratutako data Mega zerbitzu berria abiarazteko. Ez da ausazko aukeraketa, urtebete beteko baita egun horretan FBI-ak Megaupload itxi zuenetik. Orduko sareko fitxategien biltegi hedatuena zenaren ataria istearekin batera, P2P teknologiako programek edo bakoitzaren ordenagailuko edukiak zuzenean partekatzeko programek izugarrizko gorakada izan zuten. Izan ere, Megaupload zerbitzua moztearen ondorioz, han kontua zeukan jende errugabeak ere bertan gordetako fitxategi pertsonaletarako sarbidea galdu zuen, tartean egile eskubideak urratzen zituzten edukiak partekatzeagatik salatu baitzuten hodeiko biltegia.

Orain hala ere, bi zerbitzutan bereizitako eskaintza da iragarri dutena: Mega alde batetik, konpetentzia gorriko hodeiko biltegien esparruan alternatiba izatekotan datorrena; eta Megabox bestetik, musika zigilu ahalguztidunen kontra eginez beste era bateko negozioa proposatuko duen doako abesti libreen sarea. Hasieran bazirudien biak zerbitzu berean integratuta kaleratuko zirela, baina berriki iragarri dutenez, azkenean bi izango dira. Gainera, Megabox hilabete batzuk beranduago argitaratuko da, ekain aldera, itxura guztien arabera.

Sortzailea den Kim Dotcom magnatearen ahotik beretik jakin ahal izan denez, musika proiektua abiaraztekotan zegoela auzipetu zuten; eta hori izan omen zen benetan Megaupload-en kontrako auzirako azken bultzada. Hollywood eta musikua zigiluen aldetik presio handiak jaso ziren. Alabaina, musika industria irauli dezakeen proposamena da ezbairik gabe Megabox-ena: eduki sortzaileei diru sarreren %90 banatzean datza, eta erosleetan nahiz publizitatean oinarritutako negozioa ezartzea. Musikariek adibidez, abestiak zuzenean saldu ahalko lituzkete, eta dohainik jaitsi nahi duten erabiltzaileengandik ere etekina jasoko lukete: haiei jarritako publizitatearen gaineko irabaziak ere jasoko lituzketelako hein batean. Megakey izenez bataiatu dute teknika hau.

Zaharkitua geratu den eredutik at, bere kabuz errentagarria izateko ahalmena daukan eredua da beraz hau, pirateriaren mundutik bereizia. Hau dela eta, entzutetsuagoak izaten ari dira Megabox-en gorabeherak jendartean, Mega-rekin alderatuta.

Hitz-jokoen zale, bere izen bereko web ataria kaleratu zuen (kim.com) -ingelesez puntua “dot” esaten da- eta Mega zerbitzuarekin ere berdina egin nahi izan zuen magnateak, Interneten me.ga helbidea jartzekotan izan baitzen. Domeinu horiek baina, gehienetan herrialdeei dagozkie; kasu honetan Ghana-koari, eta lurraldean bertan jarri behar izaten dira zerbitzariak edo atariko egoitza soziala behintzat. Jada guztia lotuta zegoela, AEBen eraginez atzera bota ziren herrialde afrikarreko agintariak, pirateriaren kontra zeudela argudiatuta. Azkenean, prozesu luze baten ondoren, Zeelanda Berrian onartu zuten hacker ohia eta haren enpresa berria.

Nazioarteko konspirazio eta espioitza sare zaleek, edo auzi honen inguruan gehiago jakin nahi dutenek besterik gabe, protagonistaren aipatu webera joan besterik ez daukate (http://kim.com), haren bertsioa ezagutzeko hainbat txosten baitaude eskuragarri.

Pirateriarekin amaitzeko manifestua

Paradoxikoa dirudien arren, salatu zuten arrazoiarekin edo pirateriarekin bukatzeko eginbeharrekoen zerrenda publikatu du Kim Dotcom-ek berriki bere Twitter kontuaz baliatuta. Bere hitzetan gordetzen den logika sendoa da zinez: (1)gauza eder eta erakargarriak sortzea, Hollywood-ek gastatzen duena eta are gehiago berreskuratzea zilegi baita, baina kalitatezko produktuak ere sortzeaz arduratuta; (2)erosteko erreza izatea, euskarri fisikoa baztertu eta apaletan lekurik kentzen ez duten deskarga sistema sinpleak bultzatuz; (3)mundu mailako plazaratze bateratuak egitea, honek pirateria itoko bailuke, zain egotea gustuko ez dutenek desiratzen dutena eskuratu ahalko baitzuten, AEBetako kopia original hori legez kanpo jaitsi beharrean; (4)arrazoizko preziotan salgai jartzea, ez baita ulergarria herrialde desberdinen artean ematen diren prezioen arteko aldeak edo zinematik pasa den pelikulagatik eskatzen diren gehiegikeriak DVD edo Blu-Ray formatuetan; (5)edozein gailutan ibiltzea, zailtasun tekniko nabarmenagoak baititu kopia babeste sistema eraginkor bat aurkitzeak, euskarri guztientzat eskuragarri jartzeak baino, bidenabar.

Hitzok zuzenak eta garbi askoak dira; gehiengoa atxikitzeko bezalakoak. Orain bakoitzari dagokio erabakitzea nori interesa dakiokeen eredu berri honetara igarotzea, eta nori ez. Erosleak, garbi izango du aukera beden.

Mega, hobekuntzaz jositako hodeiko zerbitzu berria

Esan bezala, Mega heltzear dago eta besapean hainbat berrikuntza dakartza hodeiko zerbitzuak. Deigarrienak aipatzearren, pribatutasun sistemari eta datu ostalaritza sistema berritzaileari dagozkienak aipatu daitezke. Lehendabizikoari dagokionez, erabiltzaile bakoitzak sarean gordeko duen informazioa gako pribatu batez zifratuta joango da, eta enpresak berak ere ez duenez edukiko ahalmenik mekanismo hori irauli eta gordetzen dena zer den jakiteko, arazo legalez libratzen da Mega. Bestela, erabiltzaileen pribatutasunaren gaineko nazioarteko legea apurtuko lukete; mugimendu azkarra da beraz. Besteari dagokionez, hodeiko sistema osatzen duten zerbitzariak munduan barrena banatutako kopietan egongo dira, eta horrek Mega behin-behinean istea eragotzi edo zailtasun gainjarria ekarriko luke. Beste fitxategi partekatze sistemen aurrean balio erantsi bezala gainera, doako kontuak 50GB-eko espazioa eskainiko duela iragarri dute.

Ezer gutxi esan daiteke gehiago, martxan ikusi arte. Googe Drive, Microsoft SkyDrive, Dropbox, Ubuntu One edo Box hodeiko disko zerbitzuekin lehiatuko den Mega-ren weba ondorengoa da: http://mega.co.nz.

Euskaratzen laguntzeko deia

Urte hasieran egin zuen deia -beste behin ere- bere Twitter kontutik Kim Dotcom-ek, itzultzaileen laguntza eskatuz, Mega falta zitzaizkion hizkuntzetan ere eskuragarri jartzeko asmotan. Litekeena da beraz, dagoeneko lana aurreratuta egon arren, oraindik ere laguntza behar izatea egitasmo honetan; esan bezala, Megabox irteteko hilabeteak falta baitira. Interesatuek helbide honetara idatzi dezakete laguntzeko:
bidali emaila.

Urt, 10
2013
Aplikazioak, Google, Sakelako Telefonoak, tabletak

Google Currents aldizkari zerbitzu berria eskuragarri iOS eta Android euskarrientzat

Lehendabizi AEBetan izan zen eskuragarri iOS eta Android sistementzat, eta pasa den apirilean kaleratu zuten Google Currents mundura; eduki digitalak aldizkariak balira bezala bistaratzen dituen plataforma berria. Tabletentzat eta telefonoentzat egun dagoen edizio digitalen aukera zabala da (Feedly, Pulse edo Taptu aipatu daitezke), baina guztietan ezagunena den Flipboard aplikazioarekin lehiatzeko merkaturatu zuten benetan Currents. Flipboardek, albiste, eduki eta sare sozialen eguneraketa guztiak leku bakar batetik eta aldizkari bezala ikusteko aukera eskaintzen duen gisara, Currents zerbitzuak ere web orrialde desberdinetako informazioa bistaratzen du, Youtubeko kanalen eta bestelako feed edo jarioen kudeatzaile lanak egiten ditu. Eduki horiek guztiak eskuratzeaz gain, bakoitzaren gailu eramangarrien pantailetara automatikoki doitzen du informazioa, ahalik eta argi eta irakurgarrien utziz irakurleentzat. Bisualki ere dotorea, erabilterraza eta garbia den albiste irakurlea aurkeztu du beste behin ere Googlek. Zerbitzua doakoa da, eta han eskuragarri dauden harpidetza guztiak ere bai.

App honi esker, edonor harpidetu daiteke hainbat publikaziotara eta haietako eguneratzeak jaso automatikoki patrikako gailuan. Logikoa denez, lehendik Google Reader kontua zeukanak, bertako harpidetza guztiak berreskuratuko ditu hemen, berezitasun batekin: argitalpen horiek ez dira web bateko albiste jario hutsa, Currents-erako espresuki sortutako aldizkari digitalak baizik; web atariko sarrerez gain, telefono eta tabletentzat bereziki argitaratutako sailak eta artikuluak izan daitezke. Edukien sailkapen aurreratuago hori, eta informazioa haien pantailetara egokituta azaltzeak, gailu eramangarrien erabiltzaileen begietara erakargarriagoa den aldizkari eskaintza dakar azken batean.

Doako aldizkarien aplikazio berriak lehiakideekiko daukan balio erantsia edo gainjarria, haien itzulpenen aplikazioa edo Google Translate-ren integraziotik dator: edozein aldizkari arrotzetan harpidetu daiteke beldurrik gabe hemen, eskuragarri dituen 38 hizkuntzen artean lehentasunez ezarritakora itzuli baitezake edukia momentuan. Hala eta guztiz ere, BETA fasean dago euskarako itzulpenen zerbitzua; eta ondorioz euskaratik itzultzeko gai bada beste edozeinetara, baina ez alderantziz.

Zibergela edizioa ere eskuragarri

Nolanahi dela, Zibergelak oihartzuna izango du aurrerantzean txoko honetan ere, edizioa estreinatu baitu Google Currents-en berriki. Aplikazioa deskargatu eta Zibergelara harpidetzeko, ondorengo esteka sartu besterik ez dago sakelako edo tabletaren nabigatzailean: http://www.google.com/producer/editions/CAow3ciCBA/zibergela. Nahiago duenak ostera, QR kodigoa irakurrita berdina lortu dezake. Oraingoz, harpidetzeko modu bakarrak horiek dira, 200 abonutik gorako edizioak bakarrik ageri direlako edizio berriak bilatzeko ataleko emaitzetan. Hasierako bultzadarako deia da hau beraz, Animatu ba!

1 2 3