Bizikleta bideak dituzten Ipar Euskal Herriko hirigune nagusietan baliatu ahalko da. Eskaintza berria era horretako bideak hirietako mapetan jasotzen dituzten herrialdeetara zabaldu dute: Ameriketako Estatu Batuak, Australia, Austria, Belgika, Danimarka, Eskozia, Finlandia, Frantzia, Gales, Herbehereak, Ingalaterra, Kanada, Liechtenstein, Luxenburgo, Monako, Norvegia, Suedia eta Suitza, alegia.
Dagoeneko bizikletaz egiteko 53.000 kilometro estali dituzte, eta asmoa dute etorkizunean hiri gehiagotako bizikleta bideak sartzen jarraitzeko.
Gaur-gaurkoz ahotsa ez dago euskaraz entzuterik. Horretarako, autorako Waze doako nabigatzailea deskargatu daiteke. Zibergelan jaso genituen haren gorabeherak: http://zibergela.bitarlan.net/2013/06/06/waze-aplikazioa-gidarien-sare-soziala/.
Bestetik, aurrerantzean Internet seinalerik gabeko guneetan erabiltzeko doitu dute Google Maps. Oporretan atzerrira joan, eta roaming tarifatan gastatu gabe, errepideetan laguntza jasotzen jarraitzeko aukera zabaltzen du horrela Googlek. Roaming atxikipen bat da; telefono hornitzaileek bezeroei ezartzen diete; horrekin, aparteko ordainsaria kobratzen diete atzerrian Internet sakelakotik erabiltzearren. Europako ganberak 2015eko abendua jarri du muga gisa roaming tarifak kentzeko; baina, bien bitartean, errepideetan Internet kenduta dabiltzan nabigatzaileak erabiltzea besterik ez dago.
Egin beharrekoa sinplea da: gordetzea nahi den mapa kargatu konexioa dagoen bitartean. Bigarren mailako aplikazioen artetik kentzen ez bada, edo ordenagailu eramangarrian nabigatzailea ixten, mapa ez da desagertuko. Gainontzekoa, telefonoaren geokokapenaren esku geratzen da; eta hori doakoa da, noski.
Bizikleta ibilbideen ahotsezko jarraibideak Ipar Euskal Herrian
Zelatari elektronikoa: iBeacon
Appleren burutazioa da iBeacon. Telefonoak seinalerik ez duen guneetan eransteko diren geokokapenerako gailu multzoa da. Zeharka aipatu zuten iOS 7 eguneraketaren aurkezpenean; bestelako garrantzirik eman gabe. Eraikinen barrurako posizio sistema gisa merkaturatu, baina, asmakizunekin sarri gertatzen denez, erabilpenak askoz harago joan dira azkenean. Potentzial ikaragarria du iBeaconek, eta azken bolada honetan estandar bihurtzeko bultzada hartu duela dirudi.
Zelatatzeko eginda daude. Jendea leku batetik igaro dela nabaritzen duten lekuko isilak dira. Applek teknologia asmatu du, baina laster batu zaizkio beste enpresa batzuk ingurura. Applek ez, baizik eta Estimote enpresak honezkero merkaturatu ditu aurreneko aleak. Koloretako silikonaz eginda dagoen harri koxkor estalkia jantzi diete gainean lekuko elektroniko txikiei; non-nahi eskegitzeko eranskina eta guzti. Laster gabe, museo, saltoki eta interes turistikoko guneetan ezartzeko asmoa dute.
Erabilera desberdinak eman dakizkioke Appleren balizei. Oinezkoak antzeman, eta testuinguruko iragarki edota uneko deskontuak eskainiko dizkiete dendetan. Baina, era berean, bezeroen uneko kokapena ezagutzeko, edo baliza duen produktura erosleak gidatzeko balia daitezke. New Yorken eta San Frantziskon saltokiak erabiltzen hasiak dira jada, shopBeacon leloa hartuta. Sekulako erosketa esperientzia agintzen dute. Txikiteoan edo pub crowl eginez tabernaz taberna ibili nahi dutenentzat ibilbidea asmatu dute Manhattan bazter ezagunean. Mauka bereziak eskaini eta bisitariak gidatzeko iBeacon teknologia erabiliko dute datorren maiatzaren 20an. BeaconCrowl aplikazioa eskuragarri dago animatzen denarentzat.
Baina benetako oihartzuna Major League Baseball txapelketari zor dio. Liga horretako iPhonerako aplikazio ofizialean sartuko dute teknologia denboraldi berrirako; eta, besteak beste, zelai bakoitzaren interes guneetako bisitaldiak egiteko, jokoan dagoen partidako jokaldien errepikapenak kargatzeko, edo zelaian ikusleak haien jarlekura bideratzeko gai izango da iBeacon. Paypal etxeak ere Beacon aurkeztu du, erosleek txartelak edo zorroa atera beharrik gabe ordainketak egin ahal izateko, telefonoa soinean eramateko behar hutsarekin; iBeacon lekuko artetik pasatuta, hain zuzen ere. Ilarak aurreratzeko izango ote da, behinik behin.
Major League Baseball txapelketako aplikazioak iBeacon teknologia baliatuko du aurki.
Wifi seinalearen funtzionamenduarekin alderatu daiteke eredu berria. Eremu batera gerturatzen den iOS gailua automatikoki konektatzen zaio iBeacon. Beti daude sarera konektatuta iBeacon balizak, eta erabiltzailearen eskaera amaraunera bideratzen dute zuzenean. Ez dira Interneterako sarbide puntuak; hala ere, sarea beharrezkoa den lehentasunez programatutako egitekoak bideratzen dituzte. Orokorrean informatzekoa, edo bezeroa gidatzekoa.
Hots, ez dute lehentasunezko informazio berdina etengabe errepikatzen, eta beti daude eguneratuta. Beste abantaila bat da, telefono estaldura edo GPS seinalerik gabeko guneetan ere, konexio horien erabilpena egin dezaketela telefonoek, iBeaconak programatutako betebeharrak egiteko.
Teknologia merkea eta kontsumo apalekoa da. Bluetooth seinalez komunikatzen dira, txiparen laugarren belaunaldiko aldaera baten bidez: Bluetooth Low Energy edo BLE izenekoarekin, hain zuzen. Bateriak bi urte iraun dezake, eta seinalearen eragina 50 metrotaraino iristen da. NFC erako komunikazioa moztu egiten da lau zentimetrotik aurrera, eta bistakoa da alde horrek aukera zabalagoak ematen dizkiola Appleren ereduari. Bien artekoa izango da hurrengo urteetan telefonoetan nagusitzeko lehia.
Honezkero, erabiltzen hasi dira iBeacon erloju adimentsu eta jarduera fisikoa erakusten duten eskumuturrekoak telefonoetara konektatzeko, besteak beste. Bluetooth 4.0 leloa edo eranskina daramaten gailuak dira bateragarriak harekin.
Bide batez, GPS koordenatuak ere gordetzen ditu iBeacon lekuko bakoitzak. Bat baino gehiago ezar daitezke, eta eginbehar bat bideratzeko puntuak osatu. Honela, telefonoan gertakariak edo jakinarazpenak jaso daitezke eraikin baten sarrera eta irteeran, edota zirkuitu turistikoetan bisitaldi gidatuak osatu.
Liburutegiak App, Euskadiko liburutegi publikoen sare soziala
Jakintza eta ezagutza bilguneak dira liburutegiak, baina baita zalapartari ihes egiteko leku lasaiak ere. Lanerako edo aisialdirako isiltasuna bilatzen dutenentzako txokoak dira. Hala ere, gehiago zabaldu ahal izango dira, beharbada, Liburutegiak aplikazio berriari esker.
Teknologia berriak integratuz eta liburutegi publikoen sarea baliatuz, ohiko kontsultak edo maileguak egitea ahalbidetzen du. Euskal Autonomi Erkidegoko sare osoa baliatu daiteke horretarako. Baina benetako xedea zerbitzua garai berrietara moldatzea du: sare sozial eran antolatu eta jendearen parte hartzea bultzatu, alegia. Ikus-entzunezkoak hautatzeko, aplikazioko iritziak aintzat hartu daitezke aurrerantzean. Izan ere, iruzkinak zein esperientziak partekatzea posible egiten du. Erregistratu ondorenean, erabiltzaile bakoitzari puntuazio bat ematen zaio, ospe sistema eran funtzionatzen duena. Honela, jardueren eta parte hartzearen arabera, puntuak pilatzen dira profilean. Esaterako, edukietan iruzkinak eginez eta baloratuz, liburutegietan check-in eginez, eta abar.
Puntako baliabideekin bateragarria da Liburutegiak aplikazioa, sakelakoaren edo tabletaren geokokapena baliatzen baitu; eta ez erabiltzailearen jarraipenerako bakarrik. Sareko liburutegi guztiak mapan adierazita agertzeko, edo uneko kokapenaren arabera nahi denera iristeko argibideak eskuratzeko ere balio du.
Gainera, liburutegietan programatzen ari diren ekintzak ikus daitezke. Zehaztasun maila ezberdinetan banatzen da informazio hori; hurrenez hurren, bakoitzaren lehentasunezko liburutegia, momentuko kokapenetik gertuen daudenak eta liburutegi sareko gainontzekoen artean.
Liburutegiek antolaturiko ekintzen berri jaso ostean, hala nahi izanez gero, horietan izena emateko aukera dago, baita gainera telefonoko egutegira esportatzeko aukera ere. Alerta bat programatzeko balio dezake horrek.
Katalogoa kontsultatzeko atala ere badu: tituluaren, egilearen eta hitz gakoaren bidez iragazteko aukera eskaintzen du. Bilaketa bertako liburutegien katalogora ere muga daiteke. Ondoren, liburu berrien hautaketa bat jaso daiteke, aipamen labur eta guzti. Eta horiekin batera, gehien mailegatutako dokumentuen sailkapena ikus daiteke, tipologiaren eta generoaren arabera ordenatua.
Aipamen berezia merezi dute blog eta bideoen kanalek. Horien bidez, liburutegi bakoitzaren blogak bisita daitezke, gertueneko egunerokoen berri izateko. Bideoen bidez, tutorial eta gida txikiak eskaintzen dira, informazio eta prestakuntza iturri gisa erabiltzekoak. Hemen ere kutsu soziala baztertu gabe, boluntarioek bideoak eskegi ditzakete, haien ezagutzak partekatzeko.
Eusko Jaurlaritzaren egitasmoa da Liburutegiak App. Euskaraz erabilgarri dago, Android zein iOS gailuetan eskuratu daiteke dagoeneko.
