Mar, 31
2011
Microsoft, Nabigatzaileak

Microsoftek Internet Explorer 9 abiarazi du

01-Internet-Explorer-9-Microsoftek Microsoft Internet Explorer nabigatzailearen bertsio berria abiarazi du , Internet Explorer 9, hain zuzen ere. Eguneraketa hau doakoa da eta Microsoftek eguneratzea gomendatzen du nabigatzailearen aurreko bertsioak dituzten erabiltzaileentzat.

Bertsio honen interfazea aurreko bertsioak baino askoz sinpleagoa da, jada ez dira agertzen lehengo baliabide barrak. Gainera, web aplikazioen funtzionalitate batzuk Windowseko hasiera menuan integratzea ahalbidetzen du. Bestetik, azkenik, deskarga kudeatzaile bat integratu du beste nabigatzaile batzuek dagoeneko daukaten bezala.

Segurtasunaren aldetik ere hobekuntza batzuk dakartza bertsio berriak, besteak beste, webguneetatik jaso ahal den publizitate kopuruaren murrizketa, anti-tracking neurriak webguneek erabiltzaileen eragiketak erregistratzea saihesteko eta Active X filtroa, Active X exekutatzeko baimena emateko soilik erabiltzaileak nahi dituen webguneetan.

Microsoften arabera, bertsio honek, web estandarrak bermatzen ditu, hala, bada, web garatzaileak poztuko dira.

Microsoft Internet Explorer 9 erabili ahal izateko MS Windows Vista edo MS Windows 7 edukitzea beharrezkoa da. RAM memoriaren aldetik 512 MB da bertsio berri honek eskatzen duen gutxiengo kopurua.

Mar, 31
2011
Aplikazioak, Google

SketchUp: Googleren 3D diseinu aplikazioa

sketchup2Hainbat alditan esan den bezala, zaila da aurkitzea Internet eta Informatika eremu bat non Googlek eskua sartu ez duenik. Izan ere, hiru dimentsiotako modelatze aplikazioa ere eskaintzen du Interneteko erraldoiak.

Google Seketch Up aplikazioak eraikinak, etxeak, pertsonak, ibilgailuak eta marrazkilariak irudikatzen duen edozein 3Dtako irudiak sortzea ahalbidetzen du. Googlek, gainera, hainbat egitura eta hiru dimentsiotako objektu ezberdinak eskaintzen ditu eta ehunaka objektu ezberdinak bilatu eta deskargatu daitezke horretarako eskaintzen duen bilatzailetik.

SketchUp erabilerraztasunari begira diseinatu da, aplikazioak berak eskaintzen ditu bideo ezberdinak aplikazio honen bitartez modelatzen eta hiru dimentsioetan marrazten ikasteko.

Sketch Up-en historia

Beste proiektu askorekin gertatu den bezala, Sketch Up hasieran ez zen Googleren aplikazio bat. “@Last Software” enpresa amerikarrak abiarazi zuen proiektua 2000ko abuztuan. Googlek “@Last Software” enpresa erosi zuen 2006an eta beraz Sketch Up aplikazioaren eskubideak ere eskuratu zituen. Egun, 8. bertsioa dago eskuragarri.

Sistemaren betebeharrak

Googleren aplikazio asko hodeian daude, Internet aplikazioak dira, Google Docs, Google Calendar edo Google Maps bezala; haatik, kasu honetan, Google SketchUp mahaigaineko aplikazio bat da. Oraingoz ez da prestatu Ubuntu bezalako GNU/Linux sistemetarako bertsio bat, nahiz eta Wine-ren bitartez erabiltzaile batzuek GNU/Linux sitemetan ibiltzea lortu duten, hemen zehazten da nola: http://wiki.winehq.org/GoogleSketchup. MS Windows 2000 Serverren ere ezin da exekutatu. Izan ere, aplikazio honek erabiltzen ditu programazio liburutegi batzuk MS Windows 2000 Serverren ez daudenak. Ordea, ez dago arazorik erabiltzeko MS Windows XP SP2, MS Windows Vista, MS Windows 7 eta Mac Os X 10.5 eta Mac Os X 10.6 sistemetan. SketchUp-en azken bertsioa, 8. bertsioa alegia, dagoeneko ez da bateragarria Mac Os X 10.4 bertsioarekin.

RAM memoriari dagokionez Googletik 2GB edo gehiago gomendatzen dute, baina gutxienez aplikazioa kargatzeko 1GB beharrezkoa da sistema eragile gehienetan eta MS Windows XP SP2 sistemetan 512 MB. 3D bideo-txartela ere beharrezkoa da eta txartela honen driverra OpenGLrekin bateragarria izan behar da.

Nola eskuratu

Aplikazio hau eskuratu ahal da dohainik Googleren webgunetik lotura honetan: http://sketchup.google.com/download/index.html. Eta hor agertuko da Google Sketch Up Pro bertsioaren demo bat deskargatzeko aukera, baina, hori ordainpeko bertsioa da eta orduan debalde deskargatzen den bertsioa soilik 8 orduz erabili ahal izango da mugarik gabe. Horren azpian, agertzen da doako bertsioa deskargatzeko lortura, horri sakatu, aukeratu sistema eragilea eta deskargatzen hasiko da. Ondoren urratsei jarraitu eta sisteman instalatuko da.

Erabilera

Arestian esan bezala, Google Sketch Up erabilerraztasunari begira sortuta dago eta orduan 3Dtan modelatzeko aplikazio bat izanda, erraz erabil daiteke. Erabileran laguntzeko aplikazioa lehenengoz abiarazten denean, erabiltzen ikasteko hainbat baliabide eskaintzen dira: bideo-tutorialak, erabiltzeko aholkuak eta trukuak, laguntza-gunea, laguntza gida edo blogaren lotura. Oso gomendagarria da baliabide hauek arakatzea aplikazioa erabiltzen hasi aurretik.

Aplikazioa erabiltzen hasteko “Sketch Up erabiltzen hasi” botoiari sakatu ahal zaio eta diseinatzen hasteko txantiloia aukeratu behar da. Zenbait txantiloiren artean aukeratu daiteke: Txantiloi sinplea, diseinu arkitektonikoa, Google Eartherako eredua, ingeniaritza eredua, zurgintza eta produktuen diseinua edo ikasteko eredua, adibidez.

Mar, 28
2011
Apple

Hilaren 25ean iritsiko da Euskal Herrira iPad2-a

Appleren tableta famatuaren bigarren bertsioa salgai jarri da berriki. Eta lehen salmenta datuak izugarriak dira: diotenez, 600.000 ale saldu dira Ameriketako Estatu Batuetan gailua salgai jarri eta lehen egunean.

Lehen bertsioarekin alderatuz, honako ezaugarri hauek eskaintzen ditu jostailu berriak: bi kamera jarri dizkiote: bata aurrean eta bestea atzean; eta kolore bitan eskaintzen da: zuri nahiz beltzean. Apur bat finagoa ere bada, eta formak borobildu egin dizkiote.

Aldaketa handienetako bat, hala ere, tabletaren prozesadorean dago, nukleo bikoitzeko Apple A5 prozesadore berrian hain zuzen ere. Sistema eragilea iOS 4.3 du iPad2-ak eta dakarren softwarearen artean, FaceTime da aipagarrienetako bat. FaceTimekin, Applek bideotxata jartzen du eskuragarri bere ordenagailu, iPhone, iPod touch eta iPad 2 erabiltzaileen eskura.

Euskal Herrian, martxoaren 25tik aurrera egongo da eskuragarri, 16, 32 eta 64GBtako modeloetan. Beste tokietan bezala, zuri eta beltzean eskainiko du Applek, Wifi edo Wifi + 3G konektibitaterekin. 470 eurotik tik hasita, 800 euro bitarteko preziotan salduko da.

1 2 3