Urt, 09
2014
android, Apple, Google, Internet, Mantenimendua, Mugikorrak, Sakelako Telefonoak, tabletak, Windows Phone

Android telefono berria berrezartzen

Android_Apple_tablet
Azken hilabeteetako joerari eusten bazaio, Android telefonoek erabiltzaileak biltzen eta merkatuan hedatzen jarraituko dute. Merkatu estatubatuarra da munduko ispilua, eta bertan garbi ikusten da software libreko Android plataformaren garapena: comScore iturriaren arabera gailuen %53a Googlerenak dira egun, 2009an, %10era iristen ez zirenean. Eta egungo iPhone jabeen %80ak, aurretik ere iPhone telefonoa zutelako iOS erabiltzaileak fidelenak direla ere esaten den arren, geroz eta gehiago dira aldatzeko arrazoiak ikusten dituztenak. Indarguneak nabariak dira: smartphone eskaintza zabalagoa da, merkeagoak, hardware ahaltsuagokoak, eta gainera nahi bezala pertsonaliza daitezke. iPhoneak kalitate handiko materialdun gutizia garestiak bihurtu dira, Androidek eta Windows Phonek aldeak murriztu ostean.

Sakelakoak, dena dela, ez dira inoiz irautekoak izan. Eta, aldatzeko orduan, behinola, aurreko datuak berreskuratu nahi zituztenek banaka kopiatu ohi zituzten eskuz; egunak pasa zitzaketen sufrikario luze horretan. Egun, egoera bestelakoa da. Smartphone-ak Internetez baliatzen dira hainbat funtziotarako, esaterako, segurtasun kopiak egiteko. Ezarpenak behar bezala jarriz gero, Android telefono berrira aldatzea erosoa eta bizkorra izan daiteke; baita iOS plataformatik aldatu nahi dutenentzat ere.

Hodeia lagun

Argazkiak, bideoak, SMS mezuak, telefono zenbakien zerrenda zein aplikazioen datuak hodeian gorde eta aise berreskuratzeko beta ematen dute azken belaunaldiko telefonoek. Android ingurunea estu lotuta dago Googleren zerbitzuetara, eta hura baliatzen du hodei zerbitzu gisa. Google kontu bat edukitzea beharrezkoa da, hasteko, telefonoari etekin osoa ateratzeko.

Datuak automatikoki Googlera bidaltzen direla ziurtatzeko, Ezarpenak barruan Pertsonala sailekoEgin babeskopia eta berrezarri sakatu, eta Leheneratu automatikoki aukera hautatu behar da. Horrek norbere Google edo Gmail kontuan datu pila gordetzeko balio du: wifi ezarpenak, nabigatzaileko gogokoenak eta aplikazioetako datuak, besteak beste. Sistema berrezarri eta aplikazioak berriz instalatzen direnean, haien datuak eta ezarpenak birkargatzeko balio du. Kasu honetan, aurreko terminalean bezala, guztia agertzeko berrian konfiguratuta eta datu berberekin. Hartara, lehen utzi ziren erara agertuko dira telefono berrian.

Bada, oraindik ez da bukatu: Android telefono berria, orain, norbere Google kontuari lotu behar zaio. Arestian egindako segurtasun kopia berreskuratuko da horrela, eta, bide batez, Google Play dendara sarbidea eskuratuko. Gailu berrian, berriz ere Ezarpenak, eta Kontuak sailean Gehitu kontua aukeratu ostean, Kontua erabili lekuan Gmailen datuak sartu behar dira. Orduan, Internetetik automatikoki deskargatuko ditu, kontaktuak, mezuak, Gmail, egutegia eta abar.

Aplikazioak berriz deskargatzeko eragozpenik ez dago. Google Play gaituta dagoenean berriz, barruan, Nire aplikazioak atalean nahi direnak instalatu ahalko dira haiengatik ordaindu beharrik gabe. Norbere Google kontuari lotzen zaizkiolako aplikazioak, eta ez uneko telefonoari. Bestalde, SMS, MMS eta deien kopiak ez dituzte segurtasun kopiek bere gain hartzen (Androidek zein iOS-ek) eta egiteko propio egindako kanpoko aplikazio bat erabil daiteke: esaterako, Google Playn bilatzeko SMS Backup aplikazioa.

Kontaktuak, memorian

Esan bezala eginez gero, kontaktuek ere kargatuta behar lukete honezkero. Baina, batzuetan, Google kontuan sinkronizatuta eduki beharrean, telefonoaren memorian nahiz SIM txartelean aurki daitezke. Badaezpada egiteko eragiketa da: norberak SD txartel batera edo ordenagailura deskargatu, eta smartphone berrian berriz txertatu. Sakelako zaharreko kontaktuen gidan, Menuajartzen duen ataleko Inportatu/Esportatu aukeran USB biltegiratzera esportatu eman; gero, telefono berriko gidan leku berberera zuzendu, eta USB biltegiratzetik inportatu egin.

Ondo begiratu kontaktuak, batzuk bikoiztuta ager daitezkeelako Gmailen eta telefonoan bertan zeudelako. Googlek, ordea, automatikoki konponduko du hori, eta, horretarako, errazena Gmaileko kontaktuen atalean egitea da.

Sarrera bikoiztuak batu

Gmail postan sartu, eta ezkerreko goiko aldean, Gmail dakarren alboko gezian klik eginezKontaktuak atalera joan. Hor agertuko dira postako helbide eta telefono zenbaki guztiak, izenen arabera antolatuak. Goiko menuko Gehiago botoiari eman, eta Bilatu eta batu bikoiztuak hautatuta lan ederra aurreztuko digu sistemak. Ez arduratu telefonoaz, automatikoki sinkronizatuko baita bere kasa.

iOS ingurunetik Androidera 

iOS eta Android plataformak gehien erabiltzen direnak izaki, aplikazio gehienak bietan aurki daitezke. Alabaina, denda desberdinak dituzte, eta batetik bestera aldatzen denak berriz ordaindu beharko du haiengatik. Behinik behin, aldaketa nekeza izan ez dadin, kontaktuak bederen automatikoki joan daitezen erraz egiteko modua dago, Google Contacts erabiliz, beste behin ere.

iTunes ordenagailuko programa ireki, eta iPhone telefonoa konektatu. Telefonoaren datuak agertzen direnean, Info atala aukeratu, eta bertan Sync Contacts with… aukeratuta dagoela egiaztatu ostetik, Google Contacts ezarri goitik beherako menuan. Hemen, jada, norbere Gmaileko sinestamenduak eskatuko ditu. Sinkronizatzen laga, eta aurreko ataleko pauso berberei jarraitu bikoiztuak ezabatzeko. Android telefono berria estreinatzeko, behintzat, Google kontua gehitu, eta kontaktuak mantenduko dira horrela.

Ira, 19
2013
Hardware, Mugikorrak, Sakelako Telefonoak

‘Phonebloks’, nahieran eta zatika eratutako telefonoa

phonebloks1Telefonoek apurtzeko edo zaharkituta geratzeko urte pare bat nahikoa izaten dute gehienetan. Larriena zera da: arazo iturri pieza bakarra izanda ere, sakelako telefonoa osorik jaurtitzen dela zaborretara, ezinezkoa delako atal hori bakarrik eguneratzea edota ordezkatzea. Pentsamolde hori aldatzea du xede Dave Hakkens herbeheretarraren proiektu batek, ken daitezkeen blokeez osatutako telefono baten bidez. Bloke horiek oinarri batera konektatuta joango lirateke, zeinak, era berean aurrealdetik pantaila bati lotuta, telefono sendo baten itxura hartuko lukeen. Phonebloks deitu dio kontzeptu berritzaileari.

Blokeak erroan

Lehenik, nork bere telefonoa neurrira osatu ahalko luke blokeka, eta, ondoren, zati horietako bakoitza berriekin aldatu ahal izango luke apurtzean edo zaharkitua geratzean. Besteak beste, pantaila arrakalatzea edo telefonoaren abiadura 1GB RAM-etik 4GB-era hobetzea ez litzateke inolako eragozpen izango Phonebloks batean. Aurrez, era berean, lehentasunez eratutako Phonebloks telefonoa erosi ahalko litzateke edo bakoitzak nahi dituen funtzionalitateak aukeratuz hainbat etxeren blokeekin osatu gailua. Helburua zera da: orain, estandar ireki bat sortzea, eta, gero, hainbat enpresak beren blokeak garatzea, eta aukera zabala jartzea erosleen eskura.

Kontua da, beraz, ordenagailuetan PCaren sorkuntzatik ikusi den modularitatea kopiatzea, eta baztertzea iPhone sistema itxien eta enparauen iluntasuna eta sekretismoa. Horretarako, Blokstore deitu duten hardware denda batean pentsatu dute; bezeroek blokeak erosteko, berrikuspenak eta kritikak irakurtzeko edota haien bloke zaharrak saltzeko balioko luke. Hakkensek sortutako eredu horretan, gainera, telefonoen osagaiak hainbat enpresari erosi ahal izango genizkieke, behin plataformaren estandarrak ondo zehaztuta. Etxe bakoitzak —handiek nahiz txikiek— bloke berriak garatuko lituzkete, beharrizan askotarikoak asetzeko balioko luketenak: eguzki indarrez kargatzeko bateriak, itsuentzako pantaila sentikorrak, bidaiatzeko material arindunak…

Horiek guztiek ekarriko luketen pertsonalizazio aukera handia izango litzateke, inolako zalantzarik gabe. Indarra jarriz piezak aukeratzeko askatasunaz haratago, batek beharrezkoak ikusten ez dituen osagaiengatik ordaindu behar izatearekin bukatuko litzateke.

Irauteko diseinatua, aro berria

Prestakuntzak etengabe hobetzea bilatzen duen teknologiaren gizartean, dinamikatik irten baina horregatik martxa galdu nahi ez dutenentzat pentsatuta dagoen gailua dela esan daiteke. Eguneratzeko nahiz konpontzeko egina dagoela, alegia. Abantailak berehalakoak lirateke, beraz: iraunkorragoak, merkeagoak eta soberakin elektroniko gutxiago sortuko luketen garapen eredua aurkeztuko luke. Kontsumoari lotutako ereduaren jarraipena izanda ere, naturarekin begirune handiagoa lekarkeen bat litzateke. Eta egun elektronika kontsumoan izarra denaren gurpil zoroaren abiadura moteltzea; ez litzateke gutxi, hortaz.

Hakkensek pauso bat gehiago eman nahi du, eta era guztietako eragileak konbentzitzea da lehen eginbeharrekoa. Phonebloks teknikoki posible egiteko, enpresa, inbertitzaile, diseinatzaile, ingeniari eta ikertzaileen atxikimendua beharrezkoagoa baita dirua baino. Horretarako, deia egin du http://www.thunderclap.it/ plataforma erabilita. Sare sozialetan baino ohiartzun handiagoa lortzea zaila da, eta, beraz, lagundu nahi duenak mezu honi erantsita idatz ditzake hitz batzuk: «#phonebloks thndr.it/15eLHbz».

Urr, 18
2012
android, Aplikazioak, Apple, Mugikorrak

Spotbros aplikazioa, Whatsappari merkatua jan nahian

Spotbros3Amore eman, eta sakelakoetarako Internet kontratatzeko beharra ikusi dute azkenaldian askok. Hala, komunikazio aloreean eta soziologian «mezu laburren kultura» deituriko fenomenoaren mundura igaro dira. Smartphone telefonoen aplikazioen artean nagusi den Whatsapp aplikazioari nagusitasuna kendu nahi dion mezularitza aukerarik badago merkatuan: horietako bat da Bilbo aldean oraintsu garatu duten Spotbros.

Zerbitzu berriak Whatsappek dituen gabeziak bete nahi ditu, segurtasunean eta sare sozialetan indartsu egiteko asmoz. Whatsappean mezuak testu lauak dira, baina Spotbrosek bidalketa guztiak zifratzen ditu, AES 256 biteko algoritmoa erabilita.

Horretaz gain, bakoitza bere pribatutasunaren jabe uzten du zerbitzuak; adibidez, kontaktuak edonoren eskura utziz edo jada kontaktuen artean daudenei bakarrik utziz libreta behatzen. Mezuek ere iraungitze eguna daukate, eta 30 egunen buruan desagertu egingo dira hodeitik. Erabilerraza eta aukera anitzekoa da euskal aplikazioa, merkatuko beste aukeren aldean.

Bi ezaugarri

Bi ezaugarri nabarmentzen dira aplikazio berrian, eta mezularitzara zerbitzuetara haize berritzailea ekar dezakete: Shout (irrintzia) eta Spot (guneak), hain zuzen.

Lehenari esker, elkar ezagutu ez arren inguruan dauden eta haien telefonoetan SB instalatuta daukatenei mezua igor diezaieke, inguruan gertatzen ari denaren berri izateko, edo galderaren bat egiteko. Bigarrenarekin, norbere inguruan dauden hizketaldi taldeak bilatu daitezke, eta gaia gustukoa izanez gero, bertara bildu. Gainera, jasotako mezuei «gustukoa dut» eranstea, harremana izan duzun pertsonari puntuazioa ezartzea, edo mezuak birbidaltzeko aukera bitxiak ere eskaintzen ditu.

Interfazearen lengoaien aukera murritza da, oraingoz, ingelesa edo espainola aukeratu behar da. Spotbros eskuragarri dago App Store zein Google Play dendetan, dohainik iOS eta Android euskarridun sakelakoentzat.

1 2