Azkenaldian famatua egin da doodle hitza, egunero gai baten inguruan mozorrotzen duten Googleren atariko logotipoa ere horrela deitzen baitute. Jatorrizko esanahia, ingeleseko zirriborro hitzetik dator. Aldiz, Doodle: easy scheduling, marrazkiak baino gehiago, taldeko eginkizunen egunak adosteko balioko duten zirriborroak egiteko aplikazioa da. Interneten bidez nahiz Appleren gailuetako aplikazioetatik sar daiteke. Iragan abuztuaren 29ra arte, Androiderako bertsioa ere bazegoen eskuragarri, baina kentzea erabaki zuten, arazo ekonomikoak arrazoituta.
Erabilpena ezin errazagoa da: inkesta pentsatu, gonbidapenak bidali, eta aurrenekoa izan data eskuragarritasuna zehazten. Ez dago loturarik ere; egin beharrekoa prestatu, bidali, eta alde. Abiarazteko botoi urdina zanpatu, eta inkesta sortzeko menua irekitzen da. Bertan, titulua erabaki —«martxoan, sagardotegira» adibidez—; aukeran, ekitaldia non izango den zehaztu; deskribapena eman; eta besteek ezagutuko duten izen bat, posta elektronikoarekin batera, berriak jasotzeko. Azkenik, lehentasunezko egunak eta orduak zehaztuko dira, gonbidatuek zehaztu dezaten gure aukeren artean zein datorkien hobeto, eta posta elektronikora inkestaren esteka bidaliz bukatzen da prozesua.
Inkestarako sarbidea daukaten guztiek ikusiko dute egun bakoitzarekin ados daudenen kopurua, kolore berde deigarriz nabarmenduta egongo baita. Horrela, eguna zehaztuko dute, eta bestela buruhausteak besterik emango ez lituzkeen prozesu desatsegina aurreztuko dute.
Denborarekin gehituz joan diren ezaugarrien artean daude egutegi ezagunenekin zuzenean integratzeko ahalmena —Google Calendar, iCal eta Outlookekin— edo MeetMe izeneko profil pertsonala osatzea sarean, besteek jakin dezaten bakoitza noiz dagoen libre. Azkenik, erregistratzeko astia hartzen duenak egutegi guztiak sinkronitzeko aukera jasotzen du, doan hori ere.
Doodle: easy scheduling eskuragarri dago App Storean edo zuzenean Interneten erabilgarri eta doan, hemen: https://doodle.com/.
