Abe, 19
2013
Internet, Multimedia, musika

‘Podcast’ edo harpidetza bidezko emanaldi digitalak

podcast (2)Interneten zintzilikatzen den emankizuna da podcast bat, ondoz ondoko kapituluak dituena. Harpidetza bidez jaso daitezke, ordenagailuan nahiz edozein gailu eramangarritan. Entzun, ikusi edo irakurtzekoak izan daitezkeen arren, hasieratik, aurrez grabatutako irrati emankizunen eskutik irabazi zuten ospea. Hortik dator podcast-ak Internetez hedatzen diren irratsaio edo programa gisa ezagutzea. Izena ere ahoz ahokoaren bidez ezarritakoa da; musika entzuteko iPod gailuen hitza etabroadcast edo emanaldiak batzean ateratakoa, hain zuzen.

Zuzenekoak baino gehiago, nahi denean entzuteko grabazioak

Hainbat edukitakoak aurki daitezke: besteak beste, musika, informazioa, elkarrizketak, mahai inguruak eta eztabaidak dituzten aurrez grabatutako programak izaten dira entzungai: hizkuntzak ikasteko programetatik, hainbat hiztun eta konexio dituzten solasaldietaraino. Zuzenekoak izan gabe, gai freskoak jorratzen dituzte.

Saioen kapituluak zerrendatan antolatzen dira. Hodeian edo urrutiko zerbitzarietan dauden fitxategi multzo gisa.

RSS teknologia ahalbidetua dutenek harpidetzeko aukera ematen dute. Horrekin, ale berri bat dagoen bakoitzeko, norbere telefonoan edo ordenagailuan bakarrik kargatzea lortzen da. Bestetik, zuzenean fitxategi gisa saio soltea deskargatzeko aukera duenik ere bada.

Entzuteko, aurrena jaitsi

Entzun ahal izateko, RSS bidez podcast-ak irakurtzeko gai den Appleren iTunes edo antzeko ordenagailuko aplikazioak behar dira. Azken horiek, gutxienik, aukeratu zerrendei jarraipena egiteko ardura hartzen dute.

iTunesen kasuan, podcast-en biltegi bezala funtzionatzen du iTunesek, eta harpidetzea sinplifikatzen. Bertan eskegita dauden podcast-en webak eta jatorriak ezagutu beharrik gabe erabiltzaileak leku beretik bilaketa egin eta harpidetza egin baitezake. Beste programetan, erabiltzailea da RSS jariodun weba aurkitzeko arduraduna. Lista eguneratzen denetan abisua emateko edo, nahiago bada, automatikoki deskargatu eta ordenagailura zein iOS gailuetara bidaltzeko ezar daiteke.

Batera zein bestera, deskargak ordenagailuan gorde daitezke, eta sare konexio gabeko gailuetan entzuteko erabili. Internet bidezko streaming teknikatik bereizten du horrek. Sare sarbiderik gabe, ez dago streaming jasotzerik, eta podcast-ak ez dira inoiz zuzenekoak.

Hedabide horizontala dela esaten da podcast-a. RSS teknologia ez denez inoren jabegoa, ez dago eragozpenik edukiak entzuteko zein propioak sortzeko.

‘Podcast’ propioak nola publikatu

Kazetariez gain, zale asko dago podcast-ak egiten dituena. Saio xume bat sortzeko aurreneko pausoa ahotsa grabatzea da. Ondoren, zerbitzari batean kargatu beharko da fitxategia. Era honetako fitxategiak gorde eta partekatzeko doako zerbitzuak daude. Horietako bat da iVoox audio kioskoa, http://www.ivoox. com/ lekuan dagoena. Grabatutako fitxategia kargatu, azaleko irudia, deskribapena, egilea eta halako datuak bete eta publika daiteke. Ondoren, webean bertan edo beste batean helbidea erreferentziatuz erakuts daiteke.

iTunesen agertzeko

Podcast komunitate handiena iTunesen dago. Hor ere publikatzea komeni da, beraz, gehiengoak kutunena duen bilatzailean erakustearren. Plataforman, baina, ez dago zuzenean biltegiratzerik. Zirkuitu itxia da, kanpoko iturriak erakusten dituen esteka biltegi bat bezalakoa.

Komunitatean sartzeko, baina, norbere esteka eta Apple ID kontua izatea besterik ez da behar. Hau da, ahotsa edo bideoa hodeiko zerbitzu batean gorde daiteke, eta iTuneseko biltegian norbere kanalaren jarioa gordetzea eskuragarri jartzeko.

Kasu honetan, iVoox erabiltzearekin ez da nahikoa. Harpidetzak ahalbidetzeko, aurrena, RSS jarioak gaitu behar dira podcast-ean. Googleren Feed Burner (http://feedburner.google.com/) tresnak, Internet helbide bat RSS ale bihurtzen du. iVoox-eko fitxategiaren URLa itsatsi eta I’m a podcaster! aukeratuta, bizkor egiten du. Itzultzen duen helbidea da iTunesen sartu beharko dena.

Aski da iTunes aplikazioko Podcasts ataleko eskuin menuan Send Podcast aukeratuta agertzen den leihoan helbidea sartuta. Automatikoki kargatuko dira norbere podcast-aren datuak. Gogoan izan, daturen bat aldatu nahi izanez gero, jatorrizko zerbitzuan egitea; gaurko honetan, iVoox lekuan. Publikazioa agertzeko gutxienez egun bat itxaron beharra dago, Applen berrikusten duten artean. Posta bidez abisatzen dute direktorioan eskuragarri dagoenean.

Urr, 03
2013
Jokoak, lizentzia libreak, Mahaigaina, Multimedia, musika, Software Librea

Bideokontsola libreen aldia ote da?

SteamControllerSteam bideo jokoen banaketa digitalerako plataformak aurreneko hedatzeko zantzuak adierazi zituen harako otsailean, ordura arteko sistemetatik komertzialki ohikoa ez den Linux ingurunera jauzia eginda.

Lan nekez horretan, bideo txartelei etekin optimoa ateratzeko arazoak izan zituzten, eta kontrolatzaileek berridaztea baino beste konponbiderik ez zuten izan. Orduko izerdiak gaurko irriak bihurtu dira, eta bideo kontsola propioa kaleratzeko etenik gabeko zurrumurruen ostetik, Valvek hiru iragarpen egin berri ditu, baten ordez. http://zibergela.bitarlan.net/2013/02/21/steam-bideo-jokoen-banaketa-digitalerako-euskarria-ubuntun/.

SteamOS

Erabat doako sistema eragilea da SteamOS, oinarrian Linux software librea daramana. Bideo jokoak gauzatzera zuzendua dagoen ingurune optimizatua aurkeztu dute, eta dauden beste aukeretatik at dago eskaintza hori. Halaber, edozein PC edo Mac ordenagailutan instalatu, eta, etxeko sarea erabiliz, egongelako telebistan jokatzea egongo da Steam bideo jokoen biltegiko katalogoko 3.000 jokoetan. Hori gutxi ez, eta aisialdirako tresna osoagoa izatea nahi dutenez, musika, telebista eta pelikula zerbitzuak txertatzekotan dabiltza hemendik gutxira. Dena dela, gaur-gaurkoz streaming era hau posible izan dadin, ezinbestekoa izango da Smart TV edo Interneterako sarbidea duen telebista edukitzea.

Steam Machines

Valveren nahien artean ez dago bideo kontsola propioa ekoiztea, eta hainbat konpainiarekin hitzarmenak lortu ditu bakoitzak bere makina kaleratu dezan. Oinarritzat sistema eragilea partekatuko dute; SteamOS. Horrela, makina eta sistema ireki bat eskaini nahi zaizkie jokalariei; haien nahietara egokitzen den konfigurazioa daukan gailua aurkitzeko adinakoa. Prezio, errendimendu eta zehaztapen askotariko makinak izango direnak, alegia. Dagoeneko 300 prototipo dauzkate, eskaera egiten duten boluntarioek probatu dezaten.

Steam Controller

Aginte iraultzaile hori, etxeko etorkizuneko kontsolen kontrolagailua izateaz gain, bateragarria izango da orain arteko ordenagailuetarako Steam biltegiko jokoekin. Berezitasunez josia dator, jokalari zaleenek edo hardcore deituek gogokoen duten teklatu-eta-sagu kontroletik hurbilen dagoen esperientzia bilatzen duena.
Xehetasunetara jota, 16 botoi dauzka Steam Controllerrak, baina deigarriena erdian dagoena da. Alde batetik, bi gainazal irristakor daude; hatz lodiekin jokoak zehaztasunez maneiatzeaz gain, elektroimanen teknologiari esker indar eta dardarak ere itzultzeko gaitasuna izango dute. Bestetik, botoi gisa konfiguratu daitezkeen lau eremuko, ukipenezko eta bereizmen handiko pantaila dauka aginteak.

Telebista azpirako Linux sistemadun PC txikia baino gehiago?

Arrasto guztien arabera, Ubuntu-ra haien joko eskaintza zabaltzea, ez zen itsu-itsuan egindako apustua izan. Ingurune horretara bideo jokoak moldatzeko ahalegin hura plan handiago baten lehen fasea izan zen, inondik inora. Eta orain, iragarpen hauekin guztiekin, Steam bideo kontsolen lehen lerroan jarri da. Valvekoak bideo jokoen plataforma unibertsala sortzen dabiltza, harpidetza berarekin joko biltegi erraldoi batez gailu desberdinez sartzeko. Irekia izango da, gainera. Esaterako, haien software guztia askatuko dutela adierazi dute komunitateak moldatzeko edota aldaera propioak sortzeko. Haien makinetan lehentasunezko sistema eragilea ordezkatu ahal izango da, eta Steam biltegira sarbidea mantenduz, piezak aldatu ahalko dira berriengatik ordezkatzeko, eta abar.

Amu gisako kalitatezko produkzioen faltarik ere ez da egongo, eta SteamOS sistemarako esklusiboa izango da «Half-Life 3» bideo joko ezaguna, sagak dauzkan jarraitzaileak profitatzeko balioko duen mugimendu komertzialean.

Hala, iragan asteburuko albiste zaparrada honek aho bete hortz utzi ditu sinestunenak ere. Etorkizuneko negozio ereduaren giltzarria ote da? Edo jendeak ezagunak dituen ohiko Play Station, Xbox eta Nintendoren alde jokatzen jarraituko ote dute dirua? 2014. urtea erabakigarria izango da bideo jokoen mundua kode librera gertura- tzeko lehen ahalegin nabarmenean.

Ots, 14
2013
Aplikazioak, Apple, kontzeptuak, Mac OS X, Multimedia, tabletak, Ubuntu, Windows

iOS 6-rako ‘Jailbreak untethered’ egiteko mauka berria

Evad3rs taldekoek iragan otsailaren 4an jakinarazi zuten ohar bidez askok itxoiten zuten albistea: Apple gailu guztientzat, haien sistema eragilearen azken bertsioa edo iOS6 askatzen duen programa eskuragarri dagoela sarean. Horretaz baliatuko direnek saihestu ahal izango dute Apple etxeak izenpetu ez dituen aplikazioak instalatzeko haien gailuek izaten duten debekua. Programa horri EvasiOn deitu diote, osatzen duen prozesuaren izenarekin hitz jokoa eginez; kartzela apurtzea (Jailbreak) eta ihesa (evasion).

Hackerrek Appleren azken sistema eragilearen segurtasun hesiak laster gainditu zituzten; baina albistea izan dena da untethered gisa lortzea. Gogoan izan, untethered eran egiten bada jailbreak-a, erabiltzaileak gailua itzali eta piztu ahalko duela, ordenagailu eta iTunesen beharrik gabe. Aldiz, tethered eran egiten bada prozesua, eta gailua itzaltzen bada —bateria barik geratu delako edo nahita itzali delako—berriz ere jailbreak prozesua pasatu beharko zaio ondo ibiltzeko. Astunegia bihurtzen da bigarrena, beraz.

Izugarrizko arrakasta

Iturri batzuen arabera, aurreneko lau egunetan zazpi milioi erabiltzailek egin zuten ekintza haien gailuetan. Hala ere, oraindik aldaketa egiteko zalantzati dagoenarentzat, baliagarri gerta daiteke iOS 6 kaleratu zenean haren berrikuntzei buruz aurreratutakoa: http://zibergela.bitarlan.net/2012/10/05/appleren-gailuetarako-eskura-dago-ios-6/. Edo Jailbreak egitearen onuren eta legezkotasunaren inguruko beste honek anima dezake: http://zibergela.bitarlan.net/2012/11/22/jailbreak-a-appleren-gailuetan/.

EvasiOnekin, orain arteko prozesurik sinpleena egitea lortu dute; aditua izan gabe edonork etxean egiteko modukoa. Egin beharrekoak errazteaz gain, hainbat euskarritara eraman dute eskaintza. Windows, Linux eta Mac sistema duten ordenagailuetan exekutatu ahal diren EvasiOn bertsioak daude erabilgarri. Pauso bakarrean egiten den prozesua da oraingo hau, eta hasi aurretik iOS 6, 6.0.1, 6.0.2 edo 6.1 gailuan ezarrita edukitzea da baldintza bakarra. Jailbreak oro ere software ofizialaren gainean egiten denez, Applek haien gailu zaharkituenak software eguneraketetatik kanpo uzteko ohitura berberak baldintzatzen du. iPhone 5, iPhone 4S, iPhone 4, iPhone 3GS, iPad 4, iPad 3, iPad 2, iPad mini, iPod touch 5, iPod touch 4 eta Apple TV 2 gailuetan osatu liteke, beraz.

EvasiOn 1.2 deskargatzeko jo: http://evasi0n.com/. Ezertan hasi orduko argi izan behar dira honako kontzeptuak: Jailbreak edo kartzela apurtzea ez da terminala liberatzea; EvasiOn erabili arren, terminalak hornitzaile berdinera lotuta jarraituko du.

Prozesua pausoz pauso

Hasteko eta behin, iTunes bitartez norbere gailuaren pasahitzik gabeko segurtasun kopia bat egitea gomendatzen da. Horrela, evasiOn erabiltzearen prozesuan okerren bat gertatuko balitz, leheneratu ahal izango da gailua. Badaezpada, pantailaren blokeoa kenduta izatea komeni da, horrekin arazoak izan daitezkeelako. Logikoa denez, bateria gutxirekin ere ez hasi ezertan; prozesuaren erdian itzaltzea hondamendia bailitzateke.

Ondorengo pausoak eman behar dira prozesua ondo egiteko: 1. Begiratu zein iOS bertsio darabilzun. Begiratu Settings/General/About/Version ataka horretarako. iOS 6.1 edukitzea hoberena da, bestela, ordenagailuko iTunes bidez konektatu eta bertsioa berritzeko mezuari baietz esan. Lehendik Jailbreak eginda duenak, litekeena da prozesu horren azkenean akats mezu bat jasotzea; ez egin kasurik, eta berriz eman iTuneseko Restore and Upg rade aukeran. 2. Ireki EvasiOn 1.2. Windowseko bertsioaren kasuan, administrari gisa ireki. 3. Konektatu gailua, eta jarraian itxi iTunes. EvasiOn-ek hauteman ostean, Jailbreak botoia gaituko du. 4. Botoiari eman, eta egoera barra bete arte itxaron. 5. Bukatu ostean, gailua desblokeatzeko adieraziko du. Ondoren, aplikazio berri gisa agertuko den Jailbreak izeneko ikonoa zanpatu beharko da bertan (behin). 6. Prozesuak bukatu arte itxarotea besterik ez da falta. Gailua behin baino gehiagotan berrabiaraziko da bakarrik, eta desblokeatzeko pantaila erakutsiz amaituko da guztia.

Antza denez, azken pausoak 5 minuturik ez luke iraun beharko; horrela balitz, EvasiOn itxi daiteke eta berriz abiarazi. Kasu honetan, gailua ere berrabiarazi beharko litzateke: Power + Home botoiak sakatuta edukita (pizteko goikoa eta pantailaren behealdekoa, bestea). Berriz ere, 3. pausora itzuli beharko litzateke, kasu honetan.

Bestela, gailuaren mahai gainean Cydia izeneko biltegiak instalatuta behar luke, Applekoek baimendu gabeko aplikazioen denda. App Store-ren baliokidea da, baina kode irekiko aplikazioduna. Horrela, untethered erako askapena egin dela ziurtatu (itzali eta piztu ondoren Cydiak hor jarraitzen duela ikusita) eta norbere datuak gordetzen dituen segurtasun kopia —iTunes erabilita beste behin ere— berreskuratuta bukatzen da tailer hau.

1 2 3 4 … 9