Mai, 31
2013
android, Aplikazioak, Apple, Sakelako Telefonoak, Sare sozialak eta Microblogging, tabletak

Google+ HangoutS bat-bateko mezularitza prest dago lehiarako

HangoutSHangoutS Googleren bat-bateko mezularitzarako aplikazio berria da. Azken ekarpen horrek astebete darama App Storen, Google Play-en eta webean, Chrome nabigatzailerako gehigarri gisa. Merkatuan dauden gainontzeko aplikazioei lehia egitea baino, aplikazio berriak Google-ek dituen komunikazio zerbitzu guztiak bateratzea du helburu: txata, bideo dei zein telefonoetarako bat-bateko mezularitzarena.

Hainbat produkturen azkena suposatu du berrikuntzak, eta Google Talk, Google+ Messenger edo Google Chat and Video Service bezalakoak, dagoeneko ez dira existitzen bere horretan. Horien erabiltzaileak biltzen ditu HangoutS-ek. Inolako prestaziorik galdu gabe aberasten du haien jarduna.

Esate baterako, jada posible da iOS edo Android sakelako edo tablet batetik solasean aritzea testuz edo bideoz Gmail saioa irekita daukan ordenagailu erabiltzailearekin. Sakelakoa ahaztuta, bateria bukatuta edota sare gabe geratuta ere, etengabe konektatuta egoteko arazorik ez dago aurrerantzean.

Ohiko mezularitza aplikazioen ezaugarri guztiak biltzen ditu, aukera aurreratuagoekin batera: hamar pertsonaren arteko bideo elkarrizketak, Google-ren hodeian jarduna gordetzea (Gmail-en testuak eta Google+ sarean argazkiak), edo igorritako mezua irakurri dutenerako erakusle berriak. Hala ere, ñabardura txiki batzuk badauzka, eta ahots bidezko deiak, SMS mezuekin integrazioa edo sakelako plataforma gehiagotarako eskuragarri jartzea, Google-rentzat ez dira traba.

Google jabedun teknologia erabiltzen. Bai ote?

Beste behin ere, aurrea hartu dio nabarmen Google-ek Apple etxeari. Izan ere, iOS 6 bertsiotik aurrera lehenetsita datorren iMessage zerbitzuak izan beharko lukeen guztia baita HangoutS berria. Doako mezularitza eta plataforma artekoa, osoa eta fidagarria.

Software politikan kale egiten dabiltza Cupertino-koak, baina Google-n ere oraingoan ez dira libratu kritiketatik. Izan ere, haiek aupatu zuten XMPP protokolo estandarra, eta horrekin, edozein plataforma eta programen arteko erabiltzaileak komunikatzea posible egiten zuten. Orain, eredu hori bultzatzeari utzi eta protokolo pribatua darabilte; jada posible izateari utzi diolarik Google-ko kontaktuekin komunikatzea haiena ez den programetatik, adibidez.

Interneteko askatasunaren defendatzaile nagusia izan denak, monopoliora bideratzen duten erabakiak hartzeari ekin dio orain, baina, industriaren babesa falta zaiola estandarrari eta teknologikoki akituta geratu dela esanez zuritzen dute haien burua gaur-gaurkoz.

Mai, 24
2013
android, Aplikazioak, Internet, Sakelako Telefonoak, tabletak

Feedly RSS jarioak irakurtzeko aplikazioa

feedlyFeedly RSS jarioak irakurtzeko aplikazio doako bat da. Android sistemetarako Google Playtik deskargatu eta instalatu ahal da eta iOS sistemetan Apple Storen dago eskuragarri. Honetaz gain, gehigarri bezala instalatu daiteke hainbat nabigatzaileetan, beraz sakelako telefonoan zein ordenagailu batean nabigatzailearen bitartez irakur daitezke RSS jarioak .

Firefoxerako gehigarria eta Google Chromerako gehigarriak deskargatzeko helbideak https://addons.mozilla.org/eu/firefox/addon/feedly/ eta https://chrome.google.com/webstore/detail/feedly-beta/ndhinffkekpekljifjkkkkkhopnjodja dira hurrenez hurren.

Feedly sinkornizatzen da instalatuta dagoen gailu edo nabigatzaile guztietan, jakina, era honetan erabiltzaileak jarioak antolatu ahal ditu eta gogoko edo irakurrita bezala markatutako sarrerak Feedly aplikazioa erabiltzen duen leku guztietan egongo dira.

Feedly 2008tik dagoen aplikazioa da, baina egun pil-pilean dago Google Reader zerbitzua uztailaren 1ean itxiko zela jakinarazi zenetik. Izan ere, albiste honekin erabiltzaile dezente lortu ditu, adibidez, martxoaren 15ean 500.000 erabiltzaile berri lortu zituen 48 ordutan. Horri esker, nahiko eguneraketa eta hobekuntza egiten ari dira azken aldi honetan.

Urr, 05
2012
Apple, Sakelako Telefonoak, Sistema Eragileak

Appleren gailuetarako eskura dago iOS 6

QR kodeak erabiltzen ditu Passbook aplikazioak

QR kodeak erabiltzen ditu Passbook aplikazioak

Apple telefonoen azkenengo sistema eragilea edo iOS 6 irailaren 19an kaleratu zuten. Apple etxeak daukan eguneratzeen politikari eutsi, eta bertsio hori berritu dezaketen gailuen zerrenda ondorengoa da, sakelakoetatik hasita: iPhone 4, iPhone 4S, iPhone 3GS eta 4. belaunaldiko iPod Touch-. Tableti dagokionez: iPad berria eta iPad 2.

Orain txertatu dituzten berrikuntza guztiak ezingo dituzte gailu horiek guztiek eskaini, baina horregatik ezin dira utzi aipatu gabe esanguratsuenak. Beraz, aurreko astean atal honetan aipatu legez, Siri espainieraz ulertzen eta erantzuten hasi da, Facebook integratuagoa dago oro har, eta beste hainbat hobekuntza daude Appleren zerbitzu eta programetan.

Agian erabaki esanguratsuena da Googleen mapak kendu dituztela, eta Appleren egitura propioaz ordeztu dituztela: TomTom mapak oinarritzat harturik oraingoan. Azken helburua kalitatea handitzea eta beste zerbitzu batzuk integratzea izan da, baina bolo-bolo ibili da albistea mapek dituzten hustak direla eta.

Amaitzeko, badirudi Passbook aplikazioa dela etorkizunerako ate gehien zabalik uzten dituen berrikuntza. Izan ere, askok ikusi dute Appleren hurbilketa bat NFC edo telefono bidezko ordainketa sistema berrietara; egun, QR etiketak erabiliz, enpresa paseak eta ikuskizunetako sarrerak ordezkatzen ditu Passbookek.

Gogoan izan bertsioa berritzeko iTunes 10.7 erabil daitekeela edo ordenagailu beharrik gabe eta Wi-Fi konexio bidez ere egin daitekeela eguneraketa, OTA (Over The Air) erabilita.

Iritsi da iPhone 5 ere

Ez da denbora asko pasatu iPhone 4S plazaratu zutela, baina bueltan temati itzuli dira Steve Jobs zenaren konpainiakoak. Aldaketa nagusiak pantailaren tamaina, material berrien erabilera, potentzia grafiko harrigarria eta parerik gabeko prozesu abiadura dira. Aurrekoarekin alderatuz, %18 finagoa da sakelako telefonoa; pantaila luzerantz handitu da, 4 hatz izateraino; eta pisuari dagokionez, 112 gramo besterik ez du pisatzen.

Lehentasunez instalatuta dakar iOS 6, eta lehengo o0stiraletik dago salgai Euskal Herrian. Lehen asteburuan bost milioi ale saldu ziren AEBetan.

1 … 4 5 6 7