Foursquare (https://foursquare.com/) geolokalizazio sare sozialik ezagunenetarikoa da. Aplikazio honen bitartez erabiltzaile batek check-in egin dezake egoten den leku ezberdinetan eta bere kokapenari buruzko informazioa eman. Bide batez, erabiltzaileak berarentzat interesgarriak diren lekuak marka ditzake. Susmatu daitekeen bezala, oso bideratuta dago sakelako telefonoetan erabiltzeko, baina, webgunean ere erabil daiteke ordenagailu batekin.

Hala, bada, webgunerako bertsioan aldaketa sakon bat egin dute egitasmo honen garatzaileek. Izan ere, orain arte Google Maps erabiltzen zuten mapa azpiegitura bezala geolokalizazio zerbitzuetarako. Baina, web ingurunean OpenStreetMap zerbitzua aukeratu dute honezkero Google Mapsen ordez. OpenStreetMap (http://www.openstreetmap.org/) zerbitzu irekia da eta Internet erabiltzaileak auzolanean osatzen joaten dira.

Hala ere, aldaketa hau soilik web ingurunean eman dute eta oraingoz sakelako telefonoetarako aplikazioetan Google Maps erabiltzen da.

Aldaketa hau inflexio puntu bat da Foursquare proiektuan eta agian bultzada garrantzitsua izan daiteke OpenStreetMap proiektuarentzat.