Api, 24
2014
Mahaigaina, Mantenimendua, Sistema Eragileak, Windows

Nola ezarri Windows 7 diskorik gabe

Windows-7-USB-Installation-MediaWindows XP-ren eguneraketen amaierak soka luzea ekarri du. Bestelako aukerak asko diren arren, kasu batzuetan, ekipoaren ezaugarri teknikoek mugatzen dute egin daitekeena. Litekeena da eguneratu behar duen ordenagailua zaharra izatea, eta ondorioz hautatu den sistema eragile berriaren azkenengo bertsioari uko egin behar izatea. Horrela izanez gero, zaharragoa instalatu beharko da.

Egin beharreko aurreneko gauza, dena den, plataforma batean gomendatutako eskakizunak begiratzea da. Izan ere, gutxieneko eskakizunen hautua egiteak ordenagailua mantsoegi ibiltzea eragin dezake, eta erabiltzailea gogaitu egin daiteke.

Gutxieneko eskakizunak eta bertsioak

Windows XP sistemara ohituta daudenentzat eta ordenagailu kontuetan oso iaioak ez direnentzat, agian, errazena Windows 7a jartzea da. Hori instalatzeko ordenagailuek izan behar dituzten gutxieneko eskakizunak ondorengo estekan ageri dira: http://windows.microsoft.com/en-us/windows7/products/system-requirements. Dena den, zifra horietako bakoitza bikoiztuta ere errendimendua apala izango da.

Bereizteko beste kontu bat ordenagailua 32 biteko edo 64 biteko aginduak jasateko gai den jakitea da. Izan ere, horren araberako sistema eragilearen bertsioa aukeratzea baita hoberena. 64 biteko gaitasuna duten ordenagailuetan 32 biteko sistemak instalatu daitezke, baina, ez, ordea, alderantziz.

Bada, zein da abantaila? Besteren artean, 64 bitekoek ordenagailuaren RAM memoria ahalmen guztia aprobetxatzen dutela. 32 bitekoen langa 4 GB da; ordenagailuak emateko gehiago izan edo ez. Programak batekoak zein bestekoak daude, eta muga berdinak izaten dituzte.

Horrez gain, Windows 7aren bertsio desberdinak daude: Home Premium, Professional eta Ultimate. Bestelakorik ere bada, baina ez dira erabilpen orokorrerako edo erabiltzaile arruntentzako. Gainera, batetik bestera ere alda daiteke; ordainduta, bistan da.

Kontu horretan askorik sakondu gabe, HomePremiun etxeetarako oinarrizko bertsio xumea da. Esaterako, halako ordenagailu bat ezin daiteke sare lokal batean edo barruti batean sartu. Baina ez nahastu, Interneten bai, noski. Ultimate-k, berriz, beste biek dakartenaz gain, datuen babeserako Bitlocker ezarpena eta hizkuntza sostengu zabalagoa dakartza. Lizentzia bakoitzaren prezioa 120 eurotik 220 euro bitartekoa da. Aukera egiterakoan gogoan izateko beste kontu bat ere badago. Home Premium-aren eguneraketak bertan behera geratuko dira 2015eko urtarrilean. Beste biak, berriz, 2020ra arte ziurtatu dituzte.

Diskorik gabe instalatzeko pausoak 

Ez larritu. Aparteko ezagutzarik gabe laster egitekoa da hau guztia. Dena den, ezertan hasi aurretik, informazio garrantzitsuena kanpoko disko batean gordetzea komeni da. Ondorengo pausoek Windows 7 edukita instalazio diskorik ez dutenei balio diete. Galdu dutelako, eman ez zietelako edo apurtu zaielako gerta daiteke hori. XP-tik etorri edota ordenagailuak DVD irakurlerik ez dutenei ere balio die.

Lehenengoen kasuan, fabrikatzaile askoren ohitura izaten da ordenagailuaren disko gogorrean leku bat uztea sistemaren hasierako ezarpenak berreskuratzeko. Software pila txertatzen dituzte bertan proba gisa, eta aukeran hobe da garbi antzera norberak instalatzea. Ordenagailu eramangarrien kasuan lizentzia zenbakia erantsita egoten da behealdean, eta mahai gainekoetan, begien bistara.

Bigarrengoek lizentzia erosi egin beharko dute Amazon edo eBay dendetan. Normalean, beherapenak izaten dituzte ofizialekin alderatuta. Formatu fisikoan bidaltzen dute haiek, eta DVD irakurgailua dutenek instalatu besterik ez dute egin beharko. Baina, eta egungo eramangarri askoren kasuan bezala, USB erretena besterik ez balu? Lasai. Batzuek zein besteek egin dezaketena zera da: Microsoften webetik ISO izeneko disko irudi bat deskargatu; beste hitzetan, fitxategi bat. Gero, hori DVD batean edo USB flash gailu batean sartuko da. Behin hori eginda, ordenagailua disko gogorretik abiarazi beharrean arestian doitutako euskarritik egingo da eta instalatzen hasi. Horretarako diskoek boot edo abio sektore bat izaten dute. Bestela, sortu egin behar da. Ez da nahikoa edukia —karpetak eta fitxategiak— bertan kopiatzea, besterik gabe.

 

Sekuentzia ondorengoa izango litzateke:

  1. Lizentzia edo produktu gakoa ezabatu edo galdu bada, sistemako erregistrotik berreskura daiteke. Horretarako, Magical Jelly Bean Keyfinder programa librea erabil daiteke. Bertan, Windows 7 bilatu eta gakoa kopiatu. Deskarga: http://www.magicaljellybean.com atariaren bidez egin. Zuzeneko desgarga hemen.
  2. Deskargatu hobekien egokitzen den Windows 7 bertsioaren ISO fitxategia, doan, Microsoften zerbitzarietatik. Egin ondo aukera, produktu gakoari dagokionak bakarrik balioko baitio (hizkuntza aintzat hartu gabe):
  3. USB gailuan edo DVD diskoan abio sektorea idazteko programa propioa du Microsoftek. Windows 7 instalazio fitxategiak ere kopiatuko ditu euskarri batean edo bestean. Windows 7 USB/DVD download tool deskargatu hemen.
  4. Hori abiatu eta aurretik deskargatu den ISO fitxategia erakutsi behar zaio, eta, ondoren, ordenagailua DVD edo USB bidez abiarazi behar da. Lizentzia disko eta guzti erosi dutenek hura balia dezakete USB euskarrira pasatzeko. Gero haien kutxako produktu gakoa erabiliko dute instalazioan, noski.
  5. Ordenagailua orduan berrabiarazi behar da, USB edo DVD euskarria barruan dela. Hortik aurrera, Windows diskoan zein leku edo partiziotan instalatu nahi den erabaki, lizentzia edo produktu gakoa sartu eta jarraibideei segitzea besterik ez dago.
Mar, 20
2014
Mahaigaina, Mantenimendua, Segurtasuna, Windows

Windows XPren eguneraketak bertan behera

saioa itxi xpWindows XP plazaratu zutenean 2001ean, inor gutxik imajina zezakeen 2014an oraindik bizirik eutsiko zionik jardunari. Harrigarriena da, baina, oraindik arrakasta duela. Munduan bilioi bat ordenagailu daudela kalkulatzen da, eta horietatik %40k Windows XP darabilela. Alimaleko kopurua da hori hamar urte baino zaharragoa den sistema eragile batentzat. Ikusi besterik ez dago gehien erabilien zerrendan bigarrena dela XP, egun dagoen sistema eragileen eskaintza zabala den arren. Windows 7 da sailkapen buru orain.

Windows XP plataforma denbora luzez jendearen gogoko izan bada, hein batean, aurrekoekin zein hurrengo Vistarekin alderatuta, egonkorra, bizkorra eta nahiko erabilerraza izan delako da. Hala ere, aldeak murriztu dira eta eskaintza zabaldu. Baina, hamar urteren buruan, askok egin dute Windows berdinarekin jarraitzeko aukera. Askotan, besterik gabe; behin ohituta, erosoena zaielako.

Microsoften hitzetan, informazio eta komunikaziorako teknologiek etekina eman dezaten, berritu beharrekoak dira. Softwareak hamar urteko bizi zikloa nahikoa duelakoan, muga horren ostean doako sostengua mozteko irizpidea ezarri berri dute. Esan gabe doa, lizentzia eta ordenagailu berriak erosteko gonbidapena dela.

Ondorioa da, apirilaren 8an Windows XP eta Office 2003 bulegotika programen bildumaren doako eguneraketak bertan behera geratuko direla. Aldiro automatikoki deskargatu eta instalatzen diren partxeak edo adabakiak dira, hackerrek sisteman aurkitu eta baliatzen dituzten segurtasun akatsak estaltzeko behar-beharrezkoak.

Eragina

Ez litzateke aurreneko aldia Windows XP-ren bizi zikloaren azkena iragarri ondoren luzatzen dutena. Oraingoak, baina, atzera bueltarik gabeko erabaki komertziala dirudi. Eguneraketak kentzeaz gain, erabiltzaileentzako arreta zerbitzua ere kendu egingo dute. Eta albo ondorio gisara, gainontzeko hardware fabrikatzaileek eta software garatzaileek ere beste hainbeste egingo dute, benetako kalte bihurtzeraino.

Izan ere, eta Microsoften babesik gabe, ez du hankarik ez bururik segurtasun zuloz eta akatsez beteriko plataforma baterako software berria garatzeak. Bestela ere, pentsa daiteke nahiko denbora eta lan izango dutela Windowsen beste plataformetarako haien programak egokitzen. Eta, beraz, Windows XPn lehendik dauden programentzat laguntza eta babesa ematen jarraitzea ekonomikoki bideraezina izango denez, utzi egin beharko dute.

Larritu beharrik ez dago. Babesik gabe geratu arren, apiriletik aurrera Windows XP sistema duten ordenagailuak berdin-berdin ibiliko baitira. Baina norberaren erantzukizunpean. Erakunde eta enpresen kasuan, irudia eta harremanak ezbaian jar daitezke, eta migratzea derrigorrezko dute.

Antibirusek, suhesiek eta gainontzeko segurtasunerako programek haien funtzioa berdin beteko dute, nolabaiteko babesa eskainiz. Baina denbora pasatu ahala, horiek ere eraginkortasuna galduko dute, eta ahalegin kamutsak izango dira.

Internet Explorer nabigatzailea erabiltzen dutenek honezkero nabari dute datorren utzikeria: XPrako martxan dabilen azken bertsioa Explorer 8 da, eta dagoeneko web orrialde askok dituzten ezaugarri berrienak ezin ditzake erakutsi horretarako doituta ez dagoelako programa. Arazo hori berehala larrituko da, web teknologia berrien erabilpena sarean hedatuz doan abiaduran. Windows XP erabiltzaileek Interneten nabigatzeko zailtasunak eta ezintasunak izango dituzte, lehenago edo geroago.

Aukerak

Ezer egin gabe geratzeak hasieran balio dezakeen arren, akatsek zein programa berrien faltak gogaituko dituzte erabiltzaileak. Azkenean, Bill Gatesen konpainiaren jokoan sartuko dira gehienak. Behintzat ordenagailua zaharra bada, Windows 7 edo 8 instalatuta duen berri bat erostea da konponbide eroso eta motzena.

Ordenagailuaren zehaztapenek uzten badute, eguneratzea aintzat hartzeko aukera da. 7 da XPtik gertuen dagoena erabilpenean; ez dago jauzi handirik bertara. 8, aldiz, telefonoen tankerakoa da, eta aplikazio denda eta guzti dauka. Gehiago kosta daiteke aldaketa, eta ez da bestea bezain arrakastatsua gau- gaurkoz.

Bestela, Microsoft Premier Support zerbitzua ere badago, norbanakoentzat baino gehiago erakunde eta enpresentzat dena, eta urtero ordaintzeko harpidetza bidezkoa. Horrekin, behintzat, Windows XP mantendu eta Microsoften laguntza bermatuko litzateke. Baina bidezidor hori Microsoftentzat deserosoa denez, zerbitzua garestitu du.

Geratzen den alternatiba, GNU/Linux edo software libreko sistema eragile bati aukera eman eta probatzea litzateke. Ubuntu da onarpeni handiena izan duena, haren atzeko Canonical enpresaren azken mugimendu komertzialek software libreko komunitatetik urrundu badute ere.

Mar, 06
2014
Hardware, lizentzia libreak, Mac, Mac OS X, Mahaigaina, Osagarri Informatikoak, Windows

Pantaila anizkoitza ezartzeko argibideak

multiple_monitorsOrdenagailuak prest daude hainbat ataza aldi berean egiteko. Baina maiz erabiltzaileari bakarra erakusten dio pantailan. Martxan dauden beste ataza edo programa horiek atzeko planoan dihardutela esaten da orduan. Leihoak handitu edo txikitu egiten dira batetik bestera joateko, eta irekitako programak beheko ataza-barran pilatzen dira.

Hala ere, bada beste modu bat erosoagoa dena: ordenagailuari pantaila bakarraren ordez gehiago konektatzea, alegia. Pantailak ondoz ondo lerrokatuz gero, ezarpen gutxi nahikoa dira sistema eragileak horien artean mahaigaineko bakarra osatzeko.

Hala, sagua pantaila baten ertzean geratu beharrean, bestera jauzi eginez joaten da leku berria baliatzeko. Teknika hori asko erabiltzen dute lanerako erreferentzia edo patroi bati etengabe begira egon behar dutenek. Itzulpenetarako, pantaila batean jatorrizko testua mantenduz hura itzultzen aldameneko editorean; argazki bat irekita, alboan hura marrazten; web orrialdeak maketatzen dituenari erosoagoa egingo zaio idazten ari den kodeak zer-nolako itxura daukan pantailan erakutsita; edo aisialdirako, pantaila batek Interneten bilatutako mapa erakusten diolarik bestean bideo jokoan jolasten ari den artean.

Mahai gainekoa bikoizten

Leihoen artean aldatzeko premia murriztean, denbora aurrezten da, eta, beraz, produktibitatea handitzen. Pantaila anizkoitza jartzea ez da garesti ateratzen gainera: LCD pantailen prezioak nabarmen jaitsi dira, eta egungo bideo txartelek irteerako erreten bat baino gehiago izan ohi dituzte.

Ordenagailuaren bideo txartelak, gutxienez, irteera bikoitza izan beharko du. Aukerak desberdinak dira ordenagailua eramangarria edo mahai gainekoa izan. Kontuan izan baita datu hau: eramangarri bat inoiz ezin daiteke erabili mahai gaineko baten bigarren pantaila gisa. Eramangarrien pantailak ez baitira independenteak, eta, piztekotan, sistema eragile eta guzti abiarazten dira.

Mahai gaineko ordenagailuek lehentasunezko bideo erreten bat ekartzen dute plaka basean. Horretaz gain, bideo txartel bat ere txertatzen zaie funtzio berdina duena; bideo seinalea igortzea. Txartel horiek gutxien-gutxienean, pantaila bi edo gehiago konektatzeko erretenak jasotzen dituzte, egun.

Eramangarrien kasuan, eragiketa sinpleagoa da. VGA edota HDMI erretenak alboetan jasotzen dituzte, eta, pantaila lotuta dakartenez, eramangarrira berria lotzea besterik ez dago. Kable eta bihurgailuetaz gehiago jakiteko, gogoratu Zibergelan berriki esanak: http://zibergela.bitarlan.net/2014/02/13/bideo-kableak/.

Behin kableak eta erretenak egoki lotuz gero, ondorengo ezarpenak sistema eragilearen araberakoak dira. Baina, hala ez bada?

Arazoak leuntzen

Lehentasunezko bideo erretenekin ez iristea, edo kableak eta erretenak baliokideak ez izatea dira eragozpenak.

Aurreneko kasuan, ordenagailuaren bideo txartela eguneratzea edo ordezkatzea da errazena. Merkatuan 80 eurotik aurrerako eskaintza zabala dago. Erabiltzaile arruntek apalenekin sobera dute, eta garestiagoak bideo ediziorako edo bideo joko aurreratuenetan jolasteko nahi dituztenentzat dira. Betiere, berria erosteko sasoian bi erreten gutxienez dituela egiaztatu. Nahiago bada, bestelako aukerarik ere bada. Grafikoak hedatzeko moduluak edo ordenagailuaren bideo erreten batean konektatzekoak diren kutxak daude. Horiek hainbat bideo egokigailu edo irteera dakartzate. Honela, DVI, VGA zein HDMI erreten bakarretik hainbat pantaila konektatzeko aukera dago. Eramangarrien kasurako erakargarriagoak dira USBrako bideo egokigailuak. 1.920×1.200 bereizmena eskaintzen dute modernoenek.

Bigarren kasuan, kable egokigailuak erostea da aukera hoberena. Hainbat daude, DVI-HDMI, HDMI-VGA, eta abar.

Azken ezarpenak

Ordenagailua eta pantaila parea (gutxienez) zuzen konektatuta direnean, sistema eragilea ezartzea da azken eginbeharra.

• Windows: ordenagailua abiaraztean beharrezko kontrolatzaileak automatikoki instalatzen ditu sistemak. Lehentasunez, pantaila nagusiaren ispiluarena egingo du bigarrenak. Pantaila hedatzeko eta bakar baten gisa funtziona dezaten, Kontrol-Panela ireki eta Doitu pantaila-bereizmena atalera joan. Pantaila anitzak hartu eta bakoitzaren orientazioa eta bereizmena aukeratu. Teklatuko lasterbidea erabil daiteke Windows sinbolodun botoia eta P tekla aldi berean sakatuta. Hedatuaukeratu.

• Ubuntu Linux: Ubuntuko pantailen ezarpenak daude goiko menuko Sistema-Ezarpenak-Pantailabarruan. Detektatu botoian eman eta automatikoki egingo du. Ispilua aukera kendu, irudiaren kopia nahi ez bada.

Bideo txartel fabrikatzaile batzuek ez dituzte kontrolatzaileak egokitzen eta GNU/Linux banaketak babesik gabe lagatzen dituzte. Erosi orduko, bilatu zeintzuk diren arazorik ematen ez dituztenak sarean.

• Mac OS X: Mac guztiek ez dute gaitasuna pantaila bat baino gehiago erakusteko. Appleren laguntza dokumentazioan egiaztatu ezer baino lehen. Bestela, konektatu eta automatikoki ezagutuko du. System Preferences-Display barruan pantaila bakoitzeko ezarpen leiho bana irekiko da. Horietan ezarriko dira monitore bakoitzaren ezarpenak, atzeko irudia, lasterbideak eta menuak, eta abar.

Mac etxeko gailuak elkarrekin konektatzeko pentsatuta daude gainera. 2009az gerozko iMac eta MacBook-ak, esaterako, elkarrekin konekta daitezke eta eramangarriaren bigarren pantaila hedatu gisa erabili mahai gainekoa. iPad tableta ere erabil daiteke Mac ordenagailukoa erakutsi eta ukipenaren bidez kontrolatzeko.

Sistema eragile bat hainbat pantailatik ikustea ohikoa da. Baina ez hainbeste pantaila bakoitzean sistema eragile bana erakutsi eta guztiak bakarretik agintzea. Hori egiten du Synergy izeneko software libreak: sagu eta teklaturik gabe sistema eragile desberdin bi eduki daitezke martxan bakoitza bere ordenagailuarekin, eta hirugarren baten bidez kontrolatu hirurak; saguak batetik bestera etenik gabe jauzi eginez.

Informazio gehiagorako: http://synergy-foss.org/.

1 2 3 … 15