Mar, 06
2014
Hardware, lizentzia libreak, Mac, Mac OS X, Mahaigaina, Osagarri Informatikoak, Windows

Pantaila anizkoitza ezartzeko argibideak

multiple_monitorsOrdenagailuak prest daude hainbat ataza aldi berean egiteko. Baina maiz erabiltzaileari bakarra erakusten dio pantailan. Martxan dauden beste ataza edo programa horiek atzeko planoan dihardutela esaten da orduan. Leihoak handitu edo txikitu egiten dira batetik bestera joateko, eta irekitako programak beheko ataza-barran pilatzen dira.

Hala ere, bada beste modu bat erosoagoa dena: ordenagailuari pantaila bakarraren ordez gehiago konektatzea, alegia. Pantailak ondoz ondo lerrokatuz gero, ezarpen gutxi nahikoa dira sistema eragileak horien artean mahaigaineko bakarra osatzeko.

Hala, sagua pantaila baten ertzean geratu beharrean, bestera jauzi eginez joaten da leku berria baliatzeko. Teknika hori asko erabiltzen dute lanerako erreferentzia edo patroi bati etengabe begira egon behar dutenek. Itzulpenetarako, pantaila batean jatorrizko testua mantenduz hura itzultzen aldameneko editorean; argazki bat irekita, alboan hura marrazten; web orrialdeak maketatzen dituenari erosoagoa egingo zaio idazten ari den kodeak zer-nolako itxura daukan pantailan erakutsita; edo aisialdirako, pantaila batek Interneten bilatutako mapa erakusten diolarik bestean bideo jokoan jolasten ari den artean.

Mahai gainekoa bikoizten

Leihoen artean aldatzeko premia murriztean, denbora aurrezten da, eta, beraz, produktibitatea handitzen. Pantaila anizkoitza jartzea ez da garesti ateratzen gainera: LCD pantailen prezioak nabarmen jaitsi dira, eta egungo bideo txartelek irteerako erreten bat baino gehiago izan ohi dituzte.

Ordenagailuaren bideo txartelak, gutxienez, irteera bikoitza izan beharko du. Aukerak desberdinak dira ordenagailua eramangarria edo mahai gainekoa izan. Kontuan izan baita datu hau: eramangarri bat inoiz ezin daiteke erabili mahai gaineko baten bigarren pantaila gisa. Eramangarrien pantailak ez baitira independenteak, eta, piztekotan, sistema eragile eta guzti abiarazten dira.

Mahai gaineko ordenagailuek lehentasunezko bideo erreten bat ekartzen dute plaka basean. Horretaz gain, bideo txartel bat ere txertatzen zaie funtzio berdina duena; bideo seinalea igortzea. Txartel horiek gutxien-gutxienean, pantaila bi edo gehiago konektatzeko erretenak jasotzen dituzte, egun.

Eramangarrien kasuan, eragiketa sinpleagoa da. VGA edota HDMI erretenak alboetan jasotzen dituzte, eta, pantaila lotuta dakartenez, eramangarrira berria lotzea besterik ez dago. Kable eta bihurgailuetaz gehiago jakiteko, gogoratu Zibergelan berriki esanak: http://zibergela.bitarlan.net/2014/02/13/bideo-kableak/.

Behin kableak eta erretenak egoki lotuz gero, ondorengo ezarpenak sistema eragilearen araberakoak dira. Baina, hala ez bada?

Arazoak leuntzen

Lehentasunezko bideo erretenekin ez iristea, edo kableak eta erretenak baliokideak ez izatea dira eragozpenak.

Aurreneko kasuan, ordenagailuaren bideo txartela eguneratzea edo ordezkatzea da errazena. Merkatuan 80 eurotik aurrerako eskaintza zabala dago. Erabiltzaile arruntek apalenekin sobera dute, eta garestiagoak bideo ediziorako edo bideo joko aurreratuenetan jolasteko nahi dituztenentzat dira. Betiere, berria erosteko sasoian bi erreten gutxienez dituela egiaztatu. Nahiago bada, bestelako aukerarik ere bada. Grafikoak hedatzeko moduluak edo ordenagailuaren bideo erreten batean konektatzekoak diren kutxak daude. Horiek hainbat bideo egokigailu edo irteera dakartzate. Honela, DVI, VGA zein HDMI erreten bakarretik hainbat pantaila konektatzeko aukera dago. Eramangarrien kasurako erakargarriagoak dira USBrako bideo egokigailuak. 1.920×1.200 bereizmena eskaintzen dute modernoenek.

Bigarren kasuan, kable egokigailuak erostea da aukera hoberena. Hainbat daude, DVI-HDMI, HDMI-VGA, eta abar.

Azken ezarpenak

Ordenagailua eta pantaila parea (gutxienez) zuzen konektatuta direnean, sistema eragilea ezartzea da azken eginbeharra.

• Windows: ordenagailua abiaraztean beharrezko kontrolatzaileak automatikoki instalatzen ditu sistemak. Lehentasunez, pantaila nagusiaren ispiluarena egingo du bigarrenak. Pantaila hedatzeko eta bakar baten gisa funtziona dezaten, Kontrol-Panela ireki eta Doitu pantaila-bereizmena atalera joan. Pantaila anitzak hartu eta bakoitzaren orientazioa eta bereizmena aukeratu. Teklatuko lasterbidea erabil daiteke Windows sinbolodun botoia eta P tekla aldi berean sakatuta. Hedatuaukeratu.

• Ubuntu Linux: Ubuntuko pantailen ezarpenak daude goiko menuko Sistema-Ezarpenak-Pantailabarruan. Detektatu botoian eman eta automatikoki egingo du. Ispilua aukera kendu, irudiaren kopia nahi ez bada.

Bideo txartel fabrikatzaile batzuek ez dituzte kontrolatzaileak egokitzen eta GNU/Linux banaketak babesik gabe lagatzen dituzte. Erosi orduko, bilatu zeintzuk diren arazorik ematen ez dituztenak sarean.

• Mac OS X: Mac guztiek ez dute gaitasuna pantaila bat baino gehiago erakusteko. Appleren laguntza dokumentazioan egiaztatu ezer baino lehen. Bestela, konektatu eta automatikoki ezagutuko du. System Preferences-Display barruan pantaila bakoitzeko ezarpen leiho bana irekiko da. Horietan ezarriko dira monitore bakoitzaren ezarpenak, atzeko irudia, lasterbideak eta menuak, eta abar.

Mac etxeko gailuak elkarrekin konektatzeko pentsatuta daude gainera. 2009az gerozko iMac eta MacBook-ak, esaterako, elkarrekin konekta daitezke eta eramangarriaren bigarren pantaila hedatu gisa erabili mahai gainekoa. iPad tableta ere erabil daiteke Mac ordenagailukoa erakutsi eta ukipenaren bidez kontrolatzeko.

Sistema eragile bat hainbat pantailatik ikustea ohikoa da. Baina ez hainbeste pantaila bakoitzean sistema eragile bana erakutsi eta guztiak bakarretik agintzea. Hori egiten du Synergy izeneko software libreak: sagu eta teklaturik gabe sistema eragile desberdin bi eduki daitezke martxan bakoitza bere ordenagailuarekin, eta hirugarren baten bidez kontrolatu hirurak; saguak batetik bestera etenik gabe jauzi eginez.

Informazio gehiagorako: http://synergy-foss.org/.

Ots, 27
2014
android, Aplikazioak, Apple, GNU/Linux, Internet, Irisgarritasuna, Mac, Mac OS X, Mahaigaina, Mugikorrak, Pribatutasuna, qr kodea, Sakelako Telefonoak, Segurtasun kopiak, Segurtasuna, tabletak, Windows

Sakelakoaren datuak zuzenean sinkronizatzeko

bt-overviewiCloud, Google Drive, Ubuntu One, Mega, Dropbox, One Drive… Sarean kudeatu daitezkeen orotariko web aplikazioak dira. Telefono eta tabletetarako baliokideak diren aplikazioak eskaintzen dituzte, dendetatik deskargatzeko.

Baina, oinarrian, antzera funtzionatzen dute. Batzuek datuak enkriptatzen dituzte, ezkutukoak bihurtuz; besteek, berriz, zuzenean sarean gordetzen dituzte, zelatarien bistan. Baina denak informazioa urrutiko zerbitzarietan kargatzeko dira.

Interneterako sarbidea dagoen artean, bazter guztietatik berreskuratu ditzake norbere datuak. Aski da kontuaren erabiltzaile izena eta pasahitza gogoratzearekin.

Hala ere, zalantza bakarra geratzen zaio erabiltzaileari: datu pribatuak beste batzuen esku jartzen direla. Galtzeko arriskutik seguru egon arren, ez daude ezezagunen begiradetatik salbu. Beste hitz batzuetan, hodeiko zerbitzuen erabiltzailea alde batera uzten ari da pribatutasuna, erosotasunaren mesedetan.

Hodei konputazioa gauza askotarako erabiltzen da. Baina, agian, ospe handiena hodeiko biltegiratze sistemek eman diote. Sarerako sarbidea dutenetik, telefonoek edo tabletek ere asko baliatzen dituzte. Horien datu guztiak sinkronizatzeko aukera osoena, sarritan, lehentasunez jarritakoek ematen dute: iCloud edo Googlek. Izan ere, fitxategi, irudi, bideo, kontaktu, egutegi eta oharren kopiak sinkronizatzen dituzte.

Hala ere, datu batzuk lainoa erabili gabe zuzenean norbere ordenagailuarekin sinkronizatzerik balego, zer gertatuko litzateke?

BitTorrent Sync, aukera pribatua eta segurua

IOS eta Android gailuetarako aplikazio horrekin, bakoitzaren gailuen artean nahi adina fitxategi sinkroniza daitezke. Gainera, karpetak partekatzea ahalbidetzen du, nahi den pertsonekin, eta haiekin edozer gauza sinkroniza daiteke. Hodeiko zerbitzuek jarritako edukiera mugarik ere ez dauka, bakoitzaren ordenagailuko memoriaren gaitasunak ezarriko baitu langa. Fitxategi bat bidali aurretik enkriptatu egiten du, eta ondoren, datu horiek ez dira geratuko hodeiko zerbitzarietan gordeta. Informazio guztia gako pribatuen bidez babestuta dago.

Sync sisteman, zerbitzaria bakoitzaren ekipoa da, eta bezeroak, hara konektatuko diren gailuak. Sinkronizatzeko unean, bezeroak zein zerbitzariak piztuta eta sarera konektatuta egon beharko dute; bestela, akabo.

Behintzat, pribatutasuna estimatzen dutenek aukera ona dute hodeiaren aurrerapenak baliatzeko. Kanpoko zerbitzuen menpe egon gabe, gainera. Zibergelan, bakoitzak gobernaturiko hodei sistemez aritu ginen.

OwnCloud eta iPhonerako Younity zerbitzuek ematen dute aukera hori:http://zibergela.bitarlan.net/2013/05/16/hodei-guztien-gainetik-baina-sasi-guztien-azpitik-pasa-gabe/.

Instalazioa

Instalatzeko garaian, bezero-zerbitzari sistema osatu behar da. Sakelako eta tableten kasuan, Google Play edo App Storera jo, eta izen bereko aplikazioa deskargatu behar da. Ordenagailuan, berriz, GNU/Linux, Mac eta Windows sistemetarako dago.

Ubunturen kasuan, errazena software biltegian bilatu eta instalatzea da. Bestela, terminala ireki, eta agindu bidez osa daiteke instalazioa:

  • sudo add-apt-repository ppa:tuxpoldo/btsync
  • sudo apt-get update
  • sudo apt-get install btsync-user
  • btsync-restart

Webean dituzte Windowsen edo Mac batean instalatzeko jarraibideak: http://www.bittorrent.com/intl/en/sync/get-started.

Horrekin, martxan dago jada BitTorrent Sync zerbitzaria. Nabigatzaile bat ireki, eta http://localhost:9999 helbidean ikus daiteke.

QR kodea sortu eta telefonoarekin irakurri

Ordenagailuko karpeta bat sinkronizatuko da telefono edo tabletaren beste batekin. Karpeta hori partekatu egin behar da gailuekin, baina, aurrena, norberak sortu behar du. Gero, zein den adieraziko zaio. Ordenagailuan BitTorrent Sync ireki, eta eskuineko goiko aldean dagoen Add Folder aukeratu behar da horretarako. Gako pribatua sortzeko eskatuko du, Generate botoiari emanda. Horrek QR kode bat sortu eta erakutsiko du pantailan.

Telefono edo tabletako aplikazioa ireki, eta Add Folder aukeratu egin behar da hor ere. Atzetik Scan QR code emanda, ordenagailuaren pantailako QR kodea irakurri beharko da kamerarekin.

Nahiago bada, ageri den gako luzea kopiatu daiteke letraz letra, sakelako edo tabletan adierazten den lekuan. Ordenagailuko karpeta automatikoki sinkronizatuko da, horrela telefonoan sortuko duen berrian. Izena ere jarri beharko zaio karpetari.

Urr, 31
2013
Mahaigaina, Mugikorrak, Streaming, tabletak, Telebista

Telebista, bestelako pantailetara

Panasonic_VIERA_Tablet-717064Egungo krisi ekonomikoak badu zerikusirik ordainpeko telebista zerbitzuak pairatzen ari diren beherakadan. Arrazoia ez da, alabaina, haiengatik ordaindu behar izatea. Jendeak edukien kontrolarekiko eta erosotasunarekiko duen jarreran dago aldaketaren muina.

Internetek erabiltzaileen ohiturak aldatu dituela garbi asko dago, honez gero. Inork ez du atsegin ordutegi edo programazio bati lotuta egoterik.

Are gehiago, badirudi telebista erabat interaktibo egiteari lotuta datorrela etorkizuna: erabiltzaileak edukiarekin zuzenean harremana izateari, alegia. Hori guztia nahi bada, bitartekaria aldatu beharra dago, eta gakoa, Internet da.

Berehalako pausoa, baina, etxeetan Internet bidezko telebistaren edo IPTV deituaren egonkortzea da. Eta bideratuta dago. Digital TV kontsultoriak 97 herrialdetan egindako ikerketaren arabera, 2018 aurretik, 167 milioi etxetan Internet bidezko telebista plataformak erabiliko dituzte munduan. Joera arinduz doa, 2008ko azkenaldera 13 milioi etxetan erabiltzen ziren Internet bidezko plataformak, eta 2012an, 70 milioitara iritsi ziren. Eta aurtengo urtea amaitu orduko, hartzaileen kopurua 88 milioitaraino iristea espero dute. Sektore oparoa da: 2012an 9.141 milioi euro bildu ziren, eta, kalkuluen arabera, 2018rako 16.186 milioi euro biltzea espero dute.

Bateratu gabeko eskaintza

Hornitzaileen arteko adostasunik gabe, zerbitzu mordoa dira egun eskuragarri. Estandar baten faltak, hain zuzen, agintea hartu eta elkarren segidako kanalak aldatzeko plazera oztopatzen du: zerbitzu batera harpidetzeak ez baitu kanal guztietarako sarbidea bermatzen; haiek izenpetutako barruti batera baino.

Batzuek telebista kateen bertsioak eskaintzen dituzte; besteek, aldiz, telesailen eta pelikulen salmenta eta alokairu bilgune gisa funtzionatzen dute. Denek, baina, erabiltzaileari ematen diote kontrol osoa.

Edukiak norberak aukeratzen ditu, eta ahal dituenean ikusi, emanaldiak webguneen bidez nahiz aplikazioen bidez jasota. Emititzen denaren gaineko agintea ere erabatekoa da informatikari esker, eta atzeratzeko edo errepikapenak ikusteko arazorik ez dago. Netflix, Amazon Instant Video, Magine, Total Channel, Filmin… zerrenda ia amaigabea da, eta alderik gabe, telefono, tableta, bideo joko, ordenagailu edo Smart TV telebista batetik, haien zerbitzuetara sarbidea ematen dute, harpidetza bakarra ordainduta; antenen beharrik gabe. Ezarpen askotarikoak dituzte, eta, batzuetan, telefonoa urrutiko aginte gisa ahalbidetzen dute.

Tankerako zerbitzua eskaintzen dute jada hainbat kate tradizionalek doan, bakoitzak bere aldetik. Profil berriko ikusleen haria, zein publizitatearen irabaziak galtzeko beldur. Haien artean, EiTB-ren Nahieran zerbitzua dago, http://www.eitb.tv/eu/ webgunean eta EITB izeneko aplikazioan, App Store eta Google Play-n deskargatu daiteke.

Hego Euskal Herrian Canal+ katearen Yomvi, edo, Ipar Euskal Herrian kate berak emandako Canal Play Infinity ere antzekoak dira; ordainpekoak baina zuzeneko kirol emanaldiak eta pelikula estreinaldietara bideratuagoak (22 eta 60 euro hileroko abonamendua dute).

Ipar Euskal Herriko egoera bestelakoa da. Eskaintza murritzagoa da, hein batean, legedi zentralak, estreinatu zirenetik bi urte pasatu arte pelikulak ematea eragozten baitu; eta harpidetza bidezko plataformetarako bakarrik da.

Hego Euskal Herrian dagoeneko martxan dagoen eta, zurrumurruen arabera, laster Euskal Herri osoan egongo den zerbitzuetako bat Wuaki.tv da. Nolanahi ere, batera zein bestera, audioa euskaraz ezingo da jaso eta bideoak frantsesez edo espainolez ikustean datza desberdintasuna. Zortzi euroko hileroko kuotan, haien pelikula eta telesailen katalogoa sartzen da. Bestela, banaka alokatu edo erosi ere egin daitezke edukiak. PC, iPad, Android gailu edo Xbox360 zein Play Station 3 kontsoletatik atzi daiteke.

Ohiko telebista baten gisara, kateak eskaintzen dituen streaming erako baliokiderik ere bada. Zattoo azpimarratzekoa da, halaber, frantsesez eta espainolez. Programak grabatzea, hainbat sistematatik sartu ahal izatea —GNU/Linux barne— eta doako harpidetza bat izatea ditu bereizgarri. 30 kate dauzka egun, ETB Sat barne.

Hala eta guztiz ere, egoera asko aldatuko da aurki, erabiltzaileekin interaktibitate handiagoa izango duten aplikazioak izango baitira. Microsoft, Intel, Apple edo Sony merkatu hori zelatatzen hasiak dira. Adi baita Googleri ere; Google TV izeneko telebista adimentsuentzako zerbitzua itxi eta Android sistemekin kontraerasoa egitekotan baitago, streaming bidezko telebista berriarekin.http://zibergela.bitarlan.net/2012/01/18/google-tv/.

1 2 3 … 5