Ziur asko izango zela Hotmail interneten aspaldi denik nabigatzen dutenen lehendabiziko posta. Baina 16 urteren ostean, erabiltzaile berrien begietan posta beroa deitutakoa gehiegi tostatzera eta ezinbestean tostoira pasa da Microsoft-ek egindako akatsen kabuz. Horren ezagule, markaz aldatzea erabaki, erabat itxura aldatu eta funtzionalitate berriz josi dute zerbitzu berria: outlook.com. Hotmailek hor jarraituko du, eta erabiltzaileek beraien kontua mantendu ahalko dute (oraingoz), baina etorkizuna garbi markatu dute; Microsoft-en emaila Outlook da aurrerantzean, eta kitto.

Aurpegi aldaketa soila ez eta zerbitzuaren sortzaileek atzera egin dute tinko ziharduten alor batean: Hotmailen publizitate gehiegikeria, hain zuzen. Interfaze berria osatzeko orduan, Gmail hartu dute erreferentziatzat eta erabiltzaileak horrenbeste gogaitzen zituzten irudi publiziatarioak kendu eta mezuan klikatu ondoren bakarrik agertzen diren testu txikien bitartez ordeztu dituzte.

Itxura ere garbiagoa eta sinpleagoa da atzealde urdin lasaigarripean, botoi gutxiagoz osatua, mezu bat idazteko konektatzen baita erabiltzailea, ez beste ezer konplexutarako.

Eguneraketa hoberena sare sozialen osagarriena izango da seguruenik. Orain kontaktuan zauden pertsonaren azkeneko profil eguneraketak edota txioak jaso ahalko dira automatikoki, hauen sare sozialetarako esteka batekin batera. Mezua irekitako eskuineko paneletik bertatik “Gustokoa dut” aukeratu daiteke, komentatu edo berriz txiotu.

Aldaketa egitera ausartzen direnak (Hotmaileko hobespenetan “eguneratu Outlook-era” zanpatuz) hasieran litekeena da iparra galduta ibiltzea baina Microsoftek mahai gainean jarri duena dastatzen hasten diren heinean sorpresa gozagarria eramango dute.

Gainera, eguneraketaren ostean ere lehendik Hotmailen kontua zeukanak helbide berdina mantenduko du, lehengo kontaktuek bidalitakoa helbide berrian jasoz. Ez dira gutxi dagoeneko zerbitzu berriztatu honetan erregistratzen arrapaladan joandakoak, korreoaren izen zaharra ez baita gordetzen zerbitzu berrirako!