Googlek gehitu du funtzionalitate berri bat bere Google Maps aplikazioan. Bilaketa bat eginda, Nafarroa edo Bilbo, adibidez, eremu honek mapan okupatzen duen lekua nabarmentzen du kolore arrosarekin eta marra grisekin. Era honetan, lekua aurkitzeaz gain jakin daiteke okupatzen duen eremua.

Markaketa zoomaren arabera egokitzen da eta bakarrik ibiltzen da mapa ikuspegian, hau da, markaketa ez da erakusten ez satelite ez erliebe ikuspegian.

Euskal Herrian probatuta nahiko ondo dabilela esan daiteke, Arakaldo bezalako herri txikiren batean ez du markaketa egiten, baina ondo markatu ditu herriak, hiriak eta herrialdeak. Basque Country edo Euskal Herria bilatuta, Euskal Autonomi Erkidegoari dagokion eremua markatzen du.

Erabiltzaile guztientzat dago gaituta dagoeneko aukera hau.

http://9to5google.com/2012/01/20/google-maps-now-highlights-areas-of-interest/

Google TV sistemak eskaintzen dituen ezaugarrien artean hauek aipa genitzake: Android sistema eragilea darabilten sakelakoek telebista mota horien telekomando lana egin dezakete; eta, telebistetan, Chrome nabigatzailearekin Interneten ibiltzeko aukera izango da.

Informazio gehiago: http://www.neowin.net/news/google-paying-to-have-android-installed-on-tvs

Apple etxeak, esan bezala, arrakasta latza lortu du iPad 2arekin, baina ez da izan produktu arrakastatsu bakarra; iPhone 4S telefonoa eta MacBook Air ordenagailu eramangarriak ere erruz saldu dira.

Nabigatzaileen inguruan, Googleren Chrome hazi da gehien 2011. urtean. Azken urte hauetan Mozillaren Firefox nabigatzailea Microsoften Internet Explorerri erabiltzaileak kentzen joan bada ere, 2011. urtean, Chrome izan da Explorer eta Firefox nabigatzaileen lepo hazi dena. Nabigatzaile erabilien kuotak horrela gelditu dira, StatCounterren aburuz: %40 Internet Explorer, %27 Chrome eta 25% Firefox.

2011. urtean ere, teknologiaren munduan hainbat agurtu ditugu. Batzuk ezagunak oso, Appleren CEO izandako Steve Jobs kasu, eta beste batzuk, jendartean ezagunak izan ez arren, teknologia munduan oso garrantzitsuak izan direnak. Horietako bat da Dennis Ritchie; 1941. urtean jaio zen, eta, 70eko hamarkadan, UNIX eta C programazio lengoaiaren garapenean parte hartu zuen. 2011. urtean zendutako beste bat Betty Jean Jennings Bartik izan da, ENIAC izena zuen lehen ordenagailuaren sortzaileetako bat.

Porrotak

Teknologia enpresa ezagunenek, HTC, Samsung, LG, Sony eta abarrek, euren tabletak merkaturatu dituzte. Samsung etxeak arrakasta handia lortu du Galaxy izeneko tabletarekin, baina beste ekoizle batzuek porrot handiak jasan dituzte, HP eta RIM etxeek kasu. HP etxeak WebOS sistema eragilean oinarritutako Touchpad izeneko tableta plazaratu zuen; produktu ona, etxe ospetsua, baina salmentarik ez. Ipadaren prezio antzerakoa zuen, eta erabiltzaileek nahiago izan zuten Appleren tableta. Ondorioz, HP etxeak prezioa asko jaitsi behar izan zuen bere produktu berria saldu ahal izateko, eta, azkenean, tableten negoziotik alde egitea erabaki zuen.

BlackBerry ekoizten duen RIM etxeak ere BlackBerry PlayBook delakoa merkaturatu zuen, baina ez zuen arrakastarik izan; badirudi sistemaren eguneraketa urria eta aplikazio erakargarrien eskasia izan zela arrakasta eskasaren arrazoia.

Tableten mundutik at, teknologiaren beste alor batzuetan ere, izan dira uste baino emaitza kaskarragoak izan dituzten produktu eta zerbitzuak. Google+ da horietako bat. Kontaktuak zirkulutan biltzeko aukera ematen du sare sozial horrek ez du publiko zabalaren onarpenik izan. Googlek berean jarraitzen du, funtzionaltasun gehiago eskaintzen, jada erregistratuak dituen 50 milioi erabiltzaile horien kopurua handitu nahian.

Sarean edo hodeian eskaintzen diren zerbitzuen etenak ere kalte handiak eragin dizkiete RIM eta Sony etxeei. RIMen BlackBerry telefonoak mezularitza zerbitzuak porrot egin eta gero posta gabe izan ziren urrian. Sony etxearen PlayStation plataformak sarean jolasteko zerbitzua eten izan behar zuen bere sistemek jasan zuten eraso baten ondorioz. Agerian gelditu zen Sonyren sistemen ahulezia eta erabiltzaileek sarean gordetzen dituzten datu pribatuak egoki babestearen beharra.

Kontsolen alorrean, Nintendo etxeak betaurreko berezien beharrik gabe 3D efektua eskaintzen zuen 3DS plazaratu zuen. Plataforma horrentzat joko gutxi garatu direlako eta hainbat erabiltzailek zorabioak jasan dituztela zabaldu delako, produktu horrek arrakasta gutxi izan du.

Eta 2012rako zer?

Badirudi hasi berria den urte honek ere gailu eta zerbitzu mordoa eskainiko dituela. Gailuen munduan, bolo-bolo dabilen iPad 3 delakoaren aurkezpena espero da, eta badira Applek bere tabletaren tamaina txikitu eta 7 hazbeteko bertsio bat plazaratuko duela esaten dutenak ere. Apple etxeak ere iPhone telefono adimendunaren bosgarren bertsioa merkaturatuko du, eta, Appleren produktuen inguruan gertatu ohi denez, horrekin ere dena da filtrazio eta txutxu-mutxua.

Microsoft etxeak Windows 8 aurkezteko asmoa du 2012an, eta ezagutzera eman diren ezaugarrien artean, USB 3.0 euskarria, Ribbon interfazea eta aplikazioen denda izango duela jakin da.

Kontsolen munduan, bi dira espero diren aurkezpen ezagunenak: Nintendo etxearen Wii U eta eta Sonyren Vita.

Amaitzeko, Amazon etxea lanean da bere Fire tabletak dituen akatsak konpontzeko, eta gainontzeko tablet ekoizleek bezala, badirudi bere produktuaren bertsio berriren bat kaleratuko duela.

Googlek bere blog ofizialean honela dio: «Orain arte, Google Plusek pertsonak jarri ditu harremanetan, eta orain, zuretzat interesgarria den horrekin konektatu zaitezen nahi dugu, esaterako, zure herriko tokiko negozioekin eta ezagunak diren markekin» (http://googleespana.blogspot.com/).

Orriekin batera, Googlek Direct Connect (zuzeneko konexioa) aurkeztu du. Googleren bilatzailean + zeinua erabiltzen badugu, zuzeneko konexio horrek zuzenean eramango gaitu bilatzen dugun enpresa edo marka horrek Google Plusen duen webgunera. Hori aktibatzeko, gure Google Plusen ezarpenetan, Google+ pages atala aktibatu beharko dugu.

Interfazean hainbat aldaketa dakartza Android 4k, estetika futurista eman diote, eta tipografia ere aldatu egin dute, Robot» letra mota erabiliz. Pantailaren azpialdean, hiru botoi birtual berri jarri dituzte, eta, Appleren iOS sistema eragilean bezala, ikono bat beste ikono baten gainera arrastatu eta askatzen badugu, karpeta bat sortuko da.

Pantaila desblokeatzeko, aurpegia erabil daiteke: gailuaren kamerak erabiltzailearen aurpegia grabatu eta ezagutu egiten du.

Beste hainbat berrikuntza ere eskaintzen ditu Androiden azken bertsioak: NFC teknologien erabilpena, kamerarekin argazkiak azkar ateratzeko modua, kontaktuak kudeatzeko modu berria, datu konexioaren kontsumoaren xehetasunak, eta abar luze bat.

Sistema eragile berri hau izango duen lehen telefona, Googlek berak saltzen duen Samsung Galaxy Nexus izango da.

Google Circles

Google Plusek daukan berezitasunik garrantzitsuenetarikoa zirkuluen ideia da. Nork bere kontaktuak zirkulutan antolatu ahal ditu: lagunak, lankideak, familia, eta abar. Bakoitzak nahi dituen zirkuluak sor ditzake eta ondoren kontaktuak zirkuluetan sartu arrastatu eta jaregin eginez. Horrela erabiltzaileak bere jarioan argitaratzen duen informazioa izan ahal da publikoa, bere zirkuluetarako eta bere kontaktuen zirkuluetarako, bakarrik bere zirkuluetarako edo zirkulu edo kontaktu berezi baterako. Izan ere, sare sozialetan askotan nahasten dira familia, lagunak eta harreman profesionalak eta agian partekatzen den informazioa ez da guztiok ikusteko. Horrela, argitaratzen den sarrera bakoitzeko, aukeratu ahal da zeintzuk ikusten duten, adibidez, lagunak izeneko zirkulukoek bakarrik. Era berean, askotan sare sozialetan kontaktuak pilatzen dira eta informazio lar jasotzen du erabiltzaile bakoitzak, beraz, maiz kontaktu gertuen informazioa galdu ahal da. Era horretan, une bakoitzean ikusi ahal da erabiltzaileak nahi duen zirkuluaren jarioa bakarrik edo erabiltzaile guztien sarrerak batera.

Hau ez da ideia berri bat, software librea den Diaspora sare sozialak aukera hau eskaintzen zuen jada, beste era batean planteatuta, hori bai, eta dagoeneko Facebooken ere egin ahal den gauza bat da, nahiz eta Goolge Plusen bezain erraza ez izan.

Norabide bakarreko harremanak

Google Plusek daukan beste berezitasun bat Facebookekin alderatuta harremanak egiteko era da. Kasu honetan antza handiagoa dauka Twitterrekin. Erabiltzaile bakoitzak bere zirkuluetan nahi duen kontaktua sartzen du, beste erabiltzaileak ez du halaber onartu behar, adibidez, Facebooken, LinkedInen edo beste sare sozialetan gertatzen den bezala.

Kontaktuekin elkarrizketak gauzatzeko Google Plusek txata ere eskaintzen du GTalk-en bitartez, eta Google Plus-etik bertatik mezu elektronikoak bidaltzeko aukera ere badago.

Bideo txata taldeka

Hau guztia gutxi izango balitz, Google Plusek ere talde bideo txatak egiteko aukera ahalbidetzen du. “Hasi topaketa” izena duen botoi berde bat ikusten da, topaketak egiteko egutegi bat dela irudi lezake, baina ez da hori, taldeko bideo txata hasteko da. Pantaila partaideen eremu ezberdinetan banatu beharrean, beste bideo txat sistema batzuek egiten duten bezala, bideo txat sistema honek pantailan erakusten du une bakoitzean hitz egiten ari den erabiltzailearen bideoaren irudia.

Argazkiak

Google Plusek eskaintzen du atal oso bat erabiltzaileak sare sozial honetan dituen argazki guztiak kudeatzeko. Atal honetan erabiltzaileak igotako argazki guztiak ikusi ahal ditu hala nola etiketatuta dagoen argazkiak. Argazkiak kontaktuekin etiketatu daitezke, ezabatu edo efektu batzuen bitartez aldatu.

Jokuak

Jokuetarako ere atal berezi bat eskaintzen du Google Plusek. Bertan hainbat eta hainbat joko aurki daitezke on-line erabiltzeko. Beraz, ez da ezer instalatu behar ordenagailuan eta edozein sistema eragilerekin erabil daitezke, nabigatzaile hutsa behar delako, flash ere beharrezkoa da hainbat kasutan. Gainera, joko hauek guztiz integratuta daude sare sozialarekin eta beraz, jokoetako lorpenak edo puntuazioak argitara daitezke norberaren profilean. Era berean, askotan beste erabiltzaileekin batera jolastu ahal da eta norberaren kontaktuak ere gonbidatu ahal dira jolasteko.

Google Plus sakelako telefonoetan

Sakelako telefonoetan dagoeneko zenbaut aplikazio agertu dira Google Plus sare soziala telefono mugikorretik erabiltzeko. Esaterako,  Android telefonoetan Social Plus izeneko aplikazioarekin Google Plus, Facebook eta Twitter erabil daitezke. Hau da aplikazioaren lotura: https://market.android.com/details?id=social.plus.free.com

Ordenagailu honen apustua bestelakoa da: saretik lortzen ditu eskaintzen dituen aplikazioak, eta sarera jotzen du fitxategiak gorde eta datuak prozesatzeko. Sare edo lainoan oinarritutako sistema eragile bat erabiltzen du: Googlek garatu duen Chrome OS sistema eragilea. Ezaugarri horiekin guztiekin, garbi dago sare konexioa behar-beharrezkoa duela ordenagailu eramangarri honek.

Chrome OS

Googlek garatutako sistema eragile honek Linux darabil bere bihotzean, eta erabiltzailearekin beharrezkoa duen interfazea web nabigatzaile baten bidez eskaintzen du, jada ezaguna dugun Chrome nabigatzailearekin, hain zuzen ere. Chromebook eramangarria pizten denean, 10 segundo inguru behar ditu erabiltzaileari eskaintzen zaion nabigatzailea bistaratu eta lanerako prest egoteko. Eskaintzen diren aplikazioak web aplikazioak dira, eta Android Market eta Appleren AppStore bezala, aplikazio biltegi batetik eskuratu daitezke. Ez dago aplikazioak hartu eta instalatu beharrik, aplikazio hauek Googleren zerbitzarietan daude, eta bertan egiten dute lan. Gure dokumentuak ere Googleren zerbitzarietan gordeko dira, gaur egun Google Docs bezalako sareko ofimatika aplikazioa erabiltzean egiten den bezala.

Sareko sistema eragile hori ez da gauza berria. Urteak dira web bidez eskaintzen diren mahaigainak eskura ditugula. Gutxi batzuk aipatze aldera: eyeOS eta g.ho.st

Abantaila eta desabantailak

Aplikazioak instalatzeko beharrik ez dagoenez, apenas mantenurik duen ordenagailu bat da. Ez da software edo aplikaziorik eguneratu beharrik, eta teorian bada ere, ez dago birusekin kutsatzeko arriskurik. Ordenagailuaren potentzia ez da handia, baina nahikoa da web nabigatzaile baten eskaerak asetzeko. Lehen esan bezala, testu prozesadore batekin lanean bagaude, eragiketa guztiak sarean dauden zerbitzarietan egingo dira (testu zuzenketak, bilaketa eta ordezkapenak) eta eramangarriak eragiketa horien emaitzak erakutsiko dizkigu. Datu eta fitxategiak sarean gordetzen direnez (Googleren zerbitzarietan), eramangarria galdu edo apurtzen bada, ez da daturik galduko. Beste Chromebook batean saioa erabiltzaile berarekin hastea nahikoa izango da datu guztiak berriz ere eskura izateko.

Sareko konexiorik gabe, Chromebook hau ezer gutxi da. Konexiorik gabe ezin du ez aplikaziorik ez eta gure dokumenturik saretik eskuratu. Eskaintzen diren aplikazioak web aplikazioak direnez, programa hauen arintasuna urria da mahai gaineko aplikazioen aldean.

Eman nahi zaion erabilpenaren arabera, aparailu baliagarria izan daiteke. Posta mezuak bidali, nabigatu eta dokumentuak editatzeko egokia da. Netbook moduan ezagutzen diren eramangarrien pareko da eskaintzen dituen zereginetan. Hori bai, kontuan hartzekoak dira haren mantenu behar eskasa eta birusetatik libre egon eta datuak beti sarean izateak eskaintzen dituen abantailak.

Chromebooken eskaintza

Norbanako bezeroek Acer eta Samsung markako Chromebook makinak dituzte eskuragarri. Dena den, herrialde guztietan ez dira modelo denak eskaintzen. Wifia eta 3G konektibitatea eskaintzen duten modeloak daude salgai. Lehendabizikoek 300-400 euroko prezioa dute, eta bigarrenak 400 eurotik gorako salneurrian saltzen dira.

Googlek kaleratu duen Nexus S sakelakoari NFC teknologia txertatu diote, eta Applek ere NFC txipa sartzeko asmoa erakutsi du bere iPad 2 tabletean eta iPhone 5 sakelakoan. Badirudi 2011 urtea, NFC-dun gailuen urtea izango dela.

NFC teknologiaren erabilpenak

Haririk gabeko komunikazioa da NFCren lan eremua. Etorkizun handiena duten erabilpenak, berriz, identifikazioa, datu trukea eta, gehienbat, ordainketak dira.

Identifikatzea beharrezkoa den leku batera sartu nahi dugunean, nahikoa izango da gure sakelako telefonoa edo NFC txipa duen txartel bat irakurle batera gerturatzea. Zerbait ordaintzeko tenorean ere, kreditu txartelak erabili beharrean, posiblea izango litzateke gure sakelakoa ordainketa irakurlera gerturatzea eta horrela di-da batean erositakoa ordaintzea. Ordainketa modu horiek probatzen dabiltza hainbat enpresa. Esaterako, Sitgesen, Visa, Telefonica eta La Caixak, 2010. urtearen amaieran, 1.500 erabiltzaileei samsung telefonoak banatu zizkieten, 500 bat saltokitan egindako erosketa txikiak ordaindu ahal izateko.

Gure sakelako telefonoak diru poltsa elektronikoak bihurtu nahi dituzte. Gure telefonoen SIM-etan, Visa txartelak gorde ahal izango ditugu, eta, horrela, metro edo autobus txartelak ordaindu edo VISA bidez ordaintzen dugun edozein erosketa egingo dugu. Sistema horren erabilera errazak kontsumitzaileak animatuko dituelakoan dira adituak, Korean gertatu den bezala.

NFCren beste erabilera batzuk ere aurkeztu dira. Adibidez, jatetxe edo saltoki bat gustukoa badugu, eta, horren berri eman nahi badugu, saltokiak sarreran jarritako pegatina batera gure telefonoa gerturatzea nahikoa izango da Google Hotpot Foursquare eta natzeko sistemetan, gure gomendioa publikatua izan dadin.

Google Wallet eta Google Offers

Ameriketako Estatu Batuetan (New York eta San Frantziskon), Googlek, Wallet izeneko sistema jarri du martxan sakelakoarekin ordainketa txikiak egin ahal izateko. Mastercard motako txartel bat duen amerikarrak, txartel hori Google Walletekin lotzeko aukera izango du, eta Mastercard-ik ez duenari Googlek edozein txartelekin diruz kargatu daitekeen txartel birtual bat eskaintzen dio. Ordainketa bat egiteko orduan, Android sistema eragilea duen telefonoan, Wallet aplikazioa martxan jarri, eta, bertan, ordaindu beharreko kopurua agertu ondoren, ordainketa onartzeko 4 digituko PIN bat sartu beharko du erabiltzaileak. Wallet sistema horrekin batera, Google Offers sistema ere martxan jarri du. Gure telefonoaren geolokalizazioa aktibatua egonez gero, saltoki baten aurretik pasatzean, gure terminalean saltoki horren eskaintzak ikusi ahal izango ditugu.

Ameriketako enpresaren esanetan, digitalizatutako berrien izenburuak internauten eskura izaten jarraituko du, baina ez berrien edukiak. Google News Archive asmoak jada desagertu diren egunkarien edukiak plazaratu nahi zituen, hala nola egun lanean diharduten hainbat egunkariren hemerotekak. Bere datubasean, adibidez, 1895eko London Advertiser gisako egunkari baten edukiak aurkitu daitezke.

Aurrerantzean, Googlek informazio industria lagundu nahi du bere Google One Pass plataformaren eskutik.

Plataforma horrek harpidetzen eta ordainpeko edukien kudeaketa erraztu nahi du.

Google Apps-en bitartez, Google zerbitzuak enpresa edo entitate bezala erabiltzea posiblea da, bideo honetan azaltzen den bezala: http://www.youtube.com/watch?v=kJT3pagjd8s. Horrela, enpresa batek erakundeko erabiltzaile ezberdinak sortu ahal ditu domeinu bakar baten azpitik, esaterako. Erabiltzaile hauek, Gmail erabili ahal dute enpresaren domeinuarekin, hala nola Google Docs, Google Calendar edo Googleren bestelako zerbitzuak.

Orain arte, entitate batek 50 erabiltzaile sortu ahal zituen Google Apps dohainik erabilita. Baina Googlek Google Appsen debalde eskaintzen diren erabiltzaile kopurua murriztea erabaki du eta maiatzaren 10etik aurrera, soilik 10 erabiltzaile sortu ahal izango dira ordaindu gabe. Aste honetan, Googlek murrizketa honen berri eman die Google App erabiltzen dutenei posta elektronikoren bidez.

Maiatzaren 10era arte sortutako erabiltzaileengan murrizketa honek ez du eraginik izango eta orain arte bezala erabiltzen jarraitu ahal izango dira. Beraz, jada dauden kontuak sortu zirenetik eta zerbitzuak erabiltzen hasi zirenean zeuden baldintzak mantenduko dira.

Hezkuntza entitateek eta gobernuz kanpoko erakundeek, orain arte bezala, debalde erabili ahal izango dute zerbitzu hau eta beraz, neurri honek ez du izango eraginik kasu hauetan.

Hainbat alditan esan den bezala, zaila da aurkitzea Internet eta Informatika eremu bat non Googlek eskua sartu ez duenik. Izan ere, hiru dimentsiotako modelatze aplikazioa ere eskaintzen du Interneteko erraldoiak.

Google Seketch Up aplikazioak eraikinak, etxeak, pertsonak, ibilgailuak eta marrazkilariak irudikatzen duen edozein 3Dtako irudiak sortzea ahalbidetzen du. Googlek, gainera, hainbat egitura eta hiru dimentsiotako objektu ezberdinak eskaintzen ditu eta ehunaka objektu ezberdinak bilatu eta deskargatu daitezke horretarako eskaintzen duen bilatzailetik.

SketchUp erabilerraztasunari begira diseinatu da, aplikazioak berak eskaintzen ditu bideo ezberdinak aplikazio honen bitartez modelatzen eta hiru dimentsioetan marrazten ikasteko.

Sketch Up-en historia

Beste proiektu askorekin gertatu den bezala, Sketch Up hasieran ez zen Googleren aplikazio bat. “@Last Software” enpresa amerikarrak abiarazi zuen proiektua 2000ko abuztuan. Googlek “@Last Software” enpresa erosi zuen 2006an eta beraz Sketch Up aplikazioaren eskubideak ere eskuratu zituen. Egun, 8. bertsioa dago eskuragarri.

Sistemaren betebeharrak

Googleren aplikazio asko hodeian daude, Internet aplikazioak dira, Google Docs, Google Calendar edo Google Maps bezala; haatik, kasu honetan, Google SketchUp mahaigaineko aplikazio bat da. Oraingoz ez da prestatu Ubuntu bezalako GNU/Linux sistemetarako bertsio bat, nahiz eta Wine-ren bitartez erabiltzaile batzuek GNU/Linux sitemetan ibiltzea lortu duten, hemen zehazten da nola: http://wiki.winehq.org/GoogleSketchup. MS Windows 2000 Serverren ere ezin da exekutatu. Izan ere, aplikazio honek erabiltzen ditu programazio liburutegi batzuk MS Windows 2000 Serverren ez daudenak. Ordea, ez dago arazorik erabiltzeko MS Windows XP SP2, MS Windows Vista, MS Windows 7 eta Mac Os X 10.5 eta Mac Os X 10.6 sistemetan. SketchUp-en azken bertsioa, 8. bertsioa alegia, dagoeneko ez da bateragarria Mac Os X 10.4 bertsioarekin.

RAM memoriari dagokionez Googletik 2GB edo gehiago gomendatzen dute, baina gutxienez aplikazioa kargatzeko 1GB beharrezkoa da sistema eragile gehienetan eta MS Windows XP SP2 sistemetan 512 MB. 3D bideo-txartela ere beharrezkoa da eta txartela honen driverra OpenGLrekin bateragarria izan behar da.

Nola eskuratu

Aplikazio hau eskuratu ahal da dohainik Googleren webgunetik lotura honetan: http://sketchup.google.com/download/index.html. Eta hor agertuko da Google Sketch Up Pro bertsioaren demo bat deskargatzeko aukera, baina, hori ordainpeko bertsioa da eta orduan debalde deskargatzen den bertsioa soilik 8 orduz erabili ahal izango da mugarik gabe. Horren azpian, agertzen da doako bertsioa deskargatzeko lortura, horri sakatu, aukeratu sistema eragilea eta deskargatzen hasiko da. Ondoren urratsei jarraitu eta sisteman instalatuko da.

Erabilera

Arestian esan bezala, Google Sketch Up erabilerraztasunari begira sortuta dago eta orduan 3Dtan modelatzeko aplikazio bat izanda, erraz erabil daiteke. Erabileran laguntzeko aplikazioa lehenengoz abiarazten denean, erabiltzen ikasteko hainbat baliabide eskaintzen dira: bideo-tutorialak, erabiltzeko aholkuak eta trukuak, laguntza-gunea, laguntza gida edo blogaren lotura. Oso gomendagarria da baliabide hauek arakatzea aplikazioa erabiltzen hasi aurretik.

Aplikazioa erabiltzen hasteko “Sketch Up erabiltzen hasi” botoiari sakatu ahal zaio eta diseinatzen hasteko txantiloia aukeratu behar da. Zenbait txantiloiren artean aukeratu daiteke: Txantiloi sinplea, diseinu arkitektonikoa, Google Eartherako eredua, ingeniaritza eredua, zurgintza eta produktuen diseinua edo ikasteko eredua, adibidez.

Antzeko arazo bat izan zuen Microsoften Hotmail zerbitzuak urtearen hasieran, baina kasu horretan 17.000 erabiltzaileen kontuetan izan zuen eragina.

Googlek barkamena eskatu zuen publikoki eta azaldu zuen arazoaren zioa. Antza, GMailen biltegiratze sistemaren eguneraketan suertaturiko akats batzuk izan dira datuen galeraren zergatia. Gauzak horrela, akats horiek konpondu arte, aurreko softwarea jarri dute berriz martxan. Googlek, datuetarako, hainbat datu-gune izan arren, datu-gune guztietan batera ezabatu ziren datuak, beraz, ez zegoen datuak berreskuratzerik. Eskerrak, zinta magnetikoetan ere gordeta zeudela datuak ziurtasun kopia ezberdinetan eta horrela erabiltzaileen datuak berreskuratuak izan dira.

Hala ere, horrelako gauzak gertatzen direla ikusita, GMailen dauden on-line datuen ziurtasun kopiak egitea komenigarria da GMail erabiltzaile ororentzat. Horretarako GMail Backup bezalako baliabideak daude, hemen deskargatu daiteke GNU/Linuxerako edo MS Windowserako bertsioa:  http://www.gmail-backup.com/gmail-backup-0-104.

Google Business Photos da Googlek jarri duen zerbitzu berri bat komertzioetara bideratuta. Zerbitzu hau doakoa da, eta honen bitartez, edozein komertzio edo negozioren jabeak eskatu ahal dio Googleri bere negoziora joateko eta komertzioaren argazki-erreportaje profesionala egiteko. Argazki hauek, ondoren, Google Places-en eta Google Maps-en sartuko ditu Googlek. Ziur asko, etorkizunean Google Street View zerbitzuan ere txertatuko ditu.

Aukera hau oso onuragarria izan daiteke kaleko komertzioetarako, alde batetik lortzen da doako zerbitzu profesional bat, negozioaren kalitatezko argazkiak lortzeko. Bestetik, Googleren gune ezberdinetan ikusgai egotea lortzen da.

Oraingoz zerbitzu hau Australian, Zeelanda Berrian, Japonian eta AEBko hiri batzuetan ari dira Googleko argazkilariak. Beraz, Europan zain egon beharko da. Hala ere, laster espero da Europara ere heltzea, beraz hadi egon beharko da.

Webgune honetan ikusi ahal da proiektuari buruzko dokumentazioa eta hirien jarraipena egin:

http://maps.google.com/help/maps/businessphotos/

2009ko maiatzaren amaieran Googlek Google Wave proiektua aurkeztu zuen. Interneteko erraldoiak proiektu hau komunikazio baliabideetan iraultzailea izango zela iragarri zuen. Baina denbora pasatu da eta hasierako eztandaren uhina makaltzen eta makaltzen joan da. Aspaldi ez zen berririk entzuten, sorreran hainbesteko oihartzuna izan zuen proiektu horretaz. Azken albistea ez zen ona izan, Googlek adierazten du bertan behera utziko duela garapena proiektu independente bezala, urtearen amaierara arte zabalik mantenduko bada ere. Gainera, proiektuaren iturburu kodea irekia izango da, bestelako garatzaileek ere aurrera jarraitu ahal izateko egindako lanetik aurrera. Googlek berak ere ez du baztertzen garatutakoaren zati batzuez baliatzea beste proiektuetan. Baina, azken finean, non gelditu da iragarritako komunikazioaren eta elkarlanaren iraultza hori eta hainbesteko oihartzuna. Proiektuaz baliatu diren erabiltzaileak, hasiera batean pozik azaldu dira proiektuarekin, orduan zein izan da porrotaren zergatia. Nire uste apalean, porrotaren zio bat izan da hasiera batetik ez dela guztiz irekia izan erabiltzaile guztientzat. Hasiera batean, erabiltzaile gutxi batzuei gonbidatu zitzaien erabiltzera, eta gonbidapenen bitartez, uhina hedatzen joan zen baina ez bizirauteko abiadura nahikoarekin. Azkenean, denborarekin, proiektua eta hasierako eztanda hori ahultzen eta ahazten joan dira erabiltzaileen artean. Izan ere, horrelako komunikazio baliabideek indarra oso lotuta dago erabiltzaile kopuruarekin eta norberaren ezagunak eta kontaktuak egotearekin.

Hona hemen proiektuaren helbidea oraindik probatu nahi izanez gero: https://wave.google.com eta hona hemen proiektua bizirauteko sortu den webgunea: http://www.savegooglewave.com/

Ordenagailuak eta tramankulu digitalak baliabide aproposak dira norberaren bizitza, lana, edo azken finean, egunerokotasuna antolatzeko. Agendak, egutegiak, kontaktuak, helbideak, telefonoak eta beste hainbat kontu ordenagailuetan edo sakelako telefonoetan gordetzen ditugu. Hauetaz gain, lan arloan edo arlo pertsonalean burua zereginez josita daukagu. Eta azkenean, beti ahazten da baten bat edo beranduegi gogoratzen da.

Hala, bada, zeregin zerrendak edo “Todolist” kudeatzeko aplikazio asko aurkitu ahal dira norberaren beharretara ondoen egoitzen dena aukeratzeko.

Ez ahaztu esnea!

Bai, honek Zibergela atalaren artikulu bat jarraitzen du izaten, baina izan ere, “Remember The Milk” izena du azalduko den lehen aplikazioak, ingelesez “Gogoratu esnea” esan nahi du. Aplikazio hau nahiko ezaguna da eta zeregin zerrendak oso era malgu batean kudeatzea ahalbidetzen du. Zerrenda ezberdinak sortu ahal dira eta zerrenda bakoitzean zeregin ezberdinak sortu ahal dira era arin batean. Zerrenda hauek ikusi eta kudeatu ahal dira webgunearen bitartez eta aplikazio ezberdinen bitartez, bai proiektuaren aplikazio ofizialak zein erabiltzaile edo garatzaile ezberdinek garatutakoak erabiliz. Eta bereziki hau da Remember The Milk aplikazioak daukan oso ezaugarri garrantzitsu bat, alegia, sistema eta aplikazio ezberdinen artean elkarreragingarritasuna. Sakelako telefono sistema garrantzitsuenetarako aplikazioak daude proiektuaren webgune ofizialean: Blackbery, iPhone, Android, Windows Mobile, esaterako. Bestetik, iGooglen, Google Calendar edo Gmail-en ere integratu daiteke, hala nola Twitterrekin edo Netvibesekin, esaterako. Gainera, formatu estandar ezberdinetan esportatu eta inportatu daitezke zeregin zerrendak, adibidez iCalendar, Atom edo RSSren bitartez. Eta garatzaileentzat API bat eskaintzen du Remember The Milk proiektuarekin komunikatzeko gai diren aplikazioak garatu ahal izateko. Hau da proiektuaren webgunea: http://www.rememberthemilk.com bertan izena eman eta erabiltzen has daiteke.

Google Task

Google Task, zeregin zerrendak kudeatzeko Googleren gehigarria da GMailen eta Google Calendarren integratzen da eta bietatik beraz zeregin zerrenda kudeatu ahal da eta zerrenda hau ezkutatu edo erakutsi edozein momentutan. GMailen, gainera, posta elektronikoak zeregin zerrendan ere gehitu ahal dira zeregin bezala. Beraz, oso gomendagarria da GMail erabiltzaileentzat, are gehiago GMail erabiltzeaz gain sakelako telefonoan Android sistema eragilea edukiz gero. Izan ere, telefono mugikorretarako sistema hauetan Gtasks aplikazioa aurki daiteke Android Market aplikazio biltegian, doakoa da eta Google Taskeko zeregin zerrendak sinkronizatu ahal dira eta sakelako telefonotik ere ikusi eta kudeatu.

Google Task-en ere erabiltzaile bakoitzak zeregin zerrenda ezberdinak sortu ahal ditu, horrela banatu ahal dira zerrenda ezberdinetan, adibidez: etxea, lana, pertsonala, eta abar. Honez gain, kronologikoki edo lehentasunaren arabera ordenatu ahal dira zereginak zerrenda bakoitzean eta koskak ezarri eta kendu ahal zaie menpekotasunak adierazteko edo zerrenda nolabait hierarkizatzeko. Era berean, posiblea da norberari zeregin zerrenda posta elektronikoz bidaltzea edo inprimatzea.

Honen inguruan gehiago irakasteko, hemen dago aplikazioaren laguntza helbidea: http://mail.google.com/mail/help/tasks/.

Aplikazio honen abantaila nagusia, azken finean, aurrekoa bezala, Interneten egonda edozein ordenagailutatik edo Internet duen sakelako telefonotik kontsulta daitekeela da, eta beraz, leku ezberdinetatik ikusi eta kudeatu ahal dira zereginak. Gainera, Interneten dagoenez, sistema eragile guztietan erabili ahal izango da, nabigatzailea eta Interneterako konexioa baino ez da behar.

Beste batzuk

Remember the Milk eta Google Task aipatu ditugu oso ezagunak direlako eta gure ustez, oso interesgarriak, baina beste asko ere badaude, adibide bezala eta probatzeko gogoa duenarentzat Toodledo http://www.toodledo.com/, Teuxdeux http://teuxdeux.com/ edo Task.fm http://task.fm/ ere oso aukera onak izan ahal dira.

Google Street View Google maps zerbitzu iraultzailearen funtzionalitate iraultzailea da zeren eta munduko hiri eta herri askotako kale eta errepideetatik ibilaldi birtualak egitea ahalbidetzen duen. Hau da, Google Mapsen bitartez mundu osoa satelite gisa ikus badaiteke, Street View aukeraren bitartez errepide zein herri eta hiri askotako kaleetan murgildu ahal da erabiltzailea eta mugitu bertan ibiliko balitz bezala. Hala, bada, hemendik aurrera erabiltzaileen argazkiak ere gainjarrita agertzen dira kalean ikusten diren eraikin ezberdinetan. Irudi txikiak agertzen dira eraikinetan eta saguarekin gainean kokatuta eraikinaren gainjarrita handitzen dira. Argazki hauek Googlerena ere den Panoramio on-line irudi zerbitzuan dauden irudiak dira.

http://maps.google.com/

Googleren atzealde zuria txepela iruditzen zaionak badauka aldatzeko aukera eta gustuko irudi bat jarri ahal izango du bilatzailearen atzealdean. Era honetan, ordenagailua erabat pertsonalizatzea gustuko dutenek jada ez dute faltan botako Google ere pertsonalizatzea. Oraingoz soilik AEBetako orrialdean agertzen da aukera, beraz, aukera hori ikusi ahal izateko, momentuz helbide honetara joan beharko da: http://www.google.com/ncr. Baina espero da pixkanaka-pixkanaka ezaugarria hedatzea bilatzailearen orrialde guztietara. Aukera ikusteko sagua mugitu beharko da orrialdearen barnean aukera guztiak agertzeko eta leihoaren beheko ezkerreko bazterrean ikusten da atzealdeko irudia aldatzeko esteka.

Bilaketa seguru honen abantaila da bilaketaren informazioa eta bilatzen dena zifratuta garraiatzen dela erabiltzailearen ordenagailutik Googleren zerbitzariraino. Horrenbestez bidean dauden bitartekariek ezin dute informazio hori ikusi edo gorde, Internet hornitzailea edo proxy-ren bat tartean baldin badago, esaterako.

Oraingoz, funtzionalitate hau beta bertsioan dago, alegia, ez da behin betiko bertsioa. Beste zerbitzu batzuetan ezin da honela bilatu, Google Maps eta Google Images zerbitzuetan bezala, adibidez.

OffiSync Microsoft Officerako gehigarri bat da, Microsoft Office eta Google Docs bateratzea ahalbidetzen duena. Alegia, Google Docs dokumentuak, zuzenean ireki daitezke MS Officetik deskargatu behar gabe. Era berean, dokumentuak aldatu eta gorde daitezke Google Docs-en zuzenean. Hau da, MS Officetik zuzenean lan egin daiteke Google Docs-en dauden dokumentuekin.

OffiSync gehigarria instalatutakoan, aukera berri bat agertuko da MS Word, MS Excel eta MS Powerpoint aplikazioetan. Aukera horretatik, Google kontuarekin izena eman ahal da eta hortik aurrera Google Docs-en dauden dokumentuak arakatu ahal izango dira. Bilatzaile bat ere eskaintzen da gehigarri honekin, dokumentuak erraz aurkitzeko. Gainera, Google Docs-eko dokumentuak elkarlanean eratzeko sistema ere erabil daiteke OffiSync-etik.

Plugin honek “.NET Framework 3.5″ behar du ondo ibil dadin.

http://offisync.com/

Android sakelako telefonoetarako sistema eragile bat da eta 2007ko azaroan aurkeztu zenetik, joan da hedatzen eta interesa pizten bai telefono mugikorren fabrikatzaileengan zein erabiltzaileengan. Android software librea da eta bere ardura Open Handset Alliance erakundeak du. Open Handset Alliance Googlek bultzatutako partzuergo bat da eta partzuergo honetan estandar irekiekin konprometituta dauden hainbat entitatek parte hartzen dute, hardware, software zein telekomunikazio arlokoak, batik bat.

Sistema eragilearen ezaugarri nagusiak

Sistema eragileak web nabigatzailea integratuta ekartzen du, WebKit kode irekiko motorrean oinarrituta.

Androidek multimedia formatu arruntak onartzen ditu, audio, bideo zein irudietarako.

Bestetik, sakelako telefonoaren menpe dauden beste hainbat ezaugarri ere eskaintzen ditu, GSM telefonia, Bluetooth, 3G, Wifi, argazki-kamera, GPS, iparrorratza, azelerometroa. Ezaugarri hauek ibili ahal izateko Androidekin, telefonoaren hardwareak ere eskaini behar ditu ezaugarri horiek bere osagai elektronikoen bitartez.

Ukimen-pantailarekin erabiltzeko prestatuta dago. Izan ere, horretarako hainbat baliabide ekartzen ditu, ukimen-teklatua bezala. Pantaila biratzen da telefonoa biratzen denean eta zoom ezberdinekin ikusi eta irakurri ahal dira informazio ezberdinak, mapak edo webguneak zein pdfak edo irudiak, esaterako.

Sistemarekin hainbat aplikazio etortzen dira lehenetsita instalatuta: nabigatzailea, posta elektronikoa irakurtzeko aplikazioa, SMSak irakurtzeko eta idazteko aplikazioa, egutegia, mapak, kontaktuak.

Gainera, badago beste ezaugarri bat oso interesgarri bihurtzen duena Android. Market izeneko aplikazio biltegia da, hain zuzen ere.

Market da aplikazio biltegi itzela. Aplikazio biltegi honetan, ordainpeko zein doako aplikazio pilo bat aurkitu ahal dira eta atal ezberdinetakoak: jokoak, erosketak, komunikazioak, komikiak, kirolak, baliabide orokorrak, multimedia aplikazioak, albisteak eta eguraldia, aisialdia, jakintza eta bilaketa, osasuna, gizartea, produktibitatea, bidaiak, telefonorako gai ezberdinak, gehigarriak. Android Marketek ahalbidetzen du garatzaileek Market-en aplikazioak sartzea, ordainpekoak edo doakoak eta edozein Android mugikorretatik egongo dira eskuragai. Honela, sakelako telefonoaren erabiltzaileak deskargatu eta instalatu ahal du nahi duenean. Gainera, gune ofizialetik deskargatzen ari den bermearekin.

Market erabiltzeko eta Androiden beste ezaugarri batzuk ere erabiltzeko, sistemaren eguneraketak, mapak, posta elektronikoa edo web nabigatzailea, esaterako, beharrezkoa da Internet konexio bat mugikorrean. Wifi izan daiteke, edo noizbehinkako konexioak. Baina ahal bada, hobe da etengabeko Internet konexioa. Jada irisgarriagoak dira sakelako telefonoetarako Internet tarifa lauen prezioak. Etxeko ADSL edo kablearenak baino askoz merkeagoak aurki daitezke.

Aplikazio interesgarri batzuk

Androiderako Market biltegian denetariko aplikazioak daude, batzuk Google zerbitzuekin integratuta, era honetan, mugikorrean zein ordenagailu ezberdinetan egon daitezke datu batzuk, kontaktuak edo agenda, esaterako.

Google Sky Map aplikazioaren bitartez, planetario bat eraman ahal da sakelan. Ordua eta posizionamendurako teknologiak erabiltzen ditu jakiteko zeruaren zein zatia ikusten ari den momentu horretan erabiltzailea, eta mugimendu sentsorearen bitartez ere asmatzen du norantz begiratzen ari den. Era horretan izarrak, konstelazioak edo planetak identifikatu eta izendatzeko gauza da aplikazio hau. Gainera, izenaren arabera bilatu ahal dira elementu ezberdinak eta aplikazioak esango du nora begiratu behar den aurkitzeko.

WeatherBug aplikazioak asmatzen du non dagoen erabiltzailea eta eguraldiaren inguruko informazioa eskaintzen dio. Eskuz ere aukeratu daitezke leku ezberdinak leku horietako eguraldiari buruzko informazioa jasotzeko.

Docs To Go aplikazioaren bitartez, bulegotika dokumentu ezberdinak ikusi ahal dira mugikorretik, hurrengo formatuak onartuta: doc, docx, xls, xlsx, ppt, pptx, pdf.

Gtasks aplikazioarekin atazak kudeatu ahal dira eta bateragarria da GMailen dauden atazekin. Google Talk aplikazioaren bitartez GTalk kontaktuekin hitz egin ahal izango da.

Andando edo Hi-Hiker Pro-ren bitartez gorde ahal dira ibilbideak, jakitea zenbat ibili den edo pasatu diren altuera ezberdinak, GPSa erabiltzen dute. And Explorer fitxategi arakatzaile ezaguna da. Barcode Scanner aplikazioaren bitartez barra-kodeak eta QR kodeak irakurri ahal dira argazki-kamera erabilita. ShopSavvy barra-kodeak irakurtzeaz gain saiatzen da produktu ezberdinak identifikatzen eta produktuen prezio ezberdinak lortzen, horretarako norberaren posizioa ere erabiltzen du. Scan2PDF mobile, argazki-kameraren bitartez pasatu ahal da argazki edo dokumentu bat PDFra. BeamReader erabil daiteke PDFak irakurtzeko. Bubble-ren bitartez nibela instalatuko da telefono mugikorrean eskulanetan laguntzen duena zerbait zuzen dagoen jakiteko edo daukan angelua jakiteko. Dog Whistler aplikazioak txakurrentzako txilibitua eskaintzen du frekuentzia ezberdinekin. Draw-ren bitartez hatzarekin marraztu ahal da telefonoaren pantailan eta Solo Lite-ren bitartez gitarra bat egongo da eskuragarri mugikorrean. Voice Recorder aplikazioarekin, mugikorra ahots-grabagailu bihurtzen da. Goggles aplikazioaren bitartez argazki-kamerarekin ateratako irudiak bilatu ahal dira interneten eta Layar edo Wikitudek, argazki kamera, posizionamendua eta mugimendua erabilita gertu dauden elementuen inguruko informazioa ematen dute, dendak, jatetxeak edo mendiak, esaterako.

Microblogging eta Sare sozialetarako aplikazioak ere badaude, Twitroid Twitter zerbitzurako edo Facebook, esaterako.

Zibergela ataleko aurreko artikulu batean, http://zibergela.bitarlan.net/2009/12/17/gmail-posta-kudeaketa-aplikazio-bezala/, GMailen kanpoko posta kontuak irakurtzeko aukera aipatu zen. Ba, kontu hauen arazoetariko bat da Gmailek automatikoki begiratzen duela posta berririk dagoen, baina 30 minuturo. Beraz, premiazko mezuak berandu samar jasotzen dira. Eguneratu nahi izanez gero lehenago, “Ezarpenak” atalean “Kontuak eta Inportazioa” azpiatalera joan behar da eta hor “Begiratu posta elektronikoa” aukerari sakatu. Bistan denez, nahiko motela da prozesua.

Google honetaz jabetu da eta Lab aukeren artean, Freskatu POP kontuak izeneko funtzionalitate berri bat gaitu du. Honen bitartez, “Freskatu” esteka bat gehitzen da goiko aldean eta lotura horretan klik egiten denean, POP kanpoko kontuak eguneratzen dira eta mezu berririk dagoen begiratzen du GMailek.

Lab aukeretara joateko “Ezarpenak” aukeraren ezkerrean saio-hodia itxura duen ikonotxo bat dago eta hor klikatuta lab aukera guztiak ikusi ahal dira.

Picnik, http://www.picnik.com/,  irudiak editatzeko online aplikazio bat da. Doakoa da eta oso erraza erabiltzeko. Izan ere, izena ematea ere ez da derrigorrezkoa zerbitzua erabiltzeko. Ordainpeko bertsioaren bitartez, aukera gehigarriak eskaintzen badira ere.

Picknik 2005ean eratu zen eta egun, 20 langile ditu eta milioika bisitari igarotzen dira zerbitzuaren webgunetik hilero.

Hala, bada, Googlek online zerbitzu hau erosi du. Baliteke, honen bitartez, Googleren Picasa zerbitzua berpiztu nahi izatea. Picniken partetik ere oso onuragarria ikusten da operazioa, zeren eta Googleren azpiegitura eta baliabide teknikoak erabilita, beren zerbitzua hobetzea espero duten.

Albistea Picnik blogean:
http://blog.picnik.com/2010/03/google-acquires-picnik/

Buzz-en bitartez, Google beste saiakera bat egiten ari da Internet sozialaren trena hartzeko. Googleren dema, micorblogging omen da kasu honetan, zeren eta zerbitzu honen bitartez, egoerak eta iruzkiank jarraitzaileekin partekatu daitezkeelako. Loturak eta argazkiak ere txertatu daitezke iruzkinetan, eta era berean erabiltzaileen bidalketetan iruzkinak ere egin daitezke.

Buzz GMailetik irakur daiteke, hara heltzen dira jarraitutako erabiltzaileen bidalketak eta bakoitzaren bidalketeen gainean egindako iruzkinak. Beste zerbitzuekin ere integratuta dago, Google Readerrekin, esaterako, horrela erraza da partekatzea Google Readerren irakurritako artikulu bat.

Androind eta iPhone sakelako telefonoetarako ere eskuragarri dago: http://buzz.google.com helbidean.

http://www.google.com/buzz

Egun, pixkanaka-pixkanaka, ordenagailu batekin lan egiteko joera, lokaletik, hodeira bilakatzen doa. Alegia, gero eta gehiago erabiltzen diren aplikazioak, edukiak edo dokumentuak, Interneten daude, PC batean egon beharrean. Honek, mugikortasuna eta  berehalako erabilgarritasuna ematen du. Alde batetik, etxeko ordenagailutik, bulegoko ordenagailutik, ordenagailu eramangarritik, netbooketik, edo sakelako telefonoak bezalako gailuetatik, dokumentu, informazio edo askotan aplikazio bat eskuragarri eduki ahal du erabiltzaileak. Horretarako, Internet konexio bat baino ez da beharrezkoa. Dokumentu edo fitxategi ezberdinak, leku ezberdinetatik eta momentu ezberdinetan eskuragarri eduki eta landu ahal izatea ekartzen du honek. Eta batzuetan, beste erabiltzaile batzuekin partekatzea ere posiblea da, soilik irakurtzeko edo, idazteko baimenarekin, pertsona ezberdinen artean osatzeko.

Hala, bada, Google docs, oso baliabide jatorra da horretarako. Erabili ahal izateko, Google erabiltzaile eta pasahitza edukitzea eta http://docs.google.com helbidea Internet nabigatzailean idaztea besterik ez da behar. Google docs oraindik ez dago euskaratuta.

Dokumentuak edo idazkiak lantzea

Informazio mota ezberdinak kudeatzea ahalbidetzen du Google docs baliabideak. Dokumetuak edo idazkiak da haietariko bat. Dokumentu bat sortzeko, “Sortu berria” eta agertzen den menuan “Dokumentua” aukerari sakatu behar zaio. Hori eginda, on-line testu prozesagailua zabalduko da, MS Word edo Open Office Writer baino xumeagoa, baina, nahiko osatua, testu formateatuak sortzeko.

Behin dokumentua sortuta hainbat aukera eskaintzen ditu Google docs-ek: aldaketa historikoa ikustea; izena aldatzea; kopia bat sortzea; HTML, Open Office, PDF, RTF, MS Word edo testu bezala deskargatzea; inprimatzea. Hauek guztiak “Fitxategia” aukeretatik egin ahal dira.

Testua HTML eta CSS bezala ere editatu daiteke eta dokumentu orrialde edo web orrialde bezala ikus daiteke idazkia. Bestetik, marrazteko baliabide bat ere badu eta marrazkiak txerta daitezke honen bitartez. Halaber, loturak, irudiak, karaktere bereziak, taulak, iradokizunak, oharrak edo orrialde jauziak txertatu daitezke. Era berean, goiburukoa eta orri-oina ere jarri eta editatu ahal da.

Beste hizkuntza batzuetara ere itzul daiteke dokumentua eta ortografia zuzentzailea du, idazten den bitartean ortografia egiaztatzen joaten da. Aukera hauetan, hala ere, euskara ez dago eskuragarri. Hitzak, karaktereak eta esaldiak ere zenbatzen ditu eta beste datu estatistikoak ere ematen ditu, esaldiko batez besteko hitz kopurua, esaterako.

Aurkezpenak

Aurkezpenak ere sortu ahal dira Google Docs-en bitartez, horretarako “Sortu berria” botoiari sakatu eta irekitzen den menuan “Aurkezpena” aukeratu egin behar da. MS Power Point edo Open Office Impress aplikazioetan bezalako editore bat agertuko da orduan, aurkezpenak sortzeko diapositibaz diapositiba.

Behin sortuta, gainera, deskarga daiteke PDF, Power Point edo Testu formatuetan. Aurkezpenak on-line erakustea baimentzen du eta hizlariaren oharrak ere ikusgai jar daitezke.

Aurkezpenak egiteko gai ezberdinak konfiguratu daitezke, aurkezpenari itxura emateko eta edozein gai aukeratuta ere, atzeko irudia edo kolorea aldatu daiteke edozein momentutan.

Testuak, irudiak, bideoak, marrazkiak edo taulak txertatu daitezke. Era berean, posiblea da beste diapositiba batzuk inportatzea sortutako beste aurkezpen batzuetatik.

Kalkulu orriak

Kalkulu orriak egitea ere ahalbidetzen du Google Docs-ek, Excel, Open Office Calc eta CSV formatuetatik inportatu ahal dira datuak eta era berean, PDF, HTML eta lehen aipatutako formatuak bezala deskargatu ahal dira Google docs-en sortutako kalkulu orriak. Beste fitxategi motetan bezala, aldaketa historikoa ere ikus daiteke, eta hortik, kalkulu orrian aldaketa unean zegoen bezala erakusten da eta, era berean, zein momentutan aldatu den azaltzen da.

Kalkulu orriak sortzeko, “Sortu berriari” sakatu eta “kalkulu orriak” aukeratu. Hori eginda, MS Excel edo Open Office Calc bezalako aplikazioetan agertzen den kalkulu orria agertuko da. Hemendik, orri ezberdinak, kudeatu ahal dira, formulak, irudiak, marrazkiak, gadgetak eta grafikoak txerta daitezke. Formularioak ere sortu ahal dira eta taulak ordenatu nahi diren irizpideen arabera.

Formularioak

Formularioak galdeketekin ere sor daitezke eta posta elektronikoz bidali ahal dira edo webgune batean txertatzeko aukera ere eskaintzen du. Gero, ikus daitezke erantzunak era ezberdinetan

Beste aukera batzuk

Google docs-ek ahalbidetzen du on-line sortzen diren fitxategi ezberdinak karpetaka antolatzea eta hainbat fitxategi batera deskargatzea zip formatu konprimituan. Era berean, karpetak koloreztatu daitezke hobeto bereizteko. Eta orain dela gutxi, edozein fitxategi mota igotzeko aukera ere gaitu dute, beraz, fitxategi biltegia ere izan daiteke, irudiak edo pdfak gordetzeko, esaterako, beste dokumentu motekin batera.

Zehazten ditu gainera ordutegiak, helbideak, eta baimentzen du leku bakoitzean erabiltzailea egongo den lekua zehatzago izan dadin Googlek proposatutako ordutegia, gainera.  Egun ezberdinetan banatzen du ibilbidea eta lekuak ezabatu edo bilatzaile baten bitartez gehitu daitezke eta ibilbidea zein ordutegia berkalkulatzen du. Proiektua oraindik garapenean dago eta Google Labs proiektuen artean dago, baina oso ideia ona izan daiteke.

http://citytours.googlelabs.com/

Mac Os X eta GNU/Linux sistema eragileekin webgunea ikusten bada ere, oraingoz ez dago eskuragarri gehigarriak instalatzeko aukera. Beraz Google Chrome nabigatzailea MS Windows sistemetan erabiltzen duten lagunen eskura dago soilik.

https://chrome.google.com/extensions

Arlo honen garapenaren ideia egiteko, GMail nahiko adibide ona da. Egia esanda, nahiko arina da interfazea, posta kontu bat baino gehiago konfiguratu daiteke eta oso funtzionalitate gehigarriak ditu. Gainera, Gmail kontuak edo GMailetik irakurtzen diren kanpoko kontuak jaso ahal dira mahaigaineko aplikazio batetik eta mezuak online jarraituko dira. Horrenbestez, oso aukera ona izan daiteke norberaren posta elektroniko guztia kudatzeko, zeren eta, honetaz gain,  7 GB eskaintzen dituen eta nahiko SPAM detektatzaile ona daukan. Gainera, euskaraz dago. Egutegia ere behar izanez gero, Google Calendarrekin batera erabili ahal da.

Bilatzailea

Nola ez, Googlerena izanda, nahiko bilatzaile arina du. Bilatzailea arina dago eskuragai une oro eta hau nahikoa ez bada, bilatzaile aurreratuaz balia daiteke erabiltzailea. Bilatzaile aurreratu honek ahalbidetzen du bilatzea igorlearen edota hartzailearen arabera, mezuak dituen edo ez dituen hitzen arabera, data tarte batean eta eranskinak dituen ala ez.  Gainera, mugatu daiteke bilaketa, etiketa zehatz bat edo mota zehatz bateko mezuetara.

Etiketak

Mezuak sailkatzeko etiketak eskaintzen ditu GMailek, mezu elektroniko bakoitza etiketa batekin baino gehiagorekin lotu ahal da eta ezkerreko menuan, etiketarik erabilienak edo guk aukeratutakoak agertzen dira era azkar batean hautatutako etiketaren bidez sailkatuta dauden mezuak soilik ikusi ahal izateko. Honez gain, mezuak irakurrita edo irakurri gabe bezala sailkatu ahal dira edo izar bat jarri ahal zaie nolabait bereizteko. Izardun mezuak ikusteko atala ikusi ezean, “Ezarpenak” estekari sakatu beharko saio eta hor “Etiketak” atala aukeratu eta bertan “Izardunak” aukeran “erakutsi” estekan klik egin behar da. Honela, beti egongo dira klik baten bitartez eskuragai izarraren bitartez berezitako mezuak.

Txata: GTalk

Txata atalean, GMailek erakusten ditu konektatuta dauden kontaktuak eta konektatuta dagoenarekin berehalako mezularitzaren bitartez hitz egin daiteke bere izenaren gainean klikatuta, honez gain, elkarrizketa horretara gehitu ahal dira kontaktu gehiago, taldeka hitz egiteko. Txataren leihoak gainera, GMail leihoan bertan utz daitezke edo aparteko leiho batean zabaldu. Bideoaren bidezko elkarrizketa ere ahalbidetzen du sistema eta hardwarea bateragarria izanez gero. Aukera hauek guztiak txat leihoa zabaltzen denean kontaktu batean klikatuta, “Aukerak” atalean aurki daitezke. Gainera elkarrizketak gordetzen dira eta kontsultatu daitezke “Txatak” atalean, erakusteko gaituta egonez gero, izardun mezuen kasuan bezala.

Zereginak

Zereginak kudeatzeko aukera ere eskaintzen du GMailek, horren bitartez era arin batean kudeatu ahal dira zereginak eta horretarako aukera asko eskaintzen ditu, eginda edo egiteke bezala markatzeko, koska jartzeko, zerrenda inprimatzeko edo postaz bidaltzeko esaterako. Gainera, nire iritziz oso erabilgarria dena, aukeratzen diren mezu elektronikoak zeregin zerrendara gehitzea ahalbidetzen du Ekintzak menuaren bitartez eta beraz, zereginak mezuekin lotzea dago.

Kanpoko posta elektronikoak irakurri

GMailek beste kontu batzuk ere konfiguratzea baimentzen du eta guztiak leku beretik irakurri ahal dira, beraz, kontu hauetatik mezuak idaztea ere posiblea da. Horretarako, “Ezarpenak” aukeraren barruan, “Kontuak eta inportazioa” aukeratu behar da. Eta hor, “Bidali mezuak beste helbide batetik” eta “Gehitu posta elektronikoko POP3 kontuak”  aukera daude, hor nahi den kontuaren zehaztapenak konfiguratu besterik ez dago eta erabilgarri dago une horretatik.

http://www.gmail.com