Mai, 31
2013
android, Aplikazioak, Apple, Sakelako Telefonoak, Sare sozialak eta Microblogging, tabletak

Google+ HangoutS bat-bateko mezularitza prest dago lehiarako

HangoutSHangoutS Googleren bat-bateko mezularitzarako aplikazio berria da. Azken ekarpen horrek astebete darama App Storen, Google Play-en eta webean, Chrome nabigatzailerako gehigarri gisa. Merkatuan dauden gainontzeko aplikazioei lehia egitea baino, aplikazio berriak Google-ek dituen komunikazio zerbitzu guztiak bateratzea du helburu: txata, bideo dei zein telefonoetarako bat-bateko mezularitzarena.

Hainbat produkturen azkena suposatu du berrikuntzak, eta Google Talk, Google+ Messenger edo Google Chat and Video Service bezalakoak, dagoeneko ez dira existitzen bere horretan. Horien erabiltzaileak biltzen ditu HangoutS-ek. Inolako prestaziorik galdu gabe aberasten du haien jarduna.

Esate baterako, jada posible da iOS edo Android sakelako edo tablet batetik solasean aritzea testuz edo bideoz Gmail saioa irekita daukan ordenagailu erabiltzailearekin. Sakelakoa ahaztuta, bateria bukatuta edota sare gabe geratuta ere, etengabe konektatuta egoteko arazorik ez dago aurrerantzean.

Ohiko mezularitza aplikazioen ezaugarri guztiak biltzen ditu, aukera aurreratuagoekin batera: hamar pertsonaren arteko bideo elkarrizketak, Google-ren hodeian jarduna gordetzea (Gmail-en testuak eta Google+ sarean argazkiak), edo igorritako mezua irakurri dutenerako erakusle berriak. Hala ere, ñabardura txiki batzuk badauzka, eta ahots bidezko deiak, SMS mezuekin integrazioa edo sakelako plataforma gehiagotarako eskuragarri jartzea, Google-rentzat ez dira traba.

Google jabedun teknologia erabiltzen. Bai ote?

Beste behin ere, aurrea hartu dio nabarmen Google-ek Apple etxeari. Izan ere, iOS 6 bertsiotik aurrera lehenetsita datorren iMessage zerbitzuak izan beharko lukeen guztia baita HangoutS berria. Doako mezularitza eta plataforma artekoa, osoa eta fidagarria.

Software politikan kale egiten dabiltza Cupertino-koak, baina Google-n ere oraingoan ez dira libratu kritiketatik. Izan ere, haiek aupatu zuten XMPP protokolo estandarra, eta horrekin, edozein plataforma eta programen arteko erabiltzaileak komunikatzea posible egiten zuten. Orain, eredu hori bultzatzeari utzi eta protokolo pribatua darabilte; jada posible izateari utzi diolarik Google-ko kontaktuekin komunikatzea haiena ez den programetatik, adibidez.

Interneteko askatasunaren defendatzaile nagusia izan denak, monopoliora bideratzen duten erabakiak hartzeari ekin dio orain, baina, industriaren babesa falta zaiola estandarrari eta teknologikoki akituta geratu dela esanez zuritzen dute haien burua gaur-gaurkoz.

Mai, 16
2013
android, Aplikazioak, Apple, Internet, Irisgarritasuna, kontzeptuak, Mac OS X, Mugikorrak, Sailkatugabeak, Sakelako Telefonoak, tabletak, Ubuntu, Windows

Hodei guztien gainetik baina sasi guztien azpitik pasa gabe

Norbere disko gogorra da hodeiaNorbere hodeiaren jaun eta jabe izateko web aplikazioak agertu dira azkenaldian. Jarraibideak fin betetzen badira, saiakeran sasi artean korapilatzea ekidin eta norbere zerbitzuarekin eroso sinkronizatuko ditu gailuak edonorek.

Izan ere, bolo-bolo dabiltza Interneten informazioa gorde eta gero edozein gailutan automatikoki kargatzen dituzten web biltegiak: Microsoft SkyDrive, Google Drive, Dropbox eta Mega dira horietako batzuk. Erosoak dira oso, tramankulu guztiak gainean hartu beharrik gabe eta Internet sarbidea daukan edozein lekutatik atzitu daitezkeelako; eta seguruak dira, fisikoki gordetzen ditugun euskarrien akatsetatik libre daudelako sarean ditugun datuok. Hala ere, sarritan aipatu izan denez, datuen konfidentzialtasuna zalantza hizpide bihurtzen da. Nola jakin Googlek ez dituela datuak begiratuko, edo okerrago, erakunderen batekin partekatuko? Megaupload-ekin gertatu bezala, egun batetik bestera zerbitzua itxiz gero, hodeian gordetakoa galtzeko beldur, dokumentu garrantzitsuak hodeian gorde gabe uzten duenik ere bada gaur-gaurkoz.

Hodeiarekiko sistemekin mesfidati direnek, edo gutxienez, haien pribatutasunaz jeloskor direnek zerbitzu propioaz sinkronizatzeko aukera dute. Norbere laino propioa erabili eta kudeatzeko tresnak ugaritu egin dira, eta OwnCloud eta Younity dira horren adibideak. Guztiz pribatua den irtenbidea ahalbidetzen dute, memoria mugarik gabekoa, dokumentuak, kontaktuak eta egutegiak gorde nahiz partekatzeko, nahieran. Miraririk ezean, ordenagailua piztuta egon beharko da datuak eskuragarri nahi ditugun artean.

Owncloud, software libreko aukera osoena

Lainoan kokatzen den zerbitzua izanik, ohiko zerbitzuak eskaintzen ditu: norbere fitxategiak gordetzeko, web zerbitzari bat beharko da, eta zerbitzarian bertan gordeko dira fitxategiak; fitxategi horiek atzitzeko web interfaze bat egongo da; norberaren gailuetatik sartzeko aplikazio bezeroak daude eskuragarri iOS eta Android-eko dendetan, informazio guztia eskura izateko eta sinkronizatuta non-nahitik; eta azkenik, OwnCloud sistemak bere funtzionalitateak zabaltzeko aplikazio libreak dauzka; hots, garatzaileek arau batzuk jarraiki sor ditzaketen funtzionalitate berriak. Aplikazio horien bidez, OwnCloudek egutegi bat eskaintzen du, musika erreproduzigailu bat edo erabiltzaileak LDAP zerbitzu batekin lotzeko aukera (adibidez etxeko inprimagailua). Aplikazio biltegi hori esteka honetan ikusi daiteke: http://apps.owncloud.com/.

OwnCloud software librea da, eta, beraz, hainbat bide daude erabiltzen hasteko. Linux, Windows nahiz Mac ordenagailuekin da bateragarria, norbere etxea bihurtuz laino propioaren gordelekua. Bestela, ordainpeko ostalari edo hosting leku batean, nahiz OwnCloud zerbitzuak berak amaraunean daukan ostatzea erabilita jar daiteke Interneten.

Norbere etxea zerbitzari bihurtzeko aukera badugu, eta web aplikazioak ordenagailuan eta era erraz batean instalatzeko, Bitnami zerbitzua dugu, eta OwnCloud ere, orduko jarraibideekin instalatu daiteke: http://zibergela.bitarlan.net/2013/04/04/1605/. Bestela, OwnCloud norbere kabuz eta laguntzarik gabe nola instalatu jarraibideak aurki daitezke Ander Goñi-ren blogean: http://agonirena.com/blog/2012/11/06/owncloud-probatzen/.

Younity, Apple gailuekin lotzeko lainoa

Younity ere laino pribatua sortzeko aplikazioa da; mugatuagoa baina erabilerrazagoa aurrekoarekin alderatuta. Edozein Windows edo Mac OS X sistema batean gordetakoa jartzen du eskuragarri, iPhone, iPad eta iPod Touch gailuetatik. Ez dago besterik, debaldeko programa instalatzea (http://www.getyounity.com/) eta sinkronizatzeko gailuan beste hainbeste egitea baino App store-n Younity baliatzen hasteko. Eragozpen bakarra da ezin daitekeela fitxategirik partekatu besteekin; horretarako, postaz bidali edo gainontzeko hodei zerbitzuak erabiltzen jarraitu beharko da, ezinbestean.

Mai, 09
2013
musika, Software Librea

Amaraunean irratsaioak debalde sortzeko aukera

headphones and laptopStreaming gisako emanaldiak ohikoak egin dira azkenaldian. Horietan, ahotsa edota bideoa Internet bidez bidaltzen da; baina, batez ere, zuzenean jasotzen direlako hedatu dira hainbeste. Beste behin ere, web aplikazio batek erraztu du prozesua, eta, Grooveshark erabilita, erraz asko emititzen has daiteke ahotsa. Bestela, hodeiaz fidatu ezean, edo mugarik gabeko emisioa nahi izanez gero, norbere ordenagailua zerbitzari bihurtzea da alternatiba.

Broadcaster, bide motz eta errazena

Musika streaming bidez entzuteko aplikazio bat da Grooveshark, doako edo publizitaterik gabeko eskaintzak dituena. Spotify eta antzeko plataformentzat alternatiba gisa agertu ostean, lege arazoak izan ditu hainbat herrialdetan, erabiltzaileen artean musika dohainik partekatzeko eredua babestearren. Urrutira joan gabe, iOS gailuetan Cydia instalatuta daukaten erabiltzaileek bakarrik eskuratu dezakete dagokion aplikazioa, App Store-tik kendu baitzuten. Grooveshark zerbitzuari erabiltzaile gisa etekina ateratzeko ez da izena eman behar, ez eta saioa hasi behar ere. Guztiz sarean kudeatu eta entzun ahal da musika, eta, ondorioz, nabigatzaile arrunt batekin edozein sistema eragiletatik erabil daiteke. Webgunea honako hau da: http://grooveshark.com/.

Orain, lehen planora bueltatu da Grooveshark, aste pare bat baita hodeiko musika zerbitzuak funtzio berria estreinatu duela: Broadcaster. Harrezkero, aditua izan gabe, edonork bene-benetako irratsaioa izan dezake amaraunean. Ondoren, ohiko Grooveshark-en loturak erabili, eta norberaren musika irratia parteka daiteke webgunean bertan, URLaren bitartez, posta elektroniko nahiz sare sozialen bidez. Funtzio hori ere debaldekoa da, eta honetan datza: gunean sortutako erreprodukzio zerrendak URL helbidea daukan edozein erabiltzailerekin partekatzean. Berrikuntza nagusia da, emisioan abesti batetik bestera 30 segundo izan ditzaketen ahots grabazioak txerta daitezkeela; web atarian bertan eta ordenagailuko mikrofono xume bat erabilita graba daitezkeenak. Sistema horrek, gainera, soinu efektuak sortzeko aukera ere badauka.

Broadcaster erabilerraza da, ez du instalaziorik behar, domeinurik erosi beharrik ere ez dago, eta, are gutxiago, norbere ordenagailua zerbitzari gisa konfiguratu beharrik. Grooveshark barnean saioa hasi eta transmititzen hasteko, berriz, nahikoa da transmititzera gonbidatzen duen botoiari ematea (Start Broadcasting, orri oinean), eta gordetako norbere zerrenda emititzen hasiko da. Musika zerrenda hori uneoro eguneratu daiteke, eta halabeharrez, entzuleen nahietara moldatu; konektatu diren jarraitzaileekin komunikatzeko prest daukan solaguneari esker. Administrari leiho barneko zokondo batean ageriko zaio solasgune hori aurkezleari.

Bestelako aukerak software librean

Hainbat software dago norbere ordenagailutik streaming gisa emititzen hasteko, eta debalde deskargatu litezkeenak: SHOUTcast, Icecast edo Helix Server Basic dira horietako batzuk. Kasu horietan, baina, pausoak korapilatsuagoak dira. Hemen, aurrenekoarentzat jarraibideak: http://www.wikihow.com/Make-Your-Own-Radio-Station.

1 2 3 4 5 6