Urt, 23
2014
Internet, Mugikorrak, Sakelako Telefonoak, Sareak

100 kilometrorainoko super wifia

super-wifi4G sareak dira, egun, haririk gabeko Interneterako sarbidea lortzeko teknologia puntakoena. Gaitasun handiko sistema dela zalantzan jarri gabe, seinale murritza du traba nagusi. Hiriburu nagusietan bakarrik dago seinalea, eta ez dirudi epe motzera konponduko denik eragozpen hori. Zibergelan sakondu zen gaia: http://zibergela.bitarlan.net/2013/05/31/4g-telekomunikazio-teknologia-atarian/. Hala eta guztiz ere, telekomunikazioen etorkizuna itsu-itsuan lotzen da 4G teknologiara oraindik ere. Baina 3G sarearen gehiegizko asetasunarekin amaitzeko bestelako aukerarik ere badago: super wifia.

Azpiegitura berriei muzin

Interferentziak saihesteko asmoz, telebista kanalen arteko seinalean erabili gabeko frekuentziak edo zuriuneak uzten dira. 2011n onartu zen 802.22 estandarra, eta zuriune horiek baliatzen ditu haririk gabeko irismen handiko sareak ezartzeko. Gainera, telebista seinale analogikoa bidaltzeari utzi zitzaionetik, erabili gabeko frekuentzia tartea ere zabalagoa da. Eta hori berbera erabiltzen da: VHF eta UHF bandetako 54 eta 862 megahertz (MHz) tartekoa, hain zuzen. Era horretara, hedapen handiko wifiaren seinalea igortzea dago, ehun kilometrorainoko irismenarekin eta segundoko 22 megabiteko (Mbps) abiadura langarekin.

Egokitzapen beharrik ez

Super wifiari esker, era guztietako gailuak elkarrekin konektatzea dago sarbideko puntuen bila ibili beharrik gabe eta pareten interferentzien eraginik gabe. Agian, alderik handiena egokitzeko gehigarri berezirik edo terminal berririk behar ez izatean dago. 4G sarea erabili ahal izateko, berriz, azken belaunaldiko gailu garestiak behar dira. Izan ere, besteak beste, sakelako gutxik dute ezaugarri hori gaur-gaurkoz. Artean, egungo edozein gailu erabili ahalko litzateke besterik egin gabe, eta zortzi kilometroraino super wifiaren seinalea jaso. Aldea dago, wifi arruntaren 100 metroekin konparatuz gero. 4G sareen kasuan, sare oso bat osatu beharra du hornitzaile bakoitzak; hau da, azpiegitura berrien beharra dago, eta motel doa kontua.

Estalpean egon den teknologia

Bestalde, super wifia aintzat hartzeko baliabidea da landagune edo herrietan. Izan ere, ezartzeko kostu baxua du, eta seinalearen irismena ona da. Seinale komertzialik ez duen edo errentagarria ez den inguruneetara Internet eramateko balio du, baita wifi publikoa eduki nahiko luketen eremu handietarako ere. Litekeena da teknologia hori pixka bat estalpean egon izanaren arrazoia ere hor aurkitzea. Hornitzaileentzat errentagarriagoa da banakako sarbidea ematen duten teknologiak ezartzea, erabiltzaileei banaka kobratu ahal izateko. Super wifia ezarriz, ostera, eremu zabal bateko biztanleek baliatu ahal izango lukete Interneterako sarbide bakar hori.

Super wifia hasi da apurka-apurka ibilbidea egiten. Aurtengo ikasturtean bertan, Ameriketako Estatu Batuetako ehunka institututan eta unibertsitatetan erabiltzea erabaki dute. Horrek hautsak harrotu zituen azaroan. Brasilen eta Erresuma Batuan ere erabiltzeko interesa erakutsi dute dagoeneko.

Urt, 23
2014
android, Aplikazioak, Apple, Jokoak, Mahaigaina, Mugikorrak, Sakelako Telefonoak, tabletak

Arkatzezko marrazkia bideo joko bihurtzeko alimaleko burutazioa

ipad-floors-progressionDonkey Kongen upelak maldan behera saihesten, edo Mario eta Luigi anaiekin batera perretxikoak batzen; bi dimentsioko bideo jokoetan jolasten ziren 1980 eta 1990eko hamarkada arteko belaunaldiak. Erronka handiagoen bila, haien maila propioak paperean marraztu eta bideo jokoak sortzearekin amesten zuenik ere bazen, tarteka.

Belaunaldi horietako haurrak zein oraingoak, amesteari utzita, bi dimentsioko bideo jokoen mailak diseina ditzakete eta haietan jolas daitezke orain. Merkatuan parekorik ez duen ideia da Pixel Press Floors, telefonoetarako, tabletetarako eta webetarako aplikazioa.

Nahikoa izango dituzte gailu gutxi batzuk eta irudimena: arkatza, papera, inprimagailua eta telefono edo tableta bat. Haien atarian deskargatu behar da txantiloia, eta inprimatu; ondoren, orriaren laukitutako eremua bete argibideak jarraituz; amaitzean, kamerarekin argazkia atera, eta bideo jokoa egingo da. Pantailak igo eta lagunekin parteka daitezke, baita besteek egindakoetan jolastu ere.

Finantzaketa kolektiboari esker, egia bihurtu dute, hasierako eskabidea aspaldi beteta. Baina oraindik ez dago eskuragarri. iOS plataformarentzat martxorako iragarri dute, eta Androidentzat, berriz, ekainerako. Bideoak ikusteko, txantiloia jaisteko, edo informazio gehiagorako:http://projectpixelpress.com/.

 

Urt, 16
2014
Aplikazioak, crowdfunding, Hardware, Jaialdiak, Mugikorrak, Sakelako Telefonoak, Telebista

Berrikuntzak, Las Vegasko elektronikaren azokatik

curved tvCES edo Consumers Electronics Show elektronika eta teknologiaren nazioarteko azoka da. Urteroko hitzordua da AEBetako Las Vegas hirian. Aurten urtarrilaren 7a eta 10a bitartean izan da. Sasoiko produktu elektroniko berriak aurkezten dituzte, tarteka, inoiz merkaturatzera iritsiko ez diren proposamenak. Kontsumitzaileei aldiko joerak erakusteko eta enpresei negozioak egiteko balio du azokak.

• Pantaila kurbatuak eta gailu eramangarriak, sasoiko teknologiak. CES 2014 amaitu berritan, zeresan handiena eman dutenak pantaila kurbatuko gailuak dira. Telebisten kasuan, erdiko aldea bakarrik dute finkoa eta alboak okertu daitezke bakoitzaren beharren arabera. Bestalde, sakelako baten pantaila okertu ahal izatearen erabilpenak ez dira garbi geratu. Gainera, hiru dimentsioko telebisten porrota azaleratu du 4K bereizmeneko telebisten agerpenak; betaurrekorik gabe antzeko bizipena ematen dutelako. Erronka, baina, prezio apalak bilatzea zen. Vizio eta Polaroid etxeen oholtzan, 50 hazbeteko 4K telebistak erakutsi zituzten 731 eurotan. Toshibaren 4K bereizmena duten eramangarrien lerroa ere adierazgarria da, Ultra HD ordenagailuetara eramaten aurreneko saioa baita.

Sakelakoen aldetik, Asus nabarmendu zen, 72 eurotako smartphone baten eskutik. Android sistema eragilea eramango du Asus Zenfone 4 telefonoak.

Steam Machine, berriz, kontsola generikoak dira; Linux oinarridun bideo jokoen lehen plataforma erabiltzen duten ordenagailuak, hain zuzen. Orain, hainbat enpresak haien kontsola aurkeztearen aldeko apustua egin dute. Erabiltzaileen arreta erakarri, eta Sony, Microsoft edo Nintendok haien erara moldatutako merkatua irekitzeko egiazko mehatxua dira dagoeneko. Zibergela-n aipatu genituen: http://zibergela.bitarlan.net/2013/10/03/bideokontsola-libreen-aldia-ote/.

Gidaririk gabeko gailu hegalari txikien edo drone deituen agerpena ere aipatzekoa da. Erabilpen militarraren ondorioz ezagun egin arren, segurtasuna edo garraio zibilerako erabiltzen hastekotan baitabiltza. Amazon edo Telepizza konpainiak banaketa sistema gisa probatu dituzte, eta laster ikusiko dira gure hirietako zeruetan hegan. Parrot etxe frantziarraren Mini Drone eta Jumping Sumo erakutsi zituzten baita ere. Drone komertzial horien prezioaren berri eman ez arren, 2014aren amaiera aldera eskuragarri egotea iragarri dute. Azkenik, Android sistema eragilea autoetan sartzeko egitasmoa aurkeztu dute Audi, Google eta Nvidia etxeek. Hyundai, Honda eta General Motors batu zaizkie proiektura.

Deigarria da baita crowdfunding edo finantzaketa kolektiboaren laguntzaz aurkeztutako proiektuen kopurua. Horrek erakusten du ideia on bat duen orok ekoitzi eta saldu dezakeela bere produktua. Azkenik esanguratsuak izan zen erakutsi ziren osagarri elektronikoen arrakasta: betaurrekoak, eskumuturrekoak edo erlojuak funtzionalitate berriak aurkeztu dituzte. Berehalako etorkizuneko osagarriak interaktiboak izango dira.

• Bidokontsolarik gabeko bideo jokoak. Etorkizuna gailu sinpleenen baitan dago. Eta hodei konputazioa da giltza. Sareko sarbidea eta pantaila edukitzea nahikoa da edozein eduki egikaritzeko. Hots, jolasteko urrutiko agintea eta Internet konexiodun Smart TV bat edukitzea besterik ez da beharko aurki, Play Stationeko katalogoko jokoetan aritzeko. Zerbitzuaren izena Play Station Now da, eta streaming bidez plataformen arteko bateragarritasun arazoa bukatuko da. Trabak gainditu, eta PS4 berrian PS3-ko jokoetan jolasteko balioko du.

Baina batez ere tableta, telefono, kontsola eramangarri edo beste gailu adimentsutan ibiltzeko ere. Prozesatzeko ardura zein kalkulu guztiak egitekoa, urrutiko zerbitzariak hartuko baititu bere gain. Esan gabe doa Interneterako abiadura handia beharko dela, etenik nahi ez bada.

• Berehalako mezuak, etxeko tresnei zuzenduak. Beste behin ere, domotikari garrantzia eman zitzaion CES azokan. Aukera bakarra izan ez den arren, LG etxearen proposamenak eman du arreta gehien. Line berehalako mezularitza zerbitzuarekin bat egin eta etxeko tresnekin komunikatzeko mezularitza zerbitzua da aurkeztu dutena: Homechat. Horrela, laster batean lurra garbitzeko xurgagailua zein arropa-garbigailua —zein beste edozein gailu— urrutitik abiaraztea dago, LG markakoa eta adimentsuak diren artean.

• Janaria inprimatzeko labea. Txokolatea eta azukrea erabiliz, hiru dimentsioko jakiak egiteko diren inprimagailuak agertu dira Las Vegasen. ChefJet eta Chefjet Pro makinek bolumena eta pieza artikulatuak dituzten objektuak sortzeko gaitasuna dute. Haurren askariak ez dira berdinak izango hemendik aurrera.

• Smartwatch edo erloju adimentsuak. Azken belaunaldiko sakelakoek dituzten funtzio berberak betetzen dituzte. Dagoeneko ez da fikzioa deiak egin edo Whatsappak bidaltzea norbere eskumuturrari hitz eginez. Ezta ere aplikazioak instalatu eta jokoetan jolastea erlojuan bertan. Bide batez, teknologia jantzi egin daitekeela erakutsi dute, aurreneko modeloetako sport itxura alde batera utzita.

Erloju dotore eta serioagoak ikusi ahal izan ziren azokan, eta Pebble Steel izenekoa nabarmendu zen guztien artean. Aurretiaz ere eta aho betez merkatuko smartwatch onena izandakoa, orain metalezko akaberarekin aurkeztu dute. Xarma berezia daukan aukera da, ez baita etxe handi baten babespean egindakoa. Kickstarter atarian finantzaketa kolektiboaren bitartez egia bihurtutako proiektua da.

1 … 4 5 6 7 8 … 22