Ira, 26
2013
Google, Microsoft, musika, Streaming

‘Streaming’ musika zerbitzuak, gora

streaming-musicGaur-gaurkoz bistakoa da negozio ederra dela streaming musikarena. Mugarria Napster izeneko ataria izan zen: edozein talde eta abesti Internet bidez entzuteko eskaintza erakargarria eta garaian parekorik gabekoa ematen baitzuen, baina Metallica taldearekin epaitegietan topo egin zuten. San Frantziskoko (AEB) taldeak ez zuen gogoko izan haien musika sarean denen eskura jartzea, eta are gutxiago etekinik ez usaintzeak. Ordutik, Napster-ek zein agertu diren beste streaming zerbitzuek, hainbat harpidetza dituzte. Doakoak diren arren, gehienetan hileroko ordainketak egin behar izaten dira iragarki gogaikarriak saihesteko edo sakelakoan non-nahi musika entzun ahal izateagatik. Napster, Spotify, Grooveshark, Pandora, Ubuntu One Music, Last.fm… Streaming musika zerbitzuen zerrenda ia amaigabea da, honezkero.

Ondorengo proposamenak kaleratu berriak edo kaleratzear daudenak dira. Era askotarikoak dira aurrekoei batzen zaizkienak: musika liburutegi zabalekoak, sare sozialetan gehien ematen ari diren abestiak identifikatu eta eskuragarri jartzen dituztenak edo musika negozio eredu berri bat dakartzatenak dira horietako batzuk.

Google Play Music All Access

Astiro baina pauso irmoz joan da bidea eginez Googleren zerbitzua. Beta eran egon ostean, lehengo astean iritsi zen Euskal Herrira beta bertsioan. Android sistemarako aplikaziotik eta webetik lor daiteke, eta 7.99 euroren truke ordenagailuan gordeta ditugun 20.000 abesti ere igo litezke hodeira. Bakoitzaren musika liburutegira sartzea egongo da offline eran edo Internet konexio beharrik gabe. Norbere musikaz gain, munduan dagoen —ia— edozein abesti berri nahiz zahar entzun daitezke. Aurreneko hilabetea dohainik eskaintzen dute, eta askorentzat dagoeneko nagusi den Spotify Premiumaren lehiakide gogorrena da. https://play.google.com/ about/music/.

Xbox Music

Microsoften musika zerbitzuak urtebeteko bizitza dauka jada. Baina orain atera dituzte saretik telefono eta sakelakoentzat aplikazioak: Android sistemetan eta iPhone nahiz iPadetarako eskuragarri dago. Aurreneko pausoa, 30.000 abesti baino gehiago eskaintzea izan zen hainbat gailutik entzuteko: ordenagailu, telebista adimentsu edo Xbox 360 bideo kontsolatik. Datorkion erronka ez da nolanahikoa; Android eta iOS sistemetan ibilbide luzea eta bezero oinarri handia daukaten zerbitzuekin borrokatzea ia ezer berririk eskaini gabe: offline sarbidea, irrati propioak sortzea eta partekatzea, besteak beste. Berezitasuna webgunean dago, lehen sei hilabetekoan mugarik gabeko zerbitzua eta erabat doakoa ematen dute; hortik aurrera, hileko ordu kopuru bat egongo da muga gisa. Bestela, 9.90 euroko kuota ordaindu beharko da Xbox Music erabiltzeko. Webgunea ondorengoa da: http://music.xbox.com/.

Twitter #Music

Ideia originala da beste hau. Twitter sare sozialean presentzia handiena daukaten abesti, artista eta taldeen zerrenda bat osatzen da eta jakin-mina daukatenek aipatu doinuen zatiak entzuteko aukera daukate. Asmoa zeresana ematen dabiltzan artista berriak bilatzea omen da. Beste musika zerbitzuekin bateragarritasuna bilatzen dabiltza, eta haientzat iragazki geruza gisa funtzionatzea. Gehigarri gisa dago eskuragarri dagoeneko, adibidez, Spotify edo Rdio zerbitzuetan. Doinu erakargarri baten berri izan eta zati bat entzun ostean, osorik entzun nahi duena beste zerbitzuetara bideratu nahi dute. Astebete baino gutxiago darama Euskal Herrian abian. Interesa duenarentzat https://music.twitter.com/ da helbidea.

Baboom

Urtarrilean Mega hodeiko biltegi zerbitzuarekin hautsak harrotu ostean, bueltan da gorazarre egin zion musika zerbitzu iraultzailea aurkezteko. Hasieran, Megabox gisa izendatu zuten, eta Baboom izena jaso du azkenik. Baina funtsa orduan azaldu zen bera da orain ere: musika zigilu ahalguztidunen kontra egin eta beste era bateko negozioa proposatzea, doako abesti libreen sare baten bidez.

Beste zerbitzuekin lehiakorra izan eta eskaintza sendoa eskaini ahal izateko, eduki sortzaileentzat erakargarria egitea da gakoa. Diru sarreren %90 banatu, eta erosleetan nahiz publizitatean oinarritutako negozioa ezartzen du. Musikariek, adibidez, abestiak zuzenean saldu ahalko lituzkete, eta doan jaitsi nahi duten erabiltzaileengandik ere etekina jasoko lukete. Eurei jarritako publizitatearen gaineko irabaziak jasoko lituzketelako, hein batean.

Oraindik ez dago kaleratze dataren edo harpidetza kostuen berririk; eta doako bertsioaren iragarkien maiztasunaren gainean ere ez dago informaziorik. Hurrengo hilabeteetan albiste izango da.

Mar, 14
2013
android, Aplikazioak, Apple, Microsoft, Mugikorrak, Sakelako Telefonoak, Sare sozialak eta Microblogging, Sareak

Whatsapparen gurpil zoroan

whatsapp-spotbros-lineAzkeneko mugimenduei begiratu besterik ez dago ikusteko Whatsapp nora ezean dabilela. Hasieratik ere, bidegabea zen lizentzia eredua zeukan mezularitza aplikazioa, lehen eta bigarren mailako erabiltzaile taldeak bereizten zituen: hots, Symbian eta iOS erabiltzaileak 0,89 euro ordaintzera behartzen ziren deskargatzeagatik; Android euskarridun erabiltzaileek, berriz, doan jaitsi zezaketen Whatsapp aplikazioa. Askoren amorrua piztu arren, gehiengoak erabilitako tresna izateagatik horrelakoak egin zitzakeen, eta ados ez zegoen gutxiengoa baztertzeko adinako pribilegioa eman dezake.

Orain azaleratu den tranpa txiki bat zeukan, baina, estrategia horrek atzean: lehendabizikoek lizentzia mugagabe eskuratzen zuten, baina bigarrenek —musu truk lortzen zutenek— urtebeterako erabilpenera mugatua zuten lizentzia (Androidetako bertsioen konfigurazio atalean begiratu daiteke hori). Hala ere, mugara iristen zenak ez zuen pairatzen desberdintasunik, baimena beste urtebetez luzatzen zitzaiolako, iragan otsailean politika aldaketa egitea erabaki zutenera arte. 89 zentimoko bidesaria asko ez den arren, gurpil-zoroa abiarazi zuten Whatsapparen arduradunek, eta ordutik komunikabideetan oihartzuna izan duten adierazpen eta zurrumurruak etengabeak izan dira. Ez da erraza esaten tanteatzen dabiltzan ekaitzaren begitik nola irten, edo haien kontrako erasoak besterik ez diren; baina onena, orain dela egun pare bat jaso zen: oraindik ordaindu gabe zeuden Android erabiltzaileek ez zutela mezularitza aplikazioagatik ordaindu beharko iragarri zuten. Garbi dago bezero asko sutu zituela horrek, desorekak handiagotuko lituzkeelako erabaki horrek; ez euskarri desberdinetako erabiltzaileen artean oraingoan, txarragoa baizik: Android plataforma berdinean kutxatik pasatakoen eta oraindik beharrik izan ez zutenen artean.

Azken zantzuen arabera, eta Jan Koum Whatsappeko zuzendari exekutiboaren ahotik, zurrumurruak faltsuak ziren: gezurra da aplikazioak doakoa izaten jarraituko duela Android erabiltzaileentzat. Hemendik atera daitekeen ondorioak ere kontrajarriak dira: batetik, hasieratik erabiltzaile guztientzat irizpide bateratua izatea mesedegarri litzaieke orain. Baina, bestetik, ez al dira iritsi merkatuko tontorreraino politika horri esker? Garbi dagoena da irizpide dantza horren ondorioz erabiltzaile askok bizkarra eman diotela Whatsappi eta itzulerarik izan ohi ez duen bideari ekin diotela.

Esanak esan, jendearen ahotan egotea omen da kontua; gaizki esaka nahiz bestela, publizitatea beti delako onuragarria. Argi dagoena da mauka ederra utzi dietela lehiakideei.

Spotbros

Doan eta letra xehe gabe, alternatiba direnen artean entzutetsuenak Line eta Spotbros dira. Bigarren honi buruz esatekoak utzi genituen jada: http://zibergela.bitarlan.net/2012/10/18/spotbros-aplikazioa-whatsappari-merkatua-jan-nahian/.

Getxotarren asmoa orain Ameriketara joatea omen da, milioi bat erabiltzaileren muga gainditu berritan. Hego Amerikako merkatuetan sendotu nahi dute orain dela bost hilabete hasitako bide arrakastatsua. Gogoratu, Spotbros pribatutasunagatik bereizten dela besteengandik eta irrintzia edo shout ezaugarriari esker gertu dauden ezezagunei mezuak bidali ahal izategatik.

Line

Line japoniarrari buruz asko esan daiteke. Eta Whatsapp aplikazioari bezero gehien kentzen dion zerbitzua da. iOS, Android, Blackberry eta Windows Phone sistemetan erabil daiteke; eta mezuak bidaltzeaz gain, deiak egiteko aukera ere eskaintzen du. Berezitasun nabarmenena da ordenagailutik sartzeko bertsioa daukala, eramangarritasunean eta erosotasunean irabazten du horrela. Lineren arrakasta, baina, sticker izena duten ilustrazioen erabilpenean datza. Hauek emotikonoak ordezkatzen dituzten pantaila osoko anime erako marrazkiak dira. Urtarrileko datuen arabera, Linek 100 milioi erabiltzaile baino gehiago ditu munduan.

Urt, 03
2013
Amazon, android, Apple, ebook, Google, Hardware, Jokoak, Mahaigaina, Microsoft, Mugikorrak, Sakelako Telefonoak, Sistema Eragileak, Software Librea, tabletak, Windows

2012a, tamainari lotutako urtea

Gailu eramangarrien urtea dei dakioke 2012ari. Lehendabizikoz, tableten eta sakelakoen salmentak mahaigainekoen zifrak gainditu dituzte 2012. urtean. Irabaziak dituztenen zerrenda, ordea, ez da aldatu: Apple, Samsung eta Googlek besteen gainetik zuten abantailari eutsi diote, eta handitzea ere lortu dute.

Urtea albistetan aberats hasi zen: polemikarako nahiz eztabaida ideologikorako pizgarri izan zen Megaupload ixtea, eta Kodak argazki etxe mitikoaren gainbeherak, Facebooken burtsako txango makalak eta Appleren mapa sistema propioaren deskalabruak zeresana eman zuten. Esan beharrik ere ez dago Google Maps izan dela garaile segmentu honetan: bizkorra, zehatza, itxurosoa eta trafikoaren eta errepideen eguneratzeekin. Bestalde, filtroak eskuragarri dituzten argazki aplikazioek gorakada handia izan dute, eta Twitterrek berak ere eskuragarri ezarri du berriki, moda berriari eusteko asmoz. Nabarmenena Instagram telefonoetarako vintage erako argazki aplikazioa izan da; iOSen erabiltzaileen artean arrakasta izan ostean, Androiderako jauzia eman zuen. Instagram Facebookek barneratu, eta Twitterrek bere zerbitzutik atera zuen erantzun gisa; baina benetan kaltegarria suertatu zaio: azken asteetan erabiltzaileen eskubide gaineko eguneratze polemiko baten ondorioz, erabiltzaile galera masiboa izan du.

Windows 8 sistema eragilea ere atera da, behinola erreferente izan zenak aldaketa handiak proposatu ditu ukimenezko pantailetarako eta gailuetarako, ordenagailu, eramangarri zein tabletentzat berdin balio duen euskarriarekin sosak jokatzeko asmotan. Produktu berriari lotuta, Surface izeneko tabletak ere plazaratu zituzten, tableten gudan bidea ireki nahian. Ordenagailuen merkatua nora ezean dagoen isla besterik ez da Microsoftek pairatutakoa, hainbat eratako gailuak kaleratzen baitira, salmentak puskatuko dituen produktua nork plazaratu: bihurgarriak (erdi tableta, erdi ordenagailu eramangarri), teklatu txertagarria duten tabletak edo ultrabook ukimenezko pantailadunak dira adibideak.

Urtea bukatzeko mezuak ere jada ez ziren SMS bidez egin, baizik eta Whatsapp bidez. Hala ere, joera aldatuz doa, eta aitzindariak egunak zenbatuta dauzka lehen postuan. Spotbros edo Line mezularitza aukerak merkatua hartuz doaz, eta agian datozen Gabonetan zorion agurrek beste bitartekaririk ere izango dute. Bien indarra segurtasunean datza, eta Linek deiak egiteko aukera ere ematen duen arren, arazoak dauzka telefonoaren bateriaren erabilpen larregizkoarekin.

Tabletak eta sakelakoak

Esan dugun bezala, smartphone-en joera geroz eta pantaila handiagoak jartzea da, eta tabletetan, berriz, txikiagoak merkaturatzeko apustua egin dute. Errudunak Googlekoak direla esan daiteke, haien Nexus 7 gailuaren ondorioz. Aurrenekoa agian Amazon izan zen, bere Firerekin, baina erdibidean geratu dira Googlekoen aldean.

Nexus 7 ez da iPad Miniaren materialen kalitatera iristen, baina Google Play dendako app eskaintza zabala, prezio erakargarri bat (199 euro) eta Android euskarriaren azken eguneratzea edo 4.2 Jelly Bean bertsioaren esperientzia berrituak 2012. urteko errebelazioa bihurtu dute. Telefonoei dagokienez, iPhone 5 sakelakoa kaleratu bada ere, prezioak gutxi batzuen gutizian utzi dute, eta hori Samsung konpainiaren mesedetan joan da. Apirilean Nokia aurreratu zuten hegokorearrek munduko lehen telefono fabrikatzaile gisa, eta gaur egun Apple, Nokia eta HTC etxeek batera saltzen dituztenak baino ale gehiago merkaturatzen dituzte munduan.

Galaxy S3 izan da aginte makila eman diona, merkatuan dagoen ezaugarri, software eskaintza eta prezio onenak dituen smartphone-a dela esan baitaiteke. Googlek, bere aldetik, Nexus 4 telefonoaren eskaintza bortitza proposatu zuen, baina izan dituzten hornikuntza arazoek arrakasta oztopatu diete.

Bideo-jokoak

Kontsolen esparruan, goitik behera zetorren Nintendok eman du aldaketa, Wii U makinarekin. Gakoa prezioan (300 euro), hasierako katalogo zabala (23 jokorekin) eta beste behin ere orain arteko guztiarekin apurtu duen aginte gailu edo tableta iraultzailearen eskutik —Wii U Gamepad— etorri da. AEBetan etxeko aurreko bideo jokoak izandako salmentak bikoiztea lortu dute Mario eta Luigi anaien sortzaileek, eta momentu batez arrakastatsuak bezain gogaikarriak diren txorien edo Angry Birds bideo jokoak ahaztarazi dituzte erabiltzaileak.

Aipamen bereziak

Liburu elektronikoen sailari dagokionez, Amazonek orain arteko Kindle lineako produkturik landuena kaleratu zuen, Paperwhite: pantaila argiztatua, 1.100 libururentzako edukiera eta diseinu dotorea. Prezioa, 129 euro. Hurrengo Zibergela-ren batean mintzagai izango diren Googleren betaurrekoek errealitate areagotuaren ikuspegi berri bat ekarri izana edota 26 euroko Raspberry Pi informatika ikasteko erabiltzeko ordenagailuek ere merezi dute aipamena.

1 2 3 4 … 8