Aza, 19
2010
Aplikazioak

Testu prozesagailuak eta editoreak

testuprozesagailuak2Dokumentuak idazteko ezinbestekoak dira testu prozesagailuak eta oso garrantzitsua da bakoitzaren beharretara ondoen moldatzen dena aukeratzea. Aukera anitz daude, Internet-ingurunean, mahaigainekoak, libreak, pribatuak, arinak edo sistema eragile ezberdinentzat.

Internet inguruneko testu prozesagailuak

Internet inguruneko prozesagailuek abantaila batzuk eskatzen dituzte. Interneten daudenez, erabiltzaile batek edozein lekutatik aldatu, irakurri eta kudeatu ahal ditu bere dokumentuak on-line. Gainera, plataformanitzak dira, hau da, nabigatzailea eta internet konexioa nahikoa da atzitu ahal izateko. Beraz, ez du axola sistema eragilea, Mac Os X, GNU/Linux edo MS Windows izan daiteke. Sakelako telefonoetatik ere ikusi ahal dira Internet konexioa edukiz gero. Honez gain, plataforma batzuek ere dokumentu horiek beste erabiltzaileekin partekatzea ahalbidetzen dute, erabiltzaile ezberdinen artean osatu edo irakurri ahal izateko. Beraz, Internet-inguruneko testu prozesagailuak oso egokiak dira asko mugitzen diren pertsonentzat edo ordenagailu ezberdinetatik dokumentu ezberdinak lantzen dituzten erabiltzaileentzat. Era berean, edozein erabiltzailerentzat izan ahal da erabilgarria dokumenturen bat beste erabiltzaile batzuekin batera osatu behar badu.

On-line testu prozesagailuen artean, ezagunena, Google Docs da. Google Docs, Googlek Internet ingurunean eskaintzen duen bulegotika-suitea da, non dokumentuak, kalkulu-orriak, aurkezpenak, marrazketak eta formularioak sor daitezkeen. Helbide honetan erabili ahal da dohainik: https://docs.google.com. Googleren suite honen inguruan hitz egin zen jada Zibergelaren aurreko ale batean, “Google docs: Bulegotika hodeian” zuen izenburua eta lotura honetan irakurri ahal da: http://zibergela.bitarlan.net/2010/02/02/google-docs-bulegotika-hodeian/. Dokumentuak Internet edukitzeaz gain, plataforma honek eskaintzen duen abantaila nagusietarikoa da beste erabiltzaile batzuekin partekatu ahal direla dokumentuak, soilik irakurtzeko eran edo idazteko eran erabiltzaile ezberdinen artean osatu ahal izateko.

Beste aukera interesgarri bat Wrttn.me da, helbide honetan erabili ahal da: http://wrttn.me/. Oso testu editore arina da eta webgunean izena eman gabe sortu ahal da dokumentu bat. Formatua emateko html eta css erabili ahal da, bestela formaturik gabe idatzi ahal da testu laua. Sortutako dokumentuak helbide publiko baten bitartez argitaratu ahal dira eta Twitter edo Facebooken partekatu. Era berean embed kodea ere eskaintzen du dokumentua edozein webgunetan txertatu ahal izateko. API bat ere eskaintzen du beste aplikazio batzuetatik dokumentuak argitaratu edo irakurri ahal izateko.

Beta bertsioa da oraindik ea nolako bilakaera duen.

Mahaigaineko aplikazio arinak

Emankortasunari garrantzia eman nahi bazaio, pantaila osoko testu prozesagailu arinak izan ahal dira aukerarik onenak. Pantaila osoan egikaritzen direnez, entretenimendu guztiak baztertzen dira. Haietariko bat CreaWritter da, proiektuaren helbidean http://www.creawriter.com/ debalde deskargatu daiteke edo borondatezko dohaintza eman ahal zaio proiektuari. Testu editore hau, esan bezala, pantaila osoan exekutatzen da, aukerazko atzealdeko argazki eta musika lasaigarri batekin emankortasuna sustatzeko. Testu editore arina denez, testu formaturako gutxienezko aukerak ditu, dohaintzazko bertsioak doako bertsioak baino aukera gehiago ditu. RTF edo testu bezala gorde ahal dira baliabide honen bitartez sortutako dokumentuak. MS Windows sistemetarako bertsioa dago bakarrik. Mac Os X sistemetan, antzeko aplikazio bat erabil daiteke, OmmWritter izenekoa, hona hemen aplikazio honen webgunea: http://www.ommwriter.com, kasu honetan ere debalde jaitsi daiteke.

Blogarientzako aukera aproposa

Blogariek ere aukera interesgarri bat dute MS Windows sistemetan erabiltzeko, Windwos Live Writter, hain zuzen ere, Windows Live webgunetik bertatik deskargatu daiteke, hona hemen helbidea: http://explore.live.com/windows-live-writer. WordPress edo Blogger bezalako blog plataforma askotan argitaratu ahal dira sarrerak aplikazio honen bidez. Gainera, sarreraren aurrebista eskaintzen du. MS Windows sistemetan baino ezin da instalatu, jakina.

Aukera klasikoak

Aukera klasikoak aski ezagunak dira, arestian aipatutakoak baino aplikazio pisutsuagoak dira, hori bai, askoz aukera anitzekin. MS Office Word, Open Office Writer edo LibreOffice dira ezagunenak.

Aza, 15
2010
Apple, Mac OS X

Lion, Mac OS X sistemaren bertsio berria

macosxLion du izena Apple enpresaren Mac OS X sistemaren bertsio berriak. Mac OS X 10.7 Lion bertsioa da, hain zuzen ere. Urriaren amaieran egin zuen Applek sistema eragilearen bertsio berri honen aurkezpena eta iragarri zutenez, 2011ko udan egongo da eskuragarri.

Azken bertsio honetan, badirudi, gailu eramangarrietarako (iPhone, iPod, iPad) iOS sistema eragilearen eta ordenagailuetarako OS X sistema eragilearen arteko filosofiak uztartzen saiatu direla. Izan ere, iOStik hartutako ideia batzuk OS X sistemaren bertsio berri honetan txertatu dituzte.

Berrikuntza handietariko bat Mac App Store da. Izan ere, iOS sistemetan hain arrakastatsua izan den aplikazio biltegia Mac Os X-an ere egongo da. Aplikazio biltegi horretatik ordainpeko eta doako aplikazioak deskargatu ahal izango dira.

Beste berrikuntza garrantzitsu bat Full Screen Mode litzateke, honen bitartez, pantaila osoan ikusi ahal izango dira bai aplikazioak edo bai edukiak eta era erabat autonomo batean beste aplikazioekiko. Honela, aplikazio batzuk abiarazi ahal izango dira era berri honetan eta beste batzuk leiho arruntak bezala. Eta hori guztia, gainera, trackpad-en bitartez edo ukipen-mungimenduekin.

Aza, 15
2010
Aplikazioak

Pantaila-argazkiak egiteko aukerak

Pantaila-argazkia1Askotan, aplikazio baten, webgune baten edo ordenagailuaren pantailan ikusten den edozein gauzaren inguruko txosten bat egin behar denean, gauzak era bisualagoan azaltzeko, pantaila-argazkiak txertatzen ibili behar da.

Pantaila-argazki bat egiteko, sistema eta ordenagailu gehienetan “ImprPant” tekla sakatu ahal da. Horrek pantailan dagoenaren argazki bat paper-zorroan kopiatzen du. Ondoren, nahi den dokumentuan edo irudiak editatzeko aplikazioan itsatsi ahal da. “Alt + ImprPant” ere egin ahal izaten da, kasu honetan ez da pantaila osoa kopiatzen baizik eta soilik une horretan erabiltzen ari den leihoa.

Mac sistemetan eta ordenagailuetan, ordea, “Sagarra + Shift + 3” sakatu behar da pantaila osoaren argazkia egiteko eta “Sagarra + Shift + 4” soilik hautatutako zatiaren argazkia egiteko. Bi kasu hauetan, egindako argazkia mahaigainean gordetzen da, png motako irudi bezala, ez da paper-zorrora kopiatzen. Paper-zorrora kopiatzeko, “Ctrl+Sagarra + Shift + 3” edo “Ctrl+Sagarra + Shift + 4” sakatu beharko litzateke, hurrenez hurren, pantaila osoaren edo pantailaren zati baten argazkia kopiatzeko. Azken aukera bat eskaintzen da Mac Os X sistemetan, “Sagarra + Shift + 4” edo “Ctrl+Sagarra + Shift + 4” sakatu ostean, zuriune-barra ri sakatuta, argazki-kamera bat agertzen da pantaila eta argazki-kamera horren bitartez leiho oso edo ikono oso baten argazkia atera ahal da. Ateratako argazkia mahaigainean gordeko litzateke edo paper-zorroan Ctrl teklari ere sakatu bazaio.

Esan bezala, hauek sistemek eskaintzen dituzten lehenetsitako aukerak dira, baina horretaz gain, aplikazio edo gehigarri batzuk daude aparteko funtzionalitateak eskaintzen dituztenak.

MS Windowserako SnapIt eta ZScreen

SnapIt Screen Capture MS Windows sistemetan ibiltzen da. MS Windows 95etik aurrera, sistema honen bertsio guztietan erabili ahal da. Aplikazioaren lizentzia komertzialak 17,99$ balio du gaur egun, baina debalde jaitsi daiteke probazko bertsio bat 15 egunetarako. Hau da aplikazioa deskargatzeko helbidea: http://www.digeus.com/downloads/snapit/index.html. Deskargatzeko izena eta helbide elektronikoa eskatzen du. Jaitsi ondoren, instalatu beharko da, oso erraza da instalatzea, urratsei jarraitu baino ez da egin behar. Oso aplikazio arina da, 2MB baino ez du behar. Abiarazten denean sistemaren atzeko planoan gelditzen da eta pantaila-argazki bat egiten denean abiarazten da, horren bitartez aukeratu ahal da kopiatu nahi den zatia eta BMP, GIF, JPEG, PNG eta TIFF formatuetan gordetzea ahalbidetzen du. Aplikazioa ingelesez dago soilik.

MS Windows sistemetarako beste aukera bat ZScreen izango litzateke. Kasu honetan ere soilik ingelesez dago, baina software librea da, doakoa eta gainera oso oso osatua da. Gainera, aurrekoa bezain arina da, 2 MBera ez da heltzen. Aukera anitz eskaintzen ditu, bai pantaila-argazkia ateratzeko orduan zein ateratako argazkiaren helburuaren inguruan. Ateratako argazkia, paper-zorrora, fitxategi batera edo FTP batera bidali ahal da esaterako, edo Flickr, TinyPick edo TwitPick bezalako webguneetara ere bai. Gainera, argazki-pantaila ateratzen denean egindako argazkia editatzeko aukera eskaintzen du. Hau da aplikazioaren webgunea: http://code.google.com/p/zscreen/, deskargatzeko Downloads pestainara joan behar da eta hor ZSCreen aukeratu.

Shutter, GNU/Linux sistemetan.

Shutter GNU/Linux sistemetan pantaila-argazkiak ateratzeko oso aplikazio interesgarria da. Shutter software librea da eta instalatu daiteke Ubuntu edo GNU/Linux sistemetan Synaptic-etik, Ubuntu Software Biltegitik edo edozein pakete kudeatzailetatik, shutter izeneko paketea bilatu eta instalatzeko markatu besterik ez da behar. Aplikazio honetaz hitz egin zen jada Zibergelaren aurreko ale batean, hau da sarrera horren helbidea: http://zibergela.bitarlan.net/2010/04/08/shutter-gnulinux-en-pantaila-argazkiak-ateratzeko-aplikazio-interesgarria/ eta hau proiektuaren helbidea:http://shutter-project.org/.

Webguneen argazkiak

Screengrab, Firefoxerako gehigarri bat da eta Firefox nabigatzailearen bitartez ikusten diren webguneen argazkiak edo kapturak ateratzea ahalbidetzen du. MS Windows, Mac OS X eta GNU/Linux sistemetarako Mozilla Firefox nabigatzaileetan instalatu daiteke eta hau da gehigarriaren helbidea: https://addons.mozilla.org/eu/firefox/addon/1146/. Web orrialde osoa edo zati baten argazkia egin daiteke eta paper-zorroan edo fitxategi batean gorde ahal da PNG edo JPEG formatuan.

1 2 3