Urt, 09
2014
android, Apple, Google, Internet, Mantenimendua, Mugikorrak, Sakelako Telefonoak, tabletak, Windows Phone

Android telefono berria berrezartzen

Android_Apple_tablet
Azken hilabeteetako joerari eusten bazaio, Android telefonoek erabiltzaileak biltzen eta merkatuan hedatzen jarraituko dute. Merkatu estatubatuarra da munduko ispilua, eta bertan garbi ikusten da software libreko Android plataformaren garapena: comScore iturriaren arabera gailuen %53a Googlerenak dira egun, 2009an, %10era iristen ez zirenean. Eta egungo iPhone jabeen %80ak, aurretik ere iPhone telefonoa zutelako iOS erabiltzaileak fidelenak direla ere esaten den arren, geroz eta gehiago dira aldatzeko arrazoiak ikusten dituztenak. Indarguneak nabariak dira: smartphone eskaintza zabalagoa da, merkeagoak, hardware ahaltsuagokoak, eta gainera nahi bezala pertsonaliza daitezke. iPhoneak kalitate handiko materialdun gutizia garestiak bihurtu dira, Androidek eta Windows Phonek aldeak murriztu ostean.

Sakelakoak, dena dela, ez dira inoiz irautekoak izan. Eta, aldatzeko orduan, behinola, aurreko datuak berreskuratu nahi zituztenek banaka kopiatu ohi zituzten eskuz; egunak pasa zitzaketen sufrikario luze horretan. Egun, egoera bestelakoa da. Smartphone-ak Internetez baliatzen dira hainbat funtziotarako, esaterako, segurtasun kopiak egiteko. Ezarpenak behar bezala jarriz gero, Android telefono berrira aldatzea erosoa eta bizkorra izan daiteke; baita iOS plataformatik aldatu nahi dutenentzat ere.

Hodeia lagun

Argazkiak, bideoak, SMS mezuak, telefono zenbakien zerrenda zein aplikazioen datuak hodeian gorde eta aise berreskuratzeko beta ematen dute azken belaunaldiko telefonoek. Android ingurunea estu lotuta dago Googleren zerbitzuetara, eta hura baliatzen du hodei zerbitzu gisa. Google kontu bat edukitzea beharrezkoa da, hasteko, telefonoari etekin osoa ateratzeko.

Datuak automatikoki Googlera bidaltzen direla ziurtatzeko, Ezarpenak barruan Pertsonala sailekoEgin babeskopia eta berrezarri sakatu, eta Leheneratu automatikoki aukera hautatu behar da. Horrek norbere Google edo Gmail kontuan datu pila gordetzeko balio du: wifi ezarpenak, nabigatzaileko gogokoenak eta aplikazioetako datuak, besteak beste. Sistema berrezarri eta aplikazioak berriz instalatzen direnean, haien datuak eta ezarpenak birkargatzeko balio du. Kasu honetan, aurreko terminalean bezala, guztia agertzeko berrian konfiguratuta eta datu berberekin. Hartara, lehen utzi ziren erara agertuko dira telefono berrian.

Bada, oraindik ez da bukatu: Android telefono berria, orain, norbere Google kontuari lotu behar zaio. Arestian egindako segurtasun kopia berreskuratuko da horrela, eta, bide batez, Google Play dendara sarbidea eskuratuko. Gailu berrian, berriz ere Ezarpenak, eta Kontuak sailean Gehitu kontua aukeratu ostean, Kontua erabili lekuan Gmailen datuak sartu behar dira. Orduan, Internetetik automatikoki deskargatuko ditu, kontaktuak, mezuak, Gmail, egutegia eta abar.

Aplikazioak berriz deskargatzeko eragozpenik ez dago. Google Play gaituta dagoenean berriz, barruan, Nire aplikazioak atalean nahi direnak instalatu ahalko dira haiengatik ordaindu beharrik gabe. Norbere Google kontuari lotzen zaizkiolako aplikazioak, eta ez uneko telefonoari. Bestalde, SMS, MMS eta deien kopiak ez dituzte segurtasun kopiek bere gain hartzen (Androidek zein iOS-ek) eta egiteko propio egindako kanpoko aplikazio bat erabil daiteke: esaterako, Google Playn bilatzeko SMS Backup aplikazioa.

Kontaktuak, memorian

Esan bezala eginez gero, kontaktuek ere kargatuta behar lukete honezkero. Baina, batzuetan, Google kontuan sinkronizatuta eduki beharrean, telefonoaren memorian nahiz SIM txartelean aurki daitezke. Badaezpada egiteko eragiketa da: norberak SD txartel batera edo ordenagailura deskargatu, eta smartphone berrian berriz txertatu. Sakelako zaharreko kontaktuen gidan, Menuajartzen duen ataleko Inportatu/Esportatu aukeran USB biltegiratzera esportatu eman; gero, telefono berriko gidan leku berberera zuzendu, eta USB biltegiratzetik inportatu egin.

Ondo begiratu kontaktuak, batzuk bikoiztuta ager daitezkeelako Gmailen eta telefonoan bertan zeudelako. Googlek, ordea, automatikoki konponduko du hori, eta, horretarako, errazena Gmaileko kontaktuen atalean egitea da.

Sarrera bikoiztuak batu

Gmail postan sartu, eta ezkerreko goiko aldean, Gmail dakarren alboko gezian klik eginezKontaktuak atalera joan. Hor agertuko dira postako helbide eta telefono zenbaki guztiak, izenen arabera antolatuak. Goiko menuko Gehiago botoiari eman, eta Bilatu eta batu bikoiztuak hautatuta lan ederra aurreztuko digu sistemak. Ez arduratu telefonoaz, automatikoki sinkronizatuko baita bere kasa.

iOS ingurunetik Androidera 

iOS eta Android plataformak gehien erabiltzen direnak izaki, aplikazio gehienak bietan aurki daitezke. Alabaina, denda desberdinak dituzte, eta batetik bestera aldatzen denak berriz ordaindu beharko du haiengatik. Behinik behin, aldaketa nekeza izan ez dadin, kontaktuak bederen automatikoki joan daitezen erraz egiteko modua dago, Google Contacts erabiliz, beste behin ere.

iTunes ordenagailuko programa ireki, eta iPhone telefonoa konektatu. Telefonoaren datuak agertzen direnean, Info atala aukeratu, eta bertan Sync Contacts with… aukeratuta dagoela egiaztatu ostetik, Google Contacts ezarri goitik beherako menuan. Hemen, jada, norbere Gmaileko sinestamenduak eskatuko ditu. Sinkronizatzen laga, eta aurreko ataleko pauso berberei jarraitu bikoiztuak ezabatzeko. Android telefono berria estreinatzeko, behintzat, Google kontua gehitu, eta kontaktuak mantenduko dira horrela.

Ira, 19
2013
android, Aplikazioak, Apple, tabletak, Windows Phone

Aditzak.com aplikazio berria, aditzak erabiltzen ikasteko

aditzak.com1Aditzek makina bat buruhauste eragin ohi diete hizkuntzak ikasten ari direnei. Ordea, Interneten gero eta alternatiba gehiago aurki ditzakegun artean, gurean ere lagungarri dago euskarazko aditzekin zalantzak argitzeko tresna berria. Ekarpena Garikoitz Knörr itzultzaileak egin du, Ideateka enpresarekin elkarlanean sorturiko webgunean, eta 2011z geroztik martxan da: Aditzak.com. Orain, aldiz, pauso bat haratago joan, eta irisgarritasuna hobetuz, izen bereko aplikazioa plazaratu dute sakelako telefono nahiz tabletetarako, Irontec enpresaren laguntzaz baliatuta. Kontua da posible dela euskarazko aditzen taula alboratzea, eta Internet sarbide gabe ere kontsulta egitea.

Izan ere, inspiraziorik izan ezean, askotan ez da erraza izaten euskal aditzak erabiltzen asmatzea, eta, zalantzen kasuan, orain arte, Aditzak.com web atarian egin zitekeen, eta aurrerantzean edozein telefono adimentsutan zein tabletetan ere egiteko aukera dakar aplikazio berriak. Euskal aditzak erabiltzeko aukera ematen du, sartu bezain laster ageri diren aukeren artean hautatuta. Tresna horrek euskararen erabilpen zuzena ahalbidetzen du, 1.500 aditz konbinazio baino gehiago eskaintzen baititu. Orainari, iraganari, etorkizunari eta baldintzari buruzko informazioa dakar.

Beraz, euskara batuak dituen aditz guztiak arakatu nahi dituenak, edo aditzok erabiltzerakoan zailtasunen bat duela igartzen duenak, hobetzeko zein egiaztatzeko aukera dauka app horrekin. Aditzak.com aplikazioa doakoa da, eta eskuragarri dago Android, iOS, Windows Phone eta Symbian sistementzat, bakoitzari dagokion dendetan.

Api, 18
2013
android, Aplikazioak, Apple, Mugikorrak, musika, Windows Phone

Pandora, doako eta publizitate gabeko musika

pandorawp8appZortea izan dute Windows Phone 8 telefonoaren jabe diren guztiek, streaming eran edo Internet bidez musika entzuteko aplikazioaren bertsio berezi bat jasoko baitute: Pandora aplikazioaren bertsioa, hain zuzen ere. Deigarriena zera da: Premium zerbitzura edo ordaintzekora aurtengo urte guztirako sarbidea lortzen dela, eskaintzaz baliatuta. Microsoft-ekin sinatutako akordio horri esker, milioika abesti eta irrati kate entzun ahalko dituzte erabiltzaileek, mugarik gabe eta publizitaterik jasan beharrik gabe.

Pandora aplikazioak irratiaren funtzionamendua imitatzen du, eta musika estiloen araberako kateak dauzka eskuragarri hautatu ahal izateko; abeslariak nahiz taldeak entzutea errazten du. Nahiago bada, norberak ere sor eta edita ditzake nahi dituen kateak, gustukoen dituen doinuekin.

Windows Phone 8 bertsioa beste euskarri guztietatik bereizi, ordea, beste funtzio batzuei esker bereizten da. Besteak beste, telefonoaren mahai gainetik musika zerrendetarako lasterbideak sortzeko aukera ematen du; aplikazioaren menuko ataka berri batetik azkeneko abestiak atzigarri edukitzea ere ahalbidetzen du.

Windows Phone 8 telefonoaren jabeek eskaintzaz baliatu eta Windows Phone Storen aurkituko dute Pandora aplikazioa. iOS eta Android erabiltzaileek Pandoraren bertsio mugatuagoa daukate App Store eta Google Play dendetan, hurrenez hurren.

1 2 3